ஜும்ஆ பயான் 10/02/2023

பேரிழப்புகள் தரும் படிப்பினைகள்(சிர்யா,துருக்கி பூகம்பம்-2023)

முன்னுரை :

கடந்த திங்கள் கிழமை அதிகாலை 3:30 மணியளவில் துருக்கியில் நிலநடுக்கம் ஏற்பட்டது. அதன் ரிக்டர் அளவு 7.8 என்ற அளவில் பதிவாகியிருந்தது. அதைத் தொடர்ந்து, நூற்றுக்கணக்கான அடுக்குமாடிக் கட்டடங்கள் இடிந்துவிழுந்தன. ஆனாலும், அதே நாளில் தொடர்ந்து மூன்று முறை துருக்கி, சிரியா உள்ளிட்ட பகுதியில் நிலநடுக்கம் ஏற்பட்டது. இதன் தாக்கத்தை அண்டை நாடுகள் வரை உணரமுடிந்தது. இந்த நிலநடுக்கத்தில் 8000-க்கும் மேற்பட்டவர்கள் இறந்திருப்பதாகவும், இன்னும் மீட்புப்பணி நிறைவடையவில்லை என்பதால் பலி எண்ணிக்கை இன்னும் அதிகரிக்கலாம் எனவும் கூறப்படுகிறது.

நிலநடுக்கம் காரணமாக மொத்தமாக துருக்கி நாடே 10 மீட்டர் நகர்ந்து உள்ளதாக ஆராய்ச்சியாளர் ஒருவர் தெரிவித்து உள்ளார்.

துருக்கி நிலநடுக்கம் இந்த வருடத்தில் நடைபெற்ற மிகப்பெரிய பேரழிவாக பார்க்கப்படுகிறது. கடந்த 50 வருடங்களில் துருக்கி சந்தித்த மிக மோசமான நிலநடுக்கமாக பேரழிவாக பார்க்கப்படுகிறது. அதோடு ஒரு முறை பிளேட் நகர்ந்தால் அதற்கு மேலே இருக்கும் பிளேட்களும் நகரும் சூழ்நிலை ஏற்படும். இது கிட்டத்தட்ட சங்கிலி விளைவு போல சில நொடிகள் ஏற்படும். இதன்பின் இந்த நிலநடுக்கம் முடிந்தும் சிறிய அளவிலான நகர்வுகள் இருக்கும். இதை ஆப்டர் எபக்ட் என்றும் கூறுவார்கள்.துருக்கி நிலநடுக்கத்தில் இப்படித்தான் ஏற்பட்டு இருக்கிறது. 

இஸ்லாமிய கிலாபத்தின் அடையாளமாய் இருந்த துருக்கி.

உஸ்மான் என்பவரின் தலைமையில் பைசாந்தியரை வீழ்த்தி 13ம் நூற்றாண்டின் ஆரம்பப் பகுதியில் துருக்கியை மையமாக வைத்து தொடங்கிய உஸ்மானியர்களின் ஆட்சி 1924 வரை தொடர்ந்திருந்தது. இக்காலப் பகுதியில் 38 உஸ்மானிய சுல்தான்கள் ஆட்சியாளர்களாக விளங்கியுள்ளனர். இவர்களில் மிகவும் முக்கியமான ஆட்சியாளர்தான் கி.பி. 1451 இல் அரியாசனமேறிய இரண்டாம் முஹம்மத். இவர்தான் கி.பி. 1453 இல் (ஹிஜ்ரி 857) உரோமர்களுடன் போரிட்டு கொன்ஸ்தாந்து நோபிளை வெற்றி கொண்டார்.

இதனால்தான் இவர் வரலாற்றில் “பாதிஹ் முஹம்மத்” என அழைக்கப்படுகின்றார். நபி (ஸல்) அவர்களிடம் சில தோழர்கள் இஸ்லாமிய கொன்ஸ்தாந்து நோபிளையா அல்லது ரோமையா முதலில் வெற்றி கொள்ளும் என வினவிய போது, நபி (ஸல்) அவர்கள் கொன்ஸ்தாந்து நோபிளே முதலில் வெற்றி கொள்ளப்படும் என சுபசோபனம் சொன்னார்கள். எனவே, நபி (ஸல்) அவர்களின் முன்னறிவிப்பின் படி கிடைத்த இம்மகத்தான வெற்றியை இஸ்லாமிய நாடுகள் அனைத்தும் வெகுவிமர்சையாகக் கொண்டாடின.

பின்னர் இந்நகரையே சுல்தான் முஹம்மத் தலை நகராக்கி இஸ்தான்புல் (இஸ்லாமிய நகரம்) என பெயரை மாற்றி அமைத்தார். இவ்வெற்றிக்குப் பின் இஸ்லாம் எட்டுத்திக்குகளுக்கும் மிக வேகமாகப் பரவியது. உஸ்மானியர்கள் துருக்கியைத் தளமாகக் கொண்டே ஆட்சியை விஸ்தரித்தனர். இதன் விளைவாக, உஸ்மானிய சுல்தான் முதலாம் ஸலீம் கி.பி. 1517 இல் மம்லூக்கியரை வெற்றிகொண்டு எகிப்து, சிரியா என்பவற்றைக் கைப்பற்றி துருக்கியப் பேரரசுடன் இணைத்துக்கொண்டார். கி.பி. 16ம் நூற்றாண்டளவில் உஸ்மானிய ஆட்சியானது வட ஆபிரிக்கா வரை வியாபித்திருந்தது. மேலும் அரபுத்தீபகற்பத்தின் ஹிஜாஸ¤ம், யமனும் உஸ்மானியர் வசமானதோடு, குறிப்பாக போல்கன் பிரதேசங்கள் இவர்களது ஆதிக்கத்துக்கு உட்பட்டன.

உண்மையிலேயே உலக வரலாற்றில் மிகப்பெரிய நிலப்பரப்பை ஏக காலத்தில் ஆட்சி செய்த பெருமை துருக்கிய உஸ்மானியர்களையே சாரும். துருக்கிய சுல்தான் அன்று பேரரசின் சக்கரவர்த்தியாக மாத்திரமன்றி முஸ்லிம் உலகின் ஆன்மீகத் தலைவராகவும் விளங்கினார். உஸ்மானிய கலீபாக்களில் சுல்தான் சுலைமானின் ஆட்சிக்காலம் உஸ்மானிய கிலாபத்தின் பொற்காலம் என வர்ணிக்கப்படுகின்றது. ஏனெனில் இவர் உஸ்மானியர்களின் கீழிருந்த பல நாட்டவர்கள், இனத்தவர்கள் அனைவருக்கும் ஏற்புடைய ஒரு சட்ட யாப்பை வகுத்தார். உஸ்மானிய கிலாபத்தின் மற்றுமொரு சிறந்த ஆட்சியாளரான சுல்தான் 2ம் அப்துல் ஹமீத் (கி.பி. 1876 - கி.பி. 1909) கிலாபத்தை வீழ்த்துவதற்கு சந்தர்ப்பம் பார்த்துக் கொண்டிருந்த கிறிஸ்த்தவ, யூத சதிகளை முளையிலேயே கிள்ளி எறிந்தார். இவரது இத்தகைய செயலானது இஸ்லாத்தின் எதிரிகளை இன்றும் கோப மேற்றியது. எவ்வாறாயினும் கிலாபத்தை ஒழித்துக்கட்ட வேண்டும் என்ற தூண்டுதலை வழங்கியது.

இதன் பின்னணியில் கலீபாவை சிறைப்பிடித்த யூத சக்திகள் அவரை கொலையும் செய்தனர். இவ்வாறு இஸ்லாமிய கிலாபத் வீழ்ச்சியை நோக்கி சென்று கொண்டிருந்த சமயம்தான் 1923 இல் இரண்டாம் அப்துல் மஜீத் ஆட்சிப்பொறுப்பை ஏற்றார். இச்சமயத்தில் துருக்கியில் ஜனநாயகக் கோஷம் மேலோங்கிக் காணப்பட்டதால் தேசிய மகா சபையானது கலீபாவை 10 நாட்களுக்குள் நாட்டை விட்டு வெளியேற வேண்டும் எனக் கட்டளையிட்டு 1923 துருக்கியை குடியரசாக அறிவித்தது. அதன் முதலாவது ஜனாதிபதியாக அதே வருடம் புதிதாக தோற்றுவிக்கப்பட்ட மக்கள் ஜனநாயக சோஷலிசக் கட்சியின் தலைவர் முஸ்தபா கமாலை நியமித்தது. நபி (ஸல்) அவர்கள் மரணித்து அவர்களது தோழர்களால் நிறுவப்பட்டு, இறுதியாக துருக்கியர்களால் சுமக்கப்பட்ட இந்த இஸ்லாமிய கிலாபத்தை தங்களது கைகளாலேயே அழித்துக் கொண்டார்கள் என்பது மிகவும் கவலைக்குரிய விஷயமாகும்.

இயற்கை பேரழிவு...

உலக வரலாறென்பது இயற்கை சீற்றங்கள்,போர்கள் மற்றும் பேரழிவுகளால்  நிரம்பியுள்ளது,சில இயற்கை சீற்றங்கள்  மற்றும் பேரழிவுகள் மனித மக்கள்தொகையில் பெரும் பகுதியை கண் இமைக்கும் நேரத்தில் அழித்துவிட்டிருக்கின்றன.

மக்களின் வாழ்க்கையில் நிலநடுக்கங்களின் விளைவுகள் மிகவும் ஆபத்தானவை, நீங்கா துன்பங்களை தரவல்லவை. 

மற்ற பேரழிவுகளுடன் ஒப்பிடும்போது பூகம்பங்களினால் ஏற்படும் விளைவுகள்,போர்கள் மற்றும் தொற்றுநோய்களை விட கொடியவை, 

மனோதத்துவ நிபுணர்களின் கூற்று; பூகம்பம் போன்ற இயற்கை பேரிடர்களிலிருந்து மீண்டு உயிர் பிழைத்தவன்,மனதளவில் பயம்,துக்கத்தால் பாதிக்கப்பட்டு, வாழ்நாள் முழுவதும் நிம்மதியான தூக்கம் இன்றி தவிக்கிறான்.

உலகப் புகழ் பெற்ற  கலைக்களஞ்சியமான விக்கிபீடியாவின் கூற்றுப்படி:இதுவரை உலகில் ஏற்பட்ட பூகம்பங்களால் தோராயமாக மில்லியன் மக்கள் கொல்லப்பட்டதாக மதிப்பிடப்பட்டுள்ளது.பொருளாதார இழப்புகள் ஏராளம்.கணக்கிற்கு அப்பாற்பட்டது.

உண்மையில்,  இந்த பூகம்பங்கள், அல்லாஹ்வின் அத்தாட்சி ஆகும்.கியாம நாளில் அடையாளங்களில்  உள்ளவை ஆகும்.

பூகம்பம் குறித்து இஸ்லாம்.

குர்ஆன்,ஹதீஸ்,வரலாறுகள் மற்றும் தம்மை சுற்றி நடைபெறும் நிகழ்வுகளை படிப்பினையாக கொண்டு, முஸ்லிம்கள் தங்களின்  வாழ்க்கையை சீராக அமைத்துக் கொள்ள வேண்டும்.எந்த இலட்சியமும் இல்லாமல் வாழ்வது முஸ்லிமுக்கு அழகல்ல.அது ஈமானில் உள்ள குறைபாட்டின் அடையாளமாகும்.

குறிப்பாக பேரழிவுகளின் போது, ​​​​முஸ்லிம்களாகிய நமக்கு இரண்டு பொறுப்புகள் உள்ளன, ஒன்று நாம் நமது  ஈமானையும்,நமது இஸ்லாமிய சகோதரர்களின் ஈமானில் ஏற்படும் தடுமாற்றங்களை விட்டும் பாதுகாப்பது.

இரண்டாவது இது போன்ற இக்கட்டான சந்தர்ப்பங்களில் இஸ்லாம் வழங்கும் தீர்வு என்ன என்பதனை   நாட்டின் முஸ்லிம் அல்லாத சகோதரர்களுக்கு தெரியப்படுத்துவது நமது இரண்டாவது பொறுப்பாகும்.

எனவே,  குர்ஆன், ஹதீஸ் மற்றும் வரலாறு ஒளியில் பூகம்பங்கள் தொடர்பாக  இஸ்லாமிய வழங்கும் தீர்வை காணலாம்.

திருக்குர்ஆனில் ஷுஐப்(அலை) அவர்களின் கூட்டத்தவர்களுக்கு அளிக்கப்பட்ட வேதனையையும்,அதன் காரணத்தையும் படிப்பினையாக கூறப்பட்டுள்ளது.

ஷுஐப்(அலை)அவர்களின் கூட்டத்தவர்கள் அளவை,நிறுவையில் மோசடி செய்தனர்.இந்த பழக்கம் அவர்களிடம் அதிகரித்துக் கொண்டே சென்றது.சந்தர்ப்பம் கிடைக்கும் போதெல்லாம் அநியாயமாக பேரம் பேசி அடித்து வாங்குவது,விற்கும்போதுஅளவை,நிறுவையில் மோசடி செய்வதும் அவர்களின் இயல்பாகவே மாறிவிட்டது.

திருக்குர்ஆன் விரிவுரையாளர்கள் எழுதுகிறார்கள்;பொருளாதாரத்தில் மட்டுமல்ல உரிமைகளிலும்  பெரும்போது அதிகமாக பெறுவதும் திரும்ப வழங்கும்போது குறைத்து தருவதும்  ஷுஐப்(அலை)அவர்களின் கூட்டத்தவர்கள் தீய பண்பாகவே மாறிவிட்டது. 

ஷுஐப்(அலை)அவர்களின் கூட்டத்தவர்கள் அளவை,நிறுவையில் மோசடி செய்த காரணத்தால் பூகம்பத்தினால் வேதனை செய்யப்பட்டு அடைக்கப்பட்டனர்.

فَاَخَذَتْهُمُ الرَّجْفَةُ فَاَصْبَحُوْا فِىْ دَارِهِمْ جٰثِمِيْنَ‌ ۛۙ     ‏

ஆகவே அவர்களை பூகம்பம் பிடித்துக் கொண்டது; அதனால் அவர்கள் (காலையில்) தம் வீடுகளில், இறந்தழிந்து கிடந்தனர்.(அல்குர்ஆன் : 7:91)

இவ்விதமே மூஸா நபியின் கூட்டத்தவர்கள் பூகம்பத்தால் அழிக்கப்பட்டனர்.

وَاخْتَارَ مُوْسٰى قَوْمَهٗ سَبْعِيْنَ رَجُلًا لِّمِيْقَاتِنَا‌  فَلَمَّاۤ اَخَذَتْهُمُ الرَّجْفَةُ قَالَ رَبِّ لَوْ شِئْتَ اَهْلَـكْتَهُمْ مِّنْ قَبْلُ وَاِيَّاىَ‌  اَ تُهْلِكُنَا بِمَا فَعَلَ السُّفَهَآءُ مِنَّا  اِنْ هِىَ اِلَّا فِتْنَـتُكَ  تُضِلُّ بِهَا مَنْ تَشَآءُ وَتَهْدِىْ مَنْ تَشَآءُ ‌ اَنْتَ وَلِيُّنَا فَاغْفِرْ لَـنَا وَارْحَمْنَا‌ وَاَنْتَ خَيْرُ الْغَافِرِيْنَ‏

இன்னும் மூஸா நாம் குறிப்பிட்ட நேரத்தில் (தூர் மலையில்) நம்மைச் சந்திப்பதற்காக, தம் சமூகத்தாரிலிருந்து எழுபது ஆண்களைத் தேர்ந்தெடுத்தார்; அவர்களைப் பூகம்பம் பற்றிக்கொண்டபோது, அவர், “என் இறைவனே! நீ கருதியிருந்தால், இதற்கு முன்னரே அவர்களையும் என்னையும் நீ அழித்திருக்கலாமே! எங்களிலுள்ள அறிவிலிகள் செய்த (குற்றத்)திற்காக, எங்கள் யாவரையும் நீ அழித்துவிடுகிறாயா? இது உன்னுடைய சோதனையேயன்றி வேறில்லை; இதைக்கொண்டு நீ நாடியவர்களை வழிதவற விடுகிறாய்; இன்னும் நீ நாடியவர்களை நேர் வழியில் நடத்துகிறாய். நீ தான் எங்களுடைய பாதுகாவலன். ஆகவே எங்களுக்கு மன்னிப்பு அளிப்பாயாக! எங்களுக்கு கிருபை செய்வாயாக. மன்னிப்பவர்களிலெல்லாம் நீ தான் மிக்க மேன்மையானவன்” என்று பிரார்த்தித்தார்.(அல்குர்ஆன் : 7:155)

செல்வங்களை பதிக்க வைக்கும் செல்வந்தர்களுக்கு காரூனின் அழிவை அல்லாஹ் படிப்பினை ஆக்கினான்.

فَخَسَفْنَا بِهٖ وَبِدَارِهِ الْاَرْضَ فَمَا كَانَ لَهٗ مِنْ فِئَةٍ يَّـنْصُرُوْنَهٗ مِنْ دُوْنِ اللّٰهِ وَمَا كَانَ مِنَ الْمُنْتَصِرِيْنَ‏

ஆகவே, நாம் காரூனையும் அவன் வீட்டையும் பூமியில் அழுந்தச் செய்தோம்; அல்லாஹ்வையன்றி அவனுக்கு உதவி செய்கிற கூட்டத்தார் எவருமில்லை; இன்னும் அவன் தன்னைத்தானே காப்பாற்றிக் கொள்ளவும் முடியவில்லை.(அல்குர்ஆன் : 28:81)

ஹதீஸில்  பூகம்பங்கள் பற்றி... 

صحيح البخاري 

1036 - حَدَّثَنَا أَبُو اليَمَانِ، قَالَ: أَخْبَرَنَا شُعَيْبٌ، قَالَ: أَخْبَرَنَا أَبُو الزِّنَادِ، عَنْ عَبْدِ الرَّحْمَنِ الأَعْرَجِ، عَنْ أَبِي هُرَيْرَةَ، قَالَ: قَالَ النَّبِيُّ صَلَّى اللهُ عَلَيْهِ وَسَلَّمَ: «لاَ تَقُومُ السَّاعَةُ حَتَّى يُقْبَضَ العِلْمُ، وَتَكْثُرَ الزَّلاَزِلُ، وَيَتَقَارَبَ الزَّمَانُ، وَتَظْهَرَ الفِتَنُ، وَيَكْثُرَ الهَرْجُ - وَهُوَ القَتْلُ القَتْلُ - حَتَّى يَكْثُرَ فِيكُمُ المَالُ فَيَفِيضَ»

அபூஹுரைரா ( ரலி) அறிவிக்கிறார்கள். நபி (ஸல்) அவர்கள் கூறினார்கள். அறிவு பறிக்கப்படும் வரை, பூகம்பங்கள் அதிகரிக்கும் வரை ,நேரங்கள் சுருங்கும்  வரை, குழப்பங்கள் தோன்றும் வரை ,  கொலைகள்  அதிகரித்து, மற்றும் செல்வம் உங்களிடையே அதிகரித்து அது நிரம்பி வழியும் வரை கியாம நாள் வராது என்றார்கள்.

பூகம்பங்கள் அதிகரிப்பதும் யுக முடிவு நாளின் அடையாளமாகும் என்று நபிகள் நாயகம் (ஸல்) குறிப்பிட்டுள்ளனர்.     (நூல்: புகாரி 1036, 7121)

மூன்று பூகம்பங்கள்

யுகமுடிவு நாளின் நெருக்கத்தில் மிகப்பெரிய அளவில் நிலச்சரிவுகளும், பூகம்பங்களும் ஏற்படும். மனிதர்கள் உயிருடன் புதையுண்டு போவர்.

 (மதீனாவின்) கிழக்கே ஒரு பூகம்பம், மேற்கே ஒரு பூகம்பம், அரபு தீபகற்பத்தில் ஒரு பூகம்பம் ஆகிய மூன்று பூகம்பங்களை நீங்கள் காண்பது வரை யுகமுடிவு நாள் ஏற்படாது என்பது நபிமொழி. (அறிவிப்பவர்: ஹுதைபா (ரலி), நூல்: முஸ்லிம்)

உலகில் ஆங்காங்கே பூகம்பங்களும் அவ்வப்போது ஏற்பட்டு வருகின்றன என்றாலும் நபி (ஸல்) அவர்கள் குறிப்பிடக்கூடிய இந்த பூகம்பங்கள் மிகவும் பிரமாண்டமானவையாக அமைந்திருக்கும்.

அல்லாஹ் விடுக்கும் எச்சரிக்கை.

وَمَا نُرْسِلُ بِالْآيَاتِ إِلَّا تَخْوِيفًا

(மக்களை) அச்சமூட்டி எச்சரிப்பதற்காவே அன்றி நாம் (இத்தகைய) அத்தாட்சிகளை அனுப்புவதில்லை.(அல்குர்ஆன் 17/59)

அல்லாஹ் இந்த பூமியை  படைத்து அதை நமக்கு இளைப்பாறும் இடமாகவும், தொட்டிலாகவும், படுக்கையாகவும், விரிப்பாகவும் ஆக்கியுள்ளான்.

இறைவனின் இந்தப் பிரபஞ்சத்தையும் அதில் நிகழும் நிகழ்வுகளையம் நாம் சிந்தித்துப் பார்த்தால், இதைப் படைத்தவனின் மகத்துவம் நமக்கு புரிய வரும். அவன் வீணாக எதையும் படைக்கவில்லை என்பதை புரிந்து கொள்ளமுடியும்.

هُوَ الَّذِي جَعَلَ لَكُمُ الْأَرْضَ ذَلُولًا فَامْشُوا فِي مَنَاكِبِهَا وَكُلُوا مِنْ رِزْقِهِ ۖ وَإِلَيْهِ النُّشُورُ

அவனே உங்களுக்கு இப்பூமியை (நீங்கள் வாழ்வதற்கு) வசதியாக ஆக்கினான்; ஆகவே, அதன் பல மருங்குகளிலும், நடந்து அவனுடைய உணவிலிருந்து புசியுங்கள்; இன்னும் அவனிடமே (யாவரும்) உயிர்த்தெழவேண்டியிருக்கிறது. (அல்குர்ஆன் (67/15)

நிலநடுக்கம் ஏன்?

நில நடுக்கம், பூகம்பங்கள் பூமியின் தட்ப வெட்ப மாற்றத்தினால் ஏற்படுகின்றது என்று அறிவியல் ஆய்வாளர்கள் கூறுகின்றனர். இந்த மாற்றங்களை இவ்வுலகில் நிகழ்த்துவது அல்லாஹ் தான் என்ற நம்பிக்கை நம் அனைவருக்கும் உண்டு. ஆனால்  இவை மட்டும் காரணமல்ல. மாறாக மனிதன் தன்னை படைத்த ரப்பை மறந்து தன் மனம் போன போக்கில் வாழும் போதும், அநியாயங்கள், அழிச்சாட்டியங்கள், அக்கிரமங்கள் போன்ற பாவங்களை செய்யும் போதும் இதுப் போன்ற வேதனைகளை அல்லாஹ் பூமியில் ஏற்படுத்துகிறான். சில சமயம் பசி, பட்டினி, பஞ்சம் பயம், பொருளாதார இழப்பு, உயிர் இழப்பு, போன்ற சோதனைகளையும் ஏற்படுத்துகிறான். இதையே அல்லாஹ் திருமறையில்...

ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ

மனிதர்களில் கைகள் தேடிக்கொண்ட (தீச் செயல்களின்) காரணத்தால் கடலிலும் தரையிலும் (நாசமும்) குழப்பமும் தோன்றின் (தீமைகளிலிருந்து) அவர்கள் திரும்பிவிடும் பொருட்டு அவர்கள் செய்தார்களே (தீவினைகள்) அவற்றில் சிலவற்றை (இவ்வுலகிலும்) அவர்கள் சுவைக்கும்படி அவன் செய்கிறான். (அல்குர்ஆன் 30/41)

நில நடுக்கம் என்பது இறைவனின் கோபமா?  அல்லது இது ஒரு பேரழிவா ?

பூகம்பங்கள் என்பது  அல்லாஹ்வின் பேராற்றலில் கட்டுப்பட்டதாகும். அதை இவ்வுலகில் அவ்வப்போது ஏற்படுத்துவது மனிதன் தன்னை படைத்த ரப்பை நினைத்து பயந்து வாழ்வதற்காகும். 

சில சமயம் காஃபிர்களுக்கு எதிரான கோபமாகவும் பழிவாங்கலாகவும் இருக்கலாம். சில சமயம் முஸ்லிம்களுக்கு படிப்பினையூட்ட இவ்வுலகில் வேதனையாகவும், மறுமையில் அதனால் நிறைய நன்மைகளை தருவதற்காகவும் இருக்கலாம்.

ஒரு தடவை பூமி உள்வாங்கிய போது இப்னு மஸ்ஊத் (ரலி) கூறினார்கள்..

قال ابن مسعود أيها الناس إن ربكم يستعتبكم فاعتبوه ) .

ஒ மனிதர்களே! அல்லாஹ் உங்களிடம் நீங்கள் பாவம் செய்வதிலிருந்து மீள்வதையும் அவன் திருப்பொருத்தத்தை பெறுவைதையும் எதிர்பார்கிறான் என்றார்கள். மேலும் கடுமையான சூராவளி காற்று ஏற்பட்ட போது நபி (ஸல்) அவர்களின் முகத்தில் அதை உணர்ந்தேன் என்றார்கள் .(நூல் புகாரி)

ஹாபிழ் இப்னு ஹஜர் (ரஹ்) கூறுகிறார்கள்:

பெரும்பாலும் நிலநடுக்கங்கள் கியாமத் நாளின் அடையாளமாக பார்க்கப்படுகிறது. எனவே நில நடுக்கம், கடுமையான காற்று, இயற்கை சீற்றங்கள் ஏற்படும் போது இறைவனின் அச்சம் ஏற்பட்டு அவன் பக்கம் வேண்டும்.

சில சமயம் பூகம்பங்கள் காஃபிர்களுக்கு எதிரான கோபமாகவும் பழிவாங்கலாகவும் இருக்கலாம். இதற்கு முன்பாக பல சமுதாயம் இறை நிராகரிப்பின் காரணமாக அழிக்கப்பட்டுள்ளது.

فَكُلًّا أَخَذْنَا بِذَنْبِهِ ۖ فَمِنْهُمْ مَنْ أَرْسَلْنَا عَلَيْهِ حَاصِبًا وَمِنْهُمْ مَنْ أَخَذَتْهُ الصَّيْحَةُ وَمِنْهُمْ مَنْ خَسَفْنَا بِهِ الْأَرْضَ وَمِنْهُمْ مَنْ أَغْرَقْنَا ۚ وَمَا كَانَ اللَّهُ لِيَظْلِمَهُمْ وَلَٰكِنْ كَانُوا أَنْفُسَهُمْ يَظْلِمُونَ

இவ்வாறு, நாம் ஒவ்வொருவரையும் அவரவர் செய்த பாவத்தின் காரணமாகப் பிடித்தோம்; அவர்களில் சிலர் மீது கடும்புயல் மூலமாக கல்மாரியை அனுப்பினோம்; அவர்களில் சிலரை பேரிடி முழக்கம் பிடித்துக் கொண்டது அவர்களில் சிலரைப் பூமியினுள் அழுந்தச் செய்தோம்; அவர்களில் சிலரை மூழ்கடித்தோம்; ஆனால் அல்லாஹ் அவர்களுக்கு அநியாயம் செய்வதற்காக இருக்க வில்லை அவர்கள் தமக்குத் தாமே அநியாயம் செய்து கொண்டார்கள். (அல்குர்ஆன் 29/ 40)

தண்டனையாக...

فعن أي موسى قال : قال رسول الله أمتي هذه أمة رحومة ليس بها عذاب في الآخرة وعذابها في الدنيا الفتن والزلازل والقتل ) رواه أبو داوود وأحمد بسند صحيح .

நபி (ஸல்) அவர்கள் கூறினார்கள்: என் உம்மத் ரஹ்மத் செய்யப்பட்ட உம்மத்தாகும். மறுமையில் எந்த வேதனையும் பெற மாட்டார்கள். மாறாக உலகத்திலே குழப்பங்கள், கொலை, பூகம்பம் போன்ற வேதனையை அடைவார்கள்.

இந்த  நிலநடுக்கங்கள் நாளை கியாமத் நாளில் ஏற்படும் கடுமையான நிலநடுக்கங்களின் அபாயத்தை முன் கூட்டியே நமக்கு காட்டுகின்றன.

يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ

மனிதர்களே! நீங்கள் உங்களுடைய இறைவனை பயந்து கொள்ளுங்கள்; நிச்சயமாக (கியாமத்து நாளாகிய) அவ்வேளையின் அதிர்ச்சி, மகத்தான் பெரும் நிகழ்ச்சியாகும்.

يَوْمَ تَرَوْنَهَا تَذْهَلُ كُلُّ مُرْضِعَةٍ عَمَّا أَرْضَعَتْ وَتَضَعُ كُلُّ ذَاتِ حَمْلٍ حَمْلَهَا وَتَرَى النَّاسَ سُكَارَىٰ وَمَا هُمْ بِسُكَارَىٰ وَلَٰكِنَّ عَذَابَ اللَّهِ شَدِيدٌ

அந்நாளில், பாலூட்டிக் கொண்டிருக்கும் ஒவ்வொரு தாயும் தான் ஊட்டும் குழந்தையை மறந்து விடுவதையும், ஒவ்வொரு கர்ப்பிணியும் தன் சுமையை ஈன்று விடுவதையும் நீங்கள் காண்பீர்கள்; மேலும், மனிதர்களை மதி மயங்கியவர்களாக இருக்க காண்பீர்; எனினும் (அது மதுவினால் ஏற்பட்ட) மதி மயக்கமல்ல ஆனால் அல்லாஹ்வின் வேதனை மிகக் கடுமையானதாகும் (அல்குர்ஆன் 22/01 -02 )

பேரிழப்புகள் தரும் படிப்பினைகள்.

قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ  ﴿9:51﴾

“ஒருபோதும் அல்லாஹ் விதித்ததைத் தவிர (வேறு ஒன்றும்) எங்களை அணுகாது; அவன் தான் எங்களுடைய பாதுகாவலன்” என்று (நபியே!) நீர் கூறும்; முஃமின்கள் அல்லாஹ்வின் மீதே பூரண நம்பிக்கை வைப்பார்களாக!

சோதனை இரண்டு வகை.

இவ்வாறு ஏற்படும் அழிவுகளை “இயற்கை அனர்த்தம்” என வர்ணிக்கிறார்கள் இறை நம்பிக்கையற்றவர்கள். இந்த அனர்த்தங்களை தடுத்து நிறுத்த நவீன தொழில் நுட்பங்களால் முடியவில்லை. சுனாமி முன் கண்டறிவதற்காக அமைக்கப்பட்ட கருவியால் எந்தப் பலனம் நடக்க வில்லை. பல் வேறுபட்ட தொழில் நுட்பங்கள் கண்டு பிடிக்கப்பட்டாலும் அழிவுகளை தடுத்து நிறத்த முடியவில்லை.

அல்லாஹ்வை நம்பி வாழும் முஸ்லிம்கள் இந்த அழிவுகளை எப்படி எடுத்துக் கொள்ள வேண்டும். இயற்கை அனர்த்தம் என்றா அல்லது அல்லாஹ்வின் சோதனைகள் என்றா? நிச்சயமாக அல்லாஹ்வின் சோதனைகள் என்றே இறை விசுவாசிகள் நம்ப வேண்டும்.

அல்லாஹ்வின் சோதனைகள் இரு வகைப்படும் என்பதை அல்குர்ஆனினூடாக அறிகிறோம்.

முதலாவது, மக்கள் பாவங்களிலும் அட்டூழியங்களிலும் அக்கிரமங்களிலும் மூழ்கும் போது அல்லாஹ் சோதனைக்குள்ளாக்கி தண்டிக்க விரும்புகிறான். இந்தத் தண்டனை பாவங்களில் உழன்று வாழ்பவர்களை திருத்துவதற்கும் மக்களுக்கு படிப்பினைக்குரியதுமாக ஆக்கு கிறான்.

இரண்டாவது, மக்களின் ஈமானை பரீட்சிப் பதற்கும் பலப்படுத்துவதற்குமுரிய சோதனை யாக ஆக்குகிறான். சுவனத்திற்குரிய கூலி யாகவும் ஆக்குகின்றான். மேலும் உலக வாழ்வை சோதனைக்குரிய வாழ்வாகவே அமைத்தும் இருக்கின்றான்.

திடீர் மரணங்கள் தண்டனையல்ல.

இப்னு அப்பாஸ்(ரலி) அறிவித்தார். 

(இஹ்ராம் அணிந்திருந்த ஒருவர் அரஃபாவில் நபி(ஸல்) அவர்களுடன் தங்கியிருந்தபோது தன்னுடைய வாகனத்திலிருந்து கீழே விழுந்துவிட்டார். அது அவரின் கழுத்தை முறித்துக் கொன்றுவிட்டது. என அய்யூப் என்பவர் கூறுகிறார். வாகனம் அவரைக் கீழே வீழ்த்தியதால் அவரின் எலும்புகள் முறிந்துவிட்டன என அம்ர் கூறுகிறார். எனவே, அவர் இறந்துவிட்டார். நபி(ஸல்) அவர்கள், 'அவரின் உடலை இலந்தை இலை கலந்த நீரால் குளிப்பாட்டி இரண்டு ஆடைகளில் கஃபனிடுங்கள்; அவருக்கு நறுமணம் பூச வேண்டாம்; அவரின் தலையை மறைக்கவும் வேண்டாம்; ஏனெனில் அவர் மறுமை நாளில் தல்பியாக் கூறிக்கொண்டிருப்பவராக எழுப்பப்படுவார்' எனக் கூறினார்கள். 

(ஸஹீஹ் புகாரி 1268)

உம்மு ஹராம்(ரலி) அவர்கள் கூறுகிறார்கள்: அப்போது நான், 'இறைத்தூதர் அவர்களே! ஏன் சிரிக்கிறீர்கள்?' என்று கேட்டேன். நபி(ஸல்) அவர்கள், 'என் சமுதாயத்தாரில் சிலர் இறைவழியில் இந்தக் கடலின் மத்தியில் பயணம் செய்யும் புனிதப் போராளிகளாக எனக்குக் காட்டப்பட்டனர். அவர்கள் கட்டில்களில் வீற்றிருக்கும் 'மன்னர்களாக' அல்லது 'மன்னர்களைப் போன்று' இருந்தார்கள்' என்று கூறினார்கள். உடனே நான், 'இறைத்தூதர் அவர்களே! என்னையும் அவர்களில் ஒருத்தியாக ஆக்கும் படி அல்லாஹ்விடம் பிரார்த்தியுங்கள்' என்று சொன்னேன். அப்போது எனக்காக இறைத்தூதர்(ஸல்) அவர்கள் பிரார்த்தித்தார்கள். பிறகு (மீண்டும்) தம் தலையைக் கீழே வைத்து (உறங்கி)விட்டுப் பிறகு சிரித்தபடி விழித்தெழுந்தார்கள். அப்போதும் நான், 'ஏன் சிரிக்கிறீர்கள், இறைத்தூதர் அவர்களே?' என்று கேட்டேன். நபி(ஸல்) அவர்கள், 'என் சமுதாயத்தாரில் சிலர் இறைவழியில் புனிதப்போர் புரிபவர்களாக எனக்குக் காட்டப்பட்டார்கள்' என்று முன்புபோன்றே பதிலளித்தார்கள். அதைக் கேட்டு நான், 'இறைத்தூதர் அவர்களே! என்னையும் அவர்களில் ஒருத்தியாக ஆக்கும்படி அல்லாஹ்விடம் பிரார்த்தியுங்கள்' என்று சொன்னேன். நபி(ஸல்) அவர்கள் 'நீங்கள் (கடல் பயணம் செய்து அறப்போருக்கு) முதலாவதாகச் செல்பவர்களில் ஒருவராக இருப்பீர்கள்' என்று கூறினார்கள். (நபி(ஸல்) அவர்கள் கூறியபடியே) உம்மு ஹராம்(ரலி) அவர்கள் முஆவியா இப்னு அபீ சுஃப்யான்(ரலி) அவர்களின் (ஆட்சிக்) காலத்தில் கடல் பயணம் மேற்கொண்டார்கள். பின்பு அவர்கள் கடலிலிருந்து புறப்பட்டபோது தம் வாகனத்திலிருந்து கீழே விழுந்து இறந்துவிட்டார்கள்.(ஸஹீஹ் புகாரி 7002 )

தொழுது,இறைவனிடம் மன்றாடுவதே தீர்வாகும் .

அல்லாமா கசானி(ரஹ்)அவர்கள் சொல்கிறார்கள்;திடுக்கமான,இக்கட்டான சந்தர்ப்பங்களில் அதிகம் தொழ வேண்டும்.குறிப்பாக பூகம்பம் ஏற்படும் போது முஸ்லிம்கள் நபிலான தொழுகைகளையும்.பயபக்தியோடு துஆவிலும் ஈடுபட வேண்டும்.இதற்கென குறிப்பாக இந்த தொழுகையும் இல்லாததால் பொதுவாக இரண்டு ரகஅத்  நஃபிலாக தொழலாம். 

பஸராவில் நிலநடுக்கத்தின் போது தாம் தொழுததாக ஹஸ்ரத் இப்னு அப்பாஸ் ரளியல்லாஹு அன்ஹு அவர்களிடமிருந்து அறிவிக்கப்பட்டுள்ளது. (بدائع الصنائع ۱/۲۸۲)

கீழ் வரும் துஆக்களையும் ஓதலாம்

ஹஸ்ரத் உமர் பின் அப்துல் அஜீஸ்(ரஹ்) அவர்கள் பூகம்பத்தின் போது மக்களை பின்வரும் துஆக்களை ஓதிவர வலியுறுத்தினார்கள்.

இந்த மூன்றும் குர்ஆனில் வரும் நபிமார்கள் ஓதிய துஆக்களாகும்.

1- ஹழ்ரத் ஆதம்(அலை)அவர்கள் கேட்ட துஆ;

 رَبَّنَا ظَلَمْنَاۤ اَنْفُسَنَا ٚ وَاِنْ لَّمْ تَغْفِرْ لَـنَا وَتَرْحَمْنَا لَـنَكُوْنَنَّ مِنَ الْخٰسِرِيْنَ‏

அதற்கு அவர்கள்: “எங்கள் இறைவனே! எங்களுக்கு நாங்களே தீங்கிழைத்துக் கொண்டோம் - நீ எங்களை மன்னித்துக் கிருபை செய்யாவிட்டால், நிச்சயமாக நாங்கள் நஷ்டமடைந்தவர்களாகி விடுவோம்” என்று கூறினார்கள்.(அல்குர்ஆன் : 7:23)

2- நூஹ் நபி(அலை)அவர்கள் கேட்ட துஆ;

قَالَ رَبِّ اِنِّىْۤ اَعُوْذُ بِكَ اَنْ اَسْــٴَــلَكَ مَا لَـيْسَ لِىْ بِهٖ عِلْمٌ‌ وَاِلَّا تَغْفِرْ لِىْ وَتَرْحَمْنِىْۤ اَكُنْ مِّنَ الْخٰسِرِيْنَ‏

“என் இறைவா! எனக்கு எதை பற்றி ஞானம் இல்லையோ அதை உன்னிடத்திலே கேட்பதை விட்டும் உன்னிடம் நான் பாதுகாப்பு தேடுகிறேன்; நீ என்னை மன்னித்து எனக்கு அருள் புரியவில்லையானால் நஷ்ட மடைந்தோரில் நான் ஆகிவிடுவேன்” என்று கூறினார்.(அல்குர்ஆன் : 11:47)

3- ஹஜ்ரத் யூனுஸ்(அலை)அவர்கள் கேட்ட துஆ; 

 اَنْ لَّاۤ اِلٰهَ اِلَّاۤ اَنْتَ سُبْحٰنَكَ ‌  اِنِّىْ كُنْتُ مِنَ الظّٰلِمِيْنَ‌  ‌‏

 “உன்னைத் தவிர வணக்கத்திற்குரிய நாயன் யாருமில்லை; நீ மிகவும் தூய்மையானவன்; நிச்சயமாக நான் அநியாயக்காரர்களில் ஒருவனாகி விட்டேன்” என்று பிரார்த்தித்தார்.(அல்குர்ஆன் : 21:87)

  (الجواب الکافی،ص:۴۷)                                                  

இச்சந்தர்பத்தில் முஸ்லிம்கள் என்ன செய்ய வேண்டும்.

முஃப்தி முஹம்மது தகி உஸ்மானி ஹழ்ரத் அவர்கள் எழுதுகிறார்கள்;

பூகம்பம் போன்ற பேரிடர்கள் ஏற்படும்போது, உண்மையான முஃமின் இந்த நிகழ்வினால் ஏற்படும் நன்மை தீமைகளை நன்கு அறிந்தவன் அல்லாஹ் ஒருவன் மட்டுமே, அவனே பிரபஞ்சத்தை படைத்து பரிபாலிக்க கூடியவன். அவனின் நாட்டமின்றி ஒர் அணுவும் அசையாது.அவன் சூட்சுமங்கள் புரிகிறதோ, இல்லையோ அதில் கருத்துக்கள் கூற உரிமையில்லை என்று விளங்குவான்.(اصلاحی خطبات۱۶/۱۳۸)

இடிபாடுகளில் சிக்கி மரணிப்பவர் ஷஹீத் அந்தஸ்தை பெற்றவராவார்.

عنْ أبي هُرَيْرةَ، ، قالَ: قالَ رَسُولُ اللَّه ﷺ: الشُّهَدَاءُ خَمسَةٌ: المَطعُونُ، وَالمبْطُونُ، والغَرِيقُ، وَصَاحبُ الهَدْم وَالشَّهيدُ في سبيل اللَّه متفقٌ عليهِ.

அபூஹுரைரா (ரலி) அறிவிக்கிறார்கள்:

ஐந்து நபர்கள் ஷஹீத் உடைய அந்தஸ்தை பெறுகின்றனர்.

1) காலரா நோயால் இறந்தவர்

 2) வயிற்று வலியால் இறந்தவர் 

3) நீரில் மூழ்கி இறந்தவர்

 4) இடிபாடுகளில் சிக்கி இறந்தவர். 

5) அல்லாஹ்வின் பாதையிலே இறந்தவர்.

முடிவுரை :

பாவங்களால் தான் பூமியிலே இதுப் போன்ற இயற்கை சீற்றங்கள்  iநில நடுக்கங்கள் ஏற்படுகின்றன. எனவே அல்லாஹ்வின் கோபத்தை பெற்று தரக்கூடிய பாவங்களான வட்டி , விபச்சாரம், அளவையில் மோசடி , பிறரை ஏமாற்றுதல், பாட்டு பாடுதல், தொழுகையை விடுதல் போன்ற பாவங்களிலிருந்து தவிர்ந்திருப்போம்.

மேலும் திக்ரு, திலாவத், தொழுகை, அதிகமாக தான தர்மம் செய்தல், துஆ செய்தல், அதிகமாக இஸ்திஃபார் செய்தல், பாவமன்னிப்பு எனும் தவ்பாவை அதிகப்படுத்துதலை இதுப் போன்ற நேரங்களில் கடைபிடிப்போமாக! ஆமின்...

சிர்யா,துர்க்கி பூகம்பத்தில் உயிர்நீத்தவர்களின் பிழைகளை பொறுத்தருள்வானாக!பூகம்பத்தினால் பாதிக்கப்பட்ட சிறார்கள் முதியவர்கள் அனைவரையும் அல்லாஹ் பாதுகாத்து குணமடைய செய்வானாக!அல்லாஹ் இது போன்ற பேரிடர்களை விட்டும் நம்மையும்,நம்சந்ததினரையும் பாதுகாப்பான!ஆமீன்...

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான்.13/01/2023

தேச ஒற்றுமை மாநாடு... 

ஜனவரி 15,16 2023

தேசஒற்றுமை.

 يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

நம்பிக்கை கொண்டோரே! நீங்கள் அல்லாஹ்வை அஞ்ச வேண்டிய முறைப்படி அஞ்சுங்கள்; மேலும், (அல்லாஹ்வுக்கு முற்றிலும் வழிப்பட்ட) முஸ்லிம்களாக அன்றி நீங்கள் மரிக்காதீர்கள்.   

وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا ۚ 

இன்னும், நீங்கள் எல்லோரும் அல்லாஹ்வின் கயிற்றை வலுவாக பற்றிப் பிடித்துக் கொள்ளுங்கள்;. நீங்கள் பிரிந்தும் விடாதீர்கள்;

நம் இந்திய திருநாடு சமூக நல்லிணக்கத்திற்கான நிலம்.உலகத்திற்கே எடுத்துக் காட்டாய் திகழும் பூமி. இந்தியர்கள் அனைவரும் ஒரு தாய் பிள்ளைகளாக பந்த பாச உணர்வுகளோடு வாழ வேண்டும் என்ற அடிப்படையில் உருவாக்கப்பட்டது தான் நமது அரசியலமைப்பு சட்டம் .யாரோ சிலரின் அதிகார கணவுகளுக்காக அதன் மாண்புகளை சிதைப்பதை பார்த்துக் கொண்டிருக்க முடியாது. குடியுரிமை சட்டம், பொதுச் சிவில் சட்டம் என அச்சுறுத்தல்கள் தொடர்கின்றன. வேலை வாய்ப்பின்மை, பொருளாதார வீழ்ச்சி, ஒற்றை கலாச்சாரம் என அடுத்தடுத்து பிரச்சினைகள் தொடர்கின்றன. நம் எதிர்கால சந்ததியினருக்கு அமைதியும் பாதுகாப்பும் நிறைந்த இந்தியாவை விட்டு செல்லும் தார்மீக கடமை நம் அனைவருக்கும் இருக்கிறது.

எனவே இஸ்லாமிய சமூகம் அந்த முழுமையான வெற்றியை அடைய அடிப்படை தேவைகள் இரண்டு. 

1) இறையச்சம் 2)ஒற்றுமை

இறையச்சம்.

இறையச்சம்,  ஒரு முஸ்லிமின் வாழ்வில் எல்லா பகுதியிலும் இருக்க வேண்டும். வெளிப்படையான தவறாக இருந்தாலும், மறைமுகமான தவறாக இருந்தாலும் அல்லாஹ் பார்க்கிறான் என்ற அச்சத்தோடு அந்த தவறுகளில் இருந்து விலகி இருக்கவேண்டும். ஆகையால் தான் மேற்கூறிய வசனத்தில் அல்லாஹ்வை முழுமையாக அஞ்சி வாழுங்கள் என கட்டளையிடுகின்றான். நம் தொழுகை, தொழில், அன்றாட வாழ்க்கை, குடும்ப வாழ்க்கை, சமூக வாழ்க்கை, அரசியல் வாழ்க்கை அத்தனையிலும் ஒரு முஸ்லிம் இறையச்சத்தோடு செயல்பட வேண்டும். அல்லாஹ்விற்கு அஞ்சி நடந்தால் இந்த உலகம் நம்மை பார்த்து அஞ்சும்.

ஒற்றுமை.

பல தரப்பு மக்கள், பல்வேறு சிந்தனையுடைய மக்கள், பல மொழி, பல சமயங்கள், பல இன, சாதி, மதங்கள், பல நாடுகளை சார்ந்து வாழக்கூடிய மக்களுக்கு மத்தியில் அவ்வப்போது பிரச்சினைகள் ஏற்படுவது தவிர்க்க முடியாத ஒன்றுதான். ஆனாலும் அந்த நேரங்களிலும் ஒட்டு மொத்த சமூகத்திற்கும் ஒரு பிரச்சினை ஏற்படும் போது அனைவரும் ஒன்றினைந்து செயல்பட வேண்டும்  என இறைவன் கட்டளையிடுகிறான். நம்மில் பல அமைப்புகள், பல பிரிவுகள் இருந்தாலும், பல கொள்கை வேறுபாடுகள் இருந்தாலும் இஸ்லாத்தின் நலனை கருத்தில் கொண்டு நாம் ஒரணியில் நிற்க வேண்டும். அப்படி ஒட்டுமொத்தமாக நம் உரிமை பிரச்சினைக்காக CAA, NRC, NPR போன்ற நேரங்களில் ஒன்று சேர்ந்ததால் தான் அதை நம்மால் நிறுத்தி வைக்க முடிந்துள்ளது.  வருங்கால அரசியல் நகர்வுகள் மீண்டும் அதை மெய்படுத்திவிடக் கூடாது என்பதற்கு நாம் அனைவரும் இஸ்லாம் என்ற கருத்தியலில் ஒன்று சேர வேண்டும். இதை வலியுறுத்தி அல்லாஹ் திருமறையில்....

إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَٰنُ وُدًّا

நிச்சயமாக எவர்கள் ஈமான் கொண்டு (ஸாலிஹான-) நல்ல செயல்களைச் செய்கின்றார்களோ அவர்களுக்கு அர்ரஹ்மான் (யாவரின்) நேசத்தை ஏற்படுத்துவான். (அல்குர்ஆன் 19/96)

பல்வேறு கிளைகளாக இருப்பினும் முஸ்லிம், முஃமின் என்ற பண்பில் நாம் அனைவரும் ஒன்றுபடும்போது அதில் அல்லாஹ்வின் உதவி கண்டிப்பாக இருக்கும்.

ஒரே இறைவன், ஒரே மறை , ஒரே நபி ஒரே மார்க்கம் என்று இருக்கும் நாம் தான் இன்று பல பிரிவுகளாக, பல கட்சிகளாக பிரிந்துக் கிடக்கின்றோம். ஆனால் பல கடவுள் கொள்கை, பல வேதம் உடையவர்கள் தங்களுக்கென்று ஒரு ஆபத்து வரும் போது ஒரணியில் நின்று ஒற்றுமையோடு போராடிக் கொண்டிருக்கிறார்கள், இதை இஸ்லாமிய சமூகம் எப்போது உணரப் போகிறோம்  என்பதை யோசிக்க வேண்டும்.

وَأَنَّ هَٰذَا صِرَاطِي مُسْتَقِيمًا فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ۚ ذَٰلِكُمْ وَصَّاكُمْ بِهِ لَعَلَّكُمْ تَتَّقُونَ

நிச்சயமாக இதுவே என்னுடைய நேரான வழியாகும்; ஆகவே இதனையே பின்பற்றுங்கள் - இதர வழிகளை நீங்கள் பின்பற்ற வேண்டாம் - அவை உங்களை அவனுடைய வழியைவிட்டுப் பிரித்துவிடும்; நீங்கள் (நேர் வழியைப் பின்பற்றி) பயபக்தியுடையவர்களாக இருப்பதற்கு இவ்வாறு அவன் உங்களுக்கு போதிக்கிறான். அல்குர்ஆன் (6/153)

إِنَّ الَّذِينَ فَرَّقُوا دِينَهُمْ وَكَانُوا شِيَعًا لَسْتَ مِنْهُمْ فِي شَيْءٍ ۚ إِنَّمَا أَمْرُهُمْ إِلَى اللَّهِ ثُمَّ يُنَبِّئُهُمْ بِمَا كَانُوا يَفْعَلُونَ

நிச்சயமாக எவர்கள் தங்களுடைய மார்க்கத்தை (தம் விருப்பப்படி பலவாறாகப்) பிரித்து, பல பிரிவினர்களாகப் பிரிந்து விட்டனரோ அவர்களுடன் (நபியே!) உமக்கு எவ்வித சம்பந்தமுமில்லை அவர்களுடைய விஷயமெல்லாம் அல்லாஹ்விடமே உள்ளது - அவர்கள் செய்து கொண்டிருந்தவற்றைப் பற்றி முடிவில் அவனே அவர்களுக்கு அறிவிப்பான்.(அல்குர்ஆன்  6/159)

ஒற்றுமையோடு வாழவேண்டும். உங்களுக்கு மத்தியில் பிரிவினை வந்துவிடக் கூடாது என்பதை நபி (ஸல்) அவர்கள்  ஒரு ஹதீஸில் தெரிவிக்கிறார்கள். அல்லாஹ் உங்களிடத்தில் மூன்று விஷயத்தை பிரியப்படுகின்றான். மூன்று விஷயத்தை வெறுக்கின்றான்.

அல்லாஹ் பிரியப்படும் மூன்று விஷயங்கள்.

1) வணக்க வழிபாடுகளை அல்லாஹ்விற்காக மட்டும் செய்ய வேண்டும். அதில் யாரையும் இணையாக்கிவிடக் கூடாது.

 2) அல்லாஹ்வின் வேதத்தை பற்றி பிடித்துக்காள்ளவேண்டும். ஒற்றுமையோடு இருக்க வேண்டும். 

3)  ஆட்சியாளர்கள், மற்றும் தங்களின் தலைமைக்கு கட்டுப்பட்டு நடக்க வேண்டும்.

அல்லாஹ் பிரியப்படாத மூன்று விஷயங்கள்..

1 ) தேவையில்லாத விஷயங்களை விவாதம் செய்வது. 

2) அவசியமின்றி பிறரிடம் தேவையாகுதல். 

3) பொருளாதாரத்தை வீணடிப்பது.

வேற்றுமையில் ஒற்றுமை.

நம் இந்திய திரு நாடு பன்முக கலாச்சாரத்தை கொண்டது. நிறத்தால், இனத்தால், ஜாதியால், மதத்தால் நாம் வேறுபட்டு இருந்தாலும் இந்தியன் என்ற அடிப்பைடயில் நாம் ஒன்றுப்பட்டுள்ளோம். இந்த இந்தியா மதச்சார்பற்ற நாடு என நம் அரசியலமைப்பு சட்டமே கூறுகிறது. இதை மாற்றத்தான் இன்று பாசிச அரசாங்கம் முயற்சித்துக் கொண்டுள்ளது. நமக்குள் பிரிவினையை ஏற்படுத்த நமக்குள்ளே சில உட்பூசலை உண்டுபன்ன பல இஸ்லாமியர்களையும் விலை பேசி வாங்கி வருகின்றனர். இந்த பாசிச சிந்தனைக்கு நாம் ஆட்பட்டு விடக் கூடாது.

கருத்து வேற்றுமைகள் நமக்குள் நிறைய இருக்கலாம் .ஆனால் அது இஸ்லாத்திற்கு பாதகமாக ஆகிவிடக் கூடாது. மார்க்க விஷயத்தில் உலமாக்கள், ஃபிக்ஹ் கலை வல்லுஞர்கள் கருத்து வேற்றுமைக் கொள்வது ரஹ்மத்தாகும். ஆனால் தனக்கு தெரியாத ஒரு விஷயத்தில் கருத்து வேற்றுமை கொள்வது பிரிவினையை ஏற்படுத்திவிடும். அதுதான் இன்று நமக்கு மத்தியில் ஏற்பட்டுக் கொண்டிருக்கிறது. இதை சரி செய்ய நம்மால் முடியும். ஏனெனில் இதை  விட அதிகமான கருத்து வேற்றுமை அரபுகளிடம் இருந்தது. இரவு பகலாக, சண்டை, கலவரம், இரத்தம், வாள், போர் என வாழ்ந்து கொண்டிருந்த மக்களுக்கு மத்தியில் உதித்த பெருமானார் (ஸல்) அவர்கள்  ஒற்றுமையை ஏற்படுத்தினார்கள். இதை அல்லாஹ் திருமறையில்....

وَاذْكُرُوا نِعْمَتَ اللَّهِ عَلَيْكُمْ إِذْ كُنْتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُمْ بِنِعْمَتِهِ إِخْوَانًا وَكُنْتُمْ عَلَىٰ شَفَا حُفْرَةٍ مِنَ النَّارِ فَأَنْقَذَكُمْ مِنْهَا ۗ كَذَٰلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَهْتَدُونَ

அல்லாஹ் உங்களுக்குக் கொடுத்த நிஃமத்களை (அருள் கொடைகளை) நினைத்துப் பாருங்கள்;. நீங்கள் பகைவர்களாய் இருந்தீர்கள் - உங்கள் இதயங்களை அன்பினால் பிணைத்து, அவனது அருளால் நீங்கள் சகோதரர்களாய் ஆகிவிட்டீர்கள்;. இன்னும், நீங்கள் (நரக) நெருப்புக் குழியின் கரை மீதிருந்தீர்கள்; அதனின்றும் அவன் உங்களைக் காப்பாற்றினான் - நீங்கள் நேர் வழி பெறும் பொருட்டு அல்லாஹ் இவ்வாறு தன் ஆயத்களை - வசனங்களை உங்களுக்கு தெளிவாக்குகிறான். (அல்குர்ஆன் 3 / 103)

நமது நாயகம் (ஸல்) அவர்களின் வருகையின் பரக்கத்தால் இதுவரை விரோதிகளாக இருந்தவர்கள் சகோதரர்களாக மாறினார்கள். எதிரிகளே அச்சப்படும் அளவு நபி (ஸல்) அவர்கள் மக்களுக்கு மத்தியில் ஒற்றுமையை ஏற்படுத்தினார்கள். உலகத்தில் எந்த தலைவராலும் செய்ய முடியாத சாதனையை நபி (ஸல்) அவர்கள் செய்தார்கள்.

53 வருடங்கள் தான் வாழ்ந்த , பிறந்த சொந்த பூமியான மக்காவில் ஹிஜ்ரி 8ல் மக்கா வெற்றிப் பெற்ற பிறகு இந்த ஒற்றுமையை, சமாதானத்தை அனைவருக்கும் பொது மன்னிப்பை கொடுத்து சாத்தியப்படுத்தினார்கள்.

மதீனாவில் நபி (ஸல்) அவர்கள் ஏற்படுத்திய ஒற்றுமையினால் ஏற்பட்ட மாற்றங்கள் ....

முஹம்மது நபி (ஸல்) அவர்கள் புனித மதீனா சென்ற பின் மூன்று விதமான உடன்படிக்கையை ஏற்படுத்தினார்கள். இந்த உடன்படிக்கைகள் தான் இன்றளவும் நம் இஸ்லாம் உலகத்தின் மூளை முடுக்குகளுக்கெல்லாம்  பரவிக் கொண்டிருப்பதற்கு அடித்தளமாகும். 

1) மக்காவிலிருந்து ஹிஜ்ரத் செய்து சென்ற முஹாஜிர்களுக்கும், மதீனாவின் மைந்தர்களான அன்சாரி தோழர்களுக்கும் மத்தியில் ஒர் நட்புறவை ஏற்படுத்தினார்கள். கொடுக்கல், வாங்கல் முதல் திருமண பந்தம் வரை அனைத்தையும் இருவர்களுக்கும்  மத்தியில் கட்டமைத்தார்கள். முஹாஜிர், அன்சாரி என்ற பாகுபாடு இருவர்களுக்கும் மத்தியில் எந்த நேத்திலும் ஏற்பட்டு விடக் கூடாது என்று அவர்களுக்கு மத்தியில் சகோதர பாசத்தை உருவாக்கினார்கள்.

2) மதீனாவில் காலம் காலமாக தங்களுக்கு மத்தியில் சண்டையிட்டுக் கொண்டிருந்த இரு பெரும் கூட்டமான அவ்ஸ் ,கஜ்ரஜ் கோத்திரத்தார்களை அழைத்து அவர்களுக்கு மத்தியில் சமாதான உடன்படிக்கை செய்து அவர்களை சீர்படுத்தினார்கள். காலம் காலமாக இருந்த பகைமை நீங்கி இஸ்லாத்திற்கு சாதகமானவர்களாக மாறினார்கள்.

3) மதீனாவாசிகளான அன்சாரி நபித் தோழர்களுக்கும், மதீனாவை சுற்றி வாழ்ந்த பனூ கைனுகா, பனூ குரைலா, பனூ நுலைர் போன்ற யூத சமுதாயத்திற்கும் மத்தியில் அமைதியை நிலை நாட்ட சில முன்னெச்சரிக்கை நடவடிக்கை, மற்றும் உடன் படிக்கைகளை செய்தார்கள். 

அதில் மிக முக்கியமான உடன் படிக்கை....

1) முஸ்லிம்களும் , யூதர்களும் ஒரே நாட்டினராக கருதப்படுவர். யூதர்கள் அவர்கள் மத சம்பிரதாயங்களை செய்ய எந்த தடையும் இல்லை. யூதர்களையும், முஸ்லிம்களையும்  எதிர்த்து அந்நிய நாட்டில் இருந்து யாராவது போர் செய்ய முனைந்தால் ஒருவொருக்கொருவர் உதவி செய்திட வேண்டும். ஒன்று சேர்ந்து இருவரும் யுத்தம் செய்ய வேண்டும்.யூதர்களை முஸ்லிம்களும், முஸ்லிம்களை யூதர்களும் பாதுகாக்க வேண்டும்.

2) குற்றம் செய்தவர்கள் முஸ்லிமாக இருந்தாலும் , யூதராக இருந்தாலும் சமமான தண்டனை வழங்கப்பட வேண்டும். ஏழை, பணக்காரன் என்ற எந்த பாகுபாடும் நீதி வழங்குவதில் இருக்ககூடாது.

என்பன போன்ற பல அரசியல் நுட்பங்களையும் அரசியல் நகர்வுகளையும் பெருமான் (ஸல்) அவர்கள் கன கச்சிதமாக செய்து முடித்தார்கள். இதன் பின் சில நயவஞ்சக வேலைகள் நடந்தாலும் , ஆரம்பத்தில் நபி (ஸல்) அவர்கள் ஏற்படுத்திய இந்த ஒற்றுமை நிகழ்வுகள் பிற்கால இஸ்லாமிய வளர்ச்சிக்கு அச்சாரமாக இருந்தது.

இதை பின்பற்றியே பின்னால் வந்த நான்கு பெரும் கலீபாக்களும், அதன் பின் வந்த அத்துனை ஆட்சியாளர்களும் கடைபிடித்தார்கள். நம் இந்தியாவில்  800 வருடம் ஆட்சி செய்த முகலாய மன்னர்களும் இதை அடிப்படையாக வைத்துதான் பல்வேறு குழுக்களாக பிரிந்து இருந்த இந்த பிளவுப்பட்ட இந்தியாவை ஒருங்கினைந்த இந்திய திருநாடாக மாற்றினார்கள்.

ஒரு நாட்டின் முன்னேற்றம் அந்நாட்டில் வாழும் அனைத்து சமய மக்களும் ஒற்றுமையோடு இருந்தால் தான்  முடியும். அதை முன்னெடுக்கும் வகையில் தான் இந்த தேச ஒற்றுமை மாநாடு ஒருங்கிணைக்பட்டுள்ளது. ஒன்றுபட்டால் உண்டு வாழ்வு என பாட புத்தகத்தில் படித்திருப்போம். அது ஏட்டில் மட்டும் இல்லாமல், நம் வாழ்விலும் செய்ய உறுதியேற்போம்.

இளைஞனே! எழுந்துவா...

இளமையின் அருமை.

உலகில் வாழும் மனித சமூகம் பல்வேறு வளங்களைப் பெற்றிருக்கின்றன. இயற்கை வளம், எண்ணெய் வளம், கனிமவளம், நீர் வளம் இவ்வாறு பல்வேறு வளங்களை ஒரு நாடு, ஒரு சமூகம் பெற்றிருக்கின்றது. இந்த வளங்கள் அனைத்தையும் விட அது பெற்றிருக்கின்ற மனித வளம் (Human Resource) மகத்தானது. அந்தவகையில் ஒரு சமூகம் பெற்றிருக்கின்ற சிறந்த வளமாக இளைஞர் சமூகம் உள்ளது.

மனித வாழ்க்கையில் இளமைப்பருவமே (Child Hood) முக்கியமான காலகட்டமாகும். இப்பருவம் ஒரு கத்திமுனையைப் போன்றது. அதனை ஆக்கத்திற்கும் அழிவுக்கும் பயன்படுத்தலாம். இதே போன்றே இப்பருவமும் ஆக்கத்திற்கோ அல்லது அழிவிற்கோ பயன்படுத்தமுடியுமான பருவமாகும். இளமைப்பருவம் என்பது குழந்தைப் பருவத்திற்கும், முழு வளர்ச்சிப் பருவத்திற்கும் இடைப்பட்ட பருவமென அடையாளப்படுத்தப்படுகின்றது. இது உடல் வலிமையும் வீரியமும் கொண்ட பருவமாகும். வாழ்வில் சுறுசுறுப்பும் இயக்கமும் செயற்திறனும் மிக்க பருவமாகும். வாழ்வில் தன் வாலிபத்தை பயன்படுத்திக் கொள்ளாதவன் வளமான வாழ்விற்கு உரித்துடையவனாவது சாத்தியமானதன்று. இதனாலேயே முதுமை வரும் முன்னர் இளமையை பயன்படுத்திக்கொள்ளுமாறு நபிமொழி ஒன்று கூறுகின்றது.

‘உன்னிடம் ஐந்து விடயங்கள் வருவதற்கு முன் ஐந்து விடயங்களை பயன்படுத்திக்கொள்.

01. மரணம் வருமுன் வாழ்க்கையையும்

02. நோய் வருமுன் ஆரோக்கியத்தையும்

03. வேலைப்பளு வருமுன் ஓய்வு நேரத்தையும்

04. முதுமை வருமுன் இளமைப் பருவத்தையும்

05. வறுமை வருமுன் செல்வ நிலையையும்’ என நபி (ஸல்) அவர்கள் கூறினார்கள். (நஸாயி)

குர்ஆன் கூறும் முன் மாதிரி இளைஞர்கள் (யூசுஃப்)அலை.

قَالَ اجْعَلْنِىْ عَلٰى خَزَآٮِٕنِ الْاَرْضِ‌ اِنِّىْ حَفِيْظٌ عَلِيْمٌ‏ 

(யூஸுஃப்) கூறினார்: “(இந்த) பூமியின் களஞ்சியங்களுக்கு என்னை (அதிகாரியாய்) ஆக்கிவிடுவீராக; நிச்சயமாக நான் (அவற்றைப்) பாதுகாக்க நன்கறிந்தவன்.”(அல்குர்ஆன் : 12:55)

وَكَذٰلِكَ مَكَّنَّا لِيُوْسُفَ فِى الْاَرْضِ‌ يَتَبَوَّاُ مِنْهَا حَيْثُ يَشَآءُ‌  نُصِيْبُ بِرَحْمَتِنَا مَنْ نَّشَآءُ‌ وَلَا نُضِيْعُ اَجْرَ الْمُحْسِنِيْنَ‏ 

யூஸுஃப் தான் விரும்பிய விதத்தில் காரியங்கள் செய்து வர அந்த நாட்டில் யூஸுஃபுக்கு நாம் இவ்வாறே வாய்ப்பை ஏற்படுத்திக் கொடுத்தோம்; இவ்வாறே நாம் நாடியவருக்கு நமது அருள் கிடைக்கும் படிச் செய்கின்றோம். நன்மை செய்பவர்களின் கூலியை நாம் வீணாக்க மாட்டோம்.(அல்குர்ஆன் : 12:56)

குகை வாசிகள் இளைஞர்கள்.

نَحْنُ نَقُصُّ عَلَيْكَ نَبَاَهُمْ بِالْحَـقِّ‌ اِنَّهُمْ فِتْيَةٌ اٰمَنُوْا بِرَبِّهِمْ وَزِدْنٰهُمْ هُدًى‌‏ 

(நபியே!) நாம் உமக்கு அவர்களுடைய வரலாற்றை உண்மையைக் கொண்டு அறிவிக்கிறோம்; நிச்சயமாக அவர்கள் இளைஞர்கள் - தங்கள் இறைவன் மீது ஈமான் கொண்டார்கள்; இன்னும் நாம் அவர்களை நேர் வழியில் அதிகப்படுத்தினோம்.(அல்குர்ஆன் : 18:13)

وَّرَبَطْنَا عَلٰى قُلُوْبِهِمْ اِذْ قَامُوْا فَقَالُوْا رَبُّنَا رَبُّ السَّمٰوٰتِ وَالْاَرْضِ لَنْ نَّدْعُوَا۫ مِنْ دُوْنِهٖۤ اِلٰهًـا‌ لَّـقَدْ قُلْنَاۤ اِذًا شَطَطًا‏ 

அவர்கள் (கொடுமைக்கார அரசன் முன்னிலையில்) எழுந்து நின்று “வானங்களுக்கும், பூமிக்கும் இறைவனாகிய அவனே, எங்களுடைய இறைவன்; எக்காலத்தும் அவனையன்றி வேறு எவரையும் நாயனென்று அழைக்க மாட்டோம்; (அப்படிச் செய்தால் குஃப்ரில் கொண்டு சேர்க்கும்) - வரம்பு மீறியதைச் சொன்னவர்கள் ஆவோம்” என்று அவர்கள் உறுதியாகக் கூறிய நிலையில் அவர்கள் இதயங்களை நாம் வலுப்படுத்தினோம்.(அல்குர்ஆன் : 18:14)

هٰٓؤُلَاۤءِ قَوْمُنَا اتَّخَذُوْا مِنْ دُوْنِهٖۤ اٰلِهَةً‌  لَوْ لَا يَاْتُوْنَ عَلَيْهِمْ بِسُلْطٰنٍ بَيِّنٍ‌  فَمَنْ اَظْلَمُ مِمَّنِ افْتَـرٰى عَلَى اللّٰهِ كَذِبًا ‏ 

எங்கள் சமூகத்தாராகிய அவர்கள் அவனையன்றி வேறு நாயனை ஏற்றுக் கொண்டிருக்கிறார்கள்; அவர்கள் அவற்றின் மீது தெளிவான அத்தாட்சியைக் கொண்டு வரவேண்டாமா? ஆகவே அல்லாஹ்வின் மீது பொய்யாக இட்டுக் கட்டுபவனை விட அநியாயக்காரன் யார்? (என்றும் கூறினார்கள்).(அல்குர்ஆன் : 18:15)

وَاِذِ اعْتَزَلْـتُمُوْهُمْ وَمَا يَعْبُدُوْنَ اِلَّا اللّٰهَ فَاْوٗۤا اِلَى الْـكَهْفِ يَنْشُرْ لَـكُمْ رَبُّكُمْ مِّنْ رَّحْمَتِهٖ وَيُهَيِّئْ لَـكُمْ مِّنْ اَمْرِكُمْ مِّرْفَقًا‏ 

அவர்களையும், அவர்கள் வணங்கும் அல்லாஹ் அல்லாதவற்றையும் விட்டு விலகி நீங்கள், குகையின்பால் ஒதுங்கிக் கொள்ளுங்கள், உங்களுடைய இறைவன் தன்னுடைய ரஹ்மத்திலிருந்து உங்களுக்கு விசாலமாகக் கொடுத்து, உங்கள் காரியத்தில் உணவு பிரச்சனையை உங்களுக்கு எளிதாக்கித் தருவான் (என்று அவர்களில் ஓர் இளைஞர் சொன்னார்).            (அல்குர்ஆன் : 18:16)

அபூஜகலை கொலைசெய்த சிறுவர்கள்.

அப்துர் ரஹ்மான் இப்னு அவ்ஃப்(ரலி) அறிவித்தார்:நான் பத்ருப் போரின்போது (படை) அணியில் நின்று கொண்டிருந்தேன். திரும்பிப் பார்த்தபோது என் வலப்பக்கத்திலும் இடப்பக்கத்திலும் இளவயதுடைய இரண்டு இளைஞர்கள் (நின்று கொண்டு) இருந்தனர். 

அந்த இருவர் (அருகில்) இருப்பது குறித்து நான் அஞ்சினேன். அப்போது அந்த இருவரில் ஒருவர் தம் தோழரிடமிருந்து மறைவாக என்னிடம், 'என் பெரிய தந்தையே! அபூ ஜஹ்லை எனக்குக் காட்டுங்கள்' என்று கூறினார். அப்போது நான், 'என் சகோதரர் மகனே! அவனை என்ன செய்யப் போகிறாய்?' என்று கேட்டேன். அதற்கு அவர், 'அவனை நான் கண்டால் (ஒன்று,) அவனை நான் கொலை செய்வேன்; அல்லது அதற்காக(ப் போராடி) மடிவேன் என்று அல்லாஹ்விடம் சபதம் எடுத்துக் கொண்டுள்ளேன்' என்றார். அப்போது மற்றொரு வரும் தம் சகாவிடமிருந்து மறைவாக, முதலமாவரைப் போன்றே கூறினார். 

அவர்களைப் போன்ற இருவருக்கிடையே நான் இருப்பது எனக்கு மகிழ்ச்சியளிக்கவில்லை. எனவே, அவ்விருவருக்கும், அபூ ஜஹ்லை சமிக்கை செய்து காட்டினேன். அந்த இருவரும் இராஜாளிப் பறவைகள் போன்று பாய்ந்து அவனைப் பலமாகத் தாக்கினர். அந்த இருவரும் 'அஃப்ரா'வின் இரண்டு புதல்வர்கள் (முஆத், முஅவ்வித்) ஆவர்.(ஸஹீஹ் புகாரி (3988)

அர்ஷின் நிழலில் இளைஞன்.

இறைத்தூதர்(ஸல்) அவர்கள் கூறினார்கள்: 

'அல்லாஹ்வின் நிழலைத் தவிர வேறு நிழல் இல்லாத நாளான மறுமை நாளில் அல்லாஹ் தம் நிழலை ஏழு பேர்களுக்கு அளிக்கிறான். அவர்கள்; நீதியை நிலை நாட்டும் தலைவர், அல்லாஹ்வின் வணக்க வழிபாட்டில் ஊறிய இளைஞர், பள்ளி வாசல்களுடன் தம் உள்ளத்தைத் தொடர்பு படுத்திய ஒருவர், அல்லாஹ்விற்காகவே இணைந்து அல்லாஹ்விற்காகவே பிரிகிற இரண்டு நண்பர்கள், உயர் அந்தஸ்திலுள்ள அழகான ஒரு பெண் தவறான வழிக்குத் தம்மை அழைக்கிறபோது, 'நான் அல்லாஹ்வை அஞ்சுகிறேன்' என்று சொல்லும் மனிதர், தம் வலக்கரம் செய்யும் தர்மத்தை இடக்கரம் அறியாதவாறு இரகசியமாகச் செய்பவர், தனிமையில் இருந்து அல்லாஹ்வை நினைத்துக் கண்ணீர் சிந்துபவர்' புகாரி (660)

வாருங்கள்! ஒன்றிணைந்து தேசம் காப்போம்!

மிக மோசமான ஒரு காலகட்டத்தை நோக்கி இந்த தேசம் நகர்ந்து கொண்டிருக்கிறது. குறிப்பாக முஸ்லிம்களும் பிற்படுத்தப்பட்ட மக்களும் தங்களுடைய வாழ்க்கையை கேள்விக்குறியாக கழிக்க வேண்டிய நிலை; எதிர்காலத்தில் இங்கு தங்களால் வாழ முடியாது என்கிற ஒரு மோசமான நிலையைதான் இன்று தலித்களும், பிற்படுத்தப்பட்டவர்களும், முஸ்லிம்களும் சந்திக்கக் கூடிய ஒரு அவலமான நிலையில் இந்த தேசம் சென்று கொண்டிருக்கிறது.

இச்சூழலில் இந்திய முஸ்லிம்களையும் இந்திய மக்களையும் ஒரு தன்னம்பிக்கை நிலைக்கு நகர்த்த வேண்டும். முஸ்லிம் சமூகத்தின் உள்ளங்களில் இருக்கக்கூடிய பயத்தை துடைத்தெறிய வேண்டும். இந்த தேசம் உருவாகுவதற்கு காரணமாக இருந்தவர்கள் முஸ்லிம்கள். இந்த தேசத்தினுடைய வளர்ச்சிக்கு அடிப்படையாக பங்காற்றியவர்கள் முஸ்லிம்கள். அப்படிப்பட்ட பாரம்பரியத்திற்கு சொந்தமான ஒரு சமூகம் இன்று மனோரீதியாக ஏதோ ஒரு தடுமாற்றதில் இருக்கிறதா? மனோரீதியாக பீதிவயப்பட்டு இருக்கிறதா?

முஸ்லிம்களைப் பொறுத்தவரையில் முஸ்லிம்களுக்கு தன்னம்பிக்கை கொடுக்க வேண்டிய அவசியமே கிடையாது. காரணம், ஒவ்வொரு காலகட்டத்திற்கும் ஏதுவாக இஸ்லாமிய வழிகாட்டுதலை அல்லாஹ்வின் வசனங்கள் கொடுக்கின்றது. எந்த ஒரு சூழலிலும் நீங்கள் சர்வாதிகாரத்திற்கும் அடக்குமுறைக்கும் அடிபணிந்து போக வேண்டிய அவசியமில்லை. அதைக் கண்டு அஞ்ச வேண்டிய அவசியமில்லை. அதைக்கண்டு தடுமாற வேண்டிய அவசியமில்லை என்கிற அடிப்படையிலான அற்புதமான வரலாறுகளை அடுக்கடுக்காகக் கொண்டு, இறை வசனங்களையும், அண்ணலம் பெருமானார் (ஸல்) அவர்களின் வாழ்க்கை முறையை வழிகாட்டுதலாகக் கொண்டு இந்த சமூகத்தை அவ்வப்போது பயிற்றுவிக்க கூடிய அற்புதமான கொள்கையை, சித்தாந்தத்தை, பாரம்பரியத்தைக் கொண்ட மார்க்கம் இஸ்லாம்..

அல்லாமா இக்பால் அவர்கள் எழுதிய தேசியகீதம் ....

سارے جہاں سے اچھا ہندوستاں ہمارا 

ہم بلبلیں ہیں اس کی یہ گلستاں ہمارا 

غربت میں ہوں اگر ہم رہتا ہے دل وطن میں 

سمجھو وہیں ہمیں بھی دل ہو جہاں ہمارا 

پربت وہ سب سے اونچا ہم سایہ آسماں کا 

وہ سنتری ہمارا وہ پاسباں ہمارا 

گودی میں کھیلتی ہیں اس کی ہزاروں ندیاں 

گلشن ہے جن کے دم سے رشک جناں ہمارا 

اے آب رود گنگا وہ دن ہے یاد تجھ کو 

اترا ترے کنارے جب کارواں ہمارا 

مذہب نہیں سکھاتا آپس میں بیر رکھنا 

ہندی ہیں ہم وطن ہے ہندوستاں ہمارا 

یونان و مصر و روما سب مٹ گئے جہاں سے 

اب تک مگر ہے باقی نام و نشاں ہمارا 

کچھ بات ہے کہ ہستی مٹتی نہیں ہماری 

صدیوں رہا ہے دشمن دور زماں ہمارا 

اقبالؔ کوئی محرم اپنا نہیں جہاں میں 

معلوم کیا کسی کو درد نہاں ہمارا

பொருள்:

ஒட்டுமொத்த உலகை விட அழகானது என் இந்தியா

எங்கள் அது,அதன் கானக்குயில்கள் நாங்கள்

அந்நிய பூமியில் இருக்க நேர்ந்தாலும் எங்கள் மனம் அன்னை தேசத்திலேயே அமர்ந்திருக்கும்

மனமுள்ள இடத்திலே தான் மனிதர்களாகிய நாங்களும் இருப்போம் ?

வானுக்கு அண்டைவீட்டுக்காரனான உயர்ந்த அந்த மலை

அதுவே எங்களின் காவலாளி,அதுவே எங்கள் வாசல் பாதுகாவலன்.

அவள் மடியில் பல்லாயிரம் வருடங்களாகப் பாய்ந்து விளையாடுகின்றன நதிகள்

சொர்க்கம் பொறாமை கொள்ளும் தோட்டம் எங்களுடைய தேசம்

நீரோடும் கங்கை நதியே ! நினைவில் இருக்கின்றவனவா அந்நாட்கள் ?

உன் கரையில் எங்கள் மூடிய வண்டிகள் இறங்கிய அந்நாட்கள் ?

மதங்கள் எங்களுக்குள் பகையைப் போதிக்கவில்லை

நாங்கள் இந்தியர்கள்,இது இந்தியா

கிரேக்கம்,எகிப்து,பைஜான்டியம் உலகைவிட்டு அழிந்து போயின

எங்கள் பெயரும்,அடையாளமும் இன்னமும் உயிர்த்திருக்கிறது

காலச் சுழற்சி மட்டுமே எங்களுக்கான காலன்

இக்பால் ! நமக்கான உற்ற நண்பன் உலகிலில்லை

யாருக்கேனும் மறைந்திருக்கும் நம் வலி தெரியுமா ?

காரிருள் கவ்விடாமல் இந்தியாவை காப்போம்.! தேச ஒற்றுமையை நிலை நாட்டுவோம்.!

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான் 06/12/2022

இலஞ்சம் தவிர்ப்பீர்...

இன்றைய  விஞ்ஞான யுகத்தில் உலகம் நவீன கண்டுபிடுப்புகளில் அசுர வளர்ச்சி கண்டுவரும், அதே வேலையில் குற்றச்செயல்களும்,மனிதஉரிமை மீறல்களும்,பொருளாதர மோசடிகள்,கொள்ளை,வட்டி, ஊழல், லஞ்ச லாவண்யங்களும் பெருகி மனித இனம் அழிவை நோக்கி மிக வேகமாக நகர்ந்துக்கொண்டிருக்கின்றது.  ​​

பொருளாதார குற்ற செயல்களில் மிக மோசமான குற்றம் இலஞ்சம் ஆகும். லஞ்சம், ஊழல்... எங்கு, யாரால், எப்போது தொடங்கியது என்பவை விடைதேட முடியாத கேள்விகள்தான். ஆனால், அவை புற்றுநோயைப்போல பரவி, இன்றைக்கு சமூகத்தைப் பாதிக்கும் முக்கியப் பிரச்னையாக உருவெடுத்து நிற்கிறது. சாமான்யன் தொடங்கி நாடு வரை வளர்ச்சி, முன்னேற்றத்திற்கு தடைக்கல்லாக மாறிவிட்டன. ஒவ்வொரு தனிமனிதனையும் பாதிக்கும் ஊழல், சமூகத்தின் ஆணிவேர் வரை புரையோடிக் கிடக்கிறது

லஞ்ச ஊழல் என்பது இந்தியாவில் மட்டுமன்றி அனைத்து உலக நாடுகளிலும் பெரும் பிரச்சினையாக உருவெடுத்துள்ளது. லஞ்சம்,ஊழல் காரணமாக அனைத்து நாடுகளினதும் ஜனநாயகம் பாதிப்படைகின்றது. இதனால் பாரிய பிரச்சனைகளை ஒவ்வொரு நாடுகளும் எதிர்கொண்டு வருகின்றன. சிறு ஊழல் கூட அரசினைப் பெரிதும் பாதிக்கின்றது.

இத்தகைய ஊழலானது தீராத நோயாகவே சமூகத்தில் இன்று வரை வளர்ந்து கொண்டிருக்கின்றது.

"முன்பெல்லாம் கடமையை மீறுவதற்குத்தான் லஞ்சம் கொடுக்க வேண்டிய நிலை இருந்தது. ஆனால் தற்போது, கடமையைச் செய்யவே லஞ்சம் தரவேண்டிய அவலநிலை ஏற்பட்டதுதான் மிகவும் வேதனையான விஷயம். இப்படி சமூகத்தில் அடி ஆழம் வரை ஊடுருவியுள்ளது.   

இஸ்லாத்தின் பார்வையில் லஞ்சம்:

மஜ்மஉல்-பிஹார் என்ற நூலில் , அல்லாமா ஃபித்னி (ரஹ்)அவர்கள் "இலஞ்சம்"குறித்த விளக்கத்தில்: "லஞ்சத்தின் அர்த்தம், அதிகாரத்தில் உள்ள ஒருவருக்கு ஒருவர் தனது நியாயமற்ற கோரிக்கைகளை நிறைவேற்றுவதற்காக(அ)தவறான நோக்கத்தோடு  ஏதாவது ஒன்றை வழங்குவதாகும்."எனக் குறிப்பிடுகிறார்கள் ۔(مجمع البحاربحوالہ علامہ سیدسلیمان ندوی)

லஞ்சம் வாங்குவதற்கும் கொடுப்பதற்கும் தடை.

وَتَرٰى كَثِيْرًا مِّنْهُمْ يُسَارِعُوْنَ فِى الْاِثْمِ وَالْعُدْوَانِ وَاَكْلِهِمُ السُّحْتَ‌  لَبِئْسَ مَا كَانُوْا يَعْمَلُوْنَ‏ 

அவர்களில் பெரும்பாலோர் பாவத்திலும், அக்கிரமத்திலும் விலக்கப்பட்ட பொருள்களை உண்பதிலும் விரைந்து செயல்படுவதை (நபியே!) நீர் காண்பீர். அவர்கள் செய்வதெல்லாம் தீமையேதாம்.(அல்குர்ஆன் : 5:62)

இஸ்லாத்தில் லஞ்சம் வாங்குவது அறவே தடுக்கப்பட்டுள்ளது. யாரிடம் அதிகாரம் கொடுக்கப்பட்டுள்ளதோ அவர்களுக்கு முறையாக ஊதியம் அளிக்கப்படுகிறது. அவர்கள் எந்தப் பணியைச் செய்வதற்காக நியமிக்கப்பட்டார்களோ அந்தப் பணியைச் செய்து கொடுக்க மக்களிடம் பெறப்படும் கையூட்டுதான் லஞ்சம் எனப்படும்.   

குடும்ப அட்டை, பாஸ்போர்ட் போன்ற அத்தியாவசியங்களுக்குக்கூட லஞ்சம் வாங்குகிறார்கள். தொழில்களுக்கும் கட்டடங்கள் கட்டவும் அனுமதி அளிக்க லஞ்சம் வாங்குவது சர்வசாதாரணமாகி விட்டது. முஸ்லிம்கள் இது போன்ற பொறுப்புகளில் இருந்தால் அவர்கள் ஒருபோதும் லஞ்சம் வாங்கக் கூடாது.

அல்லாஹ்வின் தூதர் கண்மணி நாயகம் ﷺஅவர்கள் லஞ்சத்தின் தீங்குகள், லஞ்சம் வாங்குபவர்கள், லஞ்சம் கொடுப்பவர்களைக் குறித்து கடும் எச்சரிக்கை செய்துள்ளார்கள்.

عن عبد الله بن عمرو رضي الله عنهما قال: "لعن رسول الله صلى الله عليه وسلم الراشي والمرتشي" [رواه الترمذي]، 

அப்துல்லாஹ் பின் உமர் (ரலி) அவர்கள் அறிவிக்கிறார்கள்:நபி  ﷺஅவர்கள் கூறினார்கள் " லஞ்சம் வாங்குபவர்,லஞ்சம் கொடுப்பவர் இருவரையும் அல்லாஹ்வின் தூதர் நபி (ஸல்) அவர்கள் சபித்துள்ளார்கள். (நூல்;இப்னு மாஜா )

فقد قال صلى الله عليه وسلم:الراشي والمرتشي في النار. رواه الطبراني بسند جيد من حديث بن عمر.

 மற்றொரு ஹதீஸில், அப்துல்லாஹ் பின் உமர் (ரலி) அவர்களிடமிருந்து அறிவிக்கப்பட்டுள்ளது, அல்லாஹ்வின் தூதர்  ﷺஅவர்கள் கூறினார்கள், "லஞ்சம் வாங்குபவர் மற்றும் கொடுப்பவர் இருவரும் நரகத்தில் நுழைவார்கள். (தப்ரானி)

குர்ஆனில் லஞ்சத்தின் தீமைகள் பற்றி...

திருக்குர்ஆனில்   "லஞ்சம் தடை" என  தெளிவாகக் குறிப்பிடும் வசனம்.

وَلَا تَاْكُلُوْٓا اَمْوَالَـكُمْ بَيْنَكُمْ بِالْبَاطِلِ وَتُدْلُوْا بِهَآ اِلَى الْحُـکَّامِ لِتَاْکُلُوْا فَرِيْقًا مِّنْ اَمْوَالِ النَّاسِ بِالْاِثْمِ وَاَنْـتُمْ تَعْلَمُوْنَ‏

அன்றியும், உங்களுக்கிடையில் ஒருவர் மற்றவரின் பொருளைத் தவறான முறையில் சாப்பிடாதீர்கள்; மேலும், நீங்கள் அறிந்து கொண்டே பிற மக்களின் பொருள்களிலிருந்து(எந்த) ஒரு பகுதியையும், அநியாயமாகத் தின்பதற்காக அதிகாரிகளிடம் (இலஞ்சம் கொடுக்க) நெருங்காதீர்கள்.    (அல்குர்ஆன் : 2:188)

அல்லாமா இப்னு கஸீர்(ரஹ்)அவர்கள், இந்த வசனத்தின் விளக்கத்தில் எழுதுகிறார்கள்; ஒருவருக்கு உரிமையுள்ள பொருளோ,சொத்தோ அது அவருக்குரியது என்பது உறுதியாக தெரிந்து, உரிமையாளரிடம் அதற்கான ஆதாரம் இல்லாமல் இருப்பதால், அவரின் இந்த பலவீனத்தை தனக்குச் சாதகமாக பயன்படுத்திக் கொண்டு நீதிபதிக்கோ, அல்லது அதிகாரிக்கோ லஞ்சம் கொடுத்து,மற்றவர்களின் உரிமைகளை அபகரித்தல், இது அநியாயமும்  மற்றும் ஹராமும் ஆகும்,இதனை நீதிமன்றத்தால் அநியாயம் என்றோ,ஹராம் என்றோ சட்டப்பூர்வமாக நியாயப்படுத்தவும்  முடியாது, இந்த அடக்குமுறையாளர், அல்லாஹ்வின் பார்வையில் குற்றவாளியாக இருப்பார்.(ابن کثیر)

 தஃப்ஸீர் மஆரிஃபுல் குர்ஆனின் ஆசிரியர், முஃப்தி முஹம்மது ஷஃபி (ரஹ்)அவர்கள், மேலே குறிப்பிட்ட வசனத்தின் விளக்கத்தில் ஹலால் மற்றும் ஹராம் காரணங்களை விளக்கி எழுதுகிறார்கள்: இஸ்லாத்தில் எதனை குற்றம் என்றோ,தீயவை என்றோ,பாவம் என்றோ கூறப்பட்டுள்ளதோ,அவை அனைத்துமே ஏதோ ஓர் விதத்தில் அடுத்தவருக்கு இடையூறாக அமையும், சில நேரங்களில் அடுத்தவரை ஏமாற்றுவதாக இருக்கும்,  சில சமயங்களில் இன்னொருவரின் உரிமையை பறிக்கலாம், சில சமயங்களில் ஒருவருக்கு தீங்கு செய்து லாபம் பெறப்படலாம், சில சமயம் பொது உரிமைகளை சட்டவிரோதமாக தனதாக்கிக்கொள்ளலாம். 

வட்டி,லஞ்சம் இதுப்போன்ற ஹராம்களால் பெரும்பாலானோர் பாதிக்கப்படுகின்றனர். ஒரு சிலர் வளர்கிறார்கள். முழு தேசமும் திவாலாகி விடுகின்றது, ஆட்சியாளர்களின் சம்மதத்துடன்  இதுபோன்ற விஷயங்கள் நடந்தாலும் ஹலாலாக ஆகாது, ஏனெனில் இது முழு உம்மத்துக்கும் எதிரான குற்றமாகும், மேற்கண்ட வசனத்தில் இந்த சட்டவிரோத சூழ்நிலைகள் அனைத்தும் விளக்கப்படுகிறது. (معارف القرآن:۱/۴۵۹)

இந்த வசனத்தின் படி லஞ்சம் தடை என்பது தெளிவாக விளங்குகிறது, ஏனெனில் லஞ்சம் என்பது பொது உரிமைகளை நேரடியாக பாதிக்கும் ஒரு செயலாகும், இதன் காரணமாக, உரிமையாளரின் உரிமைகள் பறிக்கப்படுகிறது.

லஞ்சம் பெற வழிகாட்டுபவனும்,  உதவுபவனும் சபிக்கப்பட்டவர்களே!

இஸ்லாத்தின் பார்வையில் லஞ்சம் வாங்குவதும் கொடுப்பதும் எப்படி சபிக்கப்பட்டதோ, நரகத்திற்குரியதோ, அதேபோல், லஞ்சதிற்கு துணைபோகக்கூடியவரும் ஹதீஸின் வெளிச்சத்தில் சபிக்கப்பட்டவர். 

روى الإمام أحمد عن ثوبان قال: لعن رسول الله الراشي والمرتشي والرائش.

ஹஸ்ரத் தவ்பான் (ரலி)அவர்கள் அறிவிக்கின்றார்கள்: அறிவிக்கப்பட்டுள்ளது. "அல்லாஹ்வின் தூதர்  ﷺஅவர்கள் " லஞ்சம் வாங்குபவன், கொடுப்பவன், லஞ்சதிற்கு வழிகாட்டுபவன் அனைவரையும்" சபித்தார்கள். (நூல்:அஹ்மத்,தப்ரானி)

ஹஸ்ரத் அப்துல்லாஹ் இப்னு மஸ்வூத் (ரலி)அவர்கள் கூறுகிறார்கள்: நீதிபதி,  எவரிடமாவது அவருக்கு ஆதரவாக முடிவெடுக்க  லஞ்சம் வாங்குவது குஃப்ருக்கு  (அவநம்பிக்கைக்கு) சமம் என்றும், சாமானியர்கள் ஒருவருக்கொருவர் லஞ்சம் வாங்குவது "சுஹுத்" என்றும், அதாவது ஹராம் (தடைசெய்யப்பட்டது) மற்றும் தூய்மையற்ற  சம்பாதியமாகும்.(தபராணி) 

இஸ்லாமிய உம்மத்தின் ஏகோபித்த கருத்து "லஞ்சம் ஹராமாகும்". 

அகராதியில், "லஞ்சம்" என்பதன் பொருள்: ஒருவருக்கு தமது  நோக்கத்தை நிறைவேற்றுவதற்காக வழங்கப்படும் கையூட்டு , அந்த நோக்கம் அனுமதிக்கப்பட்டதாக இருந்தாலும் சரி,அனுமதிக்கப்படாததாக இருந்தாலும் சரி; 

அதனால்தான் இமாம் அபு சுலைமான் அல்-கத்தாபி(ரஹ்)அவர்கள் மேற்கூறிய ஹதீஸிற்கு  இப்படி விளக்கம் எழுதுகிறார்கள்: "லஞ்சம் வாங்குபவர், கொடுப்பவர் இருவரும் பாவம் மற்றும் தண்டனைக்கு ஆளாக நேரிடும், 

காரணம் இரண்டு செயல்களின் நோக்கமும் பொய்யான மற்றும் அநீதிக்கு ஆதரவளிப்பதாகும், ஒருவருக்கு அநீதம் இழைப்பது அல்லது ஒருவரின் உரிமையை   மீறுவது. 

(எ.க,) ஒரு நபர் ஷரிஅத் சட்டப்படி எந்த உரிமையும் இல்லாத ஒரு பொருளை லஞ்சம் கொடுத்து தனதாக்கிக்கொள்ள முடியும்  , அல்லது அடுத்தவரின் சொத்தையோ,அடுத்தவருக்கு சொந்தமான பொருளையோ அவரிடம் தகுந்த சான்றுகள் இருந்தாலும் அதனை  லஞ்சம் கொடுத்து அநியாயமாக அபகரித்துக் கொள்ள முடியும். , இதனால் அதன் உண்மையான உரிமையாளர் உரிமை இழக்க நேரிடும்.

மேற்கண்ட ஹதீஸின்படி, இந்த லஞ்சம் சந்தேகத்திற்கு இடமின்றி சாபத்திற்கு காரணம்.என்பது தெளிவாகிறது.

அதே போல், லஞ்சம் வாங்குபவர் எச்சரிக்கப்படுவதற்கு காரணம்; ஷரீஅத்தின்படி(கடமையை செய்ய) கடமையான  உரிமைக்கோ, செயலுக்கோ லஞ்சம் வாங்கும்போது, ​​அல்லது ஆகுமாகாததை  செய்யும் போது, ​​அதனால் இன்னொருவருக்கு தீங்கு ஏற்படுகிறது. லஞ்சம் வாங்குபவருக்கு பாதிப்பு ஏற்படாத வரை , அவர் தனது தவறான செயலைக் கைவிடத் தயாராகுவதில்லை.

எனவே மேற்கண்ட ஹதீஸின் படி, லஞ்சம் வாங்குபவர் சபிக்கப்பட காரணமாகிறார்.

ஆனால், ஒருவன் தனக்குக் கிடைக்கக்வேண்டிய நியாயமான உரிமையை கூட , லஞ்சம் கொடுக்காமல் பெற முடியாது , அல்லது தனக்கான உரிமை தாமதிக்கப்பட்டு அதனால் அசாதாரணமான கஷ்டங்களைச் சந்திக்க நேரிடும், அல்லது அநியாயக்காரனின் அநீதத்திலிருந்து தப்பிப்பதற்காக லஞ்சம் கொடுப்பது இதுபோன்ற சந்தர்ப்பங்களில் லஞ்சம் கொடுப்பது நிர்பந்தமாக அனுமதிக்கப்படும். ஆனால் தம் கடமைகளில்  நேர்மையாக இருப்பதென்பது அவசியமாகும்.

அதேபோல்,  ஒருவர் தன் தேவைக்காக அதிகாரியையோ அல்லது ஆட்சியாளரையோ சந்திக்க வேறொரு நபர் உதவிபுரிகிறார் அத்தகைய நபர் மூலம் ஆட்சியாளரை அணுகினால் இந்தப் பணிக்கு எந்தப் பொறுப்பும் இல்லாத ஒருவர் சேவைக்கான உரிமையாக ஏதாவது ஒன்றைப் பெற்றால், அது கூடும்.   ஏனென்றால் அது தவறான செயலுக்கு  ஆதரவாகவோ, யாருக்கும் அநீதியாகவோ இல்லை.மேலும்  ஷரிஅத் சட்டப்படி இந்த வேலையைச் செய்வது அவருக்குக் கடமையாக இல்லாமல் இருக்க வேண்டும் ஆனால்  எந்த வெகுமதியும் பெறாமல் இருப்பதே   நன்மையை பெற்றுத்தரும் காரியமாகும்.

அல்லாஹ்வின் தூதர்ﷺஅவர்கள் கூறினார்கள்:சிபாரிசு செய்யுங்கள், உங்களுக்கு வெகுமதி கிடைக்கும். அனுபவப்பூர்வமான உண்மை, லஞ்சம் கொடுக்க வேண்டிய விரும்பத்தகாத சூழ்நிலைகளில், கொடுப்பவர் நிர்பந்திக்கப்படுத்தப்படுகிறார், ஆனால் பெறுபவர் நிர்பந்திக்கப்படுத்தப்படுவதில்லை.

லஞ்சமும்,யூதர்களின் பழக்கமும்.           

அல்லாமா செய்யத் சுலைமான் நத்வி(ரஹ்)அவர்கள் இஸ்லாம் வருவதற்கு  முன்பு "ஜாஹிலிய்யா" அறியாமை காலத்தில் லஞ்சம் வாங்கும் நடைமுறையை வெளிச்சம் போட்டுக் காட்டி எழுதுகிறார்கள் , அரேபிய யூத பாதிரிகள் சில சமயங்களில் அமானுஷ்ய சக்தியின் அடிப்படையில் முடிவெடுப்பார்கள், இதன் நோக்கம் மக்கள் அவர்களுக்கு உடல்  உழைப்பு அல்லது லஞ்சமாக சில காணிக்கைகளை வழங்கவேண்டும்  என்றும் , அவர்கள் அதை "ஹல்வான்"(இனிப்பு) என்று அழைத்தனர், இஸ்லாம் வந்ததற்குப் பின் இந்த மாயைகள்  ஒழிந்தன.

நபிகள் நாயகம் ﷺஅவர்கள் பாதிரியாரின் ஹல்வானை குறிப்பாக தடை செய்தார்கள்.

(ترمذی،باب ماجاء فی کراہیة مہرالبغی)                       

அதே போல அரபகத்தில் யூதர்களின் வழக்குகள் அவர்களின் பாதிரிகளாலும், தலைவர்களாலும் தீர்ப்பளிக்கப்பட்டுக்கொண்டிருந்தது. சட்டம்,நீதிக்கு புறம்பாக தண்டனையிலிருந்து தப்பிப்பதற்காக, பணக்காரர்களும், செல்வாக்குள்ளவர்களும் வெளிப்படையாக லஞ்சம் கொடுப்பார்கள், அவர்களின் பாதிரியார்களும் நீதிபதிகளும் இந்த லஞ்சத்தைப் பெற்றுக்கொண்டு, அவர்களுக்கு சாதகமாக தீர்ப்புகளை வழங்கினர்.அது மட்டுமல்லாமல், அவர்கள்  "தோரா" தவராத்தின் சட்டங்களுக்கு மாற்றம் செய்து கொண்டிருந்தனர்.(صحیح بخاری)  

ஏனெனில் அவர்களிடம்  "லஞ்சம்" என்பது தோராவின் சட்டங்களில் திரிபுபடுத்தப்படுவதற்கான முக்கிய காரணங்களில் ஒன்றாகும்.இதனையே திருக்குர்ஆன் வசனம் இப்படி மேற்கோள் காட்டுகிறது :

اِنَّ الَّذِيْنَ يَكْتُمُوْنَ مَآ اَنْزَلَ اللّٰهُ مِنَ الْکِتٰبِ وَ يَشْتَرُوْنَ بِهٖ ثَمَنًا قَلِيْلًا ۙ اُولٰٓٮِٕكَ مَا يَاْكُلُوْنَ فِىْ بُطُوْنِهِمْ اِلَّا النَّارَ وَلَا يُکَلِّمُهُمُ اللّٰهُ يَوْمَ الْقِيٰمَةِ وَلَا يُزَکِّيْهِمْ  وَلَهُمْ عَذَابٌ اَ لِيْمٌ‏

எவர், அல்லாஹ் வேதத்தில் அருளியவற்றை மறைத்து அதற்குக் கிரயமாக சொற்பத் தொகை பெற்றுக் கொள்கிறார்களோ, நிச்சயமாக அவர்கள் தங்கள் வயிறுகளில் நெருப்பைத் தவிர வேறெதனையும் உட்கொள்ளவில்லை; மறுமை நாளில் அல்லாஹ் அவர்களிடம் பேசவும் மாட்டான்; அவர்களைப் பரிசுத்தமாக்கவும் மாட்டான்; அவர்களுக்குத் துன்புறுத்தும் வேதனையும் உண்டு.(அல்குர்ஆன் : 2:174)

"வயிற்றில் நெருப்பை நிரப்புவது" என்பது, ஹராமான சம்பாத்தியமான லஞ்சம் என்று பொருள்படும்.

 - وَحَدَّثَنِي مَالِكٌ، عَنِ ابْنِ شِهَابٍ، عَنْ سُلَيْمَانَ بْنِ يَسَارٍ : أَنَّ رَسُولَ اللَّهِ (ﷺ) كَانَ يَبْعَثُ عَبْدَ اللَّهِ بْنَ رَوَاحَةَ إِلَى خَيْبَرَ، فَيَخْرُصُ بَيْنَهُ وَبَيْنَ يَهُودِ خَيْبَرَ، قَالَ : فَجَمَعُوا لَهُ حَلْياً مِنْ حَلْي نِسَائِهِمْ فَقَالُوا : هَذَا لَكَ وَخَفِّفْ عَنَّا وَتَجَاوَزْ فِي الْقَسْمِ. فَقَالَ عَبْدُ اللَّهِ بْنُ رَوَاحَةَ : يَا مَعْشَرَ الْيَهُودِ، وَاللَّهِ إِنَّكُمْ لَمِنْ أَبْغَضِ خَلْقِ اللَّهِ إِلَيَّ، وَمَا ذَاكَ بِحَامِلِي عَلَى أَنْ أَحِيفَ عَلَيْكُمْ، فَأَمَّا مَا عَرَضْتُمْ مِنَ الرُّشْوَةِ فَإِنَّهَا سُحْتٌ، وَإِنَّا لاَ نَأْكُلُهَا. فَقَالُوا : بِهَذَا قَامَتِ السَّمَوَاتُ وَالأَرْضُ(159).

 நபிகள் நாயகம்ﷺஅவர்கள்  காலத்தில் கைபர் யூதர்களுடன் சமரசம் ஏற்பட்டு பாதி நிலத்தை பிரித்து தருவதென முடிவானது. நிலத்தை  பிரிக்கும் நேரம் வந்ததும்   ஹஸ்ரத் அப்துல்லாஹ் இப்னு ரவாஹா(ரலி)அவர்களை  நபிﷺஅவர்கள் கைபர் யூதர்களிடம் அனுப்பினார்கள். 

அப்துல்லாஹ் ஹிப்னு ரவாஹா(ரலி)அவர்கள் இடத்தை இரண்டு பங்குகளாக பிரித்து அதில் விருப்பமான பகுதியை எடுத்துக் கொள்ளுமாறு யூதர்களிடம் கூறினார்கள். அவர்களோ தங்களின்  பழக்கத்தின்படி அவர்களுக்கு லஞ்சம் கொடுக்க விரும்பி, அவர்களுக்கிடையே நன்கொடையாகப் பெண்களின் நகைகளில் சிலவற்றைச் சேகரித்து, அதை ஏற்றுக் கொள்ளச் சொன்னார்கள், அதற்கு ஈடாக விநியோகத்தில் தமது பங்கை அதிகரிக்கக்கேட்டுக்கொண்டார்கள்.

இதனைக் கேட்ட அப்துல்லாஹ் ஹிப்னு ரவாஹா( ரலி)அவர்கள்;   "யூதர்களே!இறைவனின் மீது ஆணையாக , இறைவனின் அனைத்து படைப்பினங்களிலும் நீங்கள்  எனக்கு மிகவும் வெறுக்கப்பட்டவர்கள், ஆனால் இது உங்களை ஒடுக்குவதற்கு என்னை(ஒருபோதும்)தூண்டாது, மேலும் நீங்கள் லஞ்சமாக வழங்கியது (ஹராம்)தடைசெய்யப்பட்டுள்ளது, நாங்கள் (முஸ்லிம்கள்) அதை சாப்பிட மாட்டோம்,என்று சொன்னார்கள்.

யூதர்கள் அவருடைய பேச்சைக் கேட்டு விட்டுச் சொன்னார்கள் . , "இதுவே நீதி (நியாயம்)." இவர் போன்றவர்களாலே  வானங்களும் பூமியும் நிலைத்திருக்கின்றன."                          (موطاامام مالک،کتاب المساقاة)

தற்காலத்தில் எங்கும் லஞ்சம்,எதிலும் லஞ்சம்...

எங்கும் லஞ்சம்,எதிலும் நெஞ்சம்  என்று கூறும் அளவுக்கு,  சமூகத்தை பிடித்திருக்கக் கூடிய கொள்ளை நோயாக லஞ்சம் வியாபித்து இருக்கக்கூடிய இன்றைய காலகட்டத்தில் லஞ்சத்தைத் தவிர்த்து கொள்ள  என்ன செய்வது  என்ற  ஒரு கேள்வி இங்கு எழுகிறது, இதற்கு நேர்மையான,எளிதான பதில் என்னவென்றால், மேற்கூறிய ஹதீஸ்கள் மற்றும் குர்ஆன் வசனங்களின் வெளிச்சத்தில், வட்டி,லஞ்சம் போன்ற ஒவ்வொரு பரிவர்த்தனையும் ஷரியாவுக்கு எதிரானது, மேலும் யாரோ ஒருவர் கொலை செய்வதற்கும், சட்ட விரோத செயல்களில் ஈடுபடுவதற்கும்  எது கொடுக்கப்பட்டாலும் அது லஞ்சத்தின் கீழ் வரும்.

லஞ்சம் கொடுப்பது  எப்போது ஆகுமாக்கப்படும்?

இதற்கு மார்க்கவிர்ப்பன்னர்கள், ஒரு சட்டத்தை வரையறுத்துள்ளார்கள்:

லஞ்சம் கொடுக்கவில்லை என்றால், உயிரிழப்பு அல்லது பண இழப்பு ஏற்படும் என்கிற  அச்சமிருப்பின் கூடும்.

அதுபோல் நியாயமற்ற அதிகாரி அவருக்கு லஞ்சம் கொடுக்காமல் தனக்கான உரிமையை கூடப்பெறமுடியாது,தன் உரிமையை இழக்க நேரிடும் என்று இருந்தால் கொடுக்கலாம்.

 كتب علامہ ابن نجیم رحمه الله :       ”اَلرِّشْوَةُ لِخَوْفٍ عَلیٰ نَفْسِہ أوْ مَالِہ أوْ لِیُسَوِّيَ أمْرَہ عِنْدَ السُّلْطَانِ أوْ أمِیْرٍ“ (ردالمحتار:۴/۳۴۰ بحوالہ جدیدفقھی مسائل:۱/۳۰۰)

அல்லாமா இப்னு நஜிம(ரஹ்)அவர்கள் எழுதுகிறார்கள்:

"லஞ்சம்"உயிர் மீதுள்ள,செல்வத்தின் மீதுள்ள பயத்திற்காக  அல்லது அரசர்,ஆட்சியாளரின் தவறான  தீர்ப்பை சரிசெய்வதற்காக (கூடும்)" (ரத்துல்முக்தார்: 4/340)

உயிர்,பொருள் பற்றிய பயம் காரணமாகவும், சுல்தான் அல்லது அமீருக்கு  லஞ்சம் கொடுக்கும் நிர்பந்தமிருந்தால் தம்மிடம் நல்லமுறையில் நடந்துக்கொள்வதற்காக லஞ்சம் கொடுக்க விலக்கு அளிக்கப்படுகிறது.

உயிர்,உடமை காக்க லஞ்சம்:

தற்கால ஃபிக்ஹ்கலை வல்லுநர் (ஃபகீஹுல் அஸ்ர்)அல்லாமா  மௌலானா காலித் ஸைஃபுல்லாஹ் ரஹ்மானி  ஹழ்ரத் அவர்கள்; லஞ்சம் கொடுப்பது,வாங்குவது ஹராம் ஆகும் காரணிகளையும்,இக்கட்டான சூழ்நிலையில் லஞ்சம் அனுமதிக்கப்படுமா?என்பதனை  இப்னு நஜிம் (ரஹ்)அவர்கள் எழுதிய தொகுப்பை மேற்க்கோள் காட்டி எழுதுகிறார்கள்: 

 "லஞ்சம் வாங்குவது எப்படி தடை செய்யப்பட்டுள்ளதோ, அதே போல, கொள்கையளவில் லஞ்சம் கொடுப்பதும் தடைசெய்யப்பட்டுள்ளது. இது சம்பந்தமாக, சட்ட வல்லுநர்களின் ஒருமித்த கருத்துயாதெனில், "எதனை வாங்குவது கூடாதோ அதனை கொடுப்பதும் கூடாது."”مَاحَرُمَ أخْذُہٗ حَرُمَ اعْطَائُہٗ“ என்பது பொதுச்சட்டம் ஆகும்.

லஞ்சம் வாங்குவது ஒரு போதும் நிர்ப்பந்தமாக முடியாது என்பதாலும், சில சமயங்களில் லஞ்சம் கொடுப்பது நிர்ப்பந்தமாகிவிடுவதாலும், தேவை மற்றும் நிர்ப்பந்தம் போன்ற சந்தர்ப்பங்களில் லஞ்சம் கொடுக்க சட்ட வல்லுநர்கள் அனுமதித்துள்ளனர்.

இதற்கு நபிகள் நாயகம் ﷺஅவர்களின் ஓர் நடவடிக்கை எடுத்துக்காட்டாக உள்ளது. நபிﷺ அவர்கள் சில சமயங்களில் தீய கவிஞர்களுக்கு ஏதாவது கொடுப்பார்கள், அதனால் அவர்கள் முட்டாள்தனமான கவிதைகளை பாடுவதை தடுப்பதற்காகவும், என்று கூறப்படுகிறது. முஸ்லிம்களை இழிவுபடுத்தி கவிப்பாடுவதை தடுக்கவும்.இவ்விதம் செய்வார்கள்.

ஜகாதை வசூலிப்பவர் பரிசு  அல்லது அன்பளிப்பை  ஏற்றுக்கொள்வது.

 நபிகள் நாயகம்ﷺ அவர்கள் ஜக்காத்தை வசூலிப்பவர் அன்பளிப்பையோ, பரிசையோ பெறுவதை தடை செய்தார்கள்.

عن أبي حُمَيد عبد الرحمن بن سعد السَّاعِدِي قال: استعمل النبي ـ صلى الله عليه وسلم ـ رجلاً من الأزْد يُقال له ” ابن اللُّتْبيَّة ” على الصَّدقة، فلمَّا قَدِم قال هذا لكم وهذا أُهدي إليَّ، فقام رسول الله ـ صلى الله عليه وسلم ـ على المِنْبر فحمِد الله وأثنى عليه ثم قال ” أما بعد، فإني أستَعْمل الرَّجل منكم على العمل مما ولَّاني الله فيأتي ويقول: هذا لكم وهذا هدية أهديت إلىَّ، أفلا جلس في بيت أبيه وأمه حتى تأتيَه هديَّته إن كان صادقًا، والله لا يأخذ أحد منكم شيئًا بغير حقِّه إلا لقيَ الله تعالى يحمله يوم القيامة، فلا أعرفنَّ واحدًا منكم لقي الله يحمل بعيرًا له رُغاء أو بقرة لها خُوار، أو شاة تَيْعَر “، ثم رفع يديْه حتى رؤى بياض إبطيه فقال ” اللهم هل بلَّغت ” (رواه البخاري ومسلم.) 

ஒரு தடவை ஜக்காத்தை வசூலிப்பவர் ஒருவர் இது ஜக்காத்துடைய பொருள்,இது எனக்கு அன்பளிப்பாக கிடைத்தது என்று கூறுவதை கேட்ட நபிகள் நாயகம் ﷺஅவர்கள் மிம்பரில் ஏறி,ஹம்து ஸலவாத்து கூறிய பின் இவ்விதம் உரை நிகழ்த்தினார்கள்;

  “நாம் அனுப்பும் வசூலிப்பவர் நிலை என்ன, அவர் வந்து, இது உன்னுடையது, இது என்னுடையது என்று சொல்கிறார்,

அவர் நேர்மையாளராக இருந்தால்  பரிசை பெரும் வரை தம்  தாய்,தந்தையர்  வீட்டில் அமர்ந்துக் கொண்டு பரிசை பெற முடியுமா என பார்க்கலாம்.

என் உயிர் எவன் கைவசம் உள்ளதோ அவன் மீது ஆணையாக ,தனக்கு உரிமையில்லாமல் அவர்  எதைப் பெற்றாரோ அதை அவர் மறுமை நாளில் கழுத்தில் சுமந்து வருவார். உங்களில் எவரும் அறியமாட்டீர்கள் அவர் ஒட்டகத்தையோ, மாட்டையோ, ஆட்டையோ,சுமப்பார்.

பின்னர் நபி (ஸல்) அவர்கள் தம் இரு கைகளையும் உயர்த்தி மூன்று முறை கூறினார்: "இறைவா! நான் உன்னிடம் எத்தி வைத்து விட்டேன்."                              (صحیح بخاری،باب ہدایاالعمال)

ஊழலில் ஊறிப்போனவர்கள்.

பணம் பத்தும் செய்யும், பணம் என்றால் பிணமும் வாயைத் திறக்கும் என்ற பழமொழிக்கேற்ப இன்றைய அரசியல் தலைவர்கள் முதல் படிப்பறிவில்லாத பாமரர்கள் வரை இருக்கின்றனர். வேலியே பயிரை மேயும் கதையாக, மக்களின் பாதுகாவலர்களாக விளங்க வேண்டியவர்களே அவர்களின் இரத்தத்தை உறிஞ்சும் அபாயம் இன்றைய சூழலில் ஏற்பட்டுள்ளது.

அரசியல் தலைவர்கள் முதல் அரசாங்க உத்தியோகத்தில் இருக்கும் அடிமட்ட ஊழியர்கள் வரை ஊழலும், இலஞ்சமும் அவர்களை விட்டபாடில்லை. மக்களின் உயிருக்கும். உடைமைக்கும் பாதுகாவலர்களாக விளங்கும் காவல் துறையினர்களும் இதற்கு விதிவிலக்கில்லை. இதன் உச்சகட்டம் என்னவெனில் இலஞ்ச ஒழிப்பு துறையினரே இலஞ்சம் வாங்கும் அவலநிலை.

இதற்காகப் போர்க்கொடி தூக்கினால், ‘யார் தான் ஊழல் செய்யவில்லை. ஊழலில்லாத அரசியலா? ஊழலில்லாத இந்தியாவை உருவாக்குவோம் என்று சொல்வதற்கு நன்றாக இருக்கும்; ஆனால் செயல்படுத்த இயலாது’ என்று இன்றைய அரசியல்வாதிகள் வசனம் பேசுகின்றனர்.

இந்த இடத்தில் அமர்ந்து பாருங்கள் என்றும், ஊழலில்லாத அரசியல்வாதி ஒருவரைக் காட்டுங்கள் என்றும் கூறி, தாங்கள் செய்யும் குற்றங்களுக்கு குற்றம் புரியும் தலைவர்களின் பட்டியலை ஆதாரமாகக் காட்டுகின்றனர். ஊழலற்ற அரசியலுக்கு முன்னோடியாக எந்த அரசியல்வாதியையும் தற்போது காணமுடிவதில்லை. ஊழலை ஒழிப்போம் என்று கூறுபவர்களின் மீதும் ஊழல் குற்றச்சாட்டு என்று கூறுமளவிற்கு ஊழலில் இந்தியா மிக முக்கிய இடத்தை பிடித்துள்ளது.

நேர்மையான ஆட்சியாளர்களை உருவாக்குதல்.

عَنْ جَابِرِ بْنِ عَبْدِ اللهِ رَضِيَ اللهُ عَنْهُمْ قَالَ : قَالَ النَّبِيُّ صَلَّى اللهُ عَلَيْهِ وَسَلَّمَ

لَوْ قَدْ جَاءَ مَالُ الْبَحْرَيْنِ قَدْ أَعْطَيْتُكَ هَكَذَا وَهَكَذَا وَهَكَذَا . فَلَمْ يَجِئْ مَالُ الْبَحْرَيْنِ حَتَّى قُبِضَ النَّبِيُّ صَلَّى اللهُ عَلَيْهِ وَسَلَّمَ ، فَلَمَّا جَاءَ مَالُ الْبَحْرَيْنِ أَمَرَ أَبُو بَكْرٍ فَنَادَى : مَنْ كَانَ لَهُ عِنْدَ النَّبِيِّ صَلَّى اللهُ عَلَيْهِ وَسَلَّمَ عِدَةٌ ، أَوْ دَيْنٌ فَلْيَأْتِنَا ، فَأَتَيْتُهُ فَقُلْتُ : إِنَّ النَّبِيَّ صَلَّى اللهُ عَلَيْهِ وَسَلَّمَ قَالَ لِي كَذَا وَكَذَا ، فَحَثَى لِي حَثْيَةً ، فَعَدَدْتُهَا ، فَإِذَا هِيَ خَمْسُمِائَةٍ ، وَقَالَ : خُذْ مِثْلَيْهَا

ஜாபிர் பின் அப்தில்லாஹ் (ரலி) அவர்கள் கூறியதாவது: ‘‘பஹ்ரைன் நாட்டிலிருந்து (ஸகாத்) பொருட்கள் வந்தால் உமக்கு இன்னின்ன பொருட்களைத் தருவேன்!” என்று நபி (ஸல்) அவர்கள் என்னிடம் கூறியிருந்தார்கள். அவர்கள் இறக்கும்வரை பஹ்ரைனிலிருந்து பொருட்கள் வரவில்லை. அபூபக்ர் (ரலி) அவர்களின் ஆட்சியில் பஹ்ரைனிலிருந்து பொருட்கள் வந்தபோது, ‘‘நபி (ஸல்) அவர்கள் யாருக்காவது வாக்களித்திருந்தால் அல்லது யாரிடமாவது கடன்பட்டிருந்தால் அவர் நம்மிடம் வரட்டும்!’’ என்று அபூபக்ர் (ரலி) அவர்கள் பிரகடனப்படுத்தினார்கள்.

நான் அவர்களிடம் சென்று நபி (ஸல்) அவர்கள் எனக்கு இன்னின்ன பொருட்களைத் தருவதாகக் கூறியிருந்தார்கள்! என்றேன்.  அபூபக்ர் (ரலி) அவர்கள் எனக்குக் கை நிறைய நாணயங்களை அள்ளித் தந்தார்கள். அதை நான் எண்ணிப் பார்த்தபோது ஐநூறு நாணயங்கள் இருந்தன. இது போல் இன்னும் இரண்டு மடங்குகளை எடுத்துக்கொள்வீராக! என்று அபூபக்ர் (ரலி) அவர்கள் கூறினார்கள்.                 (நூல்: புகாரி-2296)

வறுமையிலும் வாரி வழங்கிய மாமனிதர்.

உணவு, உடை, இருப்பிடம், மருத்துவச் செலவுகள் உட்பட அனைத்தும் மக்கள் வரிப்பணமாகிய அரசு கருவூலத்திலிருந்து கோடி கோடியாக அரசியல்வாதிகளுக்கு செலவழிக்கப்படுகின்றது. இது தவிர இலஞ்சம் மற்றும் ஊழலின் மூலமும் அவர்கள் சொத்துக்களை சேர்த்துக் கொண்டனர்.

மக்களின் நலன் காக்கத் தவறி தன்னலனையும், தன் குடும்பத்தினரின் நலனையும் மட்டுமே கவனத்தில் கொண்டு மக்களிடம் தாங்கள் கொடுத்த வாக்குறுதியையும் மறந்த சுயநலவாதிகளாகவும், பச்சோந்திகளாகவுமே இன்றுள்ள அரசியல்வாதிகள் உள்ளனர். விதை விதைக்காமல் அவர்கள் அறுவடையை மட்டுமே செய்கின்றனர். இதில் படிக்காத முட்டாள்களும், படித்த பட்டதாரி அரசியல்வாதிகளும் அடங்குவர். இப்படிப்பட்ட அரசியல் தலைமை நாட்டு மக்களுக்குக் கிடைத்த சாபக்கேடு. அவர்கள் போடும் சட்ட திட்டங்களெல்லாம் சாமானிய மக்களின் மீது அடக்குமுறையாகவும், அவர்களின் அடிவயிற்றில் அடிக்கக் கூடியவையாகவுமே உள்ளன.

மக்களால் நான் மக்களுக்காகவே நான், ஊழலை ஒழிக்கவே மக்கள் என்னைத் தேர்ந்தெடுத்துள்ளனர் என்று கூறுவதற்கு இப்போதுள்ள அரசியல்வாதிகளில் எவருக்கும் அருகதை கிடையாது. அனைவருமே பசுத்தோல் போர்த்திய புலிகளாகவும், மக்களின் இரத்தத்தை உறிஞ்சுகின்ற அட்டைப் பூச்சிகளாகவுமே உள்ளனர்.

ஆனால் அல்லாஹ்வின் தூதர் (ஸல்) அவர்களோ அரசியல் தலைமை, ஆன்மீகத் தலைமை ஆகிய இரண்டு தலைமைகளிலிருந்தும் இவற்றைப் பயன்படுத்தி அவர்கள் எதையும் தமக்காகச் சேர்க்கவில்லை என்பதே வரலாறு சொல்லும் உண்மை.

கேட்டவருக்கெல்லாம் அரசுக் கருவூலத்திலிருந்து வாரி வாரி வழங்கிய மாமனிதர் நபிகள் நாயகம் (ஸல்) அவர்கள் தமக்காகவோ தமது குடும்பத்திற்காகவோ அதிலிருந்து எந்த ஒன்றையும் எடுத்துக் கொள்ளவில்லை என்பதற்கு கீழ்க்கண்ட ஹதீஸ்கள் சிறந்த எடுத்துக்காட்டுகளாகும்.

حَدَّثَنَا عُبَيْدُ اللهِ بْنُ مُعَاذٍ الْعَنْبَرِيُّ، حَدَّثَنَا أَبِي، حَدَّثَنَا شُعْبَةُ، عَنْ مُحَمَّدٍ وَهُوَ ابْنُ زِيَادٍ، سَمِعَ أَبَا هُرَيْرَةَ، يَقُولُ

أَخَذَ الْحَسَنُ بْنُ عَلِيٍّ تَمْرَةً مِنْ تَمْرِ الصَّدَقَةِ، فَجَعَلَهَا فِي فِيهِ،   فَقَالَ رَسُولُ اللهِ صَلَّى اللهُ عَلَيْهِ وَسَلَّمَ: «كِخْ كِخْ، ارْمِ بِهَا، أَمَا عَلِمْتَ أَنَّا لَا نَأْكُلُ الصَّدَقَةَ؟»

அபூஹுரைரா (ரலி) அவர்கள் கூறியதாவது: (நபியவர்களின் பேரரான) ஹசன் பின் அலீ (ரலி) அவர்கள், தர்மப் பேரீச்சம் பழங்களில் ஒன்றை எடுத்து வாயில் போட்டார். இதைக் கண்ட அல்லாஹ்வின் தூதர் (ஸல்) அவர்கள் “சீ…சீ… கீழே போடு; நாம் தர்மப் பொருளைச் சாப்பிடக்கூடாது என்பது உனக்குத் தெரியாதா?’’ என்றார்கள்.    (நூல்.முஸ்லிம்-(1939)

சுயமரியாதையோடு வாழ கற்றுக்கொள்ளுங்கள்.

அபூ ஸயீத் அல்குத்ரீ(ரலி) அறிவித்தார். அன்சாரிகளில் சிலர் இறைத்தூதர்(ஸல்) அவர்களிடம் (பசிக்கு உணவும் செலவுக்குப் பணமும்) கேட்டார்கள். அவ்வாறு கேட்ட யாருக்குமே நபி(ஸல்) அவர்கள் கொடுக்காமல் இருக்கவில்லை. இறுதியாக, நபியவர்களிடம் இருந்த அனைத்தும் தீர்ந்துவிட்டது. தம் கரங்களால் செலவிட்டு எல்லாப் பொருட்களும் தீர்ந்து போன பின்பு அந்த அன்சாரிகளிடம் நபி(ஸல்) அவர்கள் 'என்னிடம் உள்ள எச்செல்வத்தையும் உங்களுக்கு வழங்காமல் நான் சேமித்து வைக்கப் போவதில்லை. (இருப்பினும்) சுயமரியாதையோடு நடப்பவரை அல்லாஹ் சுயமரியாதையுடன் வாழச் செய்வான். (இன்னல்களைச்) சுமப்பவருக்கு அல்லாஹ் மேலும் சகிப்புத் தன்மையை வழங்குவான். பிறரிடம் தேவையாகாமல் (தன்னிறைவுடன்) இருப்பவரை அல்லாஹ் தன்னிறைவு உள்ளவராக ஆக்குவான். பொறுமையைக் காட்டிலும் மேலான விசாலமானதோர் அருட்கொடை (வேறெதும்) உங்களுக்கு வழங்கப்படவில்லை' என்று கூறினார்கள். (ஸஹீஹ் புகாரி (6470)

உழைத்து வாழ்வோம்.

ஹகீம் பின் ஹிஸாம் (ரலி) அவர்கள் கூறியதாவது:நான் நபி (ஸல்) அவர்களிடம் (உதவி) கேட்டேன். அவர்கள் எனக்கு வழங்கினார்கள்; மீண்டும் (உதவி) கேட்டேன் வழங்கினார்கள். மீண்டும் கேட்டேன்; வழங்கிவிட்டு,  ‘‘ஹகீமே! நிச்சயமாக இந்தச் செல்வம் பசுமையானதும் இனிமையானதுமாகும். யார் இதைப் போதுமென்ற உள்ளத்துடன் எடுத்துக்கொள்கிறாரோ அவருக்கு இதில் வளம் ஏற்படுத்தப்படும்; யார் இதைப் பேராசையுடன் எடுத்துக்கொள்கின்றாரோ அவருக்கு அதில் வளம் ஏற்படுத்தப்படாது. அவன் உண்ட பின்பும் வயிறு நிரம்பாதவன் போலாவான். உயர்ந்த கை தாழ்ந்த கையைவிடச் சிறந்தது’’ என்று கூறினார்கள். அப்போது நான், ‘‘அல்லாஹ்வின் தூதரே! உங்களைச் சத்தியத்துடன் அனுப்பிவைத்தவன் மீதாணையாக! உங்களுக்குப் பின் உலகைப் பிரியும்வரை வேறு யாரிடமும் நான் எதையும் கேட்க மாட்டேன்’’ எனக் கூறினேன்.

அபூபக்ர் (ரலி) அவர்கள் (தமது ஆட்சிக் காலத்தில்) ஸகாத் பெறுமாறு ஹகீமை அழைத்தார்கள். அவர் அதை ஏற்றுக்கொள்ள மறுத்துவிட்டார். பிறகு உமர் (ரலி) அவர்கள் (தமது ஆட்சியில்) ஸகாத் பெறுமாறு அவரை அழைத்தார்கள். அவர் எதையும் ஏற்க மறுத்தார். அப்போது உமர் (ரலி) அவர்கள் ‘‘முஸ்லிம் சமுதாயமே! தமது உரிமையைப் பெற்றுக்கொள்ளுமாறு நான் ஹகீமை அழைக்கிறேன். அவரோ அதைப் பெற்றுக்கொள்ள மறுக்கிறார். இதற்கு நீங்களே சாட்சி!’’ எனக் கூறினார்கள். ஹகீம் (ரலி) அவர்கள் நபி (ஸல்) அவர்களுக்குப் பின் வேறு யாரிடமும் தாம் மரணிக்கும் வரை எதையும் கேட்கவேயில்லை என சயீத் பின் அல்முஸய்யப் (ரஹ்) அவர்கள் கூறுகிறார்கள்.

(நூல்: புகாரி-1472 )

அல்லாஹுத்தஆலா, இந்த சமூக தீமையிலிருந்து நம்மையும்,நம் சமூகத்தையும்  பாதுகாப்பானாக! (ஆமீன்) 

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.