ஜும்ஆ பயான்.26/08/2022

இஸ்லாமிய பார்வையில் ஸஃபர் மாதம்.

  وَعِنْدَهٗ مَفَاتِحُ الْغَيْبِ لَا يَعْلَمُهَاۤ اِلَّا هُوَ‌ؕ وَيَعْلَمُ مَا فِى الْبَرِّ وَالْبَحْرِ‌ؕ وَمَا تَسْقُطُ مِنْ وَّرَقَةٍ اِلَّا يَعْلَمُهَا وَلَا حَبَّةٍ فِىْ ظُلُمٰتِ الْاَرْضِ وَلَا رَطْبٍ وَّلَا يَابِسٍ اِلَّا فِىْ كِتٰبٍ مُّبِيْنٍ‏

மறைவானவற்றின் திறவுகோல்கள் அவனிடமே உள்ளன. அவனைத் தவிர யாரும் அதை அறிய மாட்டார். தரையிலும், கடலிலும் உள்ளவற்றை அவன் அறிவான். ஓர் இலை கீழே விழுந்தாலும் அதை அவன் அறியாமல் இருப்பதில்லை. பூமியின் இருள்களில் உள்ள விதையானாலும்,  ஈரமானதோ காய்ந்ததோ ஆனாலும் தெளிவான ஏட்டில் இல்லாமல் இல்லை.(அல்குர்ஆன்:6:59.)

இஸ்லாமிய 12 மாதங்களில் இரண்டாவது மாதம் ஸஃபர்.அறியாமைக்கால அரபுகளிடம் இம்மாதம் மோசமானதாகக் கருதப்பட்டது.

ஆனால் முஸ்லிம்கள் இதை சஃபர்-உல்-கைர் அல்லது சஃபர்-உல்-முழஃப்பர் (வெற்றியின் மாதம்) என்று அழைக்கின்றனர். 

இந்த மாதம் அறியாமைக்கால அரபுகளிடம் (ஜாஹிலிய்யாவில்)துர்சகுனமாகக் கருதப்பட்டது.இம்மாதம் வானத்திலிருந்து ஆபத்துகளையும், பேரழிவுகளைக் கொண்டுவரும் என்பது அவர்களின் மூடநம்பிக்கை. 

ஜாஹிலிய்யா மக்கள் இந்த மாதத்தில் மகிழ்ச்சியான வைபவங்களை (திருமணம், பயணம், பரிவர்த்தனைகள்) செய்வதை மோசமானதாகக் கருதினர், 

அறியாமைக்கால அரபுகளின் இந்த மூடபழக்கம் வாழையடி வாழையாக இஸ்லாமியர்களிடமும் தொற்றிக்கொண்டது வேதனையான விஷயமாகும்.

சஃபர் மாதத்திற்கான பெயர் காரணம்.

சஃபர் என்றால் "காலியாக இருப்பது" என்று பொருள். ஜாஹிலியா காலத்தில், சஃபர் மாதம் அபசகுனமாக கருதப்பட்டது, 

மேலும் இது "சஃபர் அல்-மகன்" என்றும் அழைக்கப்பட்டது, அதாவது வீடுகளை காலி செய்யும் மாதம்,ஏனெனில் மூன்று புனித மாதங்களுக்குப் பிறகு (ஜுல்-கஃதா, ஜுல்-ஹிஜ்ஜா, முஹர்ரம்) இந்த மாதத்தில் வீடுகள் காலி செய்து.போர்தளவாடப் பொருட்களை எடுத்துக் கொண்டு அவர்கள் சண்டையிடுவதற்கும், கொலை செய்வதற்கும் போர்க்களத்திற்குச் செல்வார்கள்.

இந்த அழிவு மற்றும் அழிவுக்கான உண்மையான காரணத்தை கவனித்து அதைத் தவிர்ப்பதற்குப் பதிலாக, அரேபியர்கள் இந்த மாதத்தை துரதிர்ஷ்டம், பேரழிவுகள் மற்றும் பிரச்சனைகளின் மாதமாக நம்பினர்.( تفسیر ابن کثیر)

அறியாமை ஜாஹிலிய்யா காலத்தில் ஸஃபர் மாதம் பற்றிய கோட்பாடுகள்.

சஃபர் மாதத்தில் அரேபியர்கள் இரண்டு பெரிய தீமைகள் செய்தனர்:

1.சந்திர மாத கணக்கை  முன்னும் பின்னுமாக மாற்றுதல்

மக்கா முஷ்ரிக்குகள், புனித மாதங்களில் போர்செய்வது தடை என்பதால் முஹர்ரம் மாதத்தை ஸஃபர் என்றும் ஸஃபரை முஹர்ரம் ஆக மாற்றியும் போர்ப்புரிந்தனர்.

இன்னும் சில வருடங்கள் முஹர்ரம் மாதத்தை தடை செய்து ஸஃபரிலிருந்து வருடத்தை துவக்கி 11 மாதங்களாக அறிவிப்புச்செய்து சந்திர மாதக்கணக்கை மாற்றிவிடுவார்கள். முஹர்ரம் ஒரு புனித மாதமாகும், அதில் போர் செய்வது தடைசெய்யப்பட்டது. (துல்கஅதா, துல்ஹிஜ், முஹர்ரம் ஆகிய மூன்று புனித மாதங்களாகும்), இந்த மூன்று மாதங்களில் முஷ்ரிக்குகள் சண்டையிடுவது மிகவும் கடினமாக  இருந்ததால், அவர்கள் இப்படி ஒரு காரியத்தை செய்தனர்.

(سعیدی، تبیان القرآن، جلد: 5، ص: 133)

2. சஃபர் மாதத்தை அபசகுனமாக கருதினர்.

முஷ்ரிக்குகள் சஃபர் மாதத்தை அசுபமாக கருதினர்.சண்டை,கொலை போன்ற காரணங்களால் நிகழும் இழப்புகளால் வீடுகள் காலியாகி துன்பங்களையும் சிரமங்களையும் சந்திக்க நேரிடும்.என அதற்கு காரணம் கூறினர்.அவர்கள் செய்த செயல்களை சரி செய்யாமல் சஃபர் மாதத்தை அசுபமாக கருதினர்.

குர்ஆன் மற்றும் ஹதீஸ் வெளிச்சத்தில் சஃபர் மாதம்.

குர்ஆனின் ஒளியில்:

مَاۤ اَصَابَكَ مِنْ حَسَنَةٍ فَمِنَ اللّٰهِ‌ وَمَاۤ اَصَابَكَ مِنْ سَيِّئَةٍ فَمِنْ نَّـفْسِكَ‌  وَاَرْسَلْنٰكَ لِلنَّاسِ رَسُوْلًا‌  وَكَفٰى بِاللّٰهِ شَهِيْدًا‏

உனக்குக் கிடைக்கும் எந்த நன்மையும் அல்லாஹ்விடமிருந்தே கிடைக்கிறது; இன்னும், உனக்கு ஏதாவது ஒரு தீங்கு ஏற்பட்டால் அது உன்னால் தான் வந்தது; (நபியே!) நாம் உம்மை மனிதர்களுக்கு (இவற்றை எடுத்துக் கூறுவதற்காகத்) தூதராகவே அனுப்பியுள்ளோம் - (இதற்கு) அல்லாஹ்வே போதுமான சாட்சியாக இருக்கின்றான்.(அல்குர்ஆன் : 4:79)

اِنَّ عِدَّةَ الشُّهُوْرِ عِنْدَ اللّٰهِ اثْنَا عَشَرَ شَهْرًا فِىْ كِتٰبِ اللّٰهِ يَوْمَ خَلَقَ السَّمٰوٰتِ وَالْاَرْضَ مِنْهَاۤ اَرْبَعَةٌ حُرُمٌ‌  ذٰ لِكَ الدِّيْنُ الْقَيِّمُ ۙ فَلَا تَظْلِمُوْا فِيْهِنَّ اَنْفُسَكُمْ‌  وَقَاتِلُوا الْمُشْرِكِيْنَ كَآفَّةً كَمَا يُقَاتِلُوْنَكُمْ كَآفَّةً‌   وَاعْلَمُوْۤا اَنَّ اللّٰهَ مَعَ الْمُتَّقِيْنَ‏

நிச்சயமாக அல்லாஹ்விடத்தில் அல்லாஹ்வுடைய (பதிவுப்) புத்தகத்தில் வானங்களையும் பூமியையும் படைத்த நாளிலிருந்தே மாதங்களின் எண்ணிக்கை பன்னிரண்டு ஆகும் - அவற்றில் நான்கு (மாதங்கள்) புனிதமானவை; இது தான் நேரான மார்க்கமாகும் - ஆகவே அம்மாதங்களில் (போர் செய்து) உங்களுக்கு நீங்களே தீங்கிழைத்துக் கொள்ளாதீர்கள்; இணை வைப்பவர்கள் உங்கள் அனைவருடனும் போர் புரிவது போல் புரியுங்கள். நிச்சயமாக அல்லாஹ் பயபக்தியுடையோருடனேயே இருக்கின்றான் என்பதை அறிந்து கொள்ளுங்கள்.(அல்குர்ஆன் : 9:36) 

ஹதீஸ் ஒளியில்:

عن ابی هریرة قال قال النبی لا عدوی ولا صفر ولا هامة.

(صحیح البخاری، کتاب الطب، باب الهامة، رقم: 5770، دارالمعرفة بیروت)

தொற்றுநோய் என்பது கிடையாது. பறவைகளைக்கொண்டு சகுனம் பார்ப்பதும் ஆந்தையால் சகுனம் பார்ப்பதும் கிடையாது. ‘ஸஃபர்’ மாதம் பீடை என்பதும் கிடையாது. சிங்கத்திடமிருந்து நீ எப்படி வெருண்டோடுவாயோ அப்படி தொழுநோயாளியிடமிருந்து வெருண்டோடு.. அபூஹுரைரா (ரலி)  புகாரி 5707,

عن أبي هريرة رضي الله عنه قال: قال رسول الله صلى الله عليه وسلم: ((لا عدوى، ولا صفر، ولا هامة))، فقال أعرابي: يا رسول الله، فما بال الإبل تكون في الرمل كأنها الظباء، فيجيء البعير الأجرب فيدخل بينها فيُجربُها كلها؟! قال: ((فمن أعدى الأول؟

நபி (ஸல்) அவர்கள் 'தொற்று நோய் கிடையாது; ஸஃபரும் கிடையாது; (இறந்தவரின் எலும்பு ஆந்தையாக மாறிப் பறப்பதாகக் கருதும்) ஆந்தை பற்றிய நம்பிக்கையும் உண்மையல்ல' என்று கூறினார்கள்.

அப்போது கிராமவாசி ஒருவர், 'இறைத்தூதர் அவர்களே! (பாலை) மணலில் மான்களைப் போன்று (ஆரோக்கியமாக) இருந்த ஒட்டகங்களுக்கிடையே சிரங்கு பிடித்த ஒட்டகம் கலந்து அவற்றையும் சிரங்கு பிடித்தவையாக ஆக்கிவிடுகின்றனவே?' என்று கேட்டதற்கு இறைத்தூதர் (ஸல்) அவர்கள் , 'முதல் ஒட்டகத்திற்கு (அதை)த் தொற்றச் செய்தது யார்?' என்று (திருப்பிக்) கேட்டார்கள். (அறிவிப்பவர்: அபூஹுரைரா (ரழி), நூல்: புஹாரி 5717, முஸ்லிம் 2220

ஸஃபர் மாதமும், தவறான எண்ணங்களும்

காலங்கள் மாறினாலும் காட்சிகள் மாறுவதில்லை என்று சொல்வதைப் போல அறியாமைக்கால இப்பழக்கம் இன்றைய நவீன யுக சில இஸ்லாமியர்கள் வரை ஸஃபர் பீடை மாதமாக கருத்தப்பட்டு வருகின்றது.

இன்றைய சில இஸ்லாமியர்கள்,ஸஃபர் மாதத்தில் திருமணம் போன்ற சுப காரியம் செய்யவதில்லை.திருமணமான பெண்ணை புகுந்த வீட்டிற்கு அனுப்புவதில்லை,பயணம் செய்வதில்லை.இம்மாததில் தொழில் துவங்குவதையும்,கொடுக்கல் வாங்கலையும் அபசகுனமாக கருதி தள்ளிப்போடுகின்றனர். 

"மக்கள் சஃபர் மாதத்தை அசுபமாக கருதுகிறார்கள், அவர்கள் திருமணம் செய்ய மாட்டார்கள், அவர்கள் பெண்களை அனுப்ப மாட்டார்கள்,பயணத்தைத் தவிர்க்கிறார்கள்." குறிப்பாக சஃபர் மாதத்தின் முதல் பதிமூன்று தினங்கள் மிகவும்  துற்சகுனமாக கருதப்படுகின்றன, அவை பதின்மூன்று நோன்புகள் என்று அழைக்கப்படுகின்றன, இவை அனைத்தும் அறியாமையின் வெளிப்பாடாகும்.

ஷாஹ் அப்துல் ஹக் முஹத்தித் தெஹ்லவி(ரஹ்)அவர்களின்

"இஸ்லாமிய மாதங்களின் சிறப்புகள்", எனும் நூலில்  எழுதப்பட்டுள்ளது, 

இது ( சஃபர் மாதம்) பேரழிவுகள், விபத்துக்கள் மற்றும் பேரழிவுகளின் மாதமாக மக்கள் கருதுகின்றனர், இந்த நம்பிக்கை தவறானது மற்றும் அதில் உண்மை இல்லை.

(اسلامی مهینوں کے فضائل، ص: 44)

ஸஃபர் மாதம் பீடை கிடையாது.

இறைத்தூதர்(ஸல்) அவர்கள் கூறினார்கள்' தொற்றுநோய் கிடையாது. பறவை சகுனம் ஏதும் கிடையாது. ஆந்தை சகுனம் ஏதும் கிடையாது. 'ஸஃபர்' மாதம் பீடை என்பதும் கிடையாது. என அபூ ஹுரைரா(ரலி) அறிவித்தார். (84 ஸஹீஹ் புகாரி (5757)

அபூ ஹுரைரா(ரலி) கூறினார் இறைத்தூதர்(ஸல்) அவர்கள் 'தொற்று நோய் கிடையாது. 'ஸஃபர்' தொற்று நோயன்று; ஆந்தையால் சகுனம் பார்ப்பதும் கிடையாது' என்று கூறினார்கள். 

அப்போது கிராமவாசியொருவர், 'இறைத்தூதர் அவர்களே! (பாலை) மணலில் மான்களைப் போன்று (ஆரோக்கியத்துடன் துள்ளித் திரியும்) என் ஒட்டகங்களிடம் சிரங்கு பிடித்த ஒட்டகம் வந்து அவற்றிற்கிடையே கலந்து அவற்றையும் சிரங்கு பிடித்தவையாக ஆக்கிவிடுகின்றனவே! அவற்றின் நிலையென்ன (தொற்று நோயில்லையா)?' என்று கேட்டார். 

அதற்கு நபி(ஸல்) அவர்கள், 'அப்படியென்றால் முதல் (முதலில் சிரங்கு பிடித்த) ஒட்டகத்திற்கு (அந்த நோயைத்) தொற்றச் செய்தது யார்?' என்று திருப்பிக் கேட்டார்கள். (ஸஹீஹ் புகாரி( 5717)

மூடநம்பிக்கையில் உலகம்.

எட்டு என்பது இந்தியாவில் கெட்ட எண் என்றால் பதிமூன்று மேல்நாட்டினருக்கு அலர்ஜிக்குரிய எண். பதிமூன்று என்னும் எண் இயேசுவைக் காட்டிக் கொடுத்த யூதாஸைக் குறிப்பதாகவும் எனவே பதிமூன்று என்பது கெட்ட எண் என்பதும் மேல் நாட்டினரின் கருத்து. அதுவும் பதிமூன்றாம் தியதி வெள்ளிக்கிழமையாகி விட்டால் அது படு பயங்கரமான மோசமான நாளாம். காரணம் இயேசு சிலுவையில் அறையப்பட்டது ஒரு வெள்ளிக்கிழமை, நோவா காலத்தின் தண்ணீர் பெருக்கு ஆரம்பமானது ஒரு வெள்ளிக்கிழமை, ஆதாம் ஏவாள் ஏதேன் தோட்டத்திலிருந்து துரத்தப்பட்டது ஒரு வெள்ளிக்கிழமை என்று காரணங்கள் அடுக்கப்படுகின்றன.

ஸ்பெயின் நாட்டில் பதிமூன்றாம் தியதி செவ்வாய்க்கிழமை வந்து விட்டால் அன்று எந்த நல்ல செயல்களையும் செய்ய மாட்டார்கள். இத்தாலியில் பதின்மூன்றாம் எண்ணைப்போல பதினேழும் கெட்ட எண்ணாகக் கருதப்படுகிறது. அது மரணத்தைக் குறிப்பதாக அவர்கள் கருதுகிறார்கள்.

அமெரிக்கா உட்பட பல நாடுகளில் பெரும்பாலான கட்டிடங்கள் பதிமூன்றாவது மாடி இல்லாமலேயே கட்டப்படுகின்றன. ஏராளமான குடியிருப்புகளில் பதிமூன்றாம் எண் வீடுகளே இருக்காது. விமான நிலையங்களில் கூட பதிமூன்றாவது எண்ணுள்ள வாசல் பல விமான நிலையங்களில் இருப்பதில்லை.

மரத்தில் பேய் வசிக்கிறது என்பது ஏறக்குறைய எல்லா நாடுகளிலும் நம்பிக்கையாக இருந்திருக்கிறது. மரங்களைத் தட்டினால் அதனுள் இருக்கும் பேய் வெளியே வராது என்பது மேல்நாட்டு நம்பிக்கையாக இன்றும் நிலவுகிறது. இந்தியாவில் பெரும்பாலான இடங்களில் காடுகளிலிருந்து வெட்டி வரும் மரங்களை வீடுகளில் உபயோகப் பொருட்களாக்குவதற்கு முன் பேய் விரட்டும் பூஜை நடக்கிறது !

அமெரிக்கர்கள், அருகிலிருக்கும் யாராவது தும்மி விட்டால் ‘கடவுள் உங்களை ஆசீர்வதிப்பாராக’ என்பார்கள். தும்மும்போது ஆன்மா வெளியேற முயல்வதாகவும், கடவுள் உன்னை ஆசீர்வதிப்பாராக என்று சொல்லும்போது ஆன்மா மீண்டும் உடலுக்குள் செல்வதாகவும் அவர்கள் நம்பினார்கள்.

இங்கிலாந்தைப் பொறுத்தவ்ரை தும்மும் போதெல்லாம் அசுத்த ஆவி வெளியேறுவதாக ஆறாவது நூற்றாண்டு வரை நம்பப்பட்டது. பின் பிளேக் நோய் தாக்கிய காலத்தில் வலியுடம் தும்முபவர்கள் மரணத்தை நோக்கியிருப்பதாகக் கருதப்பட்டு அவர்களுக்காய் ‘கடவுள் உங்களை ஆசீர்வதிப்பாராக’ என்று வாழ்த்தத் துவங்கினர். இதன் மூலம் அவன் இறக்க நேரிட்டால் அவனுக்கு கடவுளின் ஆசீர்வாதம் கிடைத்து சுவர்க்கத்துக்குச் செல்வான் என்று நம்பப்பட்டது. தும்மும்போது வாழ்த்தும் வழக்கம் எகிப்தில் திபேரியுஸ் சீசரின் காலத்திலேயே வழக்கத்தில் இருந்ததாகவும் சில கதைகள் சொல்கின்றன.     

மூட நம்பிக்கையை முறியடித்த மாமறைக் குர்ஆன்.

உலக மக்களின் வாழ்வைக் கெடுக்கும் மூடநம்பிக்கைகளில் ஒன்று ஜோதிடம் ஆகும். நட்சத்திர ஜோசியம், எண் ஜோசியம், கிளி ஜோசியம், நாடி ஜோசியம், கைரேகை ஜோசியம் என்று பல்வேறு வகையிலான ஜோதிடக் கலைகள் மக்களுக்கு மத்தியில் உலவிவருகின்றன.

நம்முடைய எதிர்காலத்தையும் மறைவான விஷயங்களையும் ஜோதிடர் கண்டறிந்து விடுவார் என்ற நம்பிக்கையில் ஜோதிடர்களிடம் சென்று அவர்கள் கூறுவதை நம்பி தங்களுடைய எதிர்காலத்தையும், பொருளாதாரத்தையும் இழந்தவர்களின் எண்ணிக்கையை கணக்கிட்டுக் கூற இயலாது. இந்த ஜோதிடத்தை நம்பியவர்களில் அதிகமானோர் இதன் மூலம் ஏமாற்றப்பட்டு பாதிப்பிற்கு உள்ளாகியுள்ளனர். கற்பிழந்தவர்களின் எண்ணிக்கையும் மிக மிக அதிகமாகும்.

தமிழக அரசியல்வாதிகள், ஆட்சியாளர்கள் பலர் ஜோதிடர்களின் ஆலோசனைப்படியே தங்கள் செயல்பாடுகளை அமைத்துக் கொள்கின்றர். பச்சை நிறத்தில் சேலை அணிதல், மஞ்சள் நிறத்தில் துண்டு அணிதல், பெயரை நியூமராலஜி அடிப்படையில் மாற்றிக் கொள்வது, பெயரில் தேவையில்லாமல் ஓரிரு எழுத்துக்களை அதிகப்படுத்தி எழுதுவது, தோஷம் கழித்தல், பரிகார பூஜைகள் நடத்துதல் என இவர்களின் மூட நம்பிக்கைகளைப் பட்டியல் போட்டு மாளாது. பகுத்தறிவு வாதம் பேசுபவர்களும் இதில் அடக்கம்.

ஜோதிடர்களின் வசீகரமான  பேச்சுக்களை நம்பி சொத்துக்களையும், கற்பையும் இழந்தவர்கள், இழந்து கொண்டிருப்பவர்கள் ஏராளம் ஏராளம்.

அன்றாடம் வியர்வை சிந்தி உழைத்த உழைப்பால் கிடைத்த வருமானத்தைப் பெற்றோர்களுக்கும் மனைவி மக்களுக்கும் செலவிடாமல்  மது குடித்து சீரழிப்பவர்கள் ஒருபுறம் என்றால் அதற்கு நிகராக ஜோதிடர்களுக்கு அள்ளிக்கொடுத்து சீரழிப்பவர்கள் அதை விட அதிகம்.

மனித சமூகத்தில் ஒரு குறிப்பிட்ட பகுதியினர் மிகப் பெரும் பாதிப்பிற்குள்ளாவதற்குக் காரணம் இந்த ஜோதிட நம்பிக்கை தான். ஜோதிடத்தின் மீது நம்பிக்கை வைத்தவர்களுக்கு அதனால் ஏற்பட்ட பாதிப்புகள்தான் மிகமிக அதிகம்.

ஆனால் உண்மையான இறைவனிடமிருந்து அருளப்பட்ட திருமறைக்  குர்ஆன், இது மூடநம்பிக்கை என்பதைத் தெளிவாக எடுத்துரைப்பதுடன் மனித சமூகம் நிம்மதியான வாழ்வடைய திருக்குர்ஆன் தெளிவான வழிகாட்டுகிறது.

ஜோதிடம் என்ற மூடநம்பிக்கையை ஒழிப்பதற்குத் திருக்குர்ஆன் எடுத்துரைக்கும் அற்புதமான அடிப்படை ‘‘நாளை நடப்பதை இறைவன் ஒருவனைத் தவிர வேறுயாரும் அறிய முடியாது” என்ற கொள்கைப் பிகரடனம்தான்.

27:65   قُلْ لَّا يَعْلَمُ مَنْ فِى السَّمٰوٰتِ وَالْاَرْضِ الْغَيْبَ اِلَّا اللّٰهُ‌ؕ وَمَا يَشْعُرُوْنَ اَيَّانَ يُبْعَثُوْنَ‏

“வானங்களிலும், பூமியிலும் மறைவானதை அல்லாஹ்வைத் தவிர யாரும் அறிய மாட்டார்கள்.”(அல்குர்ஆன்:27:65.)

  وَعِنْدَهٗ مَفَاتِحُ الْغَيْبِ لَا يَعْلَمُهَاۤ اِلَّا هُوَ‌ؕ وَيَعْلَمُ مَا فِى الْبَرِّ وَالْبَحْرِ‌ؕ وَمَا تَسْقُطُ مِنْ وَّرَقَةٍ اِلَّا يَعْلَمُهَا وَلَا حَبَّةٍ فِىْ ظُلُمٰتِ الْاَرْضِ وَلَا رَطْبٍ وَّلَا يَابِسٍ اِلَّا فِىْ كِتٰبٍ مُّبِيْنٍ‏

மறைவானவற்றின் திறவுகோல்கள் அவனிடமே உள்ளன. அவனைத் தவிர யாரும் அதை அறிய மாட்டார். தரையிலும், கடலிலும் உள்ளவற்றை அவன் அறிவான். ஓர் இலை கீழே விழுந்தாலும் அதை அவன் அறியாமல் இருப்பதில்லை. பூமியின் இருள்களில் உள்ள விதையானாலும்,  ஈரமானதோ காய்ந்ததோ ஆனாலும் தெளிவான ஏட்டில் இல்லாமல் இல்லை.(அல்குர்ஆன்:6:59.)

பதிமூன்று நோன்பின் ஷரிஅத் சட்டம்.

ஸஃபர் முதல் பதிமூன்று தினங்கள்  மற்றும் இந்த மாதத்தின் கடைசி புதன் கிழமை பற்றி பல  மார்க்கத்திற்கு முரணான பித்அத்கள் சிலரிடம் காணப்படுகிறது,

உதாரணமாக, முதல் 13 தினங்களில்  கோதுமை வேகவைக்கப்பட்டு, குறிப்பிட்ட எண்ணிக்கையில் சூரா முஸ்ஸமில் ஓதப்பட்டு, அவ்வெண்ணிக்கைக்கேற்ப மாவு உருண்டைகள் கடற்கரையில் க ரைக்கப்படுகின்றன. அவற்றை  மீன்கள்  உண்பதால், ஸஃபர் மாதத்தில் ஏற்படும் துர்சகுனம்,   பேரிடர்களும் இவற்றைச் செய்வதன் மூலம் தவிர்க்கப்படும் என்ற எண்ணம் மக்களிடம் உள்ளது. பிரச்சனைகள் மற்றும் சோதனைகள் அல்லாஹ்விடமிருந்து வருபவையாகும் அவற்றுக்கென்று குறிப்பிட்ட நாள் அல்லது மாதம் கிடையாது. குர்ஆன் அல்லது  ஃபாத்திஹா ஓதுவது ஒரு முஸ்தஹப்பானசெயலாகும், 

மேலும் இது ஒவ்வொரு மாதத்தின் எந்த தேதியிலும் அனைத்து வகையான ஹலாலான வாழ்வாதாரத்திற்காகவும் ஓதலாம்.

ஆனால் ஸஃபர் மாதத்தில் பதிமூன்று நோன்பு நோற்பதற்கோ அல்லது குர்ஆன்,பாத்திஹா ஓதி கோதுமை உருண்டைகளை கடற்கரையில் கரைப்பதற்கோ இஸ்லாத்தில் எந்த அடிப்படை ஆதாரமும் இல்லை.  

ஒடுக்கத்து புதன் எனும் ஸஃபர் மாதத்தின் கடைசி புதன்கிழமை.

ஸஃபர் மாத பதிமூன்று தினங்களைத் தவிர, சஃபர் மாதத்தின் கடைசி புதன்கிழமையை ஒடுக்கத்து புதன் என  பல தவறான பித்அத்களில் ஈடுபடுகின்றனர், அதாவது, சஃபர் மாதத்தின் கடைசி புதன்கிழமை இந்தியாவில் ஒடுகத்து புதன் எனும் பெயரில்  கொண்டாடப்படுகிறது. 

அன்று தங்களின் அலுவல்களுக்கு விடுமுறை விட்டு, பொழுதுபோக்கிற்காக வெளியில் செல்கின்றனர், பூரிகள் சமைப்பார்கள், மகிழ்ச்சியைக் கொண்டாடுவார்கள், இதற்கு அவர்கள் கூறும் காரணம்  நபிகள் நாயகம் ஸல்லல்லாஹு அலைஹி வஸல்லம் அவர்கள் மரணித்தை தழுவிய அவ்வாண்டில் ஸஃபர் மாதம் நோய்வாய் படுகிறார்கள்.

கடைசி புதன் கிழமை எழுந்து  குளித்து விட்டு மதீனாவுக்கு வெளியே நடந்து சென்றார்கள் என்று கூறுகிறார்கள், இவை அனைத்தும் ஆதாரமற்றவை. , 

உண்மையில்  நபி (ஸல்) அவர்கள் அந்நேரம்  கடுமையாக நோய்வாய்ப்பட்டார்கள்.

சஃபர் மாதத்தில், துர்சகுனம் என நம்புவதும், ஆபத்துகள், ஜின்களின் இடர்கள் நிறைந்த மாதம் என கருதுவதும் இஸ்லாத்திற்கு முரணான செயலாகும். 

அல்லாஹுத்தஆலாவின் களா-கத்ரு எனும் விதியில் நிர்ணையிக்கப்பட்டவைகளைத் தவிர காலம்,நேரம் எந்த மாற்றத்தையும் செய்திட இயலாது.சஃபர் மாதமும் ஏனைய மாதங்களைப் போலவே ஒரு மாதமாகும், ஒருவர் இந்த மாதத்தில் ஷரியாவின் சட்டங்களைக் கடைப்பிடித்தால், இந்த மாதம் அவருக்கு பாக்கியமாகும், 

இந்த மாதத்தில் பாவம் செய்தால், அல்லாஹ்வின் வரம்புகளை மீறுவானேயானால்,  அவன் பாவியாகிவிடுவான்.பாவமே மனிதனின் பெரும் துர்சகுனமாகும்.

இறுதியாக...

இஸ்லாமிய நெறியை பின்பற்றுவதை விட்டும் இஸ்லாமியர்கள் தூரமாகும் போது தானாகவே அவர்கள்

மூடநம்பிக்கைகளுக்கும், கெட்ட சகுனங்களுக்கும் பலியாகின்றனர். அவை ஈமானை  பலவீனப்படுத்தி வழிகேடர்களாக அவர்களை மாற்றிவிடுகின்றது, (நவூதுபில்லாஹ்...)

அல்லாஹ் நம்மை தீயஅனாச்சாரங்களை விட்டும் பாதுகாத்து,இஸ்லாமிய நெறியை பின்பற்றி வாழும் நன்மக்களாக ஆக்கி அருள்வானாக!ஆமீன்..

வெளியீடு: செங்கல்பட்டு மற்றும் காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான் 19/08/2022

இஸ்லாம் கூறும் மத நல்லிணக்கம்.

ஒவ்வொரு ஆண்டும்  மத நல்லிணக்க தினம் முன்னாள் இந்தியப் பிரதமர் ராஜீவ் காந்தியின் பிறந்த தினமான ஆகஸ்ட் 20 -ம் தேதி கொண்டாடப்பட்டு வருகிறது.

இஸ்லாம் ஓர் இயற்கை மார்க்கம்.இஸ்லாம் மதமல்ல அது ஓர் அழகிய வாழ்வியல் முறையாகும்.

உலகமாந்தார்கள் யாவரும் ஒரு தாய்,தந்தையரின் பிள்ளைகள் ஆவார்கள்.உங்களுக்கிடையில் நிறம்,மொழி,இனம்,சமயம் என்கிற பேதங்கள் கிடையாது என்கிறது திருமறை...

يٰۤاَيُّهَا النَّاسُ اِنَّا خَلَقْنٰكُمْ مِّنْ ذَكَرٍ وَّاُنْثٰى وَجَعَلْنٰكُمْ شُعُوْبًا وَّقَبَآٮِٕلَ لِتَعَارَفُوْا‌  اِنَّ اَكْرَمَكُمْ عِنْدَ اللّٰهِ اَ تْقٰٮكُمْ‌  اِنَّ اللّٰهَ عَلِيْمٌ خَبِيْرٌ‏

மனிதர்களே! நிச்சயமாக நாம் உங்களை ஓர் ஆண், ஒரு பெண்ணிலிருந்தே படைத்தோம்; நீங்கள் ஒருவரை ஒருவர் அறிந்து கொள்ளும் பொருட்டு. பின்னர், உங்களைக் கிளைகளாகவும், கோத்திரங்களாகவும் ஆக்கினோம்; (ஆகவே) உங்களில் எவர் மிகவும் பயபக்தியுடையவராக இருக்கின்றாரோ, அவர்தாம் அல்லாஹ்விடத்தில், நிச்சயமாக மிக்க கண்ணியமானவர். நிச்சயமாக அல்லாஹ் நன்கறிபவன், (யாவற்றையும் சூழந்து) தெரிந்தவன்.(அல்குர்ஆன் : 49:13)

மதங்களை விடவும் மனிதாபிமானம் முக்கியமானது.தான் சார்ந்த சமயத்தின் பற்று அடுத்த சமயத்தவரின் மீது விரோதம் கொள்ளவோ,அவர்களை வெறுக்கவோ காரணமாக அமைந்து விடலாகாது என நல்லிணக்கம் போதிக்கிறது இஸ்லாம்...

يٰۤـاَيُّهَا الَّذِيْنَ اٰمَنُوْا كُوْنُوْا قَوَّا امِيْنَ لِلّٰهِ شُهَدَآءَ بِالْقِسْطِ‌ وَلَا يَجْرِمَنَّكُمْ شَنَاٰنُ قَوْمٍ عَلٰٓى اَ لَّا تَعْدِلُوْا‌  اِعْدِلُوْا هُوَ اَقْرَبُ لِلتَّقْوٰى‌ وَاتَّقُوا اللّٰهَ‌  اِنَّ اللّٰهَ خَبِيْرٌ بِمَا تَعْمَلُوْنَ‏

முஃமின்களே! நியாயத்தை நிலை நாட்டுவதற்காக அல்லாஹ்வுக்கு நீங்கள் உறுதியான சாட்சியாக இருங்கள், எந்த ஒரு கூட்டத்தார் மீதும் நீங்கள் கொண்டுள்ள வெறுப்பு நீதி செய்யாமலிருக்க உங்களைத் தூண்ட வேண்டாம். நீதி செய்யுங்கள்; இதுவே (தக்வாவுக்கு) - பயபக்திக்கு மிக நெருக்கமாகும்; அல்லாஹ்வுக்கு அஞ்சுங்கள்; நிச்சயமாக அல்லாஹ் நீங்கள் செய்பவற்றை(யெல்லாம் நன்கு) அறிந்தவனாக இருக்கின்றான்.(அல்குர்ஆன் : 5:8)

لَا خَيْرَ فِىْ كَثِيْرٍ مِّنْ نَّجْوٰٮهُمْ اِلَّا مَنْ اَمَرَ بِصَدَقَةٍ اَوْ مَعْرُوْفٍ اَوْ اِصْلَاحٍۢ بَيْنَ النَّاسِ‌ ؕ وَمَن يَّفْعَلْ ذٰ لِكَ ابْتِغَآءَ مَرْضَاتِ اللّٰهِ فَسَوْفَ نُـؤْتِيْهِ اَجْرًا عَظِيْمًا‏

தர்மம், நன்மையான காரியம், மக்களிடையே நல்லிணக்கம் ஏற்படுத்துதல் ஆகியவற்றை ஏவியதைத் தவிர அவர்களின் பெரும்பாலான பேச்சுக்களில் எந்த நன்மையும் இல்லை. அல்லாஹ்வின் திருப்தியை நாடி இவற்றைச் செய்பவருக்கு மகத்தான கூலியை வழங்குவோம்.          (அல்குர்ஆன் 4:114)     

ஒரு முஸ்லிம் பிற சமயத்தவர்களோடு நீதமாக நடந்துக்கொள்ளவேண்டும்.    விரோதம் பாராட்டலாகாது. மதவெறி,பிறசமய வெறுப்பு நீதமாக நடப்பதை விட்டும் தடுக்கும் என்கிறது அருள்மறையாம் திருமறை.

அண்ணலம் பெருமானார் ﷺ அவர்கள் மதீனாவிற்கு ஹிஜ்ரத் செய்து சென்றபோது, அங்கே யூதர்கள்,கிருத்துவர்கள்,சிலைவணக்கம்புரிபவர்களோடு இஸ்லாமியர்களும் சேர்ந்து வாழ்கின்றனர்.

பின்பு மதினாவின் ஆட்சி,அதிகாரம் நாயகம் ﷺஅவர்களின் ஆளுகைக்கு கீழ் வந்ததும்,அங்கு வாழ்ந்துவந்த வேற்று மதத்தவர்களை இஸ்லாமை ஏற்குமாரோ அல்லது மதினாவை விட்டும் வெளியேறும் படியோ நிர்பந்திக்கவில்லை.அவரவர் தம் மதவிருப்படி வாழ முழு சுதந்திரம் அளிக்கப்பட்டது.

இஸ்லாமியர்கள் மற்ற மதத்தவர்களோடு கொடுக்கல்,வாங்கலில் ஈடுப்பட்டனர்,அவர்களின் விருந்துகளில் பங்கெடுத்தனர்.மத பேதமின்றி நல்லிணக்கத்தோடு நடந்துக்கொண்டனர்.வேறுபட்ட கடவுள் கொள்கையுடையவர்களாக இருந்தாலும் அவர்களோடு சகோதர வாஞ்சையோடு பழகுமாறு இஸ்லாம் அறிவுறுத்துகின்றது.

இஸ்லாமிய ஆட்சியில் மத நல்லிணக்கம்.

இஸ்லாமிய ஆட்சியின் கீழ் வாழும் குடி மகன் என்ற வகையில், முஸ்லிமல்லாதாரின் உயிர் உடமைப் பாதுகாப்பு தொடர்பாகவும் (ஸல்) அவர்கள் வலியுறுத்தினார்கள், 

عن عبد الله بن عمرو عن النبي صلى الله عليه وسلم قال من قتل نفسا معاهدا لم يرح رائحة الجنة

'ஒப்பந்தத்தில் உள்ள ஒரு திம்மியை(முஸ்லிமல்லாதாரை) எவரேனும் கொலை செய்தால் அவர் சுவர்க்கத்தின் வாடையைக்கூட நுகர மாட்டார்' (புஹாரி, அபூதாவுத்)

மற்றுமொருமறை நபி (ஸல்) அவர்கள் கூறினார்கள்,

قول النبي صلى الله عليه وسلم: (ألا من ظلم معاهدًا أو انتقصه أو كلفه فوق طاقتِه أو أخذ منه شيئًا بغيرِ طيبِ نفسٍ فأنا حجيجُه يوم القيامةِ، 

 'யார் முஸ்லிமல்லாத ஒரு உடன்படிக்கை செய்திருக்கும்  திம்மிக்கு அநீதியிழைக்கிறாரோ அல்லது அவரது உரிமையைக் குறைக்கின்றாரோ, அல்லது அவரது சக்திக்கு மேல் பொறுப்புக்களை சுமத்துகின்றார்களோ அல்லது அவரது மன விருப்பின்றி ஏதேனுமொன்றை அவரிடமிருந்து பெறுகின்றாரோ அவருக்கெதிராக மறுமையில் நான் வாதிடுபவனாக இருப்பேன்' (அபூதாவுத்)

ஒரு தடவை எகிப்தில் கவர்னராக இருந்த அம்ரிப்னுல் ஆஸ் (ரழி) அவர்கள் பள்ளிவாசலை விஸ்தரித்து கட்டுவதற்காக ஒரு யூதப் பெண்ணின் வீட்டை அவளது விருப்பமின்றி வேறு இடம் தருவதாகக் கூறி உடைத்து விட்டு பள்ளிவாசலை விசாலமாக்கிக் கட்டினார்கள். அப்பெண் தலைநகருக்குச் சென்று கலீபாவாக அன்று காணப்பட்ட உமர் (ரழி) அவர்களிடம் முறையிட்டாள். உடனே அம்ரிப்னுல் ஆஸ் (ரழி) அவர்களை வரவழைத்து விசாரித்தபோது, அவள் அளவுகதிகமாக ஈட்டுத்தொகையை எதிர்பார்ப்பதாகவும், அவளது ஈட்டுத்தொகை பைத்துல் மாலில் வைக்கப்பட்டுள்ளதாகவும் அவர் விளக்கமளித்தபோது உமர் (ரழி) அவர்கள் அப்பள்ளிவாசலை இடித்துவிட்டு அப்பெண்ணின் வீட்டைக் கட்டிக்கொடுக்குமாறு உத்தரவிட்டார்கள். இச்சம்பவமானது இஸ்லாமிய ஆட்சியின் கீழ் முஸ்லிமல்லாதார் கூட தங்களது உடமைப் பாதுகாப்புக்கு எந்தளவு உத்தரவாதப்படுத்தப்பட்டுள்ளனர் என்பது கண்கூடு. இவ்வாறான ஏராளமான சம்பவங்களை இஸ்லாம் அரசோச்சிய கால வரலாற்றில் கண்டுகொள்ள முடியும்.இஸ்லாமிய அரசாட்சியின்போது குடிமக்கள் முஸ்லிம், முஸலிமல்லாதார் என பாகுபாடின்றி சகலரினதும் உயிர், உடமைப்பாதுகாப்பு உறுதிப்படுத்தப்படுகிறது.

நாயகம்ﷺஅவர்கள் வழிகாட்டிய சமயநல்லிணக்கம்.

عن أنس رضي الله عنه، قال: كان غلام [1] يهودي يخدم النبي صلى الله عليه وسلم فمرِض، فأتاه النبي صلى الله عليه وسلم يَعُودُه، فقَعَدَ عند رأسه، فقال له: «أَسْلِم»، فنظر إلى أبيه وهو عنده، فقال له: أَطِعْ أبا القاسم صلى الله عليه وسلم، فأَسْلَمَ، فخرج النبي صلى الله عليه وسلم وهو يقول: «الحمد لله الذي أنقذه من النار» 

நபி (ஸல்) அவர்களுக்குப் பணிவிடை செய்து கொண்டிருந்த ஒரு யூதச் சிறுவன் திடீரென நோயுற்றான். எனவே அவனை நோய் விசாரிக்க நபி (ஸல்) அவர்கள் அவனிடம் வந்து அவனது தலைமாட்டில் அமர்ந்துகொண்டு ‘இஸ்லாத்தை ஏற்றுக் கொள்!’ என்றார்கள். உடனே அவன் தன்னருகிலிருந்த தந்தையைப் பார்த்தான். அப்போது அவர், ‘அபுல் காசிம் (என்ற) நபி (ஸல்) அவர்களின் கூற்றுக்குக் கட்டுப்படு!’ என்றதும் அவன் இஸ்லாத்தை ஏற்றுக் கொண்டான். உடனே நபி (ஸல்) அவர்கள், ‘இவனை நரகத்திலிருந்து பாதுகாத்த அல்லாஹ்விற்கே சகலப் புகழும்’ எனக் கூறியவாறு அங்கிருந்து வெளியேறினார்கள்.(அறிவிப்பவர்: அனஸ் (ரலி), நூல்: புகாரி-1356 

நபியவர்களுக்குப் பணிவிடை செய்யும் அளவிற்கு யூதர்கள் நபி (ஸல்) அவர்களிடம் நெருக்கமாகப் பழகியுள்ளார்கள். இந்த நெருக்கத்தினால் தான் யூதச் சிறுவன் நோய்வாய்ப்படும் போது அவனை நலம் விசாரிக்கச் செல்கிறார்கள்.

நபி (ஸல்) அவர்கள் சிறுவனைப் பார்த்து, இஸ்லாத்தை ஏற்றுக் கொள் என்று கூறிய மாத்திரத்தில் அவனுடைய தந்தை ஏற்றுக் கொள்வதற்கு அனுமதியளிக்கிறார் என்றால் பெருமானார் மீது அவர் எவ்வளவு மரியாதை வைத்திருப்பார்? நபியவர்கள் அவரிடத்தில் அழகிய முறையில் நடந்து கொண்டதே இதற்குக் காரணம்.

இறந்து விட்ட யூதர் ஒருவர் விஷயத்தில் நபி (ஸல்) அவர்கள் காட்டிய மத நல்லிணக்கம்..

                                                                                   كان سَهْلُ بنُ حُنَيْفٍ، وقَيْسُ بنُ سَعْدٍ قَاعِدَيْنِ بالقَادِسِيَّةِ، فَمَرُّوا عليهما بجَنَازَةٍ، فَقَامَا، فقِيلَ لهما إنَّهَا مِن أَهْلِ الأرْضِ أَيْ مِن   اهْلِ الذِّمَّةِ، فَقالَا: إنَّ النبيَّ صَلَّى اللهُ عليه وسلَّمَ مَرَّتْ جِنَازَةٌ فَقَامَ، فقِيلَ له: إنَّهَا جِنَازَةُ يَهُودِيٍّ، فَقالَ: أَليسَتْ نَفْسًا.

الراوي : سهل بن حنيف وقيس بن سعد | المحدث : البخاري| المصدر : صحيح البخاري

ஸஹ்ல் இப்னு ஹுனைஃபு (ரலி), கைஸ் இப்னு ஸஅத் (ரலி) ஆகியோர் காதிஸியாவில் ஓரிடத்தில் அமர்ந்திருந்தபோது ஒரு ஜனாஸா அவர்களைக் கடந்து சென்றது. உடனே அவர்கள் இருவரும் எழுந்தார்கள். அப்போது அவர்களிடம் ‘இது இந்நாட்டில் அபயம் பெற்ற (காபிரின்) ஜனாஸாவல்லவா?’ எனக் கேட்கப்பட்டது. அதற்கு அவ்விருவரும், ‘நபி (ஸல்) அவர்களைக் கடந்து ஒரு ஜனாஸா சென்றபோது எழுந்து நின்றார்கள்; அப்போது அவர்களிடம் அது யூதரின் ஜனாஸா எனக் கூறப்பட்டது. அதற்கு நபி (ஸல்) அவர்கள், ‘இவர் மனிதரில்லையா?’ எனப் பதிலளித்தார்கள் என்றார்கள். (புஹாரி :1312 அப்துர் ரஹ்மான் பின் அபீலைலா (ரலி)

முஸ்லிம் மற்றும் யூதருக்கு மத்தியில் நடந்த சண்டையை தீர்த்து வைத்த பெருமானார்.

ஒரு முஸ்லிமும் ஒரு யூதரும் ஒருவரையொருவர் திட்டிக் கொண்டனர். அந்த முஸ்லிம், 'உலகத்தார் அனைவரை விடவும் முஹம்மத்(ஸல்) அவர்களுக்கு மேன்மையை அளித்தவன் மீது சத்தியமாக!' என்று கூறினார். அந்த யூதர், 'உலகத்தார் அனைவரை விடவும் மூஸாவுக்கு மேன்மையை அளித்தவன் மீது சத்தியமாக!' என்று கூறினார். அதைக் கேட்டு (கோபம் கொண்டு) அந்த முஸ்லிம் தன் கையை ஓங்கி யூதரின் முகத்தில் அறைந்துவிட்டார். அந்த யூதர், நபி(ஸல்) அவர்களிடம் சென்று தனக்கும் அந்த முஸ்லிமுக்கும் இடையே நடந்த (சச்சர)வையெல்லாம் தெரிவித்தார். நபி(ஸல்) அவர்கள் அந்த முஸ்லிமை அழைத்து வரச்சொல்லி அது பற்றி அவரிடம் கேட்டார்கள். அவர் விபரத்தைக் கூறினார். (நடந்தவை அனைத்தையும் விசாரித்துத் தெரிந்து கொண்ட பின்) நபி(ஸல்) அவர்கள், 'மூஸாவை விட என்னைச் சிறப்பாக்கி (முதலிடம் தந்து உயர்த்தி) விடாதீர்கள். ஏனெனில், மக்கள் அனைவரும் மறுமை நாளில் மூர்ச்சையாகி விடுவார்கள். நானும் அவர்களுடன் மூர்ச்சையாகி விடுவேன். நானே முதலாவதாக மயக்கம் தெளிந்து எழுவேன். அப்போது, மூஸா(அலை), (அல்லாஹ்வின்) அர்ஷின் ஓரத்தைப் பிடித்துக் கொண்டிருப்பார். மக்களோடு சேர்ந்து அவரும் மூர்ச்சையாகி, பிறகு எனக்கு முன்பாகவே மயக்கம் தெளிந்து விட்டிருப்பாரா, அல்லது அல்லாஹ் அவருக்கு மட்டும் (மூர்ச்சையடையத் தேவையில்லையென்று) விதி விலக்கு அளித்திருப்பானா என்று எனக்குத் தெரியாது' என்று கூறினார்கள்.     (ஸஹீஹ் புகாரி (2411)

நபிகளார் தமது இருபத்தைந்தாம் வயதில் அல்அமீன் (நன்னம்பிக்கைக்குரியவர்) என்ற சிறப்புப் பெயரை ஊர் மக்களால் சூட்டப்பெற்றார்கள் என்பதிலிருந்தே அவர்கள் எந்த அளவுக்கு பொது மக்களுக்கு சேவை செய்திருக்கிறார்கள் என்பதை அறியமுடிகிறது.

இருவருக்கு மத்தியில் நல்லிணக்கம்.

49:9 وَاِنْ طَآٮِٕفَتٰنِ مِنَ الْمُؤْمِنِيْنَ اقْتَتَلُوْا فَاَصْلِحُوْا بَيْنَهُمَا‌ۚ فَاِنْۢ بَغَتْ اِحْدٰٮهُمَا عَلَى الْاُخْرٰى فَقَاتِلُوا الَّتِىْ تَبْغِىْ حَتّٰى تَفِىْٓءَ اِلٰٓى اَمْرِ اللّٰهِ ‌ۚ فَاِنْ فَآءَتْ فَاَصْلِحُوْا بَيْنَهُمَا بِالْعَدْلِ وَاَقْسِطُوْا ؕ‌ اِنَّ اللّٰهَ يُحِبُّ الْمُقْسِطِيْنَ‏

நம்பிக்கை கொண்டோரில் இரண்டு கூட்டத்தினர் சண்டையிட்டுக் கொண்டால் அவற்றுக்கிடையே இணக்கத்தை ஏற்படுத்துங்கள்! அவற்றுள் ஒன்று மற்றொன்றின் மீது வரம்பு மீறினால் வரம்பு மீறிய கூட்டம் அல்லாஹ்வின் கட்டளையை நோக்கித் திரும்பும் வரை அதை எதிர்த்துச் சண்டையிடுங்கள்! அக்கூட்டம் திருந்தினால் நீதியான முறையில் இருவருக்கிடையே நல்லிணக்கத்தை ஏற்படுத்துங்கள்! நீதி செலுத்துங்கள்! நீதி செலுத்துவோரை அல்லாஹ் விரும்புகிறான். நம்பிக்கை கொண்டோர் (அனைவரும்) சகோதரர்கள் தாம். எனவே உங்கள் சகோதரர்களுக்கிடையே இணக்கத்தை ஏற்படுத்துங்கள்! அல்லாஹ்வை அஞ்சுங்கள். அருள் செய்யப்படுவீர்கள்.(அல்குர்ஆன் 49:9,10)

இந்த வசனம் நபித் தோழர்களுக்கிடையே பிரச்சனைகள் எழுந்த போது தான் அருளப்பட்டது.

2691- حَدَّثَنَا مُسَدَّدٌ ، حَدَّثَنَا مُعْتَمِرٌ قَالَ : سَمِعْتُ أَبِي أَنَّ أَنَسًا ، رَضِيَ اللَّهُ عَنْهُ ، قَالَ

قِيلَ لِلنَّبِيِّ صلى الله عليه وسلم لَوْ أَتَيْتَ عَبْدَ اللهِ بْنَ أُبَيٍّ فَانْطَلَقَ إِلَيْهِ النَّبِيُّ صلى الله عليه وسلم وَرَكِبَ حِمَارًا فَانْطَلَقَ الْمُسْلِمُونَ يَمْشُونَ مَعَهُ وَهْيَ أَرْضٌ سَبِخَةٌ فَلَمَّا أَتَاهُ النَّبِيُّ صلى الله عليه وسلم فَقَالَ إِلَيْكَ عَنِّي وَاللَّهِ لَقَدْ آذَانِي نَتْنُ حِمَارِكَ فَقَالَ رَجُلٌ مِنَ الأَنْصَارِ مِنْهُمْ وَاللَّهِ لَحِمَارُ رَسُولِ اللهِ صلى الله عليه وسلم أَطْيَبُ رِيحًا مِنْكَ فَغَضِبَ لِعَبْدِ اللهِ رَجُلٌ مِنْ قَوْمِهِ فَشَتَمَا فَغَضِبَ لِكُلِّ وَاحِدٍ مِنْهُمَا أَصْحَابُهُ فَكَانَ بَيْنَهُمَا ضَرْبٌ بِالْجَرِيدِ وَالأَيْدِي وَالنِّعَالِ فَبَلَغَنَا أَنَّهَا أُنْزِلَتْ {وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا

நபி (ஸல்) அவர்களிடம், ”தாங்கள் அப்துல்லாஹ் பின் உபையிடம் வந்தால் நன்றாயிருக்கும்” என்று கூறப்பட்டது. நபி (ஸல்) அவர்கள் அவனிடம் செல்ல ஒரு கழுதையில் ஏறினார்கள். முஸ்லிம்களும் நபி (ஸல்) அவர்களுடன் நடந்து சென்றார்கள். அவர்கள் சென்ற பாதை உவர் நிலமாக இருந்தது.

அவனை நபி (ஸல்) அவர்கள் சென்றடைந்த போது அவன், ”தூர விலகிப் போவீராக! அல்லாஹ்வின் மீது ஆணையாக! உமது கழுதையின் துர்நாற்றம் என்னைத் துன்புறுத்தி விட்டது” என்று கூறினான்.

அப்போது அவர்களுடன் இருந்த (அன்சாரித்) தோழர் ஒருவர், ”அல்லாஹ்வின் மீதாணையாக! அல்லாஹ்வின் தூதருடைய கழுதை உன்னை விட நல்ல வாசனை உடையதாகும்” என்று கூறினார்.

அப்துல்லாஹ்வுக்காக அவனுடைய சமுதாயத்தைச் சேர்ந்த ஒருவர் ஆத்திரமடைந்து அந்த அன்சாரியை ஏசினார். அந்த இருவருக்காகவும் அவரவருடைய நண்பர்கள் கோபமடைந்தார்கள். தங்களுக்கிடையே ஈச்சங்குச்சியாலும் கைகளாலும் செருப்புக்களாலும் அடித்துக் கொண்டார்கள்.

அப்போது ‘இறை நம்பிக்கையாளர்களில் இரு குழுவினர் தங்களுக்குள் சண்டையிட நேர்ந்தால் அவர்களிடையே சமாதானம் செய்து வையுங்கள்’ (49:9) என்னும் வசனம் அருளப்பட்டது.(புகாரி)

மத நல்லிணக்கத்திற்கு சிறந்த ஒர் உதாரணம்

22.01.22 அன்று கேரளாவில் உள்ள காயம்குளம் அருகே செரவாலி என்ற ஊரில் நடந்து உள்ளது. அந்த ஊரில் இருக்கும் கோவில் அருகே வசித்து வருபவர் பிந்து. ஏழ்மையான விதவைப்பெண். இந்து மதத்தைச் சேர்ந்தவர். அவர் தன் 24 வயதான மூத்த மகள் அஞ்சுவுக்கும், காயம்குளத்தை சேர்ந்த சசி என்பவருக்கும் திருமணம் செய்து வைக்கலாம் என்று முடிவெடுத்த நேரத்தில், தன் வறுமை காரணமாக பணம் இல்லாத சூழ்நிலையில் உள்ளூர் மசூதியில் உள்ள ஜமாத் கமிட்டியின் செயலாளர் நுஜுமுதீனிடம் உதவி கேட்டார். நுஜுமுதீனும் ஜமாத்தில் இதுகுறித்து ஆலோசனை நடத்தியபோது, உதவி என்ன உதவி? நாமே திருமணத்தை நடத்தி வைப்போம். அதுவும் மசூதியிலேயே நடத்தி வைப்போம் என்று சொல்லி மசூதி வளாகத்தில் இந்து முறைப்படி வேதங்கள் ஓத, திருமணத்தை நடத்தி வைத்து இருக்கிறார்கள். எல்லா மதங்களை சேர்ந்த 4 ஆயிரம் பேர் கலந்துகொண்ட இந்த கோலாகல திருமணத்தில் பாயாசம், வடையோடு சைவ விருந்து பரிமாறப்பட்டு இருக்கிறது. மணமகளுக்கு ஜமாத்தின் சார்பில் 10 பவுன் தங்க சங்கிலியும், 2 லட்சம் ரூபாய் ரொக்கப்பரிசு மட்டுமல்லாமல், டி.வி. ரெப்ரிஜிரேட்டர் என்று ஒரு குடும்பம் நடத்த தேவையான அனைத்து பொருட்களையும் பரிசாக வழங்கி உள்ளனர். இந்து முறைப்படி திருமணம் நடந்தாலும், மணமக்கள் மசூதியையும் வழிபட்டு, தலைமை இமாம் ரியாசுதீன் பைசின் ஆசியையும் பெற்றுள்ளனர். திருமணத்தை நடத்தி வைத்த இந்து மத குருவும், முஸ்லிம் தலைமை இமாமும் அருகருகே உட்கார்ந்து மகிழ்வோடு பேசிக்கொண்டே சாப்பிட்டது மத ஒற்றுமையை மேலும் வலுப்படுத்தும் விதமாக இருந்தது.

இஸ்லாம் கூறும் சமய நல்லிணகத்தை நாடு பின்பற்றிநடந்தால் நாட்டில் நடைபெறும் மததுவேஷ அத்துமீறல்கள் நீங்கி மதசுதந்திரத்தோடும்,சமய நல்லிணக்கத்தோடும் மக்கள் நிம்மதியாக வாழ்வதோடு நாடும் முன்னேற்றம் அடையும்.

வெளியீடு : செங்கல்பட்டு & காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான் 12/08/2021

பவள விழா காணும் இந்தியா.

சுதந்திர தினம் 75

 اِنَّ اللّٰهَ لَا يُغَيِّرُ مَا بِقَوْمٍ حَتّٰى يُغَيِّرُوْا مَا بِاَنْفُسِهِمْ‌ وَاِذَاۤ اَرَادَ اللّٰهُ بِقَوْمٍ سُوْۤءًا فَلَا مَرَدَّ لَهٗ‌ وَمَا لَهُمْ مِّنْ دُوْنِهٖ مِنْ وَّالٍ‏

 எந்த ஒரு சமூதாயத்தவரும், தம் நிலையயைத் தாமே மாற்றிக் கொள்ளாத வரையில், அல்லாஹ் அவர்களை நிச்சயமாக மாற்றுவதில்லை; இன்னும் அல்லாஹ் ஒரு சமுதாயத்தாருக்குத் தீவினையை நாடினால், அதைத்தடுப்பவர் எவருமில்லை - அவர்களுக்கு அவனைத்தவிர துணை செய்வோர் எவரும் இல்லை.(அல்குர்ஆன் : 13:11)

"இந்திய சுதந்திர வரலாறு,இஸ்லாமியர்களின் குருதியால் எழுத்தப்பட்டுள்ளது.

இந்நாட்டின் விடுதலைக்காக இஸ்லாமியர்கள்,தங்களின் உயிர்,பொருள்,உடமைகள் அனைத்தையும் அர்ப்பணித்தார்கள்.

தங்களின் விகிதாச்சாரத்தை விட அதிகமாக  இந்நாட்டிற்காக தங்களை அர்பணித்துக் கொண்டார்கள்.

ஏராளமான முஸ்லிம்கள் சுதந்திரப் போராட்டத்தில் தீவிரமாக பங்கேற்றது மட்டுமல்லாமல், தங்கள் அன்பான நாட்டின் சுதந்திரத்தை உறுதிப்படுத்த தங்கள் உயிரையும் தியாகம் செய்தனர்."

இதனை சொன்னவர் ஒரு சாதாரண இந்தியரோ, ஒரு அரசியல் தலைவரோ அல்லது ஒரு முஸ்லீம் அறிஞரோ கிடையாது, மாறாக புகழ்பெற்ற பத்திரிகையாளரும் எழுத்தாளருமான மறைந்த குஷ்வான் சிங் அவர்களால் பேசப்பட்டது.

(இதனை 1975ஆம் ஆண்டு டிசம்பர் மாதம் 27ம் தேதி வெளியான ‘இல்லஸ்டிரேட்டட் வீக்லி’ என்னும் பத்திரிக்கையில் அதன் ஆசிரியர் குஷ்வந்த் சிங் பல ஆதாரங்களுடன் எடுத்துக் கூறி உறுதிப்படுத்தியுள்ளார்.)

டெல்லியின் இந்தியா கேட் மீது சுமார் 95,300 சுதந்திரப் போராட்ட வீரர்களின் பெயர்கள் எழுதப்பட்டுள்ளன, அவர்களில் 61,945 பேர் முஸ்லிம்கள். அதாவது இந்திய விடுதலைக்காக ஆங்கிலேயர்களுக்கு எதிராக எதிர்த்து போராடி தியாகம் செய்தவர்களில் 65% பேர் முஸ்லிம் விடுதலைப் போராளிகள்.

இப்படி இந்திய தேசிய விடுதலைக்காக தம் சதவிகிதத்தை விடவும் அதிகமாக தியாகம் செய்த இஸ்லாமியர்களின் வரலாறு மறைக்கப்படுகின்றது.

சன்னஞ்சன்னமாக வரலாற்றை மாற்றி மறக்கடிக்கப்படுகின்றது.

சச்சார் அறிக்கை

இந்தியா சுதந்திரம் பெற்று 75ஆண்டுகளாக இஸ்லாமியர்கள், ஆட்சி,அதிகாரம்,கல்வி,உயர்பதவி, பொருளாதாரம் என எல்லா துறைகளிலும் வேண்டுமென்றே புறக்கணிக்கப்பட்டுக் கொண்டிருக்கின்றார்கள்.

"இந்திய மக்கள் தொகையில் முஸ்லிம்கள் 14% ஆக இருக்கும்போது, அவர்கள் இந்திய அதிகாரத்துவத்தில் 2.5% மட்டுமே உள்ளனர். [9] இந்திய முஸ்லிம்கள் உள்ள நிலையானது பட்டியல் சாதியினர் மற்றும் பட்டியல் பழங்குடியினரின் நிலைமைகளுக்கும் தாழ்ந்து இருப்பதாக"  சச்சார் குழு பாராளுமன்றத்தில்2006ல் தாக்கல் செய்த மனுவில் கூறப்பட்டுள்ளது.

இன்று இந்தியாவில் இஸ்லாமியர்களின் மதவழிப்பாட்டுரிமை,உணவு, வாழ்வாதாரம் தொடங்கி அவர்களின் இருப்பையே கேள்விக்குறியாக்கி  நாடற்ற அகதிகளாக்கும் சதிவேலைகளை கனகச்சிதமாக திட்டப்பட்டுக்கொண்டிருக்கின்றது.

தங்களின் ஆட்சியில் பொருளாதார பிரச்சனை ,சட்டம் ஒழுங்கு சீர்குலைவு,எல்லைபாதுகாப்பு மந்தநிலை,ஊழல்குற்றச்சாட்டு, கருப்புப்பண விவகாரம் என பல விமர்சனங்களை மடைமாற்ற,

மக்களை ஜாதி,மத ரீதியில் பிளப்படுத்தி,ஒற்றுமையை சீர்குலைத்து நாட்டை வன்முறை காடாக்கும் சதிவேலைகள் சமுதாயத்தை சீர்குலைத்து வருகின்றன.

மதவெறியை தூண்டி,பிரிவினையை வளர்ப்பதற்காகவே ஆங்கிலேயர்கள் வரலாற்றை புனைந்தார்கள்.

அதே ஆயுதத்தை இன்று மதவெறியர்களான பாசிச சக்திகள் கையில் எடுத்திருக்கின்றார்கள்.

மிருக பலத்தோடு ஆட்சி அதிகாரம் தங்களின் கரங்களில் இருக்கும் மமதையில், இந்திய வரலாற்றை மாற்றுவோம் என்று கொக்கரிக்கின்றனர்.

இந்திய திருநாட்டில் வாழும் இஸ்லாமியர்களின் நெருக்கடியான இக்காலக்கட்டத்தில் உண்மை வரலாற்றை, மற்ற சமயத்தவருக்கும்,நம் அடுத்த சந்ததிகளான இளையசமுதாயம்,மற்றும் குழந்தைகளுக்கும் கொண்டு சேர்க்கும் பொறுப்பும்,கடமையும் நமக்கு உண்டு.

சுதந்திர வரலாறு.

ஏகாதிபத்திய வெள்ளையர்களின் கீழ் அடிமைப்பட்டு கிடந்த இந்தியா, சுதந்திரக்காற்றைச் சுவாசித்து 75 வருடங்கள் கடந்து விட்டன. இன்று இந்தியர்கள் அனைவரும் மகிழ்ச்சியோடு 75 -வது சுதந்திர தினத்தைக் கொண்டாடுகின்ற இவ்வேளையில், இந்தியச் சுதந்திரத்திற்காகப் பாடுபட்ட அந்தத் தியாகிகளின் ஈடு இணையற்றச் செயல்பாடுகளை நினைவு கூர வேண்டியது அவசியமாகும்.

இன்று சுவாசிக்கும் இந்தச் சுதந்திரக்காற்று அவ்வளவு எளிதாக கிடைத்து விடவில்லை. வியாபாரத்திற்காக நாட்டில் நுழைந்த வெள்ளை ஏகாதிபத்திய வெறியர்கள், உள்நாட்டு பிரச்சனைகளைத் தங்களுக்குச் சாதகமாகப் பயன்படுத்திக் கொண்டு நாட்டை தங்களின் ஆட்சியின் கீழ் கொண்டு வந்தனர். தாய்மண்ணை ஆக்ரமித்துள்ள அந்நியர்களிடமிருந்து நாட்டை மீட்க இந்தியர்கள் அனைவரும் ஒன்றிணைந்துப் போராடினர். தேச விடுதலை என்று வரும் போது அதில், ஜாதி, மதம், இனம் என்பதற்கெல்லாம் இடம் இல்லை. வெள்ளையன் வருகைக்கு முன்னர் பல்வேறு இன, மொழி மக்களாகப் பிரிந்து வாழ்ந்திருந்த இந்தியர்கள், வெள்ளையனை எதிர்க்க, தங்களிடையிலான அனைத்து வேற்று விருப்பு, வெறுப்புகளையும் களைந்து ஓரணியில் நின்றுப் போராடினர். எனினும் எப்பொழுதும் போல் அற்பக் காசிற்காகவும் அடிமைப் பதவிக்காகவும் விலைபோன சில துரோகிகளும் நாட்டில் இருக்கவே செய்தனர்.

வரலாறு தெரியாத சமூகம் வரலாறு படைக்க முடியாது...

தனது சொந்த வரலாற்றை பற்றி அறியாதவன் தன் வாழ்க்கையை பூஜ்ஜியத்திலிருந்து ஆரம்பிக்கின்றான்.

எனவே இம்மண்ணுக்காக நம் மக்கள் ஆற்றிய தன்னிகற்ற தியாகத்தை அறிந்து,அதனை மற்றவர்களுக்கு எடுத்துரைப்போம்.

தெற்கில் முதல் சுதந்திரப்போராட்டம்.

ஆங்கிலேயர்களுக்கெதிரான முதல் சுதந்திரப் போராட்டம் ஹைதர் அலி மற்றும் அவரது மகன் திப்பு சுல்தான் ஆகியோரால் 1780 இல் தொடங்கப்பட்டது.

சுதந்திர போராட்டத்தில் பீரங்கிகளை பயன்படுத்தி ஆங்கிலேயரை மிரள வைத்த மாவீரன் திப்பு சுல்தான்.

மாவீரன் திப்பு சுல்தான் தலைமையில் இந்திய சுதந்திர போர் நடந்திருந்தால் இந்தியா அன்றே விடுதலை அடைந்து இருக்கும் என்று மகாத்மா காந்தி கூறினார்.

வடக்கே வங்கத்து சிங்கம் சிராஜ்-உத்-தவ்ளா.

தெற்கே தென்னகத்து வேங்கை திப்பு சுல்தான் என்றால் வடக்கே வங்கத்து சிங்கம் சிராஜ்-உத்-தவ்ளா...

ஆங்கிலேயர் வணிகம் செய்ய வந்த காலந்தொட்டே அவர்களை ஆங்காங்கே எதிர்த்துக் கொண்டிருந்தவர்களில் முஸ்லிம்கள், முஸ்லிம் மன்னர்கள் கணிசமாக இருந்தனர். ஆங்கிலேயருக்கு நாட்டை ஆளும் எண்ணம் வந்துவிட்டதை முதலில் கணித்து அவர்களை எதிர்த்தவர் வங்காளத்தை ஆண்ட சிராஜ்-உத்-தவ்ளா ஆவார்.

வடக்கில் சிந்திய முதல் ரத்தம்.

வர்த்தகம் செய்ய வந்த ஆங்கிலேயருக்கு இந்த மண்ணின் வளத்தை நிரந்தரமாய் அனுபவிக்கும் எண்ணம் ஆசையாய்உருவானது. ஆங்கிலேயரின் நிர்பந்தங்களுக்கு இங்குள்ள ஆட்சியாளர்கள் பலர் அச்சத்துடன் அள்ளிக் கொடுத்தனர். அண்ட இடமும் கொடுத்தனர். தங்கள் ஆட்சிப்பரப்புக்குள் ஆங்கிலேயர் சுதந்திரமாய் பவனிவர பாதை அமைத்தனர். ஏனென்றால் பிரிட்டீஷாரின் துணை, தங்கள் பகை அரசுகளிடம் இருந்து தங்களைக் காக்கும் என்ற சுயநலத்தினால். நம் ஆட்சியாளர்களின் இச்சுயநலம் பிரிட்டீஷாருக்கு நிரந்தரமாய் இம்மண்ணை ஆள்வதற்கான எளிய வாய்ப்பாக அமைந்தது.

இந்த காலகட்டத்தில், வியாபாரம் செய்ய வந்தவர்களுக்கு நாடாளும் ஆசை வந்துவிட்டது என்பதை முதலில் கணித்து,ஆங்கிலேயரின் நிர்பந்தங்களுக்கு எதிராய் இந்த மண்ணில் முதலில் நிமிரிந்து நின்றவர்தான் வங்காளத்தை ஆண்டசிராஜ்-உத்-தௌலா.

1757-ல் ஆங்கிலேயரை அவர் சந்தித்த பிளாசிப் போர்தான் பிரிட்டீஷ் ஏகாதிபத்தியத்திற்கு எதிராய் இம்மண்ணில் நடந்த முதல் இந்திய சுதந்திரப்போர்...!  இதுவே பெரிய யுத்தம்..! இப்போரில் கைதாகும் இந்திய வீரர்களை அடைப்பதற்காக ஆங்கிலேயர் கட்டிய சிறைக்கூடத்திலேயே ஆங்கிலேயர்களைக் கைது செய்து அடைத்த மாவீரர்தான் சிராஜ்-உத்-தௌலா. 

ஆங்கிலேயரின் நாடாளும் ஆசையை முளையில் கிள்ளும் தௌலாவின் முயற்சியை முறியடிக்க பிரிட்டனிலிருந்து கடல் மார்க்கமாக வந்த ஆங்கிலப்படை கல்கத்தா துறைமுகத்தில் மிகப்பெரிய எதிர் முற்றுகையைச் சந்தித்தது. கல்கத்தா துறைமுகத்தில் ஆங்கிலேயரை எதிர்கொண்ட தௌலாவுக்கு இயற்கை மட்டும் ஒத்துழைத்திருந்தால்… இந்திய சரித்திரமே மாறியிருக்கும். ஆனால் இயற்கை ஒத்துழைக்க மறுக்க, நான்கு மணி நேரம் பெய்த கடுமையான மழையினால் தௌலா படையின் வெடிமருந்துகள் நனைந்தன. அவரது முயற்சிக்கு முற்றுப்புள்ளி வைக்கப்பட்டது.

பிரிட்டிஷ் எதிர்ப்பில் சிந்திய முதல் இந்திய ரத்தம்.. வங்காளத்தில் சிராஜ்-உத்-தௌலா சிந்திய ரத்தம்தான். அதன் மீதுதான் பிரிட்டீஷ் ஏகாதிபத்தியம் தன் முதல் கால்  கோளை இந்திய மண்ணில் ஊன்றியது. ஆமாம் இந்தியாவில் பிரிட்டீஷாரின் ஆட்சி முதலில் வங்காளத்தில்தான் ஏற்பட்டது.

இந்திய விடுதலைப் போரில் உலமாக்களின் பங்கு.

இந்திய விடுதலைப் போரில் உலமாக்களின் பங்கு குறிப்பிடத்தக்கது. இந்திய விடுதலைப் போரில் தங்கள் வழிபாட்டுத் தலங்களைக் கூட வெள்ளையனுக்கு எதிராகப் பயன்படுத்திய ஒரு சமுதாயம் உண்டென்றால், அது இஸ்லாமிய சமுதாயம்தான்.

வெள்ளிக் கிழமை ஜூம்மா மேடைகள் எல்லாம் வெள்ளையனுக்கு எதிராக போர்ப் பரணி பாடின. ஜூம்மா மேடைகளில் உரமேற்றியதன் விளைவு வீரத்துடன் இந்த சமுதாயம் வெள்ளையனை எதிர்த்துப் போராடியது. வெள்ளையனின் உடை கலாச்சாரம், மொழி போன்றவை ஹராம் என பத்வாக்கள் அளித்தனர். வெள்ளையனின் அதிகார வரம்புக்கு உட்பட்ட நிலப்பரப்புகள் யுத்த பூமி  என்பது போன்ற பத்வாக்கள் வழங்கப்பட்டன.

19 ஆம் நூற்றாண்டின் மிக முக்கிய இஸ்லாமிய அறிஞராகத் திகழ்ந்த மௌலவி காசிம் அஹ்மத் நாளோத்வி 1885ல் இந்திய தேசிய காங்கிரஸில் முஸ்லிம் உறுப்பினராகச் சேர வேண்டும் என்று தீவிரமாகப் பிரச்சாரம் செய்தார். வெள்ளையனை நாட்டை விட்டு விரட்டுவது மார்க்கக் கடமை என்ற அடிப்படையில் நூற்றுக்கும் மேற்பட்ட பத்வாக்களை (மார்க்கத் தீர்ப்புக்களை) திரட்டி நுஸ்ரத்தூல் அஹ்ரார் (விடுதலைப் போராட்ட வீரர்களுக்கான உதவி) என்ற பெயரில் நூல் ஒன்றையும் வெளியிட்டார்.

மௌலவி அஹ்துல்லாஹ் ஷா

இந்தியாவின் முதல் ஆங்கிலேயர்களுக்கெதிரான போரை ஏற்பாடு செய்து வழிநடத்தியது யார் தெரியுமா? முதல் சுதந்திரப் போரை தொடங்கி வழி நடத்தியவர் மௌலவி அஹமதுல்லா ஷா என்கிற இஸ்லாமிய அறிஞர். 

அஹ்மதுல்லா ஷா இஸ்லாத்தினை பின்பற்றும் முஸ்லீமாகவும், மத ஒற்றுமையை பேனக்கூடியராகவும் இருந்தார். 1857 ஆம் ஆண்டு கிளர்ச்சியில், நானா சாஹிப் மற்றும் கான் பகதூர் கான் போன்றோர் இவருடன் இணைந்து போராடினார்கள்.

ஆங்கிலேயர்களால் ஒருபோதும் மௌலவியை உயிருடன் பிடிக்க முடியவில்லை. அவரைப் பிடிக்க 50,000 ரூபாய் பரிசாக அறிவிக்கப்பட்டது. கடைசியில் பாவன் சிற்றரசின் ராஜா ஜகந்நாத் சிங் வஞ்சகமாக விருந்துக்கு அழைத்தது தெரியாமல் வந்த மௌலவியைக் கோட்டைக்குள் யானையுடன் நுழைந்தவுடன் கதவுகள் சாத்தப்பட்டன. வஞ்சகத்தினை உணர்ந்து வெளியேற எத்தணிக்கும் முன்பே ராஜா ஜகந்நாத் சிங் தம்பி பல்தேவ் சிங் துப்பாக்கியால் சுட்டு கொன்றான். தலை துண்டிக்கப்பட்டு பரங்கி மாஜிஸ்திரேட்டுக்கு வழங்கப்பட்டது. எஞ்சிய உடல் துண்டு துண்டாக்கப்பட்டு தீயிலிட்டு சுட்டு பொசுக்கினர். ராஜா ஜெகந்நாத் சிங்கிற்க்கு அறிவிக்கப்பட்ட பரிசு வழங்கப்பட்டது. அடுத்த நாள், மௌலவியின் தலை கோட்வாலியில் உள்ள காவல் நிலையம் முன்பு தூக்கிலிடப்பட்டது.  1857 ல் நடைப்பெற்ற இத்துயர சம்பவத்தினை மற்றொரு புரட்சியாளர் பஸல்-உல்-ஹக் கைராபாதி சாட்சி பகற்கின்றார்.

அப் போராட்டத்தில், ஏராளமான சுதந்திரப் போராளிகள் தங்கள் இன்னுயிரை தியாகம் செய்தனர், அதில் 90 சதவீதம் பேர் முஸ்லிம் சுதந்திரப் போராட்ட வீரர்கள். 

முதல் சுதந்திரப் போரட்ட மங்கை பேகம் ஹஜ்ரத் மகால்

ஜான்சி ராணி தனது வளர்ப்பு மகனுக்கு ஆட்சியைப் பெறுவதற்காகப் ஆங்கிலேர்களோடு போராடினார் என்பது இந்தியாவில் உள்ள அனைவருக்கும் தெரியும்,                                                    ஆனால் பிரிட்டிஷ் தலைவன் சர் ஹெண்ட்ரி லாரன்சை தன் கையால் சுட்டுக்கொன்று அதற்காக சிறை சென்றவர் முதல் சுதந்திரப் போரட்ட மங்கை பேகம் ஹஜ்ரத் மகால் என்பது நம்மில் எத்தனை பேருக்குத் தெரியும்.

முதல் சுதந்திர உயிர் தியாகி.

பிரிட்டிஷ் ராஜ்ஜியத்திற்கு எதிராக சதி செய்த குற்றச்சாட்டின் பேரில் அஷ்பகுல்லா கான் தூக்கிலிடப்பட்டார். இதனால், ஆங்கிலேய அரசுக்கு எதிராகப் போராடியதற்காக தூக்கிலிடப்பட்ட முதல் சுதந்திர முஜாஹித் என்ற பெருமையைப் பெற்றார். தூக்கிலிடப்படும் போது அஷ்பகுல்லா கானுக்கு 27 வயதுதான்.

காங்கிரஸின் முதல் தலைவர்.

மௌலானா அபுல் கலாம் ஆசாத் ஒரு இஸ்லாமிய மத (ஆலிம்)அறிஞரும், இந்திய சுதந்திரப் போராட்டத்தின் போது இந்திய தேசிய காங்கிரஸின் மூத்த முஸ்லீம் தலைவராகவும் இருந்தார்.

வெள்ளையனுக்கு எதிராகவும் , காங்கிரசின் தலைவராகவும் இருந்தவர் அபுல் கலாம் ஆசாத்.

வள்ளல் MAM அமீர் ஹம்சா.

MAM அமீர் ஹம்சா இந்திய தேசிய இராணுவத்திற்கு (ஆசாத் ஹிந்த் ஃபோஜ்) (INA) மில்லியன் கணக்கான ரூபாய்களை நன்கொடையாக வழங்கினார் என்பது உங்களுக்குத் தெரியுமா?. 

அவர் இந்திய தேசிய இராணுவத்தின் சுதந்திர நூலக வாசிப்பு பிரச்சாரத்தின் தலைவராக இருந்தார்.

 இப்போது இந்த சுதந்திரப் போராட்ட வீரரின் குடும்பம் தமிழ்நாட்டின் இராமநாதபுரம் மாவட்டத்தில் உள்ள ஒரு வாடகை வீட்டில் மிகவும் வறுமையில் வாடுகிறது.

வள்ளல் அப்துல் ஹபீப் யூசுப் முர்பானி.

வள்ளல் அப்துல் ஹபீப் யூசுப் முர்பானியை இந்தியர்களுக்குத் தெரியாது. இந்திய தேசிய ராணுவத்துக்கு 1 கோடி ரூபாய் முழுவதையும் நன்கொடையாக வழங்கியவர் இவர்தான். அந்தக் காலத்தில் ஒரு கோடி ரூபாய் என்பது ஒரு சிறிய தொகை அல்ல. 

வள்ளல் அப்துல் ஹபீப் யூசுப் முர்பானி தனது செல்வம் மற்றும் சொத்துக்கள் அனைத்தையும் நேதாஜி சுபாஷ் சந்திர போஸின் இந்திய தேசிய இராணுவத்திற்கு நன்கொடையாக வழங்கினார். 

சுபாஷ் சந்திரபோஸ் படையில் முஸ்லிம்கள்

ஷாநவாஸ் கான் ஒரு சிப்பாய், அரசியல்வாதி மற்றும் இந்திய தேசிய இராணுவத்தின் தலைமை அதிகாரி மற்றும் தளபதி. நேதாஜி சுபாஷ் சந்திரபோஸ் உருவாக்கிய சுதந்திர இந்தியாவின் நாடுகடத்தப்பட்ட அமைச்சரவையில் 19 உறுப்பினர்களில் 5 பேர் முஸ்லிம்கள். 

கொடையாளி பி அம்மாள்

பி அம்மாள் என்ற முஸ்லிம் பெண் சுதந்திரப் போராட்டத்திற்காக 30 இலட்சம் ரூபாவுக்கும் அதிகமான பெறுமதியான நன்கொடையை வழங்கியிருந்தார்.

கள்ளுக்கடை எதிர்ப்பு போராட்டம்

கள்ளுக்கடைகளுக்கு எதிரான மகாத்மா காந்தியின் தர்ணா மற்றும் உள்ளிருப்புப் பிரச்சாரத்தில் 19 பேர் மட்டுமே கலந்து கொண்டனர், அவர்களில் 10 பேர் முஸ்லிம்கள்.

மன்னர் பஹதூர்ஷா

கடைசி முகலாய இளவரசரான பஹதூர் ஷா ஜாபர், இந்தியாவின் சுதந்திரத்திற்காக மிகுந்த வீரியத்துடனும் தீவிரத்துடனும் போராடிய முதல் இந்தியர் ஆவார். அவர்களின் மீது ஆங்கிலேயர்கள் 1857ல் தேசத்துரோக வழக்கில் கைது செய்து ரங்கூன் சிறையில் அடைத்தனர்.ஆயுள் தண்டனை கைதியாக இறுதி வரை சிறையில் இருந்து அங்கேயே மரணித்தார்.

"இன்று நாங்கள் அனுபவிக்கும் சுதந்திரம் உன் தியாகத்தால் உதித்தது "பஹதூர்ஷாவின் கல்லறையில் முன்னாள் இந்தியப்பிரதமர் ராஜீவ் காந்தி எழுதிய வாசகம்.

மருதநாயகம்.

தமிழகத்தில்  வெள்ளையனுக்கு எதிராக 7 வருடம் தொடர் போர் செய்து வெள்ளையர்களின் சாம்ராஜ்ஜியத்தின் மிரள வைத்தவன் மாவீரன் இஸ்மாயில் மருதநாயகம் கான் சாஹிப் ஆவார்.

ஃபக்கீர் முகமது ரவுத்தர்

ஆங்கிலேயர்களுக்கெதிராக இந்திய கப்பற்படையை தோற்றுவித்த முதல் மாலுமியாக வ.உ.சிதம்ரனார் பிள்ளை என்பவரை  நாம் அனைவரும் அறிவோம்.  ஆனால் இந்த கப்பலை நன்கொடையாக வழங்கிய கப்பலுக்கு சொந்தக்காரர் ஃபக்கீர் முகமது ரவுத்தர் பற்றி நம்மில் எத்தனை பேருக்கு தெரியும். 

வ உ சி கைது செய்த வெள்ளையனிடம்  வ உ சி யை விடுதலை செய் என்று போராடி வெள்ளையன் துப்பாக்கி சூட்டால் உயிர் நீத்தவர் முகமது யாசின் என்ற இஸ்லாமியர்.

கொடிகாத்த குமரன்

கொடிகாத்த குமரன் அவரோடு சேர்ந்து கொடியை பிடித்து சிறை சென்ற முஸ்லிம்கள் அப்துல் லத்தீப், அக்பர் அலி , மைதீன்கான் . அப்துல் லத்தீப் , அப்துல் ரஹீம், வாவு சாகிப் , ஷேக் பாபா சாகிப் ஆகியவர்கள்.

வரலாற்று திரிப்பு

இந்திய விடுதலை போராட்ட காலத்தில் இந்த ஒற்றுமை இன்னும் வலுவடைந்தது. இந்து, முஸ்லிம், கிருத்துவம், சீக்கியம், பார்சி என அனைத்து மதங்களை பின்பற்றுவர்களும் ஒன்றிணைந்து செயல்பட்டார்கள்.

குறிப்பாக முஸ்லிம்கள் விடுதலைப் போராட்டத்தின் ஆரம்பம்தொட்டு விடுதலை கிடைக்கும்வரை தனது மக்கள் தொகைக்கு மேலான அளவில் மிகப்பெரிய பங்களிப்பை செய்திருக்கிறார்கள். ஏனோ பலரது தியாகங்கள் வரலாற்றில் பொறிக்கப்படவில்லை. சில வரலாறுகள் முஸ்லிம்களுக்கு எதிராகவே பதிவு செய்யப்பட்டுள்ளன.

உதாரணமாக : “History of Freedom Struggle in India” என்ற நூலில் மாப்பிள்ளை புரட்சி பற்றி இவ்வாறு எழுதப்பட்டுள்ளது. “மாப்பிள்ளை கிளர்ச்சி ஒரு சுதந்திர போராட்ட கிளர்ச்சியே அல்ல. அது மதக்காழ்ப்புணர்ச்சி காரணமாக முஸ்லிம்கள் ஏற்படுத்திய கலவரம். மேலும்

காந்திஜியின் ஒத்துழையாமை இயக்கத்தை கேரளாவில் பின்னடையைச் செய்தது இக்கிளர்ச்சியே. அது மட்டுமல்லாமல் மலபார் முஸ்லிம்களும், மதவாதிகளும், சந்தர்ப்பவாதிகளும் இந்துக்களைக் கூட்டம் கூட்டமாக படுகொலை செய்தார்கள் –மதமாற்றம் செய்தார்கள் – இந்துப் பெண்களைக் கற்பழித்தனர் – இந்துக்களின் உடைமைகளைக் கொள்ளையிட்டனர் – வீடுகளை தீயிட்டனர்” என்று மாப்பிள்ளை கிளர்ச்சியை தவறாக மதிப்பீடு செய்கிறது.

ஆனால் இந்திய மண்ணின் விடுதலைக்காக தென் இந்தியாவில் நிகழ்ந்த மாபெரும் புரட்சிதான் மாப்பிள்ளை புரட்சி. கேரளாவின் மலபார் மாப்பிள்ளை முஸ்லிம்கள் ஆங்கிலேயரின் அடக்குமுறைக்கு எதிராக கிளர்ந்தெழுந்த இப்புரட்சியை ஒடுக்க ஆங்கில அரசு மாப்பிள அவுட்ரேஜ் சட்டம், மாப்பிள்ளை கத்திச் சட்டம் போன்றவற்றை இயற்றி மலபார் முஸ்லிம்கள் மீது அடக்குமுறையை திணித்தது. இதில் பல்லாயிரக்கணக்கான முஸ்லிம்கள் படுகொலை செய்யப்பட்டனர். மகாத்மா காந்தியடிகள் ஆதரித்த கிலாபத் இயக்கத்தின் எழுச்சியில்தான் மாப்பிள்ளை கிளர்ச்சி உருவாயிற்று.

இம்மாபெரும் தியாக வரலாற்றை தவறாக சித்தரித்த நூலுக்கெதிராக உண்மை வரலாற்றை பதிவு செய்யாமல் முஸ்லிம் சமூகம் இருந்து வருவது துரதிஸ்டவசமானது.

அதேபோல் கல்கத்தா பல்கலைக்கழகத்தில் சம்ஸ்கிருத துணைத் தலைவர் டாக்டர். ஹரி பிரசாத் சாஸ்திரி எழுதிய ஒரு வரலாற்று நூலில் இப்படி ஒரு திரிபு. “திப்பு சுல்தான் 3000 பிராமணர்களை இஸ்லாத்தில் இணையப் பலாத்தகாரம் செய்தபோது, அவர்கள் அனைவரும் தற்கொலை செய்துகொண்டார்கள்”. இந்த நூலைத்தான் அன்று ராஜஸ்தான், பிஹார், உத்திர பிரதேசம், மத்திய பிரதேசம், ஒரிசா, வங்காளம் போன்ற மாநிலங்களில் பாடத்திட்டத்தில் வைத்திருந்தார்கள். இதை படித்த திப்பு சுல்தான் பற்றி ஆராய்ச்சி செய்துகொண்டிருந்த பி.என்.பாண்டே அதிர்ந்தார். இதற்கான ஆதாரம் என்னெவென்று டாக்டர். ஹரிபிரசாத் சாஸ்திரிக்கு விளக்கம் கேட்டு கடிதம் அனுப்பினார். பல கடிதத்திற்கு பிறகு அவரிடம் இருந்து பதில் வந்தது. “மைசூர் கெசட்டில் எடுத்தேன்” என்று..... ........

உடனே மைசூர் பல்கலைக்கழகத்தின் துணை வேந்தர் பிஜேந்திர நாத்ஸீல் அவர்களுக்கு இந்த செய்தி உண்மைதானா, கெசட்டில் அப்படித்தான் இருக்கிறதா என வினவ, அவரும் ஆராய்ந்து அலசிவிட்டு இதுமாதிரி சம்பவம் எதுவும் கெசட்டில் இடம்பெறவில்லை என்று பதில் தருகிறார்.

இந்த ஆதாரங்களையெல்லாம் திரட்டிக்கொண்டு பல மாநிலங்களில் பாடத்திட்டத்தில் இருந்த அந்த பொய்யான வரலாற்று பிழையை நீக்க வைக்கிறார் பி.என்.பாண்டே. இது சில உதாரணங்கள்தான். இதுபோன்று எத்தனையோ சம்பவங்கள் வரலாற்றில் தவறாக பதிவு

செய்யப்பட்டுள்ளன. இதில் ஒரு வருத்தம் என்னவென்றால் இதுபோன்ற வரலாற்று திரிபுகளுக்கு எதிரான குரல் முஸ்லிம்கள் தரப்பில் இருந்து எழுவதில்லை. நடுநிலையான

ஆய்வாளர்களிடமிருந்து மட்டுமே எழுகின்றன.

இஸ்லாமியர்கள் சுதந்திரப் போராட்டத்தில் செய்த தியாகங்களை ஆயிரக்கணக்கான பக்கங்கள் எழுத முடியும், ஆனால் துரதிர்ஷ்டவசமாக, மதவெறி, தீவிரவாத, பாசிச சக்திகள் இந்த உண்மையையும் யதார்த்தத்தையும் சாதாரண இந்தியர்களின் கண்களிலிருந்து மறைத்துவிட்டனர்,

இது மட்டுமல்ல, இந்திய வரலாற்றையும் பாடப்புத்தகங்களில் திரிக்கப்பட்டுள்ளது.அரசியல் ஆதாயத்திற்காகவும்,வாக்குகளைப் பெறுவதற்காகவும், மக்களைப் பிளவுபடுத்துவதற்காகவும், வரலாறு திரித்து எழுதப்பட்டுள்து என்பதே உண்மை. 

தேசபக்தியுள்ள இந்தியர்கள், அரசியல் வாதிகளின் கபட நாடகத்திற்கு பலியாகாமல், வலுவான, நிலையான மற்றும் முற்போக்கான நாட்டிற்காக அனைத்து குடிமக்களையும் ஒன்றிணைக்க பாடுபட வேண்டும்.

வெளியீடு: செங்கல்பட்டு மற்றும் காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான் 05/08/2022

ஆஷூராவின்    சிறப்புகள்.

சிறந்த மாதம்.........

إِنَّ عِدَّةَ الشُّهُورِ عِنْدَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ ۚ ذَٰلِكَ الدِّينُ الْقَيِّمُ ۚ فَلَا تَظْلِمُوا فِيهِنَّ أَنْفُسَكُمْ ۚ وَقَاتِلُوا الْمُشْرِكِينَ كَافَّةً كَمَا يُقَاتِلُونَكُمْ كَافَّةً ۚ وَاعْلَمُوا أَنَّ اللَّهَ مَعَ الْمُتَّقِينَ

நிச்சயமாக அல்லாஹ்விடத்தில் அல்லாஹ்வுடைய (பதிவுப்) புத்தகத்தில் வானங்களையும் பூமியையும் படைத்த நாளிலிருந்தே மாதங்களின் எண்ணிக்கை பன்னிரண்டு ஆகும் - அவற்றில் நான்கு (மாதங்கள்) புனிதமானவை இது தான் நேரான மார்க்கமாகும் - ஆகவே அம்மாதங்களில் (போர் செய்து) உங்களுக்கு நீங்களே தீங்கிழைத்துக் கொள்ளாதீர்கள்; இணை வைப்பவர்கள் உங்கள் அனைவருடனும் போர் புரிவது போல் புரியுங்கள். நிச்சயமாக அல்லாஹ் பயபக்தியுடையோருடனேயே இருக்கின்றான் என்பதை அறிந்து கொள்ளுங்கள்.

١- [عن أبي بكرة نفيع بن الحارث:] إنَّ الزَّمانَ قَدِ اسْتَدارَ كَهَيْئَتِهِ يَومَ خَلَقَ اللَّهُ السَّمَواتِ والأرْضَ، السَّنَةُ اثْنا عَشَرَ شَهْرًا، مِنْها أرْبَعَةٌ حُرُمٌ، ثَلاثٌ مُتَوالِياتٌ: ذُو القَعْدَةِ، وذُو الحِجَّةِ، والمُحَرَّمُ، ورَجَبُ، مُضَرَ الذي بيْنَ جُمادى، وشَعْبانَ.

ஹஜ்ஜத்துல் வதாவில்' உரையாற்றிய போது) நபி(ஸல்) அவர்கள் கூறினார்கள்: அல்லாஹ் வானங்களையும் பூமியையும் படைத்த நாளில் இருந்த (பழைய) நிலைக்கே காலம் திரும்பிவிட்டது. ஓர் ஆண்டு என்பது பன்னிரண்டு மாதங்கள் ஆகும். அவற்றில் நான்கு மாதங்கள் (போரிடுதல் விலக்கப்பட்ட) புனித மாதங்களாகும். (அந்த நான்கு மாதங்களில்) மூன்று மாதங்கள் தொடர்ந்து வருகின்றவையாகும். அவை ஃதுல்கஅதா, ஃதுல்ஹஜ், முஹர்ரம் மற்றும் ஜுமாதஸ்ஸானீக்கும் ஷஅபானுக்கும் இடையிலுள்ள முளர் குலத்து 'ரஜப்' மாதம் ஆகும் என அபூ பக்ரா(ரலி) அறிவித்தார்.                  (ஸஹீஹ் புகாரி) (4662)

அல்லாஹ்வின் அருளால் ஹிஜ்ரி 1444 புதுவருடம் துவங்கி,புனித முஹர்ரம் மாதத்தின் சங்கைமிகு ஆஷுரா தினம் எதிர்வரவிருகின்றது.

அல்லாஹுதஆலா ஓர் ஆண்டிற்கு 12மாதங்களை நிர்ணையித்து,ஒரு மாதத்திற்கு 29 அல்லது 30நாட்களாக வரையறுத்தான்,அந்த மாதங்களில் சிலவற்றையும்,நாட்களில் சிலநாட்களையும் சங்கையாக்கிவைத்திருக்கின்றான்.

ரமழான் மாதத்தில் நோன்பு நோற்பது கட்டாயக் கடமையாகும். இதுவல்லாது பல சுன்னத்தான நோன்புகளை இஸ்லாம் விதித்துள்ளது. அவ்வாறு விதிக்கப்பட்ட சுன்னத்தான நோன்புகளில் சிறந்ததாக ஆஷுரா நோன்பு அமைந்துள்ளது.

ஆஷூரா தினம்

புனித முஹர்ரம் மாதத்தின் பத்தாம் நாளை ’’ عاشوراء ‘‘ஆஷுரா என்று சொல்லப்படுகின்றது.

அல்லாஹுதஆலா ஆஷூரா நாளில் தன் பிரத்யேகமான ரஹ்மத்தையும்,பரகத்தையும் அபரிமிதமாக அருளுகிறான்.

عن عائشة رضي الله عنها: (أنّ قريشاً كانت تصوم عاشوراء في الجاهليّة، ثمّ أمر رسول الله بصيامه، حتّى فرض رمضان، فقال رسول الله صلّى الله عليه وسلّم: من شاء فليصمه، ومن شاء فليفطره) رواه مسلم، وفي رواية للبخاري: (كانوا يصومون عاشوراء قبل أن يفرض رمضان، وكان يوماً تستر فيه الكعبة) أخرجه البخاري، ومسلم، وأبو داود، والترمذي.

ரமலான் மாத நோன்பு கடமையாகுவதற்கு முன்பு முஹர்ரம் ஆஷூரா நாளில் நோன்பு நோற்பது முஸ்லிம்களின் மீது ஃபர்ளாக இருந்தது.

ரமலான் மாத நோன்பு கடமையானதும், அண்ணலம் பெருமானார் ﷺ அவர்கள் ஆஷுரா நோன்பை சுன்னத் ஆக ஆக்கினார்கள்.

ஒரு ஹதீஸில்..

عن أبي قتادة الأنصاري رضي الله عنه أن النبي صلى الله عليه وسلم قال: “صيام يـوم عاشوراء: أحتسب على الله أن يكفر السنـة التي قبله”رواه مسلم

ஆஷுரா நோன்பு அதற்கு முந்திய வருடத்தின் பாவங்களுக்கு பரிகாரமாக அமையும் என நான் கருதுகிறேன் என நபி (ஸல்) அவர்கள் கூறினார்கள்.  அறிவிப்பவர்:அபூகதாதா(ரலி)               நூல்: முஸ்லிம் 1977)

ஆஷூராவும், தவறானப்புரிதலும்.

சில முஸ்லிம்களின் தவறானப்புரிதல்,கண்மணி நாயகம் ﷺஅவர்களின் அருமைப் பேரர் ஹுஸைன் (ரலி)அவர்கள் கர்பலாவில் ஷஹீதாகக்கப்பட்ட நிகழ்வு,யதார்த்தமாக ஆஷூரா நாளில் நிகழ்ந்ததை வைத்து ஆஷூரா சிறப்புப்பெற காரணமே ஹுஸைன்(ரலி)அவர்களின் ஷஹாதத்தினால் தான் என தவறாக எண்ணுகின்றனர்.

நாயகம் ﷺஅவர்களின் காலத்திலிருந்தே ஆஷுராவை முஸ்லிம்கள் சங்கையாக கருதினர்.அந்நாளில் நோன்பு நோற்குமாறு நபிﷺஅவர்கள் கட்டளையிட்டுருக்கின்றார்கள்.

குர்ஆனிலும் இம்மாதத்தை சிறப்பித்துக் கூறப்பட்டுள்ளது.

ஹுஸைன் (ரலி)அவர்களின் ஷஹாதத்தோ நாயகம் ﷺஅவர்களின் வஃபாதிற்கு 50 ஆண்டுகளுக்கு பின் ஹிஜ்ரி 61ல் நிகழ்ந்தது.எனவே ஆஷூராவிற்கும்,ஹுஸைன் (ரலி)அவர்களின் ஷஹாதத்திற்கும் எந்த தொடர்புமில்லை.

ஆஷூரா நாளில் ஹுஸைன் (ரலி)அவர்கள் ஷஹீதாகி இருப்பது அன்னவர்ளின் சிறப்பை காட்டுகின்றதே ஒழிய அதனால் அன்நாளுக்கு சிறப்பு இல்லை.

ஆஷூரா சிறப்புப்பெற காரணம்.

ஆஷூரா ஏன் சிறப்பான நாள் என்ற உண்மைக்காரணத்தை அல்லாஹ்வே நன்கறிந்தவன்.

ஆனால் சில அறிஞப்பெருமக்களின் கூற்று:ஆஷூரா என்ற பெயரும் ,அந்நாளை அல்லாஹ் சிறப்பாக்கிய காரணமும்,

அல்லாஹ் அந்நாளில் பத்து நபிமார்களுக்கு தன் பிரத்யேகமான உதவிளால் சங்கைச்செய்தான்

1-ஹழ்ரத் ஆதம் (அலை)அவர்களின் தவ்பாவை வை ஏற்றுக்கொண்டது.

2-ஹழ்ரத் இத்ரீஸ்(அலை)அவர்களுக்கு உயர்ந்த அந்தஸ்தை வழங்கியது.

3-ஹழ்ரத் நூஹ்(அலை)அவர்களின் கப்பல் ஜூதி மலையில் கரை ஒதுங்கியது.

4-ஹழ்ரத் இப்ராஹீம் (அலை)அவர்கள் பிறந்ததும்,கலீலுல்லாஹ் خلیل ஆனதும்,நெருப்பு குண்டத்திலிருந்து பாதுகாக்கப்பட்டதும்.

5-ஹழ்ரத் தாவூத் (அலை)அவர்களின் தவ்பாவை வை ஏற்றுக்கொண்டது.

6-ஹழ்ரத் ஈஸா(அலை)அவர்கள் வானுலகிற்கு உயர்த்தப்பட்டது.

7-ஹழ்ரத் மூஸா(அலை)அவர்கள்

ஃபிர்அவ்ன் படையை விட்டும் பாதுகாக்க கடல் பிளந்தது.பிர்அவ்ன் மூழ்கடிக்கப்பட்டது.

8-ஹழ்ரத் யூனுஸ்(அலை)அவர்கள் மீன் வயிற்றிலிருந்து வெளியாக்கப்பட்டது.

9-ஹழ்ரத் சுலைமான்(அலை)அவர்களுக்கு ஆட்சி வழங்கப்பட்டது.

10-ஒரு அறிவிப்பின் படி,நபி ﷺஅவர்களின் பிறப்பு.

மேற்கூறிய அனைத்தும் ஆஷூரா தினத்தில் நிகழ்ந்தன.

இன்னொரு அறிவிப்பில்  உலகம் அழியும் கியாமத் தினம் ஆஷூராவில் நிகழும் என வந்துள்ளது.

இப்படி பல்வேறு நிகழ்வுகளை வைத்து இந்நாளை அல்லாஹ் சிறப்பாக்கிவைத்திருக்கின்றான் எனக் கூறப்பட்டாலும் உண்மை காரணத்தை அல்லாஹ்வே நன்கறிந்தவன்.

ஆஷூரா நோன்பு

முஹர்ரம் மாதம் பத்தாம் நாள் நோற்கப்படும் நோன்பு ஆஷுரா நோன்பு எனப்படும்.

- حَدَّثَنَا عُبَيْدُ اللهِ بْنُ مُوسَى ، عَنِ ابْنِ عُيَيْنَةَ عَنْ عُبَيْدِ اللهِ بْنِ أَبِي يَزِيدَ ، عَنِ ابْنِ عَبَّاسٍ ، رَضِيَ اللَّهُ عَنْهُمَا ، قَالَ :

مَا رَأَيْتُ النَّبِيَّ صلى الله عليه وسلم يَتَحَرَّى صِيَامَ يَوْمٍ فَضَّلَهُ عَلَى غَيْرِهِ إِلاَّ هَذَا الْيَوْمَ يَوْمَ عَاشُورَاءَ وَهَذَا الشَّهْرَ يَعْنِي شَهْرَ رَمَضَانَ

ஆஷுரா எனும் இந்த நாளையும் (ரமளான் எனும்) இந்த மாதத்தையும் தவிர, வேறெதையும் ஏனையவற்றை விடச் சிறப்பித்துத் தேர்ந்தெடுத்து நபி (ஸல்) அவர்கள் நோன்பு நோற்பதை நான் பார்த்ததில்லை.                          அறிவிப்பவர்: இப்னு அப்பாஸ் (ரலி), புகாரி-2006    

- حَدَّثَنَا مُسَدَّدٌ ، حَدَّثَنَا بِشْرُ بْنُ الْمُفَضَّلِ ، حَدَّثَنَا خَالِدُ بْنُ ذَكْوَانَ ، عَنِ الرُّبَيِّعِ بِنْتِ مُعَوِّذٍ قَالَتْ

أَرْسَلَ النَّبِيُّ صلى الله عليه وسلم غَدَاةَ عَاشُورَاءَ إِلَى قُرَى الأَنْصَارِ مَنْ أَصْبَحَ مُفْطِرًا فَلْيُتِمَّ بَقِيَّةَ يَوْمِهِ ، وَمَنْ أَصْبَحَ صَائِمًا فَلْيَصُمْ قَالَتْ فَكُنَّا نَصُومُهُ بَعْدُ وَنُصَوِّمُ صِبْيَانَنَا وَنَجْعَلُ لَهُمُ اللُّعْبَةَ مِنَ الْعِهْنِ فَإِذَا بَكَى أَحَدُهُمْ عَلَى الطَّعَامِ أَعْطَيْنَاهُ ذَاكَ حَتَّى يَكُونَ عِنْدَ الإِفْطَارِ.

நபி (ஸல்) அவர்கள் ஆஷுரா தினத்தின் காலையில் அன்ஸாரிகளின் கிராமங்களுக்கு ஆளனுப்பி, “யார் நோன்பு நோற்காதவராக காலைப் பொழுதை அடைந்து விட்டாரோ அவர் இன்றைய தினத்தின் எஞ்சிய நேரத்தை (நோன்பாக) நிறைவு செய்து கொள்ளட்டும்! யார் நோன்பாளியாகக் காலைப் பொழுதை அடைந்தாரோ அவர் நோன்பைத் தொடரட்டும்” என்று அறிவிக்கச் செய்தார்கள். நாங்கள் அதன் பின்னர் அந்நாளில் நோன்பு நோற்கலானோம். எங்கள் சிறுவர்களையும் நோன்பு நோற்க வைப்போம். கம்பளியாலான விளையாட்டுப் பொருட்களை அவர்களுக்காக நாங்கள் செய்வோம். அவர்கள் (பசியால்) உணவு கேட்டு அழும் போது நோன்பு முடியும் நேரம் வரை (அவர்கள் பசியை மறந்திருப்பதற்காக) அவர்களிடம் அந்த விளையாட்டுப் பொருட்களைக் கொடுப்போம்.

அறிவிப்பவர்: ருபைய்யிவு பின்த் முஅவ்வித் (ரலி), புகாரி-1960

حَدَّثَنَا يَحْيَى بْنُ بُكَيْرٍ ، حَدَّثَنَا اللَّيْثُ ، عَنْ عُقَيْلٍ ، عَنِ ابْنِ شِهَابٍ ، عَنْ عُرْوَةَ ، عَنْ عَائِشَةَ ، رَضِيَ اللَّهُ عَنْهَا ، وَحَدَّثَنِي مُحَمَّدُ بْنُ مُقَاتِلٍ قَالَ : أَخْبَرَنِي عَبْدُ اللهِ ، هُوَ ابْنُ الْمُبَارَكِ- قَالَ : أَخْبَرَنَا مُحَمَّدُ بْنُ أَبِي حَفْصَةَ ، عَنِ الزُّهْرِيِّ ، عَنْ عُرْوَةَ ، عَنْ عَائِشَةَ ، رَضِيَ اللَّهُ عَنْهَا ، قَالَتْ

كَانُوا يَصُومُونَ عَاشُورَاءَ قَبْلَ أَنْ يُفْرَضَ رَمَضَانُ ، وَكَانَ يَوْمًا تُسْتَرُ فِيهِ الْكَعْبَةُ فَلَمَّا فَرَضَ اللَّهُ رَمَضَانَ قَالَ رَسُولُ اللهِ صلى الله عليه وسلم : مَنْ شَاءَ أَنْ يَصُومَهُ فَلْيَصُمْهُ ، وَمَنْ شَاءَ أَنْ يَتْرُكَهُ فَلْيَتْرُكْهُ.

ரமலான் நோன்பு கடமையாக்கப்படுவதற்கு முன் இந்த நோன்பு கட்டாயமாக இருந்தது. ரமலான் நோன்பு கடமையாக்கப்பட்ட பின் விரும்பியவர் நோற்கலாம் என்ற நிலைக்கு வந்தது. (ஹதீஸின் கருத்து).  அறிவிப்பவர்: ஆயிஷா (ரலி), புகாரி-1592

 – وَحَدَّثَنَا الْحَسَنُ بْنُ عَلِىٍّ الْحُلْوَانِىُّ حَدَّثَنَا ابْنُ أَبِى مَرْيَمَ حَدَّثَنَا يَحْيَى بْنُ أَيُّوبَ حَدَّثَنِى إِسْمَاعِيلُ بْنُ أُمَيَّةَ أَنَّهُ سَمِعَ أَبَا غَطَفَانَ بْنَ طَرِيفٍ الْمُرِّىَّ يَقُولُ سَمِعْتُ عَبْدَ اللَّهِ بْنَ عَبَّاسٍ – رضى الله عنهما – يَقُولُ

حِينَ صَامَ رَسُولُ اللَّهِ -صلى الله عليه وسلم- يَوْمَ عَاشُورَاءَ وَأَمَرَ بِصِيَامِهِ قَالُوا يَا رَسُولَ اللَّهِ إِنَّهُ يَوْمٌ تُعَظِّمُهُ الْيَهُودُ وَالنَّصَارَى. فَقَالَ رَسُولُ اللَّهِ -صلى الله عليه وسلم- « فَإِذَا كَانَ الْعَامُ الْمُقْبِلُ – إِنْ شَاءَ اللَّهُ – صُمْنَا الْيَوْمَ التَّاسِعَ ». قَالَ فَلَمْ يَأْتِ الْعَامُ الْمُقْبِلُ حَتَّى تُوُفِّىَ رَسُولُ اللَّهِ -صلى الله عليه وسلم-.

நபிகள் நாயகம் (ஸல்) அவர்கள் ஆஷுரா நாளில் நோன்பு நோற்று மற்றவர்களுக்கும் கட்டளையிட்டார்கள். அப்போது நபித்தோழர்கள், “அல்லாஹ்வின் தூதரே! இந்த நாளை யூதர்களும் கிறித்தவர்களும் மகத்துவப்படுத்துகின்றனரே?” என்று கேட்டனர். அதற்கு நபிகள் நாயகம் (ஸல்) அவர்கள், “அடுத்த வருடம் அல்லாஹ் நாடினால் ஒன்பதாம் நாளும் நோன்பு நோற்பேன்” எனக் கூறினார்கள். ஆனால் அடுத்த ஆண்டு வருவதற்குள் மரணித்து விட்டார்கள்.

அறிவிப்பவர்: இப்னு அப்பாஸ் (ரலி), முஸ்லிம்-2088‌.

அல்லாஹ்வின் அருளையும்,பரக்கத்தையும் பெற்றுத்தரும் சிறப்புவாய்ந்த ஆஷூரா நாளில் நோன்பு நோற்பது சுன்னத்தான அமலாகும்.

عن ابن عباس رضي الله عنهما أنّه قال: (حين صام رسول ‏الله - صلّى الله عليه وسلّم - يوم عاشوراء، وأمر بصيامه،

இப்னு அப்பாஸ் ரழியல்லாஹு அன்ஹு அவர்கள் கூறினார்கள்: ‘நபி ஸல்லல்லாஹு அலைஹி வஸல்லம் அவர்கள் ஆஷூரா நோன்பை தானும் நோற்று அதை மற்றவர்கள் நோற்கவும் கட்டளையிட்டார்கள்’.                          (ஆதாரம்: புகாரி)

وعن أبي قتادة رضي اللَّه عنه ، أن النبي صلى الله عليه وسلم قال: " صيام يوم عاشوراء، أحتسب على اللَّه أن يكفر السنة التي قبله" .  أخرجه مسلم

நபி ஸல்லல்லாஹு அலைஹி வஸல்லம் அவர்களிடம் ஆஷூரா நோன்பைப் பற்றி கேட்கப்பட்டது, அதற்கு  நபி ஸல்லல்லாஹு அலைஹி வஸல்லம் அவர்கள், ‘அது கடந்த கால பாவங்களை மன்னிக்கும்’ எனக் கூறினார்கள்.(அறிவிப்பாளர்: அபூகதாதா ரழியல்லாஹு அன்ஹு. நூல்: முஸ்லிம்)

ஆஷுரா நோன்பு அதற்கு முந்திய வருடத்தின் பாவங்களுக்கு பரிகாரமாக அமையும் என நான் கருதுகிறேன் என நபி ஸல்லல்லாஹு அலைஹி வஸல்லம் அவர்கள் கூறினார்கள். (முஸ்லிம்)

யூதர்களுக்கு ஒப்பாகுவதை விட்டும் தடுத்தல்.

عَنْ ابْنِ عَبَّاسٍ رَضِيَ اللَّهُ عَنْهُمَا قَالَ قَدِمَ النَّبِيُّ صَلَّى اللَّهُ عَلَيْهِ وَسَلَّمَ الْمَدِينَةَ فَرَأَى الْيَهُودَ تَصُومُ يَوْمَ عَاشُورَاءَ فَقَالَ مَا هَذَا ؟ قَالُوا : هَذَا يَوْمٌ صَالِحٌ ، هَذَا يَوْمٌ نَجَّى اللَّهُ بَنِي إِسْرَائِيلَ مِنْ عَدُوِّهِمْ فَصَامَهُ مُوسَى، قَالَ فَأَنَا أَحَقُّ بِمُوسَى مِنْكُمْ فَصَامَهُ وَأَمَرَ بِصِيَامِهِ "

நபிﷺஅவர்கள் மதினாவிற்கு வருகை தந்தபோது ஆஷூரா நாளில் யூதர்கள் நோன்பிருப்பதைக் கண்டார்கள். ‘இந்நாளின் சிறப்பென்ன?’ என்று யூதர்களிடம் நபி ஸல்லல்லாஹு அலைஹி வஸல்லம் அவர்கள் கேட்டார்கள். அதற்கு யூதர்கள் இது மகத்தான நாளாகும். இந்நாளில் தான் மூஸா அலைஹிஸ்ஸலாம் அவர்களை அல்லாஹ் காப்பாற்றினான். மேலும் ஃபிர்அவ்னையும் அவனுடைய சமூகத்தினரையும் (கடலில்) மூழ்கடித்தான். எனவே அல்லாஹ்வுக்கு நன்றி கூறும் விதமாக மூஸா அலைஹிஸ்ஸலாம் அவர்கள் நோன்பு நோற்றார்கள். அதனால் நாங்கள் நோன்பு நோற்கிறோம் என்று கூறினார்கள். நபிஸல்லல்லாஹு அலைஹி வஸல்லம் அவர்கள் நாங்கள் தான் மூஸா அலைஹிஸ்ஸலாம் அவர்களை பின்பற்றுவதில் உங்களை விடத் தகுதியானவர்கள் என்று கூறினார்கள். மேலும் அந்நாளில் நோன்பு நோற்றார்கள், நோன்பு நோற்குமாறு கட்டளையிட்டார்கள்.

قال الرسول صلّى الله عليه وسلّم: (لئن بقِيتُ إلى قابلٍ لأصومَنَّ التاسعَ

மற்றொரு அறிவிப்பில் அடுத்த வருடம்  உயிரோடு  இருந்தால்  ஒன்பதாம் நாளும் நோன்பு நோற்பேன் எனக் கூறினார்கள்

அறிவிப்பாளர்: இப்னுஅப்பாஸ் ரழியல்லாஹு அன்ஹு நூல்: புகாரி, முஸ்லிம்

 النبي ﷺ أنه قال: خالفوا اليهود صوموا يومًا قبله ويومًا بعده[1] وفي رواية أخرى: صوموا يومًا قبله أو يومًا بعده[2

இஸ்லாம் இறைவனால் அங்கீகரிக்கப்பட்ட உன்னத சன்மார்க்கமாகும்,மனித குலம் வாழ்வில் வளம் பெறவும்,மறுமையில் ஈடேற்றம் பெறவும் இறைவனால் அருளப்பட்ட சிறந்த மார்க்கமாகும்.

அதனால் தான் கண்மணி நாயகம்ﷺ அவர்கள் இஸ்லாம் ஒரு சிறு காரியத்தில் கூட பிற மதத்திற்கு ஒப்பாகுவதை வெறுத்தார்கள்.

ஆஷூரா நாளில் நோன்புநோற்பதை சுன்னத் ஆக்கிய நபி ﷺஅவர்கள் யூதர்களுக்கு மாற்றமாக 9அல்லது 11 இரண்டில் ஒரு நாளை சேர்த்து இரண்டு நோன்பு நோற்குமாறு கட்டளையிட்டார்கள்.

இஸ்லாத்தின் மிக முக்கிய கட்டளைகளில் ஒன்று, பிற மதத்திற்கு ஒப்பாக நடக்கக் கூடாது என்பதாகும்.

அல்லாஹ்வின் தூதர் ﷺஅவர்கள் கூறினார்கள்:

من تشبه بقوم فهو منهم۔                                                  ابو داود، کتاب الباس، باب فی لبس الشهرة﴾

யார் பிற சமுதாயத்தின் சம்பிரதாயங்களுக்கு ஒப்பாக நடக்கிறாரோ அவர் அவர்களைச் சார்ந்தவரே!

அறிவிப்பவர்: இப்னு உமர் (ரலி), நூல்: அபூதாவூத்-4031 (3512)

இஸ்லாமியர்களின் அடையாளமாக உள்ள தாடியும் கூட யூத,கிருத்துவர்களுக்கு மாறுசெய்வதற்காக சொல்லப்பட்ட கடமையே ஆகும்.

முஷ்ரிக்களுக்கு மாற்றாமாக மீசையை கத்தரிக்கும் படியும்,தாடியை அடர்த்தியாக வைக்கும் படியும் இஸ்லாம் ஏவுகின்றது.

عَنِ ابْنِ عُمَرَ رضي الله عنه، قَالَ: قَالَ رَسُولُ اللّهِ صلى الله عليه وسلم: "خَالِفُوا الْمُشْرِكِينَ، أَحْفُوا الشَّوَارِبَ وَأَوْفُوا اللِّحَى"

முஷ்ரிக்குகளுக்கு மாற்றம் செய்யுங்கள்.அதுப்போல் தலைப்பாகை அணியும் தொப்பியுடன் அணியுங்கள் காரணம் முஷ்ரிக்கள் தொப்பியின்றி தலைப்பாகை அணிவார்கள் என்கிறது இஸ்லாம்.

இப்படி சிறுசிறு காரியங்களில் கூட பிறமதத்தவருக்கு ஒப்பாகுவதை இஸ்லாம் வெறுக்கிறது.

நற்காரியங்களில் கூட அன்னியவர்களுக்கு ஒப்பாகுவதை இஸ்லாம் தடைசெய்திருக்க, இன்று இஸ்லாமியர்கள் ஃபேஷன் என்கிற பெயரில் நடை,உடை,பேச்சி,கலாச்சாரம் ஏன் சிகையலங்காரம் உட்பட அனைத்திலும் ஆங்கிலேயர்களையும்,சினமா பிரபலங்களையும் பின்பற்றிக்கொண்டிருக்கின்றார்கள்.

(அல்லாஹ் நம் சமூகத்தை பாதுகாப்பானாக!ஆமீன்)

ஆஷூராவின் சிறப்பை கூறும் மற்றுமொரு நபிமொழி.

عن أبى هريرة رضى الله عنه أن رسول الله صلى الله عليه وآله وسلم قال: «مَنْ وَسَّعَ عَلَى أَهْلِهِ يَوْمَ عَاشُورَاءَ وَسَّعَ اللهُ عَلَيْهِ سَائِرَ سَنَتِهِ» أخرجه البيهقى فى "شعب الإيمان

அல்லாஹ்வின் தூதர் ﷺஅவர்கள் கூறினார்கள்:எவர் ஆஷூரா தினத்தில் தன் குடும்பத்தவர்களின் மீது விசாலமாக செலவிடுகின்றாரோ, அல்லாஹ் அவருக்கு வருடம் முழுவதும் செல்வத்தை விசாலமாக வழங்கி விடுகின்றான்.             அறிவிப்பவர் : அபூஹீரைரா                             நூல் : பைஹகி.

அல்லாஹ் தஆலா நம்மை ஆஷுரா தினத்தின் சிறப்பை பெற்றவர்களாக ஆக்கி வைப்பானாக! ஆமின்.

வெளியீடு : செங்கல்பட்டு மற்றும் காஞ்சிபுரம் மாவட்ட ஜமாஅத்துல் உலமா சபை.