ஜும்ஆ பயான் 23/02/2022

மதுவின் விபரீதங்கள். 

يٰۤاَيُّهَا الَّذِيْنَ اٰمَنُوْۤا اِنَّمَا الْخَمْرُ وَالْمَيْسِرُ وَالْاَنْصَابُ وَالْاَزْلَامُ رِجْسٌ مِّنْ عَمَلِ الشَّيْطٰنِ فَاجْتَنِبُوْهُ لَعَلَّكُمْ تُفْلِحُوْنَ‏

ஈமான் கொண்டோரே! மதுபானமும், சூதாட்டமும், கற்சிலைகளை வழிபடுதலும், அம்புகள் எறிந்து குறி கேட்பதும், ஷைத்தானின் அருவருக்கத்தக்க செயல்களிலுள்ளவையாகும்; ஆகவே நீங்கள் இவற்றைத் தவிர்த்துக் கொள்ளுங்கள் - அதனால் நீங்கள் வெற்றியடைவீர்கள்.(அல்குர்ஆன் : 5:90)

இஸ்லாம் ஹலால்-ஹராமின் வித்தியாசங்களையும்,ஆகுமான-ஆகுமல்லாத வழிகளின் எல்கைகளையும்,பயன்தருபவை-தீங்குவிளைவிப்பவை இவற்றின் வித்தியாசங்களையும் தெளிவுப்படுத்தி,மனிதன் தூயவாழ்வை மேற்கொள்ளவும்,சீர்திருத்த வாழ்வியல் முறையை அமைத்துக்கொள்ளவும் அழகிய வழிக்காட்டுதல்களை வழங்கியுள்ளது.

மனிதன் உட்கொள்ளும் உணவுகள்,உபயோகிக்கும் பொருள்கள் இவற்றில் நலவானவை-தீயவை,தூய்மையானவை-அசுத்தமானவை  முதலியவற்றை தெளிவுப்படுத்தப்பட்டுள்ளது.

மனிதனின் அகம்-புறம் இரண்டின் ஆரோக்கியத்திற்கு ஊருவிளைவிக்கும் பாவங்கள்,தனி மனித பாதிப்பை கடந்து சமூகதீமையாக மாறி அழிவை  உண்டாக்கும் தீமைகளை விளக்கப்பட்டுள்ளது.மனிதன் உட்கொள்ளும் சில உணவு,பானங்கள் உடலை கடந்து ஆன்மாவை பாதித்து.இம்மை,மறுமை இரு வாழ்வை நாசமாக்கிவிடும் என எச்சரிக்கப்பட்டுள்ளது.

இஸ்லாம் மனிதனின் மார்க்க,உலக வாழ்விற்கு மிகச் சிறந்த வழிமுறைகளை வகுத்தளித்துள்ளது.இஸ்லாம் வகுத்தளித்துள்ள வழியில் மனித குலம் வாழ்வை அமைத்துக்கொள்ளுமேயானால் இம்மை,மறுமை இரு வாழ்வில் ஈடேற்றம் பெறலாம்.

இஸ்லாத்தில் மது உள்ளிட்ட அனைத்து போதைபொருட்களும் கடுமையாக எச்சரிக்கப்பட்டடுள்ள ஹராம்களாகும். மதுவும்,போதையும் மனிதனை வாழ்வையும் நாசமாக்கி அழித்துவிடும்.

இஸ்லாமிய மார்க்கம் அழகிய வாழ்வில் முறையை அறிமுகப்படுத்தி,அனீதம்,அவமரியாதை,கோபம்,விரோதம்,கொலை,கொள்ளை,திருட்டு,ஆபாசம்,அசிங்கம்,விபச்சாரம் போன்ற சமூக சீர்கேடுகளை தடுக்க, முக்கியமாக மது,போதையை ஒழிக்கின்றது.

மேற்கூறிய அனைத்து சீர்க்கேடுகளுக்கும் வேர்,அடிப்படை  மது,போதை  தான் காரணம் என்றால் மிகையாகாது.

மது போதையும், அறியாமைக்காலமும்

இஸ்லாம் வருவதற்கு முன் உலகில் எங்கெல்லாம் குற்றங்களும்,பாவங்களும் மிகைத்து காணப்பட்டதோ அங்கெல்லாம் மக்கள் மது போதைக்கு அடிமையாகவும்,மதுவில் மூழ்குபவாராகவும் இருந்திருப்பார்கள்.

இஸ்லாம் வந்ததற்கு பின்பு மது போதைகளின் விளைவுகளை கூறி அதனை  தடை செய்த போது தான். மனித இனம் மதுவும்,போதையும் அழிவைத் தரும் பாவச்செயல் என்பதை உணரத்தொடங்கியது.

மௌலானா அபுல் ஹஸன் நத்வி (ரஹ்)அவர்கள் எழுதுகிறார்கள்:அறியாமைக்கால மக்கள்,அவர்களின் குணநலன்களை கவனித்து பார்க்கும் போது கிட்டத்தட்ட அவர்கள் மனநோயாளியாக இருந்தார்கள்.இதற்கு காரணம் அவர்களிடம் மது பழக்கம் தாரளமாக புழக்கத்தில் இருந்ததும்.மது அருந்துவதை பெருமையாக கருதியதுமே ஆகும்.

அறியாமைக்கால அரபு கவிதை, இலக்கியங்களில் "மதுவை சிலாகித்தும்,மது எவ்வளவு இருப்பு வைத்திருப்பாரோ அதனை வைத்து ஒருவனின் அந்தஸ்த்தை  நிர்ணையிப்பவர்களாக இருந்தார்கள்."என்று உள்ளது.

ஒரு குடும்பமோ,கோத்திரமோ அவர்களின் மதிப்பு, அவர்கள் எத்தனை பேரல்கள்(பானைகள்)மது வைத்திருக்கிறார்கள் என்பதை கவனித்து நிர்ணையிக்கப்படும்.

۔( انسانی دنیا پر مسلمانوں  کے عروج وزوال کا اثر:59)

இஸ்லாம் உலகில்  தோன்றியபோது சமூக சீர்கேடுகளை கடுமையாக எதிர்த்தது.மது போதையால் ஏற்படும் விளைவுகளையும்,சமூக பாதிப்புகளையும் மக்களுக்கு எடுத்துரைத்து "மது""போதை "அசுத்தமானது எனக்கூறி மதுவை ஹராமாக்கும் இறை கட்டளை இறங்கியது. 

இஸ்லாமிய வருகைக்குப் பின்பு மதுவில் மூழ்கிக் கொண்டிருந்த அரபியர்கள்,அதனை ஹராமாக்கி இறை கட்டளை வந்த போது தங்களின் கரங்களால் மது பானைகளை உடைத்தார்கள்.அன்று மதினா வீதியெங்கும் மது ஆறு ஓடியது என வரலாற்று ஆய்வாளர்கள் எழுதுகிறார்கள்.

மௌலானா முஃப்தி முஹம்மது ஷஃபீ ஸாஹிப் எழுதுகிறார்கள்;

நபி ﷺஅவர்கள் அனுப்பிய அறிவிப்பாளர் மதினா வீதிகளில்

"இன்றோடு மது ஹராமாக்கப்பட்டது"என அறிவிப்பு செய்த போது,தங்களின் கரங்களில் மதுவை வைத்திருந்தவகள் அப்படியே கீழே போட்டு உடைத்தார்கள்.வீடுகளில் சேகரித்து வைக்கப்பட்டிருந்த மதுக்களை வீதியில் கொட்டினார்கள்.அன்று மதினாவில் பெருமழைப் பெய்ததைப் போல வீதிகளில் மது ஆறாக ஓடியதுمعارف القرآن ):1/525)

மார்க்கம் தந்த மது விலக்கு.

ஆரம்பத்தில் மக்களிடையே இஸ்லாம் தெளிவு படுத்தப்பட்ட பின்னரும் இந்த போதையளிக்கும் மது எதற்கு என்ற ரீதியில் நபியவர்களிடத்தில் மதுவைப் பற்றி பேசினார்கள். ஆனாலும் இறைவனோ நபியவர்களோ உடனடியாக மது தடுக்கப்பட்டு விட்டது அது உங்களுக்கு ஆகுமானதல்ல என்று உத்தரவு விதிக்கவில்லை. அவர்கள் விரும்பி அருந்திக்கொண்டிருந்த மதுவை உடனடியாக நிறுத்துவது இறைவனின் நாட்டமாக இருக்கவில்லை.  

= இறைவன் நபி(ஸல்) அவர்களுக்கு முதல் கட்டமாக திருக்குர்ஆனின் பின்வரும் வசனத்தை இறக்கினான்....

يَسْأَلُونَكَ عَنِ الْخَمْرِ وَالْمَيْسِرِ ۖ قُلْ فِيهِمَا إِثْمٌ كَبِيرٌ وَمَنَافِعُ لِلنَّاس وَإِثْمُهُمَا أَكْبَرُ مِنْ نَفْعِهِمَا ۗ  ۗ

“(நபியே!) மதுபானத்தையும், சூதாட்டத்தையும் பற்றி அவர்கள் உம்மிடம் கேட்கின்றனர்; நீர் கூறும்: “அவ்விரண்டிலும் பெரும் பாவம் இருக்கிறது; மனிதர்களுக்கு (அவற்றில் சில) பலன்களுமுண்டு; ஆனால் அவ்விரண்டிலும் உள்ள பாவம் அவ்விரண்டிலும் உள்ள பலனைவிடப் பெரிது” (திருக்குர்ஆன் 2:219)

மதுவில் நன்மையை விட தீமை அதிகமுள்ளது தவிர்ந்திருத்தல் நல்லது என்ற இந்த அறிவுரை வந்தபோது சிலர் தவிர்ந்திருநதனர. ,சிலர் மது அருந்தினார்கள்.

= சிறிது காலம் சென்றது மக்கள் மது குடித்தவாறே தொழுகையில்

ஈடுபட்டார்கள். தொழுகையின்போது குர்ஆனின் வசனங்களை ஓத வேண்டும். தொழுகையில் போதை காரணமாகச் சிலர் தவறாக ஓதினார்கள். இப்போது இறைவன் சற்று கட்டுபடுத்தும் விதமாக

يَا أَيُّهَا الَّذِينَ آمَنُوا لَا تَقْرَبُوا الصَّلَاةَ وَأَنْتُمْ سُكَارَىٰ 

 “நீங்கள் மது அருந்திய நிலையில் இருக்கும்போது தொழுகைக்கு நெருங்காதீர்கள்;”  (திருக்குர்ஆன் 4:43) என்ற வசனத்தை இறக்கினான்.

= இவ்வாறு சிறிது காலம் சென்றது. இப்போது மக்கள் தொழுகையின் போது மட்டும் மது அருந்தாமல் இருந்தனர். இருந்தாலும் நேர்வழி பெற்ற நபித் தோழர்கள் மதுவைத் தடை செய்வது பற்றித் தெளிவான வசனம் இறைவனிடமிருந்து வர வேண்டும் எனப் பிரார்த்தித்தார்கள். சிறிது காலத்திற்குப் பின்னர் மதுவிலக்கு குறித்து முழுமையான வசனம் இறக்கியது.

يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ

.”நம்பிக்கை கொண்டோரே! மதுபானமும், சூதாட்டமும், கற்சிலைகளை வழிபடுதலும், அம்புகள் எறிந்து குறி கேட்பதும், ஷைத்தானின்அருவருக்கத்தக்கச் செயல்களிலுள்ளவையாகும்: ஆகவே இவற்றை நீங்கள் தவிர்த்துக் கொள்ளுங்கள். அதனால் நீங்கள் வெற்றியடைவீர்கள்.”  (திருக்குர்ஆன் 5:90)

இவ்வசனம் இறக்கப்பட்டதும் நபித்தோழர்கள் மகிழ்ந்தார்கள். எங்கள் விஷயத்தில் எங்கள் இறைவன் தெளிவான தீர்ப்பளித்து விட்டான் என இறைவனைப் புகழ்ந்தார்கள். இந்த வசனம் இறங்கியதுபோது வினாடிகூட தாமதிக்கவில்லை. அருந்திக் கொண்டிருந்தவர்கள் மதுவைத் துப்பினார்கள். குடித்தவர்கள் வாந்தி எடுத்தார்கள். மதீனா வீதிகளிலே அவர்கள் வீடுகளில் வைத்திருந்த மது பீப்பாய்களைக் கொட்டினார்கள்.

கவனம் தேவை.

வீட்டுச் சூழலிலிருந்து பல பிள்ளைகள் போதை பாவனைக்கு ஆளாகுகின்றார்கள். தந்தை சிகரட் புகைப்பவராக இருந்தால், அந்த சிகரட்டை வாங்குவதற்கு பிள்ளையிடம் பணம் கொடுத்து வாங்கிக் கொள்கிறார். அந்தப் பிள்ளை தந்தையுடைய புகைத்தல் “ஸ்டைலை” பார்த்து நாளடைவில் அதனை திருட்டுத் தனமாக புகைக்க ஆரம்பிக்கின்றது.

வீட்டில் வைபவங்களின் போது பியர் மற்றும் மது பாவிக்கப்படும்போது பிள்ளைகள் அவற்றின் ஆபத்துக்களை பொருட்படுத்தாமல் பயன்படுத்த ஆரம்பிக்கின்றனர்.

வீட்டுச் சூழலில் பயன்படுத்திய போதைபொருட்களை பிள்ளைகள் நாளடைவில் சமூக சூழலில் சக தோழர்களுடன் தொடர்ந்தும் பழகிக் கொள்ள முனைகின்றனர். சிலவேளை வீட்டுச் சூழலில் சிகரட் புகைத்தல், மது அருந்துதல் போன்றவை இல்லாவிட்டாலும் சமூக சூழலில் அவை பயன்பாட்டில் இருக்குமாயின் அவர்கள் இலகுவில் போதைக்கு ஆளாகிவிடுவார்கள்.

மதுவின் விபரீதங்கள்.

1. இந்தியாவில் மிகஅதிகமாக மது அருந்துபவர்கள் உள்ள மாநிலம் தமிழகம். இங்கு 13 வயது சிறுவர்கள் கூட குடிகாரர்களாக இருக்கின்றார்கள்.

 2.  தமிழகத்தில்குடிகாரர்களின் எண்ணிக்கை ஒரு கோடி.அவர்களில் 20 சதவீதம் பேர் குடியைவிட்டு மீளமுடியாத அளவுக்கு போதைக்கு அடிமையானவர்கள்.

 3. தமிழகத்தில்அன்றாடம் மதுஅருந்துபவர்களில் 49 இலட்சம் பேர்  13  முதல்  28  வயதைசேர்ந்தவர்கள். 

4. அதிகமான சாலை விபத்துக்களை கொண்ட மாநிலம் என்ற பெருமை தமிழகத்தையே சேரும் ஒராண்டில் நடக்கும் 60,000 சாலைவிபத்துகளுக்கு பலகாரணம்  இருந்தாலும்  60  சதவீத விபத்துகள் குடித்து விட்டு வாகனம் ஓட்டுவதால்தான்.

5. மதுபான விற்பனையால்,ஆண்டு தோறும் தமிழக அரசுக்கு 12 ஆயிரத்து 500 கோடி ரூபாய் வருவாய் கிடைக்கிறது. தமிழக அரசின் மொத்த வருவாயில்  கிட்டதட்ட  30 சதவீத அளவுக்கு சாராய விற்பனையில் இருந்து கிடைக்கும் நிலை.

6. கிராமப்புறங்களில் உள்ளவர்கள் தங்கள் வருமானத்தில்  24 சதவீதத்தையும்,  நகர்ப்புறங்களில் உள்ளவர்கள் 32சதவீதத்தையும் மதுபானத்துக்காகசெலவிடுகிறார்கள்.

7. இந்தியாவிலேயே அதிகமானோர் தற்கொலை செய்து கொண்ட மாநிலம் தமிழ்நாடுதான். கடந்த ஆண்டு மட்டும் 16561 நபர்கள். அதாவது ஒவ்வொருமணி நேரத்திற்கும் 15 பேர்கள் இந்த தற்கொலை சாவுகளில் 50% பின்னணியில் இருப்பது மதுப்பழக்கமே.

நபிகளார் காலத்து மதுவகைகள்.

(என் தந்தை) உமர் (ரலி) அவர்கள் சொற்பொழிவு மேடையின் மீது நின்று (இறைவனைப் போற்றிப் புகழ்ந்த பின்) ஐந்து வகைப் பொருட்களினால் மது தயாரிக்கப்பட்டு வந்த நிலையில் மதுவிலக்கு வந்தது. அவையாவன: திராட்சை, பேரீச்சம் பழம், தேன், கோதுமை, வாற்கோதுமை. ஆக, அறிவுக்குத் திரையிடுவதெல்லாம் மதுவேயாகும் என்று சொன்னார்கள்.

அறிவிப்பவர்: இப்னு உமர் (ரலி)    நூல்கள்: புகாரி (5581

போதையில் நபியை திட்டியவர்.

 அலீ(ரலி) அறிவித்தார்:பத்ருப் போரின்போது போரில் கிடைத்த செல்வத்திலிருந்து என்னுடைய பங்காக வயதான ஒட்டகம் ஒன்று எனக்குக் கிடைத்திருந்தது. நபி(ஸல்) அவர்களும் (தமக்குக் கிடைத்த ஐந்தில் ஒரு பாகமான) குமுஸில் இருந்து எனக்கு மற்றொரு கிழட்டு ஒட்டகத்தைத் தந்திருந்தார்கள். நான் அல்லஹ்வின் தூதர்(ஸல்) அவர்களின் மகள் ஃபாத்திமாவுடன் (முதன் முதலாக) வீடு கூட விரும்பியபோது பனூ கைனுகா குலத்தைச் சேர்ந்த பொற்கொல்லர் ஒருவரை, என்னுடன் வந்து 'இத்கிர்' புல்லைக் கொண்டு வர ஏற்பாடு செய்திருந்தேன். அந்தப் புல்லைப் பொற்கொல்லர்களுக்கு விற்று அந்தப் பணத்தை என் மணவிருந்துக்குப் பயன்படுத்திக் கொள்ள விரும்பினேன். நான் என் ஒட்டகங்களுக்கான சேண இருக்கைகளையும் தீனிப் பைகள், மற்றும் கயிறுகளையும் சேகரிக்கலானேன். அப்போது என் இரண்டு ஒட்டகங்களும் அன்சாரி ஒருவரின் அறையின் அருகே மண்டியிட்டு அமரச் செய்யப்பட்டிருந்தன. நான் சேரிக்க விரும்பியவற்றைச் சேகரித்துவிட்டபோது திரும்பி வந்தேன். அப்போது என் இரண்டு ஒட்டகங்களின் திமில்களும் துண்டிக்கப்பட்டிருந்தன. அவற்றின் இந்த (அவலக்) காட்சியைக் கண்டபோது என்னால் என் கண்களைக் (கண்ணீர் சிந்த விடாமல்) கட்டுப்படுத்த முடியவில்லை. நான், 'இதையெல்லாம் செய்தவர் யார்?' என்று கேட்டேன். மக்கள், 'ஹம்ஸா இப்னு அப்தில் முத்தலிப் தான் இப்படிச் செய்துவிட்டார். அவர் இந்த வீட்டில் அன்சாரிகளின் மது அருந்தும் குழு ஒன்றில் தான் இருக்கிறார்' என்று பதிலளித்தார்கள். நான் நபி(ஸல்) அவர்களிடம் சென்றேன். அப்போது அவர்களிடம் ஸைத் இப்னு ஹாரிஸா(ரலி) இருந்தார்கள். நபி(ஸல்) அவர்கள், ஹம்ஸா(ரலி) அவர்களின் செயலால் நான் அடைந்த வேதனை என் முகத்தில் தென்பட, அதைப் புரிந்து கொண்டார்கள். எனவே, நபி(ஸல்) அவர்கள், 'உங்களுக்கு என்ன நேர்ந்தது?' என்று கேட்டார்கள். நான், 'இறைத்தூதர் அவர்களே! இன்றைய நாளைப் போன்ற (பயங்கரமான) ஒரு நாளை ஒருபோதும் நான் பார்த்ததில்லை. ஹம்ஸா என் இரண்டு ஒட்டகங்களையும் தாக்கி அவற்றின் திமில்களை அறுத்துவிட்டார். அவற்றின் (அடிவயிற்று) இடுப்புப் பகுதிகளை (வாளால்) கிழித்துவிட்டார். அவர் இப்போது ஒரு வீட்டில் மது அருந்தும் நண்பர்கள் குழுவுடன் இருக்கிறார்' என்று சொன்னேன். உடனே, நபி(ஸல்) அவர்கள் தங்களின் அங்கி ஒன்றைக் கொண்டு வரச் சொல்லி அதையணிந்து நடந்து செல்ல, அவர்களை நானும் ஸைத் இப்னு ஹாரிஸாவும் பின்தொடர்ந்து சென்றோம். ஹம்ஜா இருந்த வீட்டிற்கு வந்தவுடன் நபி(ஸல்) அவர்கள் உள்ளே செல்ல அனுமதி கேட்டார்கள். அவர்களும் நபிக்கு அனுமதி கொடுத்தார்கள். அங்கே அவர்கள் (அனைவரும்) மது அருந்திக் கொண்டிருந்தார்கள். இறைத்தூதர்(ஸல்) அவர்கள் ஹம்ஸாவை அவர் செய்த காரியத்திற்காகக் கண்டிக்கத் தொடங்கினார்கள். ஹம்ஸாவின் இரண்டு கண்களும் சிவந்திருக்க, அவர் போதையுற்று விட்டிருந்தார். ஹம்ஸா, அல்லாஹ்வின் தூதரைப் பார்த்துப் பார்வையை உயர்த்தி அவர்களின் இரண்டு முழங்கால்களையும் பார்த்தார்; பிறகு பார்வையை உயர்த்தி, அவர்களின் வயிற்றுப் பகுதியைப் பார்த்தார். பிறகு, 'நீங்கள் என் தந்தையின் அடிமைகள் தாமே?' என்று கேட்டார். இறைத்தூதர்(ஸல்) அவர்கள், அவர் போதையில் இருக்கிறார் என்பதைப் புரிந்து கொண்டு, தாம் வந்த வழியே (திரும்பாமல்) அப்படியே பின் வாங்கிச் சென்றார்கள். நாங்களும் அவர்களுடன் வெளியேறினோம். (ஸஹீஹ் புகாரி (3091)

மது ஷைத்தானின் செயல்.

திருமறையில் மது போதையை ஷைத்தானின் செயல் என்றும்,ஷைத்தான் மதுவின் மூலமாக உங்ளிடம் விரோதத்தையும்,பகைமையையும் வளர்க்கிறான் என்றும்.மது இறைசிந்தனையை போக்கிவிடும் என்றும் எச்சரிக்கின்றது. 

اِنَّمَا يُرِيْدُ الشَّيْطٰنُ اَنْ يُّوْقِعَ بَيْنَكُمُ الْعَدَاوَةَ وَالْبَغْضَآءَ فِى الْخَمْرِ وَالْمَيْسِرِ وَيَصُدَّكُمْ عَنْ ذِكْرِ اللّٰهِ وَعَنِ الصَّلٰوةِ‌  فَهَلْ اَنْـتُمْ مُّنْتَهُوْنَ‏

நிச்சயமாக ஷைத்தான் விரும்புவதெல்லாம், மதுபானத்தைக் கொண்டும், சூதாட்டத்தைக் கொண்டும் உங்களிடையே பகைமையையும், வெறுப்பையும் உண்டு பண்ணி அல்லாஹ்வின் நினைவிலிருந்தும், தொழுகையிலிருந்தும் உங்களைத் தடுத்து விடத்தான்; எனவே, அவற்றை விட்டும் நீங்கள் விலகிக் கொள்ள மாட்டீர்களா?(அல்குர்ஆன் : 5:91)

இதுவே மதுவை ஹராமாக்கிய ஆயத்து ஆகும்.இதில் மதுவின் விளைவுகளை தெளிவாக விளக்கப்பட்டுள்ளது. 

(روح المعانی:7/17بیروت)

போதை உண்டாக்குபவை அனைத்துமே ஹராம்.

 போதை தரக்கூடியவைகளில் முதல் தரத்தில் மது இருக்கிறது.இதனாலேயே அல்லாஹ்  தனது மறையில் மதுவின் விளைகளை பல இடங்களில் கூறி தடைசெய்துள்ளான்.

நாயகம்ﷺஅவர்களும் பல ஹதீஸ்களில் மதுவை தடைசெய்துள்ளார்கள்.

حرم اللہ الخمر، وکل مسکر حرام۔( نسائی:5633)

அல்லாஹ் மதுவை ஹராம் ஆக்கியுள்ளான்.போதைதரும் ஒவ்வொருன்றுமே ஹராமாகும் என நபிﷺஅவர்கள் கூறியுள்ளார்கள்.

பிரிதோர் ஹதீஸில்... 

کل شراب اسکر، فھوحرام۔(بخاری:۲۳۷)

நபிﷺஅவர்கள் சொன்னார்கள்;போதை தரக்கூடிய பானங்கள் அனைத்துமே ஹராம் ஆகும்.

மற்றுமொரு ஹதீஸில்...

کل مسکر خمر، وکل خمر حرام۔( مسند احمد:4506)

போதை தரக்கூடிய அனைத்தும் மதுவாகும்.மதுவகைகள் அனைத்தும் ஹராம் ஆகும்.

مااسکر کثیرہ فقلیلہ حرام۔( ترمذی:1784)

போதை தரக்கூடியவைகளில் அதிகமும் ஹராம்,குறைவும் ஹராம்.இதுப் போன்ற பல ஹதீஸ்களில் மது போதை அதிகமாகவோ,கொஞ்சமாகவோ எவ்வகையில் ஆகுமாகாது,ஹராம் என்பதனை தெளிவாகக் கூறியுள்ளார்கள்.

மது போதையால் மார்க்கத்தில் உண்டாகும் பாதிப்புகள்.

மது அனைத்து பாவங்களின் ஆணிவேர் என ஹதீஸில் வந்துள்ளது.

لاتشرب الخمر، فانھا مفتاح کل شر۔( ابن ماجہ:337)

மது அருந்தாதீர்,அது தீமைகள் அனைத்ததின் திறவுகோலாகும்.

மற்றொர் ஹதீஸ் மதுவை ’’ام الفواحش‘‘தீமைகளின் தாய் என்கிறது.

:الخمر ام الفواحش اکبر الکبائرمن شربھا وقع علی امہ وعمتہ وخالتہ۔( دارقطنی:4052)

மது தீமைகளின் தாய்.

لاتشربن الخمر،  فانہ راس کل فاحشۃ۔( مسند احمد:21503)

மது அருந்தாதீர்.அது மானக்கேடான செயல்கள் அனைத்தின் தலையாகும்.

மதுவினால் மனிதன் இழக்கும் வாய்ப்புகளும், இழப்புகளும்.

من شرب الخمرثم لم یتب منھا،  حرمھا فی الاخرۃ۔( بخاری:5172)

மது அருந்துபவன்,அதிலிருந்து மீண்டு தவ்பா செய்யவில்லையெனில்.

நாளை மறுமையில் அதனை இழப்பான்.

مدمن الخمر کعابد وثن۔( ابن ماجہ:3374)

மது பழக்கத்தில் மூழ்கிகிடப்பவன்,சிலைவணங்குபவனை போன்றவன்.

لایدخل الجنۃ مدمن الخمر۔( ابن ماجہ:3375)

மது பழக்கத்தில் மூழ்கிகிடப்பவன் சுவனம் செல்லமாட்டான்.

:الخمر ام الخبائث ومن شربھا لم یقبل اللہ منہ صلاۃ اربعین یومافان مات وھی فی بطنہ مات جاھلیۃ۔( دارقطنی:4050)

மது தீமைகளின் தாய்.மது அருந்துபவனின் நாற்பது நாட்கள் தொழுகையை அல்லாஹ் ஏற்கமாட்டான்.ஒருவனின் வயிற்றில் மது இருக்க அவன் மரணத்தை தழுவினால்,அறியாமைக்காலத்தில் மரணித்தவனை போன்றவனாவான்.

மது போதையால் உலகவாழ்வில் உண்டாகும் பாதிப்புகள்.

மது பழக்கம் மனிதனை அடிமையாக்கி அவனின் புத்தியை மழுங்கடிக்க செய்துவிடுகின்றது.நல்லது,கெட்டதை பகுத்தறியும் திறனை இழக்கிறான்.

அவனின் உணர்வுகள் அவனின் கட்டுப்பாட்டில் இருக்காது.நாவையும் அடக்க முடியாது.அவனின் சிந்தனை கெட்டுப்போய் விடுகிறது.சிந்தனையும்,செயலும் கெடுவதால் சமூகத்தில் கண்ணியத்தை இழக்கிறான்.

மது அருந்துபவன் நல்ல தந்தையாகவோ, நல்ல கணவனாகவோ,நல்ல மகனாகவோ, நல்ல சகோதரனாகவோ, நல்ல நண்பனாகவோ,ஏன் சமூகத்தில் நல்ல மனிதனாகக் கூட ஆக முடியாது.தன்னை படைத்த இறைவனுக்கு நல் அடியானாகவும் ஆக முடியாது.

ا:لا تشربوا مایسفہ احلامکم،  ومایذھب اموالکم۔(مصنف ابن ابی شیبہ :23288)

உங்களின் சிந்தனையை மழுங்கடிக்கச்செய்யும்,உங்களின் செல்வங்களை அழிக்கும் மதுவை அருந்தாதீர்கள்.

மது குடிப்பதால் ஏற்படும் தீமைகள்.

மது நேரடியாக இரத்தத்தில் கலந்து விடுவதால் மது குடித்தவுடன், சிறிது நேரத்திற்கு உற்சாம் பிறக்கிறது. மகிழ்ச்சியளிக்கிறது. ஆனால் நாளடைவில் எல்லா நோய்களையும் கொடுத்து சிறிது சிறிதாக நம்மை அழிக்கிறது. மது உடல் நலத்தைக் கெடுப்பதோடு சமுதாயச் சீர்கேடுகளையும் ஏற்படுத்துகிறது. சந்தோசத்திற்காக குடிக்க ஆரம்பித்தவர்கள் பிறகு மதுவிற்கு அடிமையாகி விடுவதோடு குடும்பத்தையும் துயரத்தில் ஆழ்த்தி விடுகின்றார்கள்.

#1. மது குடிப்பதால் உடல் சோர்வடைகிறது.

அதிகம் மது அருந்தியவர்கள் ஒரு நிதானமான தூக்கத்தையோ அல்லது ஓய்வையோ பெற முடியாது. கை மற்றும் கால்கள் நடுக்கத்தையும் உணர்கின்றனர். இதனால் அன்றாட வாழ்க்கை நடவடிக்கைகளை செய்து முடிப்பதில் கூட சிரமத்தை சந்திக்கின்றனர்.

#2. குடும்ப அமைதி கெடுதல்.

குடும்பத் தலைவன் மது அருந்தினால், குழந்தைகளுக்கு தகப்பனின் அன்பு, வழிகாட்டுதல் கிடைக்கப் பெறாது. சிறுவயதிலேயே தந்தையை இழக்க வேண்டியும் ஏற்படலாம்.மேலும் குழந்தைகள் கூட வழி தவறி நடப்பதற்கும் காரணமாகிவிடும். தினந்தோறும் சண்டைகள் இடம்பெறும். இச்சச்சரவுகளே வீட்டின் அமைதியைக் குலைத்துவிடுகின்றது.

#3. இதயம் சம்பந்தப்பட்ட நோய்கள் ஏற்படும்.

இரத்த அழுத்த நோய் மற்றும் மார்பு வலி போன்ற நோய்கள் உண்டாவதற்கு மதுவே காரணம் ஆகின்றது.

#4. கல்லீரல் பாதிப்படைகிறது.

மது குடிப்பதினால் கல்லீரல் பாதிக்கப்பட்டு கல்லீரல் இறுக்க நோய் (Cirrhosis) ஏற்படுகிறது. பின்னர் கல்லீரல் புற்று நோய் ஏற்படுவதற்கும் காரணமாகிறது.

#5. நோய் எதிர்ப்பு சக்தி குறைவடையும்.

மது அருந்துபவர்களுக்கு உடலில் நோய் எதிர்ப்பு தன்மை குறைவதால் தொற்று நோய்கள் வந்தால் எளிதில் தீராது. உடலில் ஊட்டச்சத்து குறைவு ஏற்படும். மது குடிப்பவர்களுக்கு சளி, இருமல் போன்ற நோய்கள் எளிதில் தொற்றிக் கொள்ளும் வாய்ப்புக்கள் அதிகமாகவே உள்ளது.

#6. மூளை பாதிப்படைகின்றது.

மது குடிப்பதால் மூளையை பாதிக்கும் நோய்கள் ஏற்பட வழி வகுக்கின்றது. தொடர்ந்து அதிகமாக குடிப்பதால் மூளையின் செயல்பாடு குழம்பிப்போகிறது. நினைவாற்றலையும் வெகுவாகப் பாதிப்படையச் செய்கின்றன.

#7. பொருளாதாரப் பாதிப்பை ஏற்படுத்துகின்றது.

ஒருவருடைய குடிப்பழக்கம் அவனது குடும்பப் பொருளாதாரத்தை பாதிக்கின்றது. ஆடம்பரச்செலவாக மதுவிற்காக சம்பாதித்த பணமெல்லாம் வீணாக்குகின்றனர். இது தனிநபரின் பொருளாதாரத்தைப் பாதித்து பின் நாட்டுப் பொருளாதாரத்தின் முதுகெலும்பையே முறிக்கிறது.

#8. ஒழுக்கம் நெறிமுறை தவறி நடக்கச்செய்கிறது.

இன்று நாட்டில் நடைபெறும் அதிக குற்றங்கள் மதுவின் துணையோடு நடப்பவை தான். பெண்களுக்கு எதிரான வன்முறைகள், கொலை, கொள்ளை, களவு போன்ற ஒழுக்க நெறி தவறிய செயற்பாடுகளுக்கும் மதுவே காரணமாகின்றது.

#9. சமூகத்தில் அந்தஸ்து குறைகின்றது.

குடிப்பழக்கத்தினால் ஒழுக்கக்கேடும், அந்த ஒழுக்கக்கேட்டால் சமுதாய நன்மதிப்பும் இழக்கப்படுகின்றது.

#10. மரணம் ஏற்படும்.

மது குடிப்பதனால் இறப்பவர்களின் எண்ணிக்கை அதிகமாக உள்ளது. பல ஆண்டுகளாகத் தொடர்ந்து அதிகளவில் மது அருந்துபவர்களுக்கு உடல்நிலை பிரச்சினை ஏற்பட்டு திடீர் மரணம் நிகழ்கின்றது.

By - தினத்தந்தி

மதுவினால் தள்ளாடும் தமிழகம்.

கோடியில் புரளும் செல்வந்தனையும், அடுத்த வேளை உணவுக்கே வழியில்லாமல் தெருக்கோடியில் தவிக்கும் பரம ஏழையையும் ஆட்டி படைத்து கொண்டிருக்கிறது மதுபானம்.

இது ஒருபுறம் இருக்க, தமிழகத்தின் தலைவிதியையே மதுபானம் மாற்றி கொண்டிருக்கிறது என்றால் அது மிகையாகாது. இன்றைய இளைய தலைமுறையினரின் வாழ்க்கையை கேள்விக்குறியாக்கி விட்டது. சந்தோஷத்தை கொண்டாடும் உற்சாக பானமாகவும், துக்கத்தை மறக்க செய்யும் மாமருந்தாகவும் மதுபானத்தை கருதும் அவலநிலையில் இளைஞர்கள் உள்ளனர்.

பணம் செய்யாததை மதுபானம் செய்து கொண்டிருக்கிறது என்பதே உண்மை. உதாரணமாக ரூ.500 கொடுத்து செய்யக்கூடிய வேலையை, ஒரு குவாட்டர் பாட்டில் வாங்கி கொடுத்தால் செய்து முடிக்கும் மனநிலை குடிமகன்களுக்கு வந்துவிட்டது. மது பிரியர்கள் என்பதை காட்டிலும், மது அடிமைகளாக பலர் உள்ளனர்.

ஒரு நாள் கூட தங்களால் மதுபானம் குடிக்காமல் இருக்க முடியாது என்ற நிலைக்கு இளைஞர்கள் பலர் தள்ளப்பட்டுள்ளனர். ‘எப்போது மதுபானம் கிடைக்கும்? என்று மதுக்கடை வாசலில் காத்திருந்து வாங்கி செல்வோர் இருக்கின்றனர். இவர்கள் ‘டாஸ்மாக் ஓப்பனர்’ என்று அழைக்கப்படுகின்றனர்.

மது அடிமை பட்டியலில் இடம் பிடிப்போரின் எண்ணிக்கை ஆண்டுதோறும் அதிகரித்து கொண்டே இருக்கிறது. இதில் என்ன கொடுமை என்றால், ஆணுக்கு நிகராக சில பெண்களும் மதுபோதையில் மிதக்கின்றனர். குறிப்பாக தமிழகத்தில் 70 சதவீதம் பேர் மதுபானம் குடிக்கின்றனர். இதேநிலை நீடித்தால் மது குடிக்காதவர்களை விரல் விட்டு எண்ணும் நிலை வந்து விடும். முன்பெல்லாம் பெண்ணுக்கு வரன் பார்க்கும்போது, மாப்பிள்ளை குடிக்கக்கூடாது என்று பெற்றோர் நினைத்தனர். ஆனால் தற்போது அந்த நிலை மாறிவிட்டது. குடிக்காத மாப்பிள்ளை கிடைப்பது அரிதாகி விட்டது. இதனால் விசேஷம் மற்றும் திருவிழா காலத்தில் மட்டும் மதுபானம் குடிப்பவர் என்று தெரிந்தும் கூட பெண்ணை மணம் முடித்து வைக்கின்றனர். மதுபானம் தன்னை அழிப்பது மட்டுமின்றி, தன்னை சார்ந்தவர்களையும் நடை பிணமாக்கி விடுகிறது. ஒருவர் மதுவுக்கு அடிமையாகி விட்டால், ஒட்டுமொத்த குடும்பமே நடுவீதிக்கு வந்து விடுகிறது. அவமானத்தால் கூனி குறுகி போய் விடுகின்றனர். தினமும் மரண வேதனையை அனுபவிக்கின்றனர்.

மதுப்பழக்கத்தினால் கணவனை இழந்து விதவைகளாகவும், தந்தையை இழந்து அனாதைகளான குழந்தைகளும் பலர் உள்ளனர். உடலையும், உள்ளத்தையும் பாதிக்கக்கூடியது மதுபானம். உடலில் நச்சுப்பொருட்களை வெளியேற்றும் கல்லீரலை மதுபானம் செயலிழக்க செய்து விடுகிறது. நரம்பு மண்டலம், சிறுமூளையின் செயல்பாட்டை முடக்கி விடுகிறது.

உடல், உள்ளம், குடும்பம், சமுதாயத்துக்கு கேடு விளைவிக்கும் மதுபானத்தை விட்டு மீள முடியாமல் பலர் தவித்து கொண்டிருக்கின்றனர். மது பிரியர்களை கூட மாற்றி விடலாம். ஆனால் மது அடிமைகளை கரை சேர்ப்பது அவ்வளவு எளிதான காரியம் இல்லை. திருந்தாத குடிமகன்களால் ஒவ்வொரு நாளும் அவர்களது குடும்பத்தினர் திண்டாடி கொண்டிருக்கின்றனர்.

சமீபத்தில் கொண்டாடிய போகி, பொங்கல், காணும் பொங்கல் ஆகிய 3 நாட்களில் மட்டும் தமிழகத்தில் உள்ள 5,140 டாஸ்மாக் கடைகளில் மதுபான விற்பனை ரூ.500 கோடியை தாண்டியது. கடந்த ஆண்டை காட்டிலும் 10 சதவீதம் உயர்ந்துள்ளது. இது வருமானமா? அவமானமா? என்று தெரியவில்லை. சாதனையா? வேதனையா? என்று திக்கு தெரியாமல் தமிழகம் திணறி கொண்டிருக்கிறது.

இதேநிலை நீடித்தால் மதுவோடு மல்லுக்கட்டும் நிலைக்கு இளைஞர்கள் தள்ளப்படுவார்கள். மதுபானம் குடிக்காத இளைஞர்களை பார்ப்பது அரிதாகி விடும். சமுதாயத்தின் அனைத்து தீமைகளுக்கும் வேரான மதுபானத்தை, அறுத்து எறிய வேண்டியது அவசியமாகி விட்டது. இது, ஒரே நாளில் சாத்தியமில்லை. ஆனால் கொஞ்சம், கொஞ்சமாக மதுபிரியர்களை மீட்டெடுத்து மறுவாழ்வு அளிக்க முடியும்.

முதலில், ஒரு தாலுகாவுக்கு 3 அல்லது 4 கடைகள் என நிர்ணயம் செய்து, அதனை மூட வேண்டும். இதேபோல் தமிழகத்தில் உள்ள மதுபான கடைகளின் எண்ணிக்கையை படிப்படியாக குறைக்க வேண்டும். அப்போது தான் ஆரோக்கியமான, நோய் நொடியில்லாத, குற்றமற்ற ஒரு இளைஞர் சமுதாயத்தை உருவாக்க முடியும். மது இல்லாத தமிழகம் மலர்ந்தால், அதன் மணம் உலகம் முழுவதும் பரவும். தமிழக இளைஞர்களின் எதிர்காலம் வளமானதாக மாறும். இதற்கு காலம் தான் பதில் சொல்ல வேண்டும்.

#நன்றி தினத்தந்தி

மருந்தல்ல நோயே!

சிலர் மருத்துக்காக மதுவைப் பயன்படுத்தினர். நபிகளார் எந்த வகைக்கும் இந்த மதுவைப் பயன்படுத்தக்கூடாது என்று கட்டளையிட்டார்கள்.

நபி (ஸல்) அவர்களிடம் தாரிக் பின் சுவைத் அல்ஜுஅஃபீ (ரலி) அவர்கள் மது (தயாரிப்பதைப்) பற்றிக் கேட்டார்கள். அப்போது நபி (ஸல்) அவர்கள் அ(வ்வாறு மது தயாரிப்ப)தைத் தடை செய்தார்கள்; அல்லது அதை வெறுத்தார்கள். அப்போது தாரிக் (ரலி) அவர்கள், “மருந்துக்காகவே அதைத் தயாரிக்கிறேன்’’ என்று கூறினார்கள். நபி (ஸல்) அவர்கள், “அது மருந்தல்ல; நோய்’’ என்றார்கள்.  (அறிவிப்பவர்: வாயில் பின் ஹுஜ்ர் (ரலி)   நூல்: முஸ்லிம் (4015)

தண்டனைகள்.

ஒரு மனிதர் யமன் நாட்டிலுள்ள ‘ஜைஷான்’ எனுமிடத்திலிருந்து வந்து, தம் நாட்டினர் சோளத்திலிருந்து தயாரித்துப் பருகிவருகின்ற ஒரு வகை பானம் குறித்து நபி (ஸல்) அவர்களிடம் கேட்டார். அதற்கு நபி (ஸல்) அவர்கள், “அது போதையளிக்கக்கூடியதா?’’ என்று கேட்டார்கள். அவர் “ஆம்’’ என்று பதிலளித்தார்.

நபி (ஸல்) அவர்கள், “போதையளிக்கக்கூடிய ஒவ்வொன்றும் தடை செய்யப்பட்டதாகும். (இவ்வுலகில்) போதைப் பொருட்களை உட்கொள்பவருக்கு (மறுமையில்) ‘தீனத்துல் கபாலை’ நிச்சயமாக நான் புகட்டுவேன் என அல்லாஹ் உறுதிமொழி எடுத்துள்ளான்’’ என்று கூறினார்கள். மக்கள் “அல்லாஹ்வின் தூதரே! ‘தீனத்துல் கபால்’ என்பது என்ன?’’ என்று கேட்டார்கள். அதற்கு நபி (ஸல்) அவர்கள், “நரகவாசிகளின் வியர்வை அல்லது நரகவாசிகளின் சீழ்’’ என்று விடையளித்தார்கள்.                அறிவிப்பவர்: ஜாபிர் (ரலி)                      நூல்: முஸ்லிம் (4075)

மது இல்லாத உலகை, போதையற்ற சமுதாயத்தை உருவாக்கிட திருக்குர்ஆனும் அதற்குச் செயல்வடிவம் கொடுத்த நபியவர்களின் வாழ்க்கை வழிகாட்டுதலும் தான் தீர்வாக அமையும் என்பதில் எந்தச் சந்தேகமும் இல்லை.

மனிதனின் இம்மை,மறுமை வாழ்வை நாசமாக்கும் மது,போதையை விட்டும் அல்லாஹ் நம் சமுதாயத்தை காப்பானாக!ஆமீன்...

வெளியீடு: செங்கல்பட்டு & காஞ்சிபுரம் மாவட்ட ஜமாஅத்துல் உலமா சபை.