ஜும்ஆ பயான் 08/09/2023

குர்ஆன் கூறும் அறிவியல்.

اِقْتَـرَبَتِ السَّاعَةُ وَانْشَقَّ الْقَمَرُ‏

(இறுதி) நேரம் நெருங்கி விட்டது; சந்திரனும் பிளந்து விட்டது.      (அல்குர்ஆன் : 54:1)

அல்லாஹுத்தஆலா பிரபஞ்சத்தையும் கோடான கோடி படைப்பினங்களையும் படைத்த, பேராற்றல்களும், அற்புதங்களும் நிறைந்த இப்பிரபஞ்சத்தை ஆய்வு செய்து படைத்த இறைவனை அறிந்து கொள்ளுமாறு இஸ்லாம் போதிக்கிறது.

குர்ஆனில் மனித சிந்தனையை தூண்டும் ஏராளமான வசனங்கள் உள்ளன.     தப்ஸீர் மஆரிபுஃல் குர்ஆனின் ஆசிரியர் மௌலானா முஃப்தி முஹம்மது ஷஃபீ ஸாஹிப்(ரஹ்)அவர்கள் எழுதுகிறார்கள்;குர்ஆனில் சுமார்  700 வசனங்கள் வானம்,பூமி,வானத்தின் ஓட்டம்,பூமியின் ஓட்டம், சயின்ஸ் அறிவியல் பற்றி பேசுகிறது.

இஸ்லாமிய போதனை மக்கா மண்ணில் ஆரம்பிக்கப்பட்ட வேளை அரேபியாமட்டுமன்றி அகில உலகுமே அறியாமை இருளில் மூழ்கியிருந்தது. இஸ்லாம் எனும் அறிவுத் தீபத்தை ஏற்ற வந்த அன்னல் நபி உம்மி (எழுத வாசிக்கத் தெரியாத) தூதராவார். அவர் இந்தத் தூதை எடுத்துச் சொன்ன சமூகம் (எழுத வாசிக்கத் தெரியாத) உம்மி சமூகமாகும் என்பதைக் குர்ஆன் குறிப்பிடுகிறது. வரலாற்று ஏடுகள் அக்காலத்தை ‘ஜாஹிலிய்யக்காலம்’ என அடையாளப் படுத்துகின்றன.

 நபி(ஸல்) அவர்களது 23 வருடகால கடின முயற்சியின் பின்னர் அரேபியர்களிடையே கலாசார பண்பாட்டு ரீதீயான முன்னேற்றம் ஏற்பட்டது போல் மிகப் பெரிய அளவில் அறிவியல் பேரெழுச்சியும் ஏற்பட்டது. அரேபிய தீபகற்பத்தையும் தாண்டி ஐரோப்பிய உலகுக்கும் அறிவொளிகளை வழங்கும் அளவிற்கு மகத்தானதொரு மாற்றம் நிகழ்ந்தது. இஸ்லாத்தின் மீதும் முஸ்லிம்கள் மீதும் காழ்ப்புணர்வு கொண்டவர்களால் கூட புறக்கணித்து விட முடியாத அளவுக்கு அறிவியல் எழுச்சியின் உச்சத்தை அடைய அந்த சாதாரண ஆட்டுமந்தை மேய்த்தவர்களைத் தூண்டியது எது? இந்த திடீர் திருப்பத்திற்கான காரணங்கள் என்ன? அறிவியல் துறையில் முஸ்லிம்கள் நிகழ்த்திய சாதனைகள்? அதற்கான காரணிகள் என்ன என்பனவற்றை இங்கு நோக்குவோம்.

முஸ்லிம்களின் அறிவியல் எழுச்சி:

கி.பி. 500ம் ஆண்டு முதல் 1500ம் ஆண்டுவரையுள்ள காலம் மத்தியகாலம் என வரலாற்றில் அழைக்கப்படுகிறது. இருண்ட காலம் என்றும் வர்ணிக்கப்படும் இக்காலப் பிரிவில் ஐரோப்பிய நாடுகள் கூட கலை, கல்வி, கலாசார ரீதீயில் பெரிய வீழ்ச்சியைக் கண்டிருந்தன. இதே வேளை கிறிஸ்தவ உலகு அறிவியல் துறைக்கெதிரான அறிவிக்கப்படாத யுத்தத்தையே தொடங்கியிருந்தது.

கி.பி. 283ல் எகிப்திய ஆட்சிப்பீடத்திலேறிய இரண்டாம் தொலமி அலெக்சாந்திரியாவில் நிறுவிய பிரமாண்டமான நூல் நிலையத்தை தியோபிளஸ் எனும் பாதிரியின் தூண்டுதலால் கி.பி. 391ல் கிறிஸ்தவர்கள் தீயிட்டுக் கொழுத்தினர். அறிவியலை மதத்தின் பெயரால் எதிர்த்தவர்கள் அறிஞர்களையும் விட்டுவைக்கவில்லை. ‘இயேசு கிறிஸ்துவுக்குப்பின் எந்த விஞ்ஞானத்துக்கும் இடமில்லை, அவருடைய போதனைகளுக்குப் பின் எந்தவிதமான விஞ்ஞானப் போதனைகளும் தேவையில்லை.  என்று போதிக்கப்பட்டதால் விஞ்ஞானிகள் பலர் மதப்பிரிவினரால் கொடூரமாகக் கொல்லப்பட்டனர். இவ்வாறு அறிவியலுக்கெதிரான போராட்டம் ஒருபக்கம் நடந்து  கொண்டிருக்கையில் முஸ்லிம் உலகு அறிவுத்தாகம் கொண்டு, அறிவியலில் மோகம் கொண்டு பண்டைய அறிவியல் செல்வங்களைத் தேடி வந்து பெற்று அவற்றை மேலும் மெருகூட்டும் பணியில் மும்முரமாக ஈடுபட்டுக்கொண்டிருந்தது.

ஒரு விஞ்ஞானியும் கண்டுபிடிப்பு அவர்களின் மத நூலான பைபிளுக்கு சற்று முரணாக இருந்தாலும் கூட கடுமையாக தண்டிக்கப்படுவார்.

வாடிக்கன் திருச்சபையில் மதக் குற்றங்களைச் செய்பவர்களுக்கென்று தனி கோர்டும்,சிறைச்சாலையும் இருந்தது.அந்த சிறைச்சாலையில் குற்றம் சாட்டப்பட்டு அடைக்கப்பட்டவர்கள் அனைவரும் (சயின்டிஸ்ட்கள்)விஞ்ஞானிகளாக இருந்தனர்.

பைபிளில் "ஒரு தாய் வலியுடன் குழந்தையை பெற்றெடுக்கிறாள்"என்ற வசனத்திற்கு முரணாக இருப்பாதாகக் கூறி வெகு நாட்கள் Anesthesia மயக்க மருந்துக்கு தடைவிதித்திருந்தனர்.

மேற்குறித்த நிலை பற்றி பிரபல வரலாற்றாசிரியரான H.G.Wells தனது நூலில், ‘முதல் முதலில் கிரேக்கரே தத்துவ விசாரணையை ஆரம்பித்தனர். அவர்களுக்குப் பின்னர் அரேபியர் அம் முறையைத் தொடர்ந்தனர். அரிஸ்டோடில் விதைத்த தத்துவம், அலெக்ஸாந்திரியாவில் புகழ்பெற்ற நூதனசாலையில் கவனிப்பாரற்றுக் கிடந்தது. இவை அரேபியரின் எழுச்சிக்குப் பின்னரே முளைவிட்டு பழம் தரத் துவங்கின என்று குறிப்பிடுகின்றார்.

அழிவின் விளிம்பிலிருந்த அறிவியலை முஸ்லிம்கள் பாதுகாத்திருக்காவிட்டால் பழம் பெரும் அறிவியல் முதுசங்கள் பல இன்றை உலகுக்குக்கிடைக்காது போயிருக்கலாம். அழிவிலிருந்து அறிவியலைப் பாதுகாத்தமை முஸ்லிம்கள் அறிவியல் உலகுக்குச் செய்த மிகப் பெரும் சேவையாகும். இது குறித்து பேராசிரியர் Stanislas Guyand அவர்கள் தனது Encyceopadie des science religieusus என்ற ஜேர்மனிய நூலில்,ஒட்டுமொத்தமாகவும் முஸ்லிம்கள் அறிவியல் துறைக்காற்றிய பங்குபற்றிக் கூறுவதாயின், பேராசிரியர் பிலிப் கே. ஹிட்டி History of Arabs எனும் தனது நூலில் கூறுவது போன்று ‘மத்திய கால ஆரம்பத்தில் மனித இனத்தின் முன்னேற்றத்திற்காகப் பணியாற்றியவர்கள் அரேபியர்களைப் போல வேறு எவரும் இல்லை’ என்று கூறலாம்.

வானவியல்:

முஸ்லிம்கள் பிரகாசித்த அறிவியல்துறைகளில் வானவியலும் ஒன்றாகும். இந்திய, கிரேக்க வானவியல் நூல்களை மொழிபெயர்த்து கற்றதோடு தமது ஆய்வுமுயற்சிகளையும் முஸ்லிம்கள் முடுக்கிவிட்டனர். மிகக்குறுகிய காலத்திலேயே முஸ்லிம் உலகில் பல வானியல் ஆய்வாளர்கள் உருவாகினர். அவர்கள் வானவியல்துறையில் அதுவரைகாலம் நிலவி வந்த தவறான கருத்துக்களை விமர்சிக்கவும் தயங்கவில்லை. கலீபாக்களின் உதவியுடன் பல்வேறு இடங்களில் வானவியல் ஆய்வு நிலையங்களும் நிறுவப்பட்டன.

முஹம்மத் அல் பஸாரி, யாகூப் இப்னு தாரிக், அல் குவாறிஸ்மி (780-850), அலி இப்னு ஈஸா, அல் பர்கானி, அல் மஹானி, பனூ மூஸா, அபூ மஃ’ர் போன்ற பல அறிஞர்கள் இத்துறையில் பல நூல்களையும் ஆய்வுகளையும் வெளியிட்டுள்ளனர்.

வெற்றிகரமாக விண்ணில் சீறிப் பாய்ந்தது சந்திரயான்-3

ஸ்ரீஹரிகோட்டா: ஸ்ரீஹரிகோட்டாவில் இருந்து எல்விஎம்-3 ராக்கெட் மூலம் சந்திரயான்-3 விண்கலம் இன்று மதியம் 2.35 மணிக்கு வெற்றிகரமாக விண்ணில் ஏவப்பட்டது. இஸ்ரோ விஞ்ஞானிகளுக்கு பல்வேறு தரப்பிலிருந்தும் பாராட்டுகள் குவிந்து வருகின்றன.

செய்தியாளர்கள் சந்திப்பில் பேசிய இஸ்ரோ தலைவர் சோமநாத், "திட்டமிட்டபடி விண்கலம் பூமியில் இருந்து 179 கிலோ மீட்டர் தொலைவில் அதன் சுற்றுவட்டப்பாதையில் நிலைநிறுத்தப்பட்டது. சந்திரயான்-3 நிலவை நோக்கிய தனது பயணத்தைத் தொடங்கிவிட்டது. இனி எல்லாம் சரியாக நடைபெற வாழ்த்துகளைத் தெரிவித்துக் கொள்கிறேன்" என்று தெரிவித்தார். 'மிஷன் அக்கம்ப்ளிஷ்ட்' என்று ஆங்கிலத்தில் அவர் உரையைத் தொடங்கியதும் அரங்கில் கரகோஷம் எழுந்தது.

தொடர்ந்து பேசிய சந்திரயான்-3 திட்ட இயக்குநர் மோகன் குமார், "சந்திரயான்-3 விண்கலம் வெற்றிகரமாக விண்ணில் நிலைநிறுத்தப்பட்டதன் மூலம் மீண்டும் அது மிகவும் வலுவான ஒரு விண்கலம் என்பதை உலகுக்கு நிரூபித்துள்ளது" என்று பெருமிதம் தெரிவித்தார். தொடர்ந்து இந்தத் திட்டத்தில் பணியாற்றிய அனைவருக்கும் தனது வாழ்த்துகளையும் நன்றியையும் அவர் பதிவு செய்தார்.

நன்றி;இந்து தமிழ் திசை

இஸ்லாமும்,  விண்வெளிப்பயணமும்.

சந்திரனில் முதன் முதலில் தரையிறங்கிய மனிதர் அமெரிக்காவைச் சார்ந்த நீல் ஆம்ஸ்ட்ராங் என்பது உலகறிங்க செய்தி ஆகும்.

சந்திரனை தொட்டது யார் ஆம்ஸ்ட்ராங்கா?

உண்மையில் சந்திரனை முதன் முதலில்  தொட்டவரும்,ஏன் முதன் முதலில் விண்வெளிப் பயணம் (மிஃராஜ்)மேற்கொண்டவர்களும் நம் கண்மணி நாயகம் ﷺஅவர்கள் தான் என்பதனை திருமறை குர்ஆன் ஆணித்தரமாக நிறுவுகிறது.அதற்கான சான்றுகளும் உள்ளன.

சந்திரன் பிளந்தது உண்மையா?

اِقْتَـرَبَتِ السَّاعَةُ وَانْشَقَّ الْقَمَرُ‏

(இறுதி) நேரம் நெருங்கி விட்டது; சந்திரனும் பிளந்து விட்டது.    (அல்குர்ஆன் : 54:1) இவ்வசனத்தில் சந்திரன் பிளந்து விட்டது என்று கூறப்பட்டுள்ளது.

நபிகள் நாயகம் (ஸல்) அவர்கள் தம்மை இறைவனின் தூதர் என்று கூறியபோது அதற்குரிய அத்தாட்சியை அன்றைய மக்கள் கேட்டார்கள்.

அப்போது நபிகள் நாயகம் (ஸல்) அவர்கள் வானத்தில் சந்திரனை இரண்டாகப் பிளந்து காட்டினார்கள். அனைவரும் பார்த்துக் கொள்ளுங்கள் என்றும் மக்களிடம் கூறினார்கள். (பார்க்க: புகாரீ 3636, 4864, 4865)

அல்லாஹ்வின் தூதர் (ஸல்) அவர்கள் உண்மையில் இறைவனின் தூதர்தானா என்பதை உண்மைப்படுத்திட ஓர்  சான்றைக்  காட்டும்படி மக்காவாசிகள் கேட்டனர். அதன் உண்மைச் சான்றாக அல்லாஹ்வின் புறத்திலிருந்து சந்திரனை இரண்டு துண்டுகளாக்கி அற்புதம் நிகழ்த்திக் காட்டப்பட்டது என்பது இந்நிகழ்வின் வரலாற்றுப் பின்னணியாகும். நபி (ஸல்) அவர்கள் மக்காவிலிருந்து மதீனாவுக்கு ஹிஜ்ரத் செல்வதற்கு ஐந்து ஆண்டுகளுக்குமுன் இச்சம்பவம் நிகழ்ந்ததாக வரலாற்று ஆசிரியர்கள் குறிப்பிடுகின்றனர்.

இது குறித்தான அறிவிப்புகள் கூறுவதாவது:

நாங்கள் நபி(ஸல்) அவர்களுடன் மினாவில் இருந்தபோது சந்திரன் (இரண்டு துண்டுகளாகப்) பிளவுபட்டது. உடனே, நபி(ஸல்) அவர்கள், ‘நீங்கள் (இதைப் பார்த்து நினைவில் இருத்தி) சாட்சியாளர்களாக இருங்கள்” என்று கூறினார்கள். (அதன்) இரண்டு துண்டுகளில் ஒன்று (ஹிரா) மலையின் திசையில் சென்றது. அறிவிப்பவர் அப்துல்லாஹ் இப்னு மஸ்வூத் (நூல்கள் – புகாரி 3636, 3869, 3871, 4864, 4865 முஸ்லிம் 5396, திர்மிதீ, அஹ்மத்)

அறிவிப்பாளர் மஸ்ரூக்(ரஹ்) அவர்களின் ஓர் அறிவிப்பில் “மக்காவில் (சந்திரன்) பிளந்தது” என அப்துல்லாஹ் இப்னு மஸ்வூத்(ரலி) கூறினார்.

இந்நிகழ்ச்சியைத் தான் இவ்வசனம் சுட்டிக்காட்டுகிறது. பூமியின் துணைக் கோளாக அமைந்துள்ள சந்திரனைப் பற்றி அறிந்து வைத்திருப்பவர்கள், சந்திரன் இரண்டாகப் பிளப்பதும், பிறகு ஒன்று சேர்வதும் சாத்தியமற்றது என்று கருதலாம்.

ஆனால் திருக்குர்ஆனில் இறைவன் தனது தனிப்பெரும் ஆற்றலால் நிகழ்த்திய அற்புதங்களைக் கூறும் போது, அதற்கான சான்றுகளையும் உலகில் விட்டு வைக்கிறான்.

நூஹ் நபியின் காலத்தில் ஏற்பட்ட வெள்ளப் பிரளயத்தைச் சொல்லும் போது அவர் பயணித்த கப்பலைச் சான்றாக விட்டு வைத்திருக்கிறோம் என்று இறைவன் குறிப்பிடுகிறான். அந்தக் கப்பல் தற்போது கண்டுபிடிக்கப்பட்டுள்ளது. (பார்க்க: குறிப்பு 222)

அது போல் சந்திரன் பிளந்ததைக் கூறி விட்டு, இது ஓர் அற்புதம் என்பதையும் உறுதி செய்து விட்டு, அனைத்தும் பதிவாகியிருக்கின்றது என்று இவ்வசனத்தில் கூறுகிறான்.

சந்திரன் பிளந்த நிகழ்வு தந்திரமோ, அல்லது கண்கட்டு வித்தையோ அல்ல. அது பதிவாகியிருக்கின்றது என்று கூறுகிறான்.

நிலவில் முதலில் காலடியெடுத்து வைத்த நீல் ஆம்ஸ்ட்ராங், அங்கு இறங்கிய போது அவர் பயணித்த விண்கலம் நிலவைப் பல கோணங்களில் ஏராளமான புகைப்படங்களை எடுத்து பூமிக்கு அனுப்பியது.

அவற்றுள் ஒரு கோணத்தில் எடுக்கப்பட்ட புகைப்படங்களில் ஓர் ஆப்பிளை இரண்டாக அறுத்து மீண்டும் இணைத்தது போன்ற கோடு இருந்தது.

இதற்கான காரணத்தை விஞ்ஞானிகளால் கண்டுபிடிக்க முடியவில்லை. இதற்கு அரபியன் பிளவு என்று பெயரிட்டனர். காரணம், சந்திரன் பிளந்தது என்ற நம்பிக்கை அரபியரிடம் (முஸ்லிம்களிடம்) இருந்தது தான்.

முஸ்லிம்களின் நம்பிக்கையை உறுதிப்படுத்தும் விதமாக இந்தப் பிளவு அமைந்துள்ளது என்பதே இதன் பொருளாகும்.

இறைவன் கூறுவது போன்று, சந்திரன் பிளந்ததற்கான சான்றும் சந்திரனிலேயே பதிவு செய்யப்பட்டுள்ளது என்பதை இந்தக் கண்டுபிடிப்பிலிருந்து அறிந்து கொள்ளலாம்.

இந்தத் தகவல் அமெரிக்க அரசால் தமிழ் உட்பட உலகின் பல மொழிகளில் வெளியிடப்பட்ட அமெரிக்கன் ரிப்போர்ட்டர் என்ற மாத இதழில் புகைப்பட சான்றுகளுடன் நீல் ஆம்ஸ்ட்ராங் நிலவில் இறங்கிய போது வெளிவந்தது.

சந்திரன் பிளந்தது பற்றியும், அதற்கான சான்று சந்திரனில் பதிவாகியுள்ளது பற்றியும் திருக்குர்ஆன் அறிவித்திருப்பது இது இறைவேதம் என்பதை உறுதிப்படுத்துகின்றது.

சந்திரனில் பிளவு ஏதும் இல்லை என்று தற்போது நாசா விஞ்ஞானிகள் கூறுவதாகச் சிலர் இதை மறுக்கின்றனர். இப்போது நிலவில் பிளவு தென்படவில்லை என்பதால் அப்பல்லோ விண்கலம் மூலம் ஆம்ஸ்ட்ராங் இறங்கிய போது எடுத்த புகைப்படங்களும், அதில் காணப்பட்ட பிளவும், அரபியன் பிளவு என்று அதற்கு பெயரிட்டதும், அமெரிக்க அரசால் வெளியிடப்பட்ட அமெரிக்கன் ரிப்போர்ட் பத்திரிகையில் இந்த விபரம் வெளியிடப்பட்டதும் பொய்யாகாது. அமெரிக்கன் ரிப்போர்ட்டர் பத்திரிகையில் அப்படி ஏதும் வெளியிடப்படவில்லை என்று நாசா மறுக்கவில்லை.

சந்திரன் பிளந்த நிகழ்வை கண்ணால் கண்ட சாட்சி.

இந்தியாவின் இந்து மன்னர் சேரமான் பெருமாள் இறை தூதர் முஹம்மது (ஸல்) அவர்களை சந்தித்து இஸ்லாத்தை தழுவினார்.

சேரமான் பெருமாள் பாஸ்கர ரவிவர்மா கி.பி.ஏழாம் நூற்றாண்டில் தொன்மையான சேர வம்சத்தை ஆண்டு வந்த தமிழ் மன்னன் ஆவார். இவரது ஆட்சியின் கீழ் இன்றைய கேரள மாநிலமும் தமிழகத்தின் தென் பகுதியும் இருந்தது. அப்போது சேர நாடு அரபியார்களுடன் வியாபார கப்பல் தொடர்பை கொண்டிருந்தது. பல்வேறு கிறிஸ்தவ மதத்தினரும் யூத மதத்தினரும் அப்போது சேர நாட்டுக்கு வந்துகொண்டு இருந்தனர்.

#நிலவை #பிரிக்கும் #அதிசயம் :

மக்காவில் முகம்மது நபி (ஸல்) அவர்கள் இஸ்லாம் மார்க்கத்தை மக்களிடையே அறிமுகம் செய்திருந்தனர். இந்த நிலையில் ஒரு நாள் இரவு தனது மாளிகையில் நிலவை ரசித்துக்கொண்டு இருந்த சேரமான் பெருமாள் அவர்கள், திடீரென்று நிலவு இரண்டாக பிரிந்து மறுபடியும் ஒன்று சேர்வதை கண்டார்கள். இந்த அதிசய நிகழ்வை பற்றி அவர்கள் பலரிடமும் விசாரித்தார்கள்.

அப்போது சேர துறைமுகத்துக்கு வந்த ஒரு அரபியார் கூட்டம் ஒன்று அது பற்றி தங்களுக்கு தெரியும் என கூறியதை கேட்டு, அவர்களை தங்கள் அரண்மனைக்கு வரவழைத்து விசாரித்தார்கள். அப்போது அவர்கள் தங்கள் நாட்டில் இறைதூதர் ஒருவர் தோன்றி இருப்பதாகவும். அவர் பெயர் முகம்மது (ஸல்) எனவும், அவரே இறைமறுப்பாளர்களை நம்பவைப்பதற்காக இந்த 'நிலவை பிரிக்கும் அதிசயத்தை' நடத்தியதாகவும் கூறக்கேட்டனர்.

இதில் மிகவும் ஆர்வம் ஏற்பட்ட சேரமான் பெருமாள் அவர்கள் அந்த அரபியார்களிடம் தான் முகம்மது நபி (ஸல்) அவர்களை பார்ப்பதற்கு மிகவும் ஆர்வமாக இருப்பதாகவும், அதனால் தன்னையும் மெக்காவுக்கு அழைத்து செல்லுமாறும் கேட்டார்கள். ஆனால் அப்போது ஈழத்துக்குபயணப்படுவதற்கு ஆயத்தமாயிருந்த அந்த அரபியார் கூட்டம் தங்கள் திரும்பி வரும்பொழுது சேரமான் பெருமாள் அவர்களை மெக்காவுக்கு அழைத்து செல்வதாக வாக்களித்தனர்.

#இஸ்லாத்தை #ஏற்றல் :

தனது ராஜ்ஜியததை பல்வேறு பிரிவுகளாக பிரித்த சேரமான் பெருமாள் அவர்கள், அதை தனது மகன்களுக்கும் உறவினர்களுக்கும் பகிரிந்து கொடுத்தார் (அதில் ஒரு பிரிவினர் 'கொச்சின் ராயல் பேமிலி' என்ற பெயரில் இன்றளவும் கேரளாவில் வாசித்து வருகின்றனர்).

அதன் பிறகு சேரமான் பெருமாள் அவர்கள் திரும்பி வந்த அராபிய கூட்டத்தாருடன் மெக்கா கிளம்பி சென்றனர். அங்கு முகம்மது நபி (ஸல்) அவர்களை நேரில் பார்த்த சேரமான் பெருமாள் அவர்கள் அங்கேயேஇஸ்லாம் மார்க்கத்தை ஏற்றார்கள். மேலும் முகம்மது நபி (ஸல்) அவர்களால் தாஜுதீன் எனவும் பெயர் மாற்றம் செய்யப்பெற்றார்கள். மேலும் 3 நாட்கள் அங்கு தங்கி இருந்து ஹஜ் கடமையை நிறைவேற்றிய அவர்கள் முகம்மது நபி (ஸல்) அவர்களுக்கு தாங்கள் கொண்டுவந்த ஊறுகாயை அன்பளிப்பாக கொடுத்தார்கள்.

இதை நபி தோழர்களில் ஒருவரான அபு சயீத் அல் குத்ரி கூறியதாக ஹக்கிம் என்பவர் தனது நூலான அல் முஸ்தராக் என்ற நூலில் பின்வருமாறு கூறுகின்றார் இந்தியாவிலிருந்து முகம்மது நபி (ஸல்) அவர்களை பார்க்க வந்திருந்த ஒரு மன்னர் ஒரு ஜாடீ நிறைய ஊறுகாய்களை கொடுவந்திருந்தார். அதில் இஞ்சி சேர்க்கப்பட்டு இருந்தது. அதை முகம்மது நபி (ஸல்) அவர்கள் தங்கள் தோழர்கள் அனைவருக்கும் பகிர்ந்து கொடுத்தனர். அதில் எனக்கும் ஒரு துண்டு கிடைத்தது."

 சேரமான் பெருமாள் அவர்கள் அங்கேயே ஜித்தாஹ் (jeddah) தேசத்து மன்னரின் தங்கையை மனம் முடித்தார். அதன் பிறகு இஸ்லாம் மார்க்கத்தை இந்தியாவில் பரப்பும் பொருட்டு நபி தோழர்களில் ஒருவரான மாலிக் பின் தீனார் (ரலி) என்பவரின் தலைமையில் பல போதகர்களை அழைத்துக்கொண்டு நாடு திரும்பினார். ஆனால் திரும்பும் வழியிலேயே ஓமன் நாட்டில் உள்ள சலலாஹ் துறைமுகத்தில் (Salalah Port,Oman) நோய் வாயப்பட்டு இறந்தார். அவருடைய உடல் அங்கேயே அடக்கம் செய்யப்பட்டது.

குர்ஆன் கூறும் அறிவியல்.

உலகத்தில் வாழக்கூடிய மக்களுக்கு வழி காட்டும் நெறிமறையாக அல்குர்ஆன் அமைந்துள்ளது. 1445 ஆண்டுகளுக்கு முன் அல்லாஹ் வின் தூதர் நபி(ஸல்) அவர்களுக்கு அருளப்பட்ட இந்த புனித குர்ஆன், பல்லாயிரக்கணக்கான ஆண்டுகளுக்கு முன் வாழ்ந்த மக்களையும், நிகழ்ந்த சம்பவங்களையும் வரலாறாக தந்ததுடன் வாழுகின்ற மக்களுக்கு இது சட்ட நூலாகவும், விண்ணியல், மண்ணியல், தாவரவியல், கருவியல், சமுத்திரவியல், விலங்கியல் என்று பல தரப்பட்ட விஞ்ஞானங்களை எடுத்துக்காட்டிக் கொண்டிருக்கிறது.

அன்றைய காலகட்டத்தில் நவீன விஞ்ஞான வளர்ச்சிகளே இல்லாத காலத்தில் இறக்கி அருளப்பட்ட இந்த குர்ஆன் இன்று விஞ்ஞானம் வளர்ச்சியடைந்த காலத்தைப் பேசுவது பலதரப்பட்ட மக்களையும் வியப்பில் ஆழ்த்துகிறது. பல அறிஞர்களை ஆராய்ச்சி பண்ண தூண்டுகிறது.

اَفَلَا يَتَدَبَّرُوْنَ الْقُرْاٰنَ اَمْ عَلٰى قُلُوْبٍ اَ قْفَالُهَا‏

மேலும் அவர்கள் இந்தக் குர்ஆனை ஆராய்ந்து பார்க்க வேண்டாமா? அல்லது அவர்கள் இருதயங்கள் (இருக்கின்றனவே) அவற்றின் மீது பூட்டுப் போடப்பட்டு விட்டனவா?          (அல்குர்ஆன் : 47:24)

 “ஆழ்ந்து சிந்திக்க வேண்டாமா?’ 4:82 என்று அல்லாஹ் கேட்கிறான்.

اَلَمْ نَجْعَلِ الْاَرْضَ مِهٰدًا ۙ‏

நாம் இப்பூமியை விரிப்பாக ஆக்கவில்லையா?(அல்குர்ஆன் : 78:6)

وَّالْجِبَالَ اَوْتَادًا ۙ‏

இன்னும், மலைகளை முளைகளாக ஆக்கவில்லையா?(அல்குர்ஆன் : 78:7)

“இன்னும் இப்பூமி சாயாமலிக்கும் பொருட்டு நாம் அதில் நிலையான மலைகளை அமைத்தோம். அவர்கள் நேரான வழியில் செல்லும் பொருட்டு நாம் விசாலமான பாதைகளையும் அமைத்தோம் என்று அல்லாஹ் கூறுகிறான். (அல்குர்ஆன் 21:31)

நாம் வாழுகின்ற இந்த பூமியின் மேற்பகுதி கடினமாக அமைந்துள்ளது. இதில்தான் உயிரினங்கள் வாழ முடியும். ஆனால் பூமியில் ஆழத்தின் உள்ளே உள்ள கீழடுக்குகளோ, மிகவும் வெப்பம் நிறைந்ததாகவும், திரவ நிலையிலும் உள்ளது. எனவேதான் பூமியின் கீழ் பகுதியில் எந்த உயிரினமும் வாழ முடியாது. ஆதலால் தான் அல்லாஹ் பூமியை உருண்டை வடிவில் படைத்த போதிலும், உயிரினங்கள் வாழும் பகுதியை குறிப்பிடும் வகையில்தான் இப் பூமியை விரிப்பாக ஆக்கவில்லையா? என்று வினா எழுப்பியுள்ளான்.

பூமியில் வாழும் உயிரினங்கள் ஆடி சாயாமலிருக்கவே மலைகளை உருவாக்கி அவற்றின் வேர்கள் பூமிக்குள் ஆழமாக ஊடுருவி நிற்பதாகவும் அல்குர்ஆன் கூறியதை ஆராய்ந்து பார்த்த அமெரிக்க பல்கலைக்கழக பேராசிரியர் டாக்டர் ஃபிராங் பிரஸ்லின் என்பவர் தனது நூலில் அல்குர் ஆனின் கூற்றை உறுதிப்படுத்திக் கூறியுள்ளார்.

“இந்த பூமியை வசிக்கத்தக்க இடமாக ஆக்கியவனும் அதனிடையே ஆறுகளை உண்டாக்கியவனும், அதற்காக மலைகளை உண்டாக்கிய வனும் இரு கடல்களுக்கிடையே தடுப்பை உண்டாக்கியவனும் யார்? அல்லாஹ்வுடன் வேறு நாயன் இருக்கின்றானா? இல்லை எனினும் பெரும்பாலோர் அறியாதவர்களாக இருக்கின்றனர்.

“கடல்களை பற்றி அல்லாஹ் கூறுகையில் 

مَرَجَ الْبَحْرَيْنِ يَلْتَقِيٰنِۙ‏

அவனே, இரண்டு கடல்களையும் ஒன்றோடொன்று சந்திக்கச் செய்தான்.(அல்குர்ஆன் : 55:19)

بَيْنَهُمَا بَرْزَخٌ لَّا يَبْغِيٰنِ‌‏

(ஆயினும்) அவற்றிடையே ஒரு தடுப்பும் இருக்கிறது; அதை அவை மீறமாட்டா.(அல்குர்ஆன் : 55:20)

“மேலும், ஒன்று மிக்க இனிமையும், சுவையுமுள்ளது. மற்றொன்று உப்பும், கசப்புமானது. இவ்விரண்டிற்குமிடையே வரம்பை மீற முடியாத ஒரு தடையை ஏற்படுத்தியிருக்கின்றான். (அல்குர்ஆன் 25:53)

அல்குர்ஆனின் கடலியல் வசனங்களை ஆராய்ச்சி செய்த கடலியல் நிபுணர் டாக்டர் ஜான்கூஸ்தோ எனும் அறிஞர் அதனை உறுதிப்படுத்துகின்ற வகையில் அது எந்தப் பகுதியில் உள்ள கடல் என்ற விபரங்களைச் சேகரித்து எடுத்துக் காட்டியுள்ளார். மேலும் அமெரிக்கா வின் கொலரடோ பல்கலை கழகத்தில் மண்ணியல் துறை பேராசிரியராக உள்ள டாக்டர் வில்லியம் ஹை என்ற அறிஞரும் ஆராய்ச்சி மூலம் உறுதிப்படுத்தி இந்த விந்தைமிகு நிகழ்வு மத்திய தரைக் கடலுக்கும் ஜிப்ரால்டரில் உள்ள அட்லாண்டிக் சமுத்திரத்திற்கும் இடையே உள்ள தடுப்பு உட்பட பல்வேறு இடங்களில் இந்த அற்புத நிகழ்வு ஏற்படுகிறது என்று தெரிவித்து உள்ளனர்.

இந்த கடல் நீரில் ஒரு பகுதி சுவையாகவும் ஒரு பகுதி உப்பு நீராகவும் இருக்கும். ஆனால் கடல் ஒரே மாதிரியாகவே தெரியும். ஆனால் அல்லாஹ் அதனை சாய்வான அமைப்பில் கண் புலன்களுக்கு புலப்படாத வகையில் தடுப்புக் களை ஏற்படுத்தி அதன் வழியே ஒரு கடலின் நீர் மற்றொரு கடலுக்கு செல்கிறது என்பதனை தெளிவாக விளக்கி உள்ளார். ஆதாரம்: Principles of Oceonography Davis P.92

சிந்திக்க தூண்டும் வேதம்.

தான் சார்ந்திருக்கும் மதம் கூறும் கோட்பாடுகள் சரியா?. அறிவுப்பூர்வமானவையா? ஏன ஆய்வு செய்தார் ஒரு கிறிஸ்தவ விஞ்ஞானி. அவருடைய அறிவியல் ஆய்வின் தீர்வு உலகம் உருண்ட வடிவத்தில் இருப்பதாகவும் அது சுழல்வதால் இரவு பகல் மாறி மாறி வருகிறது எனக் கூறினார். அவர்தான் கலீலியோ. கிறிஸ்தவ மதச்சித்தாந்தமோ உலகம் தட்டையானது எனக்கூறியது. மதச்சித்தாந்தத்துக்கு மாற்றமாக ஆய்வின் தீர்வை அறிவித்த கலீலியோ மதகுருமார்களால் பாதிரிகளால் கண்டிக்கப்பட்டார். இறுதியில் கல்லெறிந்து கொல்லும் தண்டனைக்குள்ளாகி உயிர் நீத்தார்.

இந்து மதத்தார் போற்றும் பேணும் சட்ட நூல்களில் ஒன்றாகிய மனுஸ்மிருதி மார்க்க ஞானம் (வேதத்தைப் பற்றிய கல்வி) ஒருசாரார்க்கு மட்டுமே சொந்தம். அவர்களைத் தவிர வேறு சாரார் எவரும் கற்ககூடாது எனத்தடை விதிப்பதுடன் பிறப்பால் தாழ்ந்த பிரிவினர் வேத வசனங்களை காதுகொடுத்துக் கேட்கவும் கூடாது என்று பிரகடனம் செய்கிறது. மீறி கேட்பார்களேயானால் அவர்களின் காதுகளில் ஈயத்தைப் பழுக்க காய்ச்சி ஊற்ற வேண்டுமென்ற தண்டனையை நிறைவேற்ற உத்திரவிடுகிறது. இப்படி கல்வியறிவைப்பெற கற்றபடி செயல்பட சிந்திக்க செயலாற்ற என எல்லா நிலைகளின் வாசல்களையும் அடைத்து ஒருசாரார் கூறும் கருத்துக்களே உன்னதமானவை. மறுக்கமுடியாதவை. பின்பற்றத்தக்கவை என பிதற்றும் பித்தலாட்டங்களைப் பார்க்கிறோம்.

இஸ்லாத்தின் அடிப்படைகளில் ஒன்றாகிய குர்ஆன் அல்லாஹ்வினால் அருளப்பட்டது. அருள்மறை சிந்திக்கக்கூறி உலகோரை அழைக்கும் வசனங்கள் ஏராளம். ஏராளம். ஓரிரு சான்றுகளைக் காண்போம்.

اَفَلَا يَتَدَبَّرُوْنَ الْقُرْاٰنَ اَمْ عَلٰى قُلُوْبٍ اَ قْفَالُهَا‏

மேலும் அவர்கள் இந்தக் குர்ஆனை ஆராய்ந்து பார்க்க வேண்டாமா? அல்லது அவர்கள் இருதயங்கள் (இருக்கின்றனவே) அவற்றின் மீது பூட்டுப் போடப்பட்டு விட்டனவா?            (அல்குர்ஆன் : 47:24)

وَلَقَدْ يَسَّرْنَا الْقُرْاٰنَ لِلذِّكْرِ فَهَلْ مِنْ مُّدَّكِرٍ‏

நிச்சயமாக, இக் குர்ஆனை நன்கு நினைவு படுத்திக் கொள்ளும் பொருட்டே எளிதாக்கி வைத்திருக்கின்றோம். எனவே (இதிலிருந்து) நல்லுணர்வு பெறுவோர் உண்டா?(அல்குர்ஆன் : 54:17)

உண்ணும் உணவைச் சிந்திப்பார்களா?

மனிதர்களாகிய நாம் அன்றாடம் ஏராளமான உணவுப் பொருட்களை உண்ணுகின்றோம். அவ்வாறு உண்ணுகின்ற காரணத்தினால் தான் நம்மால் இந்த உலகத்தில் உயிரோடும், திடகாத்திரமான உடலோடும் வாழ முடிகின்றது. நம்முடைய வாழ்க்கைக்கு அவசியத் தேவையான உணவை நாம் எங்கிருந்து பெறுகிறோம்? அது எப்படி உருவாக்கப்படுகின்றது? அதை பூமியிலிருந்து வெளியே கொண்டு வருவது யார்? என்பது போன்ற ஏராளமான விஷயங்களை நாம் சிந்திக்க ஆரம்பித்தால் அதிகமான படிப்பினைகளை நம்மால் பெற முடியும்.

திருக்குர்ஆனைப் புரட்டிப் பார்க்கின்ற ஒவ்வொருவருடைய சிந்தனை உணர்வுகளையும் மிக இலகுவான முறையில் திருக்குர்ஆன் தூண்டி விடுகின்றது.

قُتِلَ الْاِنْسَانُ مَاۤ اَكْفَرَهٗؕ‏

மனிதன் சபிக்கப்பட்டு விட்டான். அவன் எப்படி நன்றி கெட்டவனாக இருக்கிறான்? (அல்குர்ஆன் 80:17)

فَلْيَنْظُرِ الْاِنْسَانُ اِلٰى طَعَامِهٖۤۙ‏

اَنَّا صَبَبْنَا الْمَآءَ صَبًّا ۙ‏

ثُمَّ شَقَقْنَا الْاَرْضَ شَقًّا ۙ‏

فَاَنْۢبَتْنَا فِيْهَا حَبًّا ۙ‏

وَّ عِنَبًا وَّقَضْبًا ۙ‏

وَّزَيْتُوْنًا وَّنَخْلًا ؕ‏

وَحَدَآٮِٕقَ غُلْبًا ۙ‏

وَّفَاكِهَةً وَّاَبًّا ۙ‏

مَّتَاعًا لَّـكُمْ وَلِاَنْعَامِكُمْؕ‏

மனிதன் தனது உணவைக் கவனிக்கட்டும்!

நாமே தண்ணீரை (வானிலிருந்து) ஊற்றினோம்.

பின்னர் பூமியை முறையாகப் பிளந்தோம்.

உங்களுக்கும், உங்கள் கால்நடைகளுக்கும் பயன்படுவதற்காக தானியத்தையும், திராட்சையையும், புற்பூண்டையும், ஒலிவ மரத்தையும், பேரீச்சை மரத்தையும், அடர்ந்த தோப்புகளையும், கனிகளையும், தீவனங்களையும் அதில் முளைக்கச் செய்தோம்.(அல்குர்ஆன்:80:24-32)

இந்த வசனங்களை நன்றாகப் படித்துப் பாருங்கள்! இறைவன் நமக்கு வழங்கியிருக்கின்ற, அற்புதமான பேரருட்கொடையை நாம் விளங்கிக் கொள்ள முடியும்.

பூமியின் இயற்கைப் பண்பு என்னவென்றால், பூமிக்குள் எந்தப் பொருட்களை வைத்துப் புதைத்தாலும், அந்தப் பொருட்களை தனக்கே உரிய பாணியில் மிச்சம் வைக்காது இல்லாமல் ஆக்கிவிடும். உதாரணமாக ஒரு மரக்கட்டையை புதைத்து வைத்தாலோ, ஒரு இரும்பை புதைத்து வைத்தாலோ, ஒரு மனிதனைப் புதைத்து வைத்தாலோ, மக்கும் பொருட்கள், மக்காத பொருட்கள் இதுபோன்ற எந்தப் பொருட்களைப் புதைத்து வைத்தாலும் சரிதான்! சிறிது காலகட்டத்திற்குப் பிறகு தன்னிடத்தில் தங்கிய பொருட்களை இருந்த இடம் தெரியாமல் அழித்து விடும்.

ஆனால், மற்ற பொருட்களைப் பூமியில் வைத்து புதைப்பதைப் போன்று மனிதன் உண்ணுகின்ற உணவுப் பொருட்களின் வித்துக்கள் புதைக்கப்படுகின்றன. பூமிக்குள் வைக்கப்பட்ட உணவுப்பொருட்கள் முளைகளாக, இலைகளாக, கிளைகளாக, மரமாக, காய்களாக, கனிகளாக மனிதனுடைய கரங்களுக்கு அள்ளி இறைக்கின்றது. ஏன்? கல், கட்டை, இரும்பு, மனிதன் இதுபோன்ற அனைத்துப் பொருட்களையும் சாப்பிடத் தெரிந்த மண்ணுக்கு, கைவிரல்களால் நசுக்கினால் இல்லாமல் போகக்கூடிய சின்னஞ்சிறிய விதையைச் சாப்பிடுவதற்கு எவ்வளவு நேரம் பிடிக்கும்? சிந்தித்தோமா?

குர்ஆன் அறிவியலுக்கு மட்டும் வழிகாட்ட வில்லை ஆன்மீகத்திற்கும் வழிகாட்டுகிறது .  சிந்திக்கிறன்ற மனிதர்களுக்கு நேர்வழிகாட்டும்.

முஸ்லிம்_ராஷ்ட்ரம்  சந்திரன்.                                       

சந்திரனில் முதன் முதலில் இறங்கிய நீல்_ஆம்ஸ்ட்ராங் பயணித்த விண்கலம் நிலவைப் பல கோணங்களில் புகைப்படங்களை எடுத்து பூமிக்கு அனுப்பியது.

அந்த புகைப்படங்களில் ஒன்றில் ஒரு ஆப்பிளை இரண்டாக அறுத்து மீண்டும் இணைத்தது போன்ற கோடு இருந்தது.

அந்த கோட்டிற்கு அரேபியன்_பிளவு என்று அமெரிக்க விஞ்ஞானிகள் பெயரிட்டார்கள். 

குர்ஆனில் சந்திரன் பிளந்ததை கூறிய இறைவன் அதற்கான சான்றையும்  சந்திரனிலேயே பதிவு செய்திருக்கிறான்  என்பதையே அமெரிக்க விஞ்ஞானிகளின்  அறிவிப்பும் உறுதி படுத்துகிறது.

இந்தத் தகவல் அமெரிக்க அரசால் தமிழ் உட்பட உலகின் பல மொழிகளில் வெளியிடப்பட்ட அமெரிக்கன்_ரிப்போர்ட்டர் என்ற மாத இதழில் புகைப்பட சான்றுகளுடன்  வெளிவந்தது.

" ஆகஸ்ட்-19,2023 அன்று இந்திய வானியல் ஆய்வு மையம் (ISRO) சந்திராயன் 3.0 கலம் வெளியிட்ட நிலவின் படங்களைக் கூர்ந்து கவனித்தபோது, IBN YOUNUS என்ற இடம் குறிக்கப்பட்டிருந்தது!

கி.பி 950-1009 இல் வாழ்ந்த எகிப்து வானியல் ஆய்வாளர் அபு அல்-ஹசன் அலி இப்னு அல்-ஹசன் இப்னு யூனுஸ் என்ற விஞ்ஞானி கண்டறிந்த பள்ளத்தாக்கு என்பது பலருக்கும் தெரியாத தகவல். "என்று அருமையான ஒரு செய்தியை துபாலிருந்துத் தருகிறார் அருமை நண்பர் எழிலன் ஜமாலுதீன்                      

ஆக ....சந்திரன்_முஸ்லிம்களின்_ராஷ்ட்ரம் என்பதை ஆயிரம் வருடங்களுக்கு முன்னரே ஆதாரபூர்வமாக நிரூபித்தவர் இப்னு_யூனுஸ் என்ற அறிவியல் அறிஞர்.அவர் பெயரை சந்திரனில் ஒரு பகுதிக்கு ஏற்கனவே அமெரிக்கா வைத்து விட்டது .

ஆனாலும் முஸ்லிம்கள் யாரும்  சந்திரன் முஸ்லிம் ராஷ்ட்ரம் என்று லூசுத்தனமாக சொல்லிக் கொள்வதில்லை.அது உலக மக்கள் அனைவருக்கும் சொந்தமானது என்றுதான் சொல்கிறார்கள்.

இதை நாட்டு மக்கள் புரிந்து கொண்டால் சில உளறுவாயர்களின் பேச்சுகளுக்கு அர்த்தமில்லாமல் போய்விடும்.

(நன்றி;அபு ஹாஷிமா)

அறிவியல் வளர,இஸ்லாம் வளரும்.விஞ்ஞானம் மெய்ப்பட அல்லாஹுத்தஆலாவின் அத்தாட்சி வெளிப்படும்.

எனவே அல்லாஹுத்தஆலா அவனின் ஆற்றலை அறிந்து வழிபடும் நல்லோர்களின் கூட்டத்தில் நம்மை சேர்த்து வைப்பானாக!ஆமீன்...

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான்25/08/2023

ஸஃபரும் தவறானப் புரிதலும்.

وَالْعَصْرِۙ‏

اِنَّ الْاِنْسَانَ لَفِىْ خُسْرٍۙ‏

காலத்தின் மீது சத்தியமாக.

நிச்சயமாக மனிதன் நஷ்டத்தில் இருக்கின்றான்.(அல்குர்ஆன் : 103:1,2)

சஃபர் மாதம்.

சஃபர் அல் முஸஃப்பர் மாதம் இஸ்லாமிய ஹிஜ்ரா நாட்காட்டியில் இரண்டாவது மாதமாகும்.இது முஹர்ரம் மாதத்தை அடுத்து  ரபிவுல் அவ்வலுக்கு முன்னால் வரும் மாதமாகும்.இதனை ஓர் வழமையான மாதம் எனலாம்.காரணம் இம்மாதத்தில் ஏனைய மாதங்களைப்போல சுன்னதான அல்லது முஸ்தஹப்பான அமல்கள் குறிப்பிடப்படவில்லை.அதனால் இம்மாதம் துற்சகுனம்,ஆபத்தானது என எண்ணுவது தவறாகும். அறியாமைக்கால அரபுகள் இம்மாதத்தை துற்சகுனமாக கருதி பயணம் மேற்கொள்வதை தவிர்ப்பார்கள்.

ஸஃபர் பீடை மாதமா?

நாயகம்ﷺ அவர்கள் ஸபஃர் மாதம் குறித்த மூடநம்பிக்கைகளை 1400 ஆண்டுகளுக்கு முன்பே தடைசெய்துவிட்டார்கள்.

قَالَ سَمِعْتُ أَبَا هُرَيْرَةَ، يَقُولُ قَالَ رَسُولُ اللَّهِ صلى الله عليه وسلم ‏ “‏ لاَ عَدْوَى وَلاَ طِيَرَةَ وَلاَ هَامَةَ وَلاَ صَفَرَ، وَفِرَّ مِنَ الْمَجْذُومِ كَمَا تَفِرُّ مِنَ الأَسَدِ ‏”‏‏.‏

”தொற்றுநோய் என்பது கிடையாது. பறவைகளைக்கொண்டு சகுனம் பார்ப்பதும் ஆந்தையால் சகுனம் பார்ப்பதும் கிடையாது. ‘ஸஃபர்’ மாதம் பீடை என்பதும் கிடையாது. சிங்கத்திடமிருந்து நீ எப்படி வெருண்டோடுவாயோ அப்படி தொழுநோயாளியிடமிருந்து வெருண்டோடு..  [புகாரி 5707]

துற்சகுனம்,கெட்டநேரம்,பீடைத்தனம் காலத்திலோ நேரத்திலோ பொருளிலோ அல்ல மாறாக மனிதன் செய்யும் செயல்கள் தான் நல்லது கெட்டதை நிர்ணயிக்கின்றது.

மனிதனுக்கு அல்லாஹ் வழங்கிய வாழ்வை நல்ல முறையிலே இறைப் பொருத்தத்தை நாடி கழிக்கும்போது அது அவனுக்கு நல்ல பொழுதுகளாகும்.பாவங்களிலும் தீய பழக்கவழக்கங்களிலும் இறை கோபத்தை உண்டாக்கும் வழிகளில் காலத்தை கழிப்பது கெட்ட பொழுதுகளாக அமையும்.

உதாரணமாக சில மக்கள் அதிகாலை ஃபஜ்ர் தொழுகிறார்கள்.இன்னும் சிலர் ஃபஜ்ர் தொழாமல்  தூங்கி விடுகின்றனர்.

அனைவருக்கும் ஒரே மாதிரி விடிந்த காலைப்பொழுது பஜ்ரு தொழுதவருக்கு சிறந்ததாகவும்.தொழாதவருக்கு அபசகுனமாகவும் அமைந்து விடுகின்றது.எனவே கால நேரத்தில் நல்லது கெட்டது கிடையாது.நன்மை தீமையை தீர்மானிப்பது நம் செயல்களே ஆகும்.

وَعَنْ أَبِي هُرَيْرَةَ قَالَ: قَالَ رَسُولُ اللَّهِ صلى الله عَلَيْهِ وَسلم: ” قَالَ اللَّهُ تَعَالَى: يُؤْذِينِي ابْنُ آدَمَ يَسُبُّ الدَّهْرَ وَأَنَا الدَّهْرُ بِيَدِيَ الْأَمْرُ أُقَلِّبُ اللَّيْلَ وَالنَّهَارَ ” مُتَّفَقٌ عَلَيْهِ) رواه البخاري ومسلم

அல்லாஹு தஆலா கூறுவதாக நபி (ஸல்) அவர்கள் சொன்னார்கள். ஆதமின் மகன் என்னை நோவினைபடுத்துகிறான். அவன் காலத்தை ஏசுகிறான்.ஆனால் நான்தான் காலமாக (காலத்தை உருவாக்குபவனாக) இருக்கிறேன். நான்தான் இரவு பகலை மாறி மாறி வரச் செய்கிறேன். (மிஷ்காத்)

மக்களில் சிலர் பேரிடர்களும், ஆபத்துகளும்,கொள்ளை நோய்களும் ஏற்பட்ட கால நேரங்களை கெட்ட நேரம் என்று ஏசுகின்றனர்.ஆனால் அந்தந்த காலங்களில் நிகழும் நிகழ்வுகள் யாவும் அல்லாஹ்வின் நாட்டப்படியும் கட்டளை படியும் நிகழ்கின்றன.

   تُوْلِجُ الَّيْلَ فِى النَّهَارِ وَتُوْلِجُ النَّهَارَ فِى الَّيْلِ‌ وَتُخْرِجُ الْحَـىَّ مِنَ الْمَيِّتِ وَتُخْرِجُ الْمَيِّتَ مِنَ الْحَـىِّ‌ وَتَرْزُقُ مَنْ تَشَآءُ بِغَيْرِ حِسَابٍ‏

(நாயனே!) நீதான் இரவைப் பகலில் புகுத்துகின்றாய்; நீதான் பகலை இரவிலும் புகுத்துகின்றாய்; மரித்ததிலிருந்து உயிருள்ளதை நீயே வெளியாக்குகின்றாய்; நீயே உயிருள்ளதிலிருந்து மரித்ததையும் வெளியாக்குகின்றாய்; மேலும், நீ நாடியோருக்குக் கணக்கின்றிக் கொடுக்கின்றாய். (அல்குர்ஆன் 3:27. )

இரவு பகல் மாறி மாறி வருவது காலத்தின் சுழற்சிக்குக் காரணமாகும். இவ்வாறு  மாறி மாறி வரச் செய்பவன் அல்லாஹு தஆலாவாக இருப்பதால் காலத்தை ஏசுவதை தன்னையே ஏசுவதாக,தன்னையே நோவினை செய்வதாகக் குறிப்பிடுகின்றான்.

உண்மையில் பீடை என்பதும் துர்சகுனம் என்பதும் இறைவன் படைத்த காலத்தில் இல்லை. மாறாக நமது செயல்பாடுகளில் உள்ள குறைபாடுகளின் காரணத்தால் காலம் நமக்கு பீடையாக, துன்பம் தரக்கூடியதாக காட்சி தருகிறது. ஆனால் மார்க்கம் காட்டும் வழியில் நமது செயல்பாடுகளை அமைத்துக்கொண்டால் என்னாளும் நன்னாளே என்பதை உணரலாம்.

அறியாமைக்கால இப்பழக்கம் இன்றைய நவீன யுக சில இஸ்லாமியர்கள் வரை ஸஃபர் பீடை மாதமாக கருத்தப்பட்டு வருகின்றது.

இன்றைய சில இஸ்லாமியர்கள்,ஸஃபர் மாதத்தில் திருமணம் போன்ற சுப காரியம் செய்யவதில்லை.திருமணமான பெண்ணை புகுந்த வீட்டிற்கு அனுப்புவதில்லை,பயணம் செய்வதில்லை.இம்மாததில் தொழில் துவங்குவதையும்,கொடுக்கல் வாங்கலையும் அபசகுனமாக கருதி தள்ளிப்போடுகின்றனர். 

"மக்கள் சஃபர் மாதத்தை அசுபமாக கருதுகிறார்கள், அவர்கள் திருமணம் செய்ய மாட்டார்கள், அவர்கள் பெண்களை அனுப்ப மாட்டார்கள்,பயணத்தைத் தவிர்க்கிறார்கள்." குறிப்பாக சஃபர் மாதத்தின் முதல் பதிமூன்று தினங்கள் மிகவும்  துற்சகுனமாக கருதப்படுகின்றன, அவை பதின்மூன்று நோன்புகள் என்று அழைக்கப்படுகின்றன, இவை அனைத்தும் அறியாமையின் வெளிப்பாடாகும்.

ஷாஹ் அப்துல் ஹக் முஹத்தித் தெஹ்லவி(ரஹ்)அவர்களின்

"இஸ்லாமிய மாதங்களின் சிறப்புகள்", எனும் நூலில்  எழுதப்பட்டுள்ளது,          இது ( சஃபர் மாதம்) பேரழிவுகள், விபத்துக்கள் மற்றும் பேரழிவுகளின் மாதமாக மக்கள் கருதுகின்றனர், இந்த நம்பிக்கை தவறானது மற்றும் அதில் உண்மை இல்லை.                                      (اسلامی مهینوں کے فضائل، ص: 44)

மூட நம்பிக்கை இல்லாத  மார்க்கம்.

இஸ்லாத்தில் நல்ல நேரம் கெட்ட நேரம் கிடையாது.

காலங்களோடும், நேரங்களோடும் தான் மனிதனின் வாழ்க்கை பின்னிப் பிணைந்துள்ளது. உண்மை நிலை இவ்வாறு இருக்க காலத்தை நல்லது கெட்டது என தரம் பிரிப்பது வாழ்க்கைக்கு உகந்தது அல்ல. திருமணம், தொழில் துவங்குதல், புது வீட்டிற்குச் செல்லுதல் போன்ற காரியங்களைத் துவங்கும் முன்பாக நல்ல நேரம், கெட்ட நேரம் பார்க்கும் வழக்கம் பெரும்பான்மையானோரிடம் இருக்கிறது.

உலகில் நிகழக்கூடிய காரியங்கள் அனைத்தும் ஆட்களைப் பொறுத்தே அமைகின்றன நாட்களைப் பொறுத்து அல்ல. காலம் என்பது மனிதன் நாட்களை கணக்கிட்டு கொள்வதற்கான ஒரு வழிகாட்டி தான். வெற்றி தோல்வியை, இன்ப துன்பத்தைத் தீர்மானிக்கும் இலக்கு அல்ல. இதை உணராமல் நம்மவர்கள் காலத்தைக் குறைகூறுகின்றனர். இதன் மூலம் இறைவனையே நோவினை செய்கின்றனர்.m

நபி (ஸல்) அவர்கள் கூறினார்கள்: அல்லாஹ் சொன்னான்: ஆதமின் மகன் (மனிதன்) என்னைப் புண்படுத்துகின்றான். காலத்தின் கை சேதமே என்று அவன் கூறுகின்றான். ஆகவே உங்களில் ஒருவர் காலத்தின் கை சேதமே என்று கூற வேண்டாம். ஏனெனில் நானே காலம் (படைத்தவன்). அதில் இரவையும் பகலையும் நானே மாறி மாறி வரச்செய்கிறேன். நான் நாடினால் அவ்விரண்டையும் (மாறாமல்) பிடித்து (நிறுத்தி) விடுவேன். (நூல்: முஸ்லிம் 4521)

ஒரு நாளில் குழந்தை பிறக்கிறது என்றால் அதே நாளில் அதன் தாய் மரணிக்கிறாள். இப்படி இறப்பும் பிறப்பும் ஒரே நேரத்தில் சங்கமிக்கும் அந்நாளை நாம் நல்ல நாள் என்று குறிப்பிடுவோமா? அல்லது கெட்ட நாள் என்று குறிப்பிடுவோமா? நாட்கள் நன்மை, தீமையைத் தீர்மானிக்காது என்பதற்கு இதுவே தகுந்த ஆதாரமாக இருக்கிறது.

குறிபிட்ட பொருளினால் தான் நல்லது நடக்கும் என்று நம்பினால் அவர் இறை நம்பிக்கையாளர் இல்லை.

عَنْ زَيْدِ بْنِ خَالِدٍ الْجُهَنِيِّ، أَنَّهُ قَالَ صَلَّى لَنَا رَسُولُ اللَّهِ صلى الله عليه وسلم صَلاَةَ الصُّبْحِ بِالْحُدَيْبِيَةِ عَلَى إِثْرِ سَمَاءٍ كَانَتْ مِنَ اللَّيْلَةِ، فَلَمَّا انْصَرَفَ أَقْبَلَ عَلَى النَّاسِ فَقَالَ "" هَلْ تَدْرُونَ مَاذَا قَالَ رَبُّكُمْ "". قَالُوا اللَّهُ وَرَسُولُهُ أَعْلَمُ. قَالَ "" أَصْبَحَ مِنْ عِبَادِي مُؤْمِنٌ بِي وَكَافِرٌ، فَأَمَّا مَنْ قَالَ مُطِرْنَا بِفَضْلِ اللَّهِ وَرَحْمَتِهِ فَذَلِكَ مُؤْمِنٌ بِي وَكَافِرٌ بِالْكَوْكَبِ، وَأَمَّا مَنْ قَالَ بِنَوْءِ كَذَا وَكَذَا فَذَلِكَ كَافِرٌ بِي وَمُؤْمِنٌ بِالْكَوْكَبِ "".

ஸைத் இப்னு காலித் அல்ஜுஹனீ(ரலி) அறிவித்தார். 

நபி(ஸல்) அவர்கள் 'ஹுதைபிய்யா' எனுமிடத்தில் எங்களுக்கு ஸுபுஹ் தொழுகை நடத்தினார்கள். அன்றிரவு மழை பெய்திருந்தது. தொழுது முடித்ததும் மக்களை நோக்கி, 'உங்களுடைய இறைவன் என்ன கூறினான் என்பதை நீங்கள் அறிவீர்களா?' என்று கேட்டார்கள். 'அல்லாஹ்வும் அவனுடைய தூதருமே இதைப் பற்றி நன்கு அறிந்தவர்கள்' என்று நாங்கள் கூறினோம். 

'என்னை விசுவாசிக்கக் கூடியவர்களும் என்னை நிராகரிக்கக் கூடியவர்களுமான என் அடியார்கள் இரண்டு பிரிவுகளாக ஆனார்கள். அல்லாஹ்வின் கருணையினாலும் அவனுடைய அருட்கொடையினாலும் நமக்கும் மழை பொழிந்தது எனக் கூறுபவர்கள் என்னை நம்பி, நட்சத்திரங்களை மறுத்தவர்களாவர். இந்த நட்சத்திரத்தினால் எங்களுக்கு மழை பொழிந்தது எனக் கூறுபவர்கள் என்னை நிராகரித்து, நட்சத்திரங்களை விசுவாசித்தவர்களாவர் என்று இறைவன் கூறினான்' என்று இறைத்தூதர்(ஸல்) அவர்கள் கூறினார்கள்.                        (ஸஹீஹ் புகாரி : 846)

இஸ்லாமிய பார்வையில் சகுனம்.

'சகுனம்’

என்பதற்கு அரபியில் ‘ததய்யுர்’ எனப்படும். இது ‘தய்ர்’ எனும் பெயர்ச் சொல்லில் இருந்து பிறந்ததாகும். பறவைக்கு அரபியில் ‘தய்ர்’ என்பர்.

இதற்கான காரணத்தை இமாம் இப்னு ஹஜர் அவர்கள் இவ்வாறு கூறுகிறார்கள்: அன்றைய அறியாமைக் கால மக்கள் ஒரு பிரயாணத்தை ஆரம்பிக்கும் போது பறவைகளை பறக்கச் செய்து அது பறக்கும் திசைக் கேற்ப அப்பிரயாணத்தின் முடிவைத் தீர்மானிப்பார்கள். அதாவது அப்பறவை வலப்புரம் பறந்தால் அதனை நற்சகுனமாகக் கருதி பிரயாணத்தைத் தொடர்பவர்களாகவும், அது இடப்புறம் பறந்தால் அது துர்ச்சகுனம் என்று ஆரம்பித்த பிரயாணத்தை நிறுத்தக் கூடியவர்களாகவும் இருந்தனர். எனவே அக்காலத்தில் பறவையை வைத்து சகுனம் பார்த்ததால் ‘ததய்யுர்’ என சகுனத்திற்கு பெயர் வந்தது.

இது அக்காலத்தில் வழக்கிலிருந்த சகுனமாகும். இன்று நமது நாட்டு மக்களைப் பொறுத்த வரை பல முறைகளில் சகுனம் பார்க்கிறார்கள். உதாரணமாக:

பிரயாணத்தை ஆரம்பிக்கும் போது, பூனை, வெற்றுக் குடம் சுமந்த பெண், விதவைப் பெண், கூன் குருடு போன்றோர் குறுக்கருத்தால் இதனை கெட்ட சகுனமாக கருதி ஆரம்பித்த பயணத்தை நிறுத்தி விடுதல்.

இமாம் இப்னுல் கையும் கூறுகிறார்கள்:

சகுணமானது அதை நம்பக் கூடியவனையும் அதற்குப் பயப்படக் கூடியவனையும் தான் பாதிக்கும். ஆனால் யார் அதனை ஒரு பொருட்டாகவே கருதவில்லையோ அவனை ஒரு பொழுதும் பாதிக்காது’.

சகுனம் பார்த்து தமது முன்னேற்றத்தைத் தடுத்துக் கொள்வதைத் தவிர வேறு ஒன்றுமில்லை. வெறும் பித்தலாட்டம் மட்டும் தான்.

ஷவ்வால் மாதம் பீடை அல்ல.

நல்ல நேரம் பார்த்து ஆரம்பிக்கப்பட்ட வியாபாரங்கள், திருமணங்களில் பலவும் தோல்வியிலும், மனக்கசப்பிலும் முடிவடைவதையும், மக்களால் ஒதுக்கப்பட்டுள்ள நேரத்தில் செய்யப்படும் காரியங்கள் அமோக வரவேற்பை பெறுவதையும் நாம் பார்க்கலாம். இதற்கு அன்னை ஆயிஷாவின் வாழ்க்கை ஓர் முன்மாதிரியாகவுள்ளது.

அறியாமைக் காலத்தில் ஷவ்வால் மாதம் பீடை மாதமாகவும், துர்க்குறியாகவும் கருதப்பட்டது. அம்மாதத்தில் மக்கள் எவ்வித நற்காரியமும் செய்ய மாட்டார்கள். மேலும் அம்மாதத்தில் திருமணம் செய்தால் நிலைக்காது என்றும் நம்பி இருந்தனர். இந்த அறியாமையை அழிப்பதற்க்காகவே நபி (ஸல்) அவர்கள் அம்மாதத்தில் ஆயிஷாவைத் திருமணம் செய்தார்கள் அனைவரும் மெச்சும் அளவிற்கு வாழ்ந்தார்கள். இதைப் பற்றி அன்னை ஆயிஷா அவர்களே கூறுகிறார்கள்.

ஆயிஷா (ரலி) கூறியதாவது: அல்லாஹ்வின் தூதர் (ஸல்) அவர்கள் என்னை ஷவ்வால் மாதத்தில் மணந்து கொண்டார்கள்: ஷவ்வால் மாத்திலேயே என்னுடன் தாம்பத்திய உறவைத் தொடங்கினார்கள். அல்லாஹ்வின் தூதர் (ஸல்) அவர்களின் துணைவியரில் அவர்களுடன் என்னை விட நெருக்கத்திற்குரியவர் யார்?                   (நூல் : முஸ்லிம் 2782)

ஜோதிடர்கள்.

யாராவது குறி சொல்பனிடம் சென்று அவன் கூறுவதை உண்மை என்று நம்பியவர் முஹம்மது (ஸல்) அவர்களுக்கு அல்லாஹ்வால் அருளப்பட்டதை (குஆனை) நிராகரித்தவர் ஆவார்”- அறிவித்தவர் அபூஹுரைரா (ரலி).  (நூல் :அபூதாவுத்)

ஜோதிடக்காரன் கூறவதை உண்மை என்று நம்புபவன் அல்லாஹ் இறக்கிய வேதத்தை நிராகரித்தவனாவான் என்று நபி (ஸல்) அவாகள் எச்சரித்திருக்கிறாகள். 

நபி இப்ராஹிம் (அலை) 

 عَنِ ابْنِ عَبَّاسٍ ـ رضى الله عنهما ـ قَالَ إِنَّ رَسُولَ اللَّهِ صلى الله عليه وسلم لَمَّا قَدِمَ أَبَى أَنْ يَدْخُلَ الْبَيْتَ وَفِيهِ الآلِهَةُ فَأَمَرَ بِهَا فَأُخْرِجَتْ فَأَخْرَجُوا صُورَةَ إِبْرَاهِيمَ وَإِسْمَاعِيلَ فِي أَيْدِيهِمَا الأَزْلاَمُ فَقَالَ رَسُولُ اللَّهِ صلى الله عليه وسلم "" قَاتَلَهُمُ اللَّهُ أَمَا وَاللَّهِ قَدْ عَلِمُوا أَنَّهُمَا لَمْ يَسْتَقْسِمَا بِهَا قَطُّ "". فَدَخَلَ الْبَيْتَ، فَكَبَّرَ فِي نَوَاحِيهِ، وَلَمْ يُصَلِّ فِيهِ.

இப்னு அப்பாஸ்(ரலி) அறிவித்தார்:

நபி(ஸல்) அவர்கள் (மக்காவுக்கு) வந்தபோது, கஅபாவில் சிலைகள் இருந்ததால் உள்ளே நுழைய மறுத்து அப்புறப்படுத்துமாறு கட்டளையிட்டார்கள். உடனே அவை அப்புறப்படுத்தப்பட்டன. அச் சிலைகளில் (குறி பார்ப்பதற்குரிய) அம்புகளைக் கையில் தாங்கியவாறு இப்ராஹீம் (அலை), இஸ்மாயீல்(அலை) ஆகியோரின் உருவங்களும் இருந்தன. அவற்றையும் வெளியேற்றினார்கள். இதைக்கண்ட நபி(ஸல்) அவர்கள், 'அல்லாஹ் இ(தைச் செய்த)வர்களை அழிப்பானாக! அல்லாஹ்வின் மீது ஆணையாக! இவ்விரு (நபிமார்களு)ம் அம்புகள் மூலமாகக் குறி பார்ப்பவர்களாக ஒருபோதும் இருந்ததில்லை என்பதை இதைச் செய்தவர்கள் அறிந்தே வைத்திருக்கிறார்கள்' என்று கூறிவிட்டுக் கஅபாவில் நுழைந்தார்கள். அதன் ஓரங்களில் (நின்று) தக்பீர் கூறினார்கள்; அதில் தொழவில்லை.                         (ஸஹீஹ் புகாரி : 1601.)

اَللّٰهُ يَبْسُطُ الرِّزْقَ لِمَنْ يَّشَآءُ مِنْ عِبَادِهٖ وَيَقْدِرُ لَهٗ  اِنَّ اللّٰهَ بِكُلِّ شَىْءٍ عَلِيْمٌ‏

“அல்லாஹ் தன் அடியார்களில் தான் நாடியவர்களுக்கு உணவை விசாலமாக்குகிறான், தான் நாடியவருக்கு சுருக்கியும் விடுகிறான்; நிச்சயமாக அல்லாஹ் ஒவ்வொன்றையும் அறிந்தவன்.”(அல்குர்ஆன் : 29:62)

மேற்கண்ட திருமறை வசனங்கள் மற்றும் நபி மொழிக்கு மாற்றமாக அல்லாஹ் ஒருவருக்கு குறிப்பிட்ட அளவு செல்வத்தை நிர்ணயித்திருக்க, ஜோதிடத்தை நம்புபவர்கள், அந்தக் ஜோதிடர்கள் கூறுவது போல் செயல்பட்டால் அல்லது அதிருஷ்டக் கற்களை மோதிரங்களில் அணிந்துக் கொண்டால் அந்தக் கற்கள் நமக்கு அல்லாஹ்வின் நாட்டத்திற்கு மாறாக நமக்கு அதிக செல்வங்களை பெற்றுத் தரும் என்று நம்புவதாகும். (இத்தகைய தீய எண்ணங்களிலிருந்து அல்லாஹ் நம்மைக் காப்பாற்றுவானாகவும்). அல்லாஹ் இறக்கியருளியதை நிராகரித்தவன் முஸ்லிமாக இருக்க முடியாது.

நவீனயுக அனாச்சாரங்கள்.

கைசேதம்!அறியாமைக்கால அரபுகளின் தவறான பழக்க வழக்கங்களின் நீட்சியை இன்றும் இஸ்லாமியர்கள் சிலரிடம் காணமுடிகிறது.குறிப்பாக இன்றைய சமூகஊடகங்களில் நம் இஸ்லாமிய சகோதரர்கள் பகிரும்,பரப்பும் செய்திகளை கூறலாம்.

சமூகவளைதளங்களின் பயன்கள் அதிகமாக இருப்பதைப்போல அதன் பாதிப்புக்களும் அதிகம்.அதன் பயனர்கள் ஒரு செய்தியை முழுமையாக படிக்காமலும்,அதன் நம்பகத்தன்மையை உறுதிச்செய்யாமலும் அடுத்தவருக்கு பகிர்வதை கடமையை போல் செய்கின்றனர்.

இஸ்லாமிய சகோதர்களும் கூட இஸ்லாமிய செய்திகளை ஷேர் செய்வதை நன்மையாக கருதுகின்றனர்.

உண்மையிலே அது இஸ்லாமிய செய்தியா?குர்ஆன் வசனமா?ஹதீஸா என்கிற எந்த அறிவும் இல்லாமல் பரப்புகின்றனர்.

நபிமொழி அல்லாததை நபிமொழி என்றோ அல்லது குர்ஆன் வசனம் அல்லாத ஒன்றை குர்ஆன் வசனம் என்றோ கூறுவது கடும் தண்டனைக்குரிய குற்றம் என எச்சரிக்கப்பட்டுள்ளது.

عن أبي هريرة، قال: قال رسول الله صلى الله عليه وسلم: «من كذب علي متعمدا فليتبوأ مقعده من النار».  

[صحيح] - [متفق عليه]

அல்லாஹ்வின் தூதர் ﷺஅவர்கள் கூறினார்கள்: ‘என்மீது யார் வேண்டுமென்றே பொய்யுரைப்பானோ அவன் நரகத்தில் தனது இருப்பிடத்தை அமைத்துக் கொள்ளட்டும்’.

(அறிவிப்பவர் : அபூஹுரைரா(ரலி) நூல்கள் : புகாரீ 110, முஸ்லிம் 4)

இந்த நபிமொழி மாறுப்பட்ட வார்த்தைகளில் பல ஹதீஸ் கிரதங்களில் காணக்கிடக்கின்றது.

நாயகம் ﷺஅவர்கள் பல சந்தர்ப்பங்களில் தாம் சொல்லாததை சொன்னதாக இட்டுக்கட்டுவதை கடுமையான தண்டனைக்குறிய குற்றம் என எச்சரித்துள்ளார்கள்.எனவே ஒரு மெஸேஜை பகிர்வதற்கு முன்னால் அது உண்மையிலே ஹதீஸா இல்லை குர்ஆன் ஆயத்தா என ஆராய்ந்து அனுப்பவேண்டும்.தமக்கு வருவதையெல்லாம் Forward பகிர்வது ஒரு முஸ்லிமுக்கு அழகல்ல.

இதுப்போன்று தனக்கு வரும் செய்திகளையெல்லாம் பரப்புபவனை நாயகம் ﷺஅவர்கள் பொய்யன் என்றார்கள்:

كَفَى بالمرءِ كذِبًا أن يحدِّثَ بِكُلِّ ما سمِعَ

الراوي :أخرجه مسلم في ((مقدمة الصحيح)) (5)، وأبو داود (4992)، وابن حبان (30) من حديث أبي هريرة

ஒருவர் தாம் கேள்விப்பட்டதையெல்லாம் (பிறருக்கு) அறிவிப்பதே அவர் பொய்யர் என்பதற்குப் போது(மான சான்றாகு)ம். (அறிவிப்பவர்;அபூஹுரைரா (ரலி) அவர்கள்.) (நூல்: முஸ்லிம் 6)

حَدِيْثُ الْمُغِيرَةِ رَضِيَ اللَّهُ عَنْهُ قَالَ سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : (( إِنَّ كَذِبًا عَلَيَّ لَيْسَ كَكَذِبٍ عَلَى أَحَدٍ، مَنْ كَذَبَ عَلَيَّ مُتَعَمِّدًا فَلْيَتَبَوَّأْ مَقْعَدَهُ مِنْ النَّارِ ))

அல்லாஹ்வின் தூதர்(ஸல்) அவர்கள் கூறினார்கள்: 'என் மீது கூறும் பொய் (உங்களில்) ஒருவரின் மீதும் கூறும் பொய்யைப் போன்றதன்று. யார் என் மீது வேண்டுமென்றே பொய்யுரைக்கின்றானோ அவன் தன் இருப்பிடத்தை நரகத்தில் ஆக்கிக் கொள்ளட்டும்!'

(அறிவிப்பவர் : முகீரா(ரலி) நூல்கள் : புகாரீ 1291, முஸ்லிம் 5)

சமூகவலை தளங்களில் உலாவரும் பித்அத்கள்.

சஃபர் மாதம் சம்பந்தமாக சமூக வலைதளங்களில் பல செய்திகள் உலா வருகின்றன.

அதன் உண்மை தன்மையை ஆராயாமல் தனக்கு வரும் குறுஞ்செய்தியை அப்படியே பல group குழுக்களுக்கு forward பகிர்ந்து விடுகின்றனர்.

அது உண்மையிலே நன்மையான காரியமாக இருந்தால் பரவாயில்லை.ஆனால் தவறான தகவலாக இருந்தால் அதன் தீமை அதனை பகிர்ந்தவரையே சேரும்.

உதாரணமாக சமூக வலைதளங்களில் இஸ்லாம் என்ற பெயரில் வரும் சில செய்திகள்

#அல்லாஹுத்தஆலாவின் ஐந்து திருநாமத்தை  11 பேருக்கு forwardஅனுப்பினால் உங்களின் பெரும் பிரச்சனை முடிவுக்கு வரும்.

இதனை ஷேர் செய்யவில்லையெனில் பல பிரச்சனைகளை சந்திக்க நேரிடும்.

#அதேபோல சில மெசேஜ்கள் இப்படியும் வரும் இந்த தகவலை இத்தனை குரூப்புகளுக்கு ஷேர் செய்தால் சொர்க்கம் கிடைக்கும்.

#சில மெசேஜ்களில் அல்லாஹ் ரசூலின் மீது உண்மையான பிரியம் இல்லாதவர்கள் இந்த மெசேஜை ஷேர் செய்ய மாட்டார்கள்.

#சில மெசேஜ்கள் பிற மதத்தவரின் வெறுப்பை தூண்டும் விதமாகவும் வருகின்றன.

ஒரு பக்கம் கஃபத்துல்லாஹ்வின் படத்தையும்,இன்னொரு பக்கத்தில் வேறு மதத்தவரின் கடவுளின் படத்தை போட்டுவிட்டு A,B இந்த இரண்டில் எந்த கடவுளை உங்களுக்குப் பிடிக்கும் like, comment, share செய்யுங்கள்.

இதுபோன்று இஸ்லாத்திற்கு அறவே சம்பந்தமில்லாத பல பொய்யான தகவலை சமூக வலைதளங்களில் இஸ்லாமியர்களின் சிலர் நன்மையான காரியமாக கருதி பரப்பிக் கொண்டிருக்கின்றனர்.இது முற்றிலும் தவறான இஸ்லாத்திற்கு எதிரான தண்டனைக்குரிய குற்றமாகும். 

தற்காலத்தில் சமூக வலைதளங்களில் கற்பது,கற்பிப்பது,நல்ல பல செய்திகளை அறிந்து கொள்வது போன்ற பல காரியங்கள் எளிதாக அமைகிறது.இதனை சரியாக உபயோகித்தால்  அல்லாஹ்வின் அருட்கொடையாக அமையும். 

அப்படி இல்லாமல் வரும் செய்திகளை அதன் உண்மை தன்மையை ஆராயாமல் பலருக்கு அதனை அனுப்பும்போது அதன் தீமை அனுப்பியவரையே வந்து சேரும்.

மனிதன் பேசக்கூடிய ஒவ்வொரு வார்த்தையும்.எழுதக்கூடிய ஒவ்வொரு எழுத்தும்.பகிரக் கூடிய ஒவ்வொன்றும் அவன் செயலேட்டில் பதிவு செய்யப்பட்டு கொண்டே இருக்கின்றன என்பதனை மனிதன் நினைவில் கொள்ள வேண்டும்.

مَا يَلْفِظُ مِنْ قَوْلٍ اِلَّا لَدَيْهِ رَقِيْبٌ عَتِيْدٌ‏

கண்காணித்து எழுதக்கூடியவர் அவனிடம் (மனிதனிடம்) இல்லாமல் எந்த சொல்லையும் அவன் மொழிவதில்லை.(அல்குர்ஆன் : 50:18)

வரலாற்று பிழைகள்.

இஸ்லாமிய வரலாற்றில் தவறான செய்தியை பரப்பியதால் இஸ்லாத்திற்கும் முஸ்லிம்களுக்கும் ஏற்பட்ட பல பின்னடைவுகளும் பாதிப்புகளும் இன்று வரை வரலாற்றில் சாட்சிகளாக உள்ளன.

உஹத் யுத்ததில் நாயகம் ﷺஅவர்கள் கொல்லப்பட்டார்கள் என பரவிய தவறான வதந்தியால் இஸ்லாமிய படை சிதறுண்டு போய் பெரும் பின்னடைவை சந்திக்க நேரிட்டது.

பனு முஸ்தலிக் யுத்தத்தின் போது அன்னை ஆயிஷா (ரலி)அவர்களின் மீது நயவஞ்சகர்கள் அபாண்டமான பழியை சுமத்தினர்.அது காட்டு தீயாய் பரவி நாயகம்ﷺ அவர்களை காயப்படுத்தியது. சில இஸ்லமியர்களும் உண்மைதன்மை ஆராயமல் அதனை செய்தனர்.

இறுதியில் அல்லாஹுத்தஆலா திருமறை குர்ஆனில் அன்னை ஆயிஷா (ரலி)அவர்களின் பத்தினித்தனம் பரிசுத்ததன்மையை கூறி,இட்டுட்டியவர்கள்,வதந்தி பரப்பியவர்களை கடினமான வார்த்தைகளால் கண்டித்தான்.

اِنَّ الَّذِيْنَ جَآءُوْ بِالْاِفْكِ عُصْبَةٌ مِّنْكُمْ‌  لَا تَحْسَبُوْهُ شَرًّا لَّـكُمْ‌  بَلْ هُوَ خَيْرٌ لَّـكُمْ‌  لِكُلِّ امْرِىٴٍ مِّنْهُمْ مَّا اكْتَسَبَ مِنَ الْاِثْمِ‌  وَالَّذِىْ تَوَلّٰى كِبْرَهٗ مِنْهُمْ لَهٗ عَذَابٌ عَظِيْمٌ‏

எவர்கள் பழி சுமத்தினார்களோ, நிச்சயமாக அவர்களும் உங்களில் ஒரு கூட்டத்தினரே! ஆனால் அது உங்களுக்குத் தீங்கு என்று நீங்கள் எண்ண வேண்டாம். அது உங்களுக்கு நன்மையாகும். (பழி சுமத்தியவர்கள்) ஒவ்வொரு மனிதனுக்கும் அவன் சம்பாதித்த பாவம் (அதற்கொப்ப தண்டனை) இருக்கிறது; மேலும், அ(ப்பழி சுமத்திய)வர்களில் பெரும் பங்கெடுத்துக் கொண்டவனுக்குக் கடினமான வேதனையுண்டு.(அல்குர்ஆன் : 24:11)

அதேபோன்று இன்றும் சில இணையத்தளங்கள் இஸ்லாம் தொடர்பான பல்வேறு தலைப்புகளில் பொதுவாக்கெடுப்புகளை நடத்துகின்றன. இந்த வாக்கெடுப்புகளில், நமது சகோதரர்கள் சிலர் மிகுந்த ஆர்வத்துடன் கலந்துகொண்டு தங்கள் கருத்துகளை பதிவு செய்கிறார்கள். பொதுவாக இதுபோன்ற அனைத்து இணையதளங்களும் இஸ்லாத்திற்கு எதிரான பிரச்சாரத்திற்கு பயன்படுத்தப்படுகின்றன, அவைகளை மிகுந்த எச்சரிக்கை உணர்வோடு கையாள வேண்டும். இதனையே அல்லாஹுத்தஆலா இப்படி கூறியுள்ளான்.

يٰۤاَيُّهَا الَّذِيْنَ اٰمَنُوْۤا اِنْ جَآءَكُمْ فَاسِقٌ  بِنَبَاٍ فَتَبَيَّنُوْۤا اَنْ تُصِيْبُوْا قَوْمًا  بِجَهَالَةٍ فَتُصْبِحُوْا عَلٰى مَا فَعَلْتُمْ نٰدِمِيْنَ‏

முஃமின்களே! ஃபாஸிக் (தீயவன்) எவனும் உங்களிடம் ஒரு செய்தியைக் கொண்டு வந்தால், அதைத் தீர்க்க விசாரித்துக் கொள்ளுங்கள்; (இல்லையேல்) அறியாமையினால் (குற்ற மற்ற) ஒரு சமூகத்தாருக்கு நீங்கள் தீங்கு செய்து விடலாம்; பின்னர் நீங்கள் செய்தவை பற்றி நீங்களே கைசேதப் படுபவர்களாக (கவலைப்படுபவர்களாக) ஆவீர்கள்.(அல்குர்ஆன் : 49:6)

اِنَّ الَّذِيْنَ يُحِبُّوْنَ اَنْ تَشِيْعَ الْفَاحِشَةُ فِى الَّذِيْنَ اٰمَنُوْا لَهُمْ عَذَابٌ اَلِيْمٌۙ فِى الدُّنْيَا وَالْاٰخِرَةِ‌ وَاللّٰهُ يَعْلَمُ وَاَنْـتُمْ لَا تَعْلَمُوْنَ‏

எவர்கள் ஈமான் கொண்டுள்ளோரிடையே இத்தகைய மானக்கேடான விஷயங்கள் பரவ வேண்டுமெனப் பிரியப்படுகிறார்களோ, அவர்களுக்கு நிச்சயமாக இம்மையிலும் மறுமையிலும் நோவினை செய்யும் வேதனையுண்டு; அல்லாஹ் (யாவற்றையும்) அறிகிறான். நீங்கள் அறியமாட்டீர்கள்.

(அல்குர்ஆன் : 24:19)

சமூக ஊடகங்களை நம்முடைய கல்வி,அரசியல்,வணிக நோக்கங்களுக்காக அதிகம் பயன்படுத்துகிறோம்.

அதைவிடவும் அதிகமாக தீனுல் இஸ்லாத்தை பரப்புவதற்கும்,நபித்துவ கல்வியை மாற்று மத சகோதரர்களுக்கு சரியான முறையில் எடுத்துரைப்பதற்கு சமூக ஊடகம் எளிதான மற்றும் விரைவில் மக்களை சென்றடையும் தளமாக உள்ளது.

இன்றைய காட்சி,அச்சு ஊடகங்கள்,சமூக வலைதளங்கள் பெரும்பாலும் இஸ்லாமிய எதிர்ப்பாளர்களின் ஆதிக்கத்தில் உள்ளது.அவற்றை இஸ்லாத்திற்கு எதிரான நச்சுக் கருத்துக்களை பரப்புவதற்கு அதிகம் பயன்படுத்தப்படுகின்றன.

எனவே இஸ்லாமியர்கள்  தம்மால் முடிந்த அளவு சமூக வலைதளங்களை இஸ்லாமிய போதனைகளை பரப்புவதற்கு நலமாக அமைத்துக் கொள்ள வேண்டும்.

ஆனால் தமக்கு இஸ்லாத்தின் பெயரில் வரும் செய்திகளை அதன் உண்மை தன்மையை ஆராயாமல் அடுத்தவருக்கு பகிர்வதை அறவே தவிர்த்துக் கொள்ள வேண்டும்.இதனையே இஸ்லாம் தடுக்கின்றது.ஸஃபர் மாதத்தை போல அனேக அனாச்சாரங்கள் இப்படித்தான் துவங்கியது.

எனவே அனாச்சாரங்கள் எந்த வடிவத்தில் வந்தாலும் அதனை இஸ்லாமியர்கள் விட்டொழிக்க வேண்டும்.

அல்லாஹு தஆலா அதற்கு நம் அனைவருக்கும் கிருபை செய்வானாக! ஆமின்...

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.

ஜும்ஆ பயான் 28/07/2023

மனித நேயம் காப்போம்.

முன்னுரை :

மணிப்பூரில் என்னதான் நடக்கின்றது?

1949-ம் ஆண்டில் இந்தியாவுடன் இணைக்கப்பட்டது மணிப்பூர். 1956-ல் யூனியன் பிரதேசமாக அறிவிக்கப்பட்டு, 1972-ல் மாநில அந்தஸ்து பெற்றது. புவியியல் ரீதியாக பெரும்பாலான பகுதி மலைகள் தான். சமவெளி என்பது பத்து சதவிகித பள்ளத்தாக்கு நிலம்தான். இந்தப் பள்ளத்தாக்கு பகுதியில் பெரும்பான்மையாக அதாவது மாநில மக்கள் தொகையில் 53 சதவீதம் பேர் மணிப்பூரி மொழி பேசும்‘மைத்தி’ இன மக்கள் வாழ்கிறார்கள். 90 சதவிகித மலைப் பகுதிகளில்,  குக்கி, நாகா, சோமி உள்ளிட்ட பழங்குடி குழுக்களைச் சேர்ந்த மக்கள் பரவி வாழ்கிறார்கள். குறிப்பிட்டுச் சொன்னால், பள்ளத்தாக்குப் பகுதியில் பெரும்பான்மை மக்கள் இந்துக்கள். மலைப் பகுதி பழங்குடிகளில் அனைவரும் கிறிஸ்தவர்கள். 

இந்த இரு சமூக, இனக்குழு மக்களுக்கிடையே உள்ள முக்கிய முரண் அவர்களின் வாழ்விடம். அரசியலமைப்புச் சட்டம் 371-சி பிரிவின்படி வெளியிடப்பட்ட அறிக்கை, ‘மலைப் பகுதிகளில் பழங்குடிகள் அல்லாத யாரும் நிலம் வாங்க முடியாது’ என்று தடுக்கிறது. (ஆனால், பழங்குடியினர் சமவெளி, பள்ளத்தாக்குப் பகுதிகளில் நிலம் வாங்கிக் கொள்ள முடியும்.) இந்தக் காரணத்தினால் கடந்த 2013-ம் ஆண்டில், “நாங்கள் வாழும் சமவெளி நிலம் எங்களுக்குப் போதவில்லை. பர்மா, பங்களாதேஷிலிருந்து வரும் அகதிகளால் எங்கள் வாழ்விடத்துக்கு அச்சுறுத்தல் இருக்கிறது. அதனால், எங்களையும் பழங்குடிகள் என்று அறிவித்துவிடுங்கள்” என்று மைத்தி இந்துக்கள் தரப்பிலிருந்து கோரிக்கைகள் கிளம்பின. இது பிரச்னையின் முதல் புள்ளி.

பத்து ஆண்டுகள் கழித்து, கடந்த 2023 ஏப்ரல், 19-ம் தேதி மணிப்பூர் நீதிமன்றம் இது தொடர்பாக தீர்ப்பு ஒன்றை வழங்கியது. அதில், மைத்தி இந்துக்களையும் பழங்குடியினராகச் சேர்ப்பது குறித்து, 4 வாரங்களுக்குள் மாநில அரசு (பா.ஜ.க), மத்திய அரசுக்கு (பா.ஜ.க) தன்னுடைய பரிந்துரைகளை வழங்கவேண்டும் என்று குறிப்பிடப்பட்டிருந்தது. 

ஏற்கெனவே, BC, SC, EWC உள்ளிட்ட இடஒதுக்கீடுகள் சமவெளியில் வாழும்  மைத்திகள் அனுபவித்துவருகிறார்கள். மாநிலத்தின் 60 சட்டமன்றத் தொகுதிகளில் 40 தொகுதிகள் பள்ளத்தாக்குகளில் வாழும் மைத்தி இந்துக்கள் வசமிருக்கின்றன. அரசுத் துறைகள், கல்வி, பொருளாதாரம் என அனைத்திலும் அவர்களுக்கே முன்னுரிமை கிடைத்துவருகிறது. தற்போது அவர்களைப் பழங்குடிகளாகவும் மாற்றி அறிவித்தால், தங்களுடைய நிலமும் எதிர்காலமும் பறிபோகும் என்று மணிப்பூர் பழங்குடி குழுக்கள் எதிர்க்கத் தொடங்கினார்கள். 

இதற்காக, மணிப்பூரின் அனைத்து பழங்குடி மாணவர் சங்கம் (ATSUM)மலைப் பகுதிகளில் 12 மணி நேர வேலை நிறுத்தப் போராட்டத்தைக் கடந்த ஏப்ரல் 23-ம் தேதி நடத்தியது. பிறகு, மே-3ம் தேதி மணிப்பூரின் தலைநகர் இம்பால் (சமவெளி) உள்பட 10 இடங்களில் பேரணி நடத்த ஏற்பாடு செய்தது. இதில், 60 ஆயிரத்துக்கும் மேற்பட்ட பள்ளி, கல்லூரி மாணவர்கள் திரண்டு தங்களின் எதிர்ப்பைப் பதிவுசெய்தனர். அந்தப் பேரணியில் தான் முதன்முதலாக திட்டமிட்டு தாக்குதல் நடத்தப்பட்டிருக்கிறது.  தாக்குதலுக்கு முக்கிய காரணமாக, மைத்தி இனப் பெண் ஒருவரை குக்கி பழங்குடிகள் பாலியல் வன்கொடுமை செய்து கொன்றுவிட்டனர் என்று போலியான செய்தி ஒன்று பரப்பப்பட்டதுதான். அந்த வெறுப்புப் பிரசாரத்தின் அனல் தொடர் வன்முறைக்கான நெருப்பைப் பற்றவைத்தது.   

போராட்டத்தில் ஈடுபட்ட பழங்குடி மக்களில் பெரும்பான்மையானவர்கள் குக்கிகள். இவர்கள் அதிகம் வசிக்கும் சுரசந்த்பூர் மாவட்டத்திலும் தலைநகர் இம்பாலிலும் குக்கி பழங்குடிகளைக் குறிவைத்து, மைத்திகள் தாக்குதலில் இறங்கியிருக்கிறார்கள். 

இதற்காக, எந்தெந்த வீடுகளில் இந்து மத அடையாளச் சின்னங்கள், கொடிகள் இருக்கின்றனவோ அவைமட்டும் தவிர்க்கப்பட்டு,  குக்கிகளின் வீடுகள் மீது தாக்குதல் அதிகரித்திருக்கிறது. இந்த வன்முறையில், வீடுகள், பள்ளிக்கூடங்கள், வணிக நிறுவனங்கள் அடித்து நொறுக்கப்பட்டு தீவைக்கப்பட்டிருக்கின்றன. குக்கி பழங்குடிகள், ஆங்கிலேய ஆட்சிக்கு எதிராக போர் புரிந்ததற்காக அமைக்கப்பட்ட நினைவுச் சின்னங்கள், அவர்களின் வழிபாட்டுத் தலங்கள் உள்ளிட்டவை தகர்க்கப்பட்டிருக்கின்றன. மே 3-ம் தேதி வன்முறையில் மட்டும் 50க்கும் மேற்பட்ட உயிர்பலிகள் நிகழ்ந்திருக்கின்றன. பலர் வீடுகளைவிட்டு வெளியேறி, பாதுகாப்பான இடங்களில் தஞ்சமடைந்திருக்கிறார்கள். 

அன்று இரவே மணிப்பூரின் எட்டு மாவட்டங்களில் ஊரடங்கு உத்தரவு பிறப்பிக்கப்பட்டு, இணைய சேவையும் துண்டிக்கப்பட்டிருக்கிறது. ராணுவம் வரவழைக்கப்பட்டு போராட்டக்காரர்களை(!) கண்டதும் சுட உத்தரவும் பிறப்பிக்கப்பட்டிருக்கிறது. இந்த நிலைமையில்தான், மணிப்பூர் மாநில மல்யுத்த வீராங்கனை மேரிகோம், “எங்கள் மாநிலம் பற்றி எரிகிறது” என்று ட்வீட் மூலமாக பிரதமருக்குக் கோரிக்கை விடுத்தார். ஆனால், அப்போது கர்நாடக தேர்தல் பிஸியில் இருந்தது ஏழைத்தாயின் மகனின் மொத்த கூடாரமும். 

மணிப்பூரின் இரு இனக்குழுக்களுக்கு இடையே பரப்பிவிடப்பட்ட இந்த வெறுப்பரசியல், வன்முறை, கலவரங்களுக்குப் பின்னால், நீதிமன்ற உத்தரவு மட்டுமல்ல... மதம், அரசியல், பொருளாதார வளச் சுரண்டல் உள்ளிட்ட காரணங்களும் இருக்கின்றன. 2022-ல் இரண்டு கட்டங்களாக நடைபெற்ற மணிப்பூர் சட்டமன்றத் தேர்தலில், பாஜக 32 இடங்களில் வென்றது. அவற்றில்   இம்பால் (17), பிஷ்னுபூர் (4) சுரசந்த்பூர்(3), சந்தேல் (2) ஆகிய பா.ஜ.க வென்ற  தொகுதிகளில் பெரும்பான்மையான மக்கள் மைத்தி இந்துக்கள். 

300 ஆண்டுகள் பழமையான மைத்திகளின் ‘சனமகி’ பண்பாடும், இந்து மத சம்பிரதாயங்களும் ஒன்றோடு ஒன்று பிணைந்துகிடக்கிறது. இதனால், பெரும்பான்மை மைத்திகள்மீது அக்கறை காட்டுவதாகச் சொல்லிக்கொண்டு, சிறுபான்மையினரான கிறிஸ்தவ குக்கி பழங்குடிகளை அவர்களுக்கு நேரெதிராக நிறுத்தும் அரசியல் அங்கு பா.ஜ.க-வுக்குப் பலனளித்திருக்கிறது.  இதற்காக, மணிப்பூரில் தேசிய குடிமக்கள் பதிவேடு (NRC)திட்டத்தை நடைமுறைப் படுத்தவேண்டும் என்று மைத்திகள் தரப்பிலான கோரிக்கை முதன்மை படுத்தப்படுகிறது. இது பழங்குடியினரை சமவெளிகளில் இருந்து வெளியேற்றுவதற்கான மறைமுகக் குரல்தான். 

ஒருபுறம், காட்டைப் பாதுகாக்கிறோம் என்ற பெயரில் பழங்குடியினர் வாழும் மலைப் பகுதிகளிலிருந்து அவர்களை வெளியேற்றி, அவர்களின் வீடு, கட்டடங்களை இடிக்கும் பணிகளையும் ஆளும் பா.ஜ.க அரசு மேற்கொள்கிறது. மறுபுறம், சட்டமீறல்களுடன் மலைப் பகுதியில் பழங்குடியினர் அல்லாதவர்களின் ஆக்கிரமிப்புகளும் அதிகரித்து வருகின்றன. இதற்கிடையே, அண்டை நாடுகளிலிருந்து குக்கி இனப் பழங்குடிகள் மணிப்பூரில் ஊடுருவி இருக்கிறார்கள் என்றும், அவர்களை உள்ளூர் குக்கி மக்கள் ஆதரிக்கிறார்கள் என்று திட்டமிட்ட வெறுப்புப் பிரசாரமும் அங்கு மேற்கொள்ளப்படுகிறது.  

மத ரீதியாக நடைபெறும் அத்துமீறல்களும் இவற்றுக்குச் சளைத்ததல்ல. ஆங்கிலேயர் ஆட்சி காலத்தில் கட்டப்பட்ட எண்ணற்ற கிறிஸ்துவ தேவாலயங்களை, மாநில அரசுக்குச் சொந்தமான நிலத்தில் கட்டப்பட்டதாகச் சொல்லி இடித்துத் தள்ளிவருகிறது பா.ஜ.க அரசு. கத்தோலிக்க தேவாலயம், லூத்ரன் சர்ச், பாப்டிஸ்ட் கன்வென்ஷன் சர்ச் என நூற்றுக்கணக்கான தேவாலயங்களை தற்போதைய வன்முறையில் எரிக்கப்பட்டிருப்பதாக செய்திகள் தெரிவிக்கின்றன. ‘இவை அனைத்தும் 1983-ல் அசாமில் நடைபெற்ற வன்முறை- நெல்லி இனப் படுகொலைகளை அடியொற்றி நடைபெறும் சம்பவங்களை நினைவு படுத்துகின்றன... அதன் பின்னணியில் இருந்ததும் ஆர்.எஸ்.எஸ் அமைப்பினர் தான்...’ என்கிறார்கள் அசாமைச் சேர்ந்த பழங்குடி மக்கள்.  

தமிழ்நாட்டில் நாமறிந்த இந்துத்துவ அமைப்புகள் போலவே, மணிப்பூரிலும் அரம்பை தெங்கால், மைத்தி-லீபன் உள்ளிட்ட சில பாசிச பா.ஜ.க-வின் ஆசிபெற்ற இந்துத்துவ அமைப்புகளே இந்த வன்முறையினை முன்னின்று நடத்தியிருக்கின்றன. நவீனரக துப்பாக்கி உள்ளிட்ட ஆயுதங்களை ஏந்தியபடி இருச்சக்கர வாகனங்களில் கும்பலாகச் சென்று, காவல் நிலையங்களைச் சூறையாடி, குக்கி பழங்குடி கிராமங்களில் புகுந்து, அவர்களின் வீடுகளை, பொருட்களை, பெண்களை, ஆண்களை நாசம் செய்து கொலைகளில் ஈடுபடுகின்றன. இந்த இந்துத்துவ அமைப்புகளின் முக்கியக் கொள்கை, மணிப்பூரின் மன்னர் காலத்துப் பண்பாடான ‘சனமகி’ ராஜ்ஜியம் திரும்பவும் வரவேண்டும் என்பதுதான். மணிப்பூர் மாநில ஆர்.எஸ்.எஸ் தலைமையகத்தில் பறப்பது இவர்களின் சனமகி கொடியே. 

பொருளாதார ரீதியாக, பழங்குடிகளின் நிலம்தான் சமவெளியில் வாழும் மைத்திகளின் இலக்கு. தங்களையும் பழங்குடிகளாக அறிவித்துவிட்டால், மலைப்பகுதி நிலங்களை அவர்களால் வாங்கிவிட முடியும். ஆனால், இது மைத்திகளின் ஒட்டுமொத்த மனநிலை அல்ல. அதே சமூகத்தின் பணம் படைத்த அதிகார வர்க்கத்தின் கோரிக்கை. பா.ஜ.க அரசின் தேசிய சமையல் எண்ணெய் திட்டத்துக்கு National Mission on Edible Oils-Oil Palm (NMEO-OP) வடகிழக்கின் 2.5 லட்சம் ஹெக்டேர் நிலம் வேண்டும். அதன் அளப்பரிய நீர்வளம் வேண்டும். பதஞ்சலி, காத்ரேஜ், ருச்சி, சஞ்சய் கொயாங்கோ உள்ளிட்ட பெரு முதலாளிகளின் எண்ணெய் வணிகம் செழிக்க பிரச்சனையின்றி பழங்குடிகளின் நிலம் அவர்களுக்குக் கிடைக்க வேண்டும். அவர்கள் வாழும் சதுப்பு நில, நீர்நிலைகளை விட்டு அவர்களைத் துரத்த வேண்டும். 

மணிப்பூர் பழங்குடிப் பெண்களை நிர்வாணமாக்கி, நடுவீதியில் இழுத்துச் சென்று, அவர்களின் தந்தை, சகோதரனைக் கொன்று குவித்த கொடூரம் வீடியோவாக வெளிவந்ததும், இரண்டரை மாதங்களாக வாய்திறக்காத பிரதமர், ‘இது 140 கோடி இந்திய மக்களின் அவமானம்’ என்றிருக்கிறார். 

ஆம், தரகு முதலாளித்துவ அடிமைகளும், மதவெறி, இனவெறியைத் தூண்டிவிட்டு, பாசிச கொள்கைகள் மூலம் மக்களைப் பிளவுபடுத்தி, பெண்களை நிர்வாணமாக்கி, சிறுமிகளை எரித்து, விவசாயிகள் மீது கார் ஏற்றிக் கொலை செய்து, பழங்குடிகளை  அவர்களின் நிலங்களிலிருந்து வெளியேற்றும்    வெறுப்பரசியல் கும்பலை ஆட்சி அதிகாரத்தில் உட்கார வைத்திருப்பதற்காக நாங்கள் நிச்சயம் அவமானப்படத்தான் வேண்டும். இது எங்களின் அவமானம்தான். 

நன்றி : 

- கார்த்திக் புகழேந்தி கார்த்திக் புகழேந்தி

21-07-2023

மனித உரிமை மீறல்.

மணிப்பூர் மாநிலத்தில் குக்கி பழங்குடியினத்தை சேர்ந்த இரண்டு பெண்களை மைத்தி சமூகத்தைச் சேர்ந்த ஆண்கள் கும்பல் ஒன்று சேர்ந்து நிர்வாணப்படுத்தி வீதியில் ஊர்வலமாக அழைத்து சென்ற கொடூரமான வீடியோ சமூக வலைதளங்களில் பகிரப்பட்டு தேசிய அளவில் அதிர்ச்சியை ஏற்படுத்தியுள்ளது. அந்த இரண்டு பெண்களில் ஒருவர் கூட்டுப் பாலியல் வன்கொடுமைக்கும் ஆளாகியுள்ளார். இது ஒன்றும் இந்திய நாட்டிற்கு புதிதல்ல . மனித உரிமைகள் மீறப்படுவதும் மானங்கப்படுத்துவதும் இந்திய நாட்டின் அடையாளமாக மாறிவருகிறது.

பிறர் மானம் காப்போம்.

அல்லாஹ் நமக்கு வழங்கிய மார்க்கத்தில், இறைவனுக்கு செய்யவேண்டிய கடமைகள் நமக்கு எந்த அளவுக்கு சொல்லப்பட்டிருக்கிறதோ, அதை விட கூடுதலாக ஒரு மனிதன் இன்னொரு மனிதன் விஷயத்தில் நடந்துக் கொள்ளவேண்டிய அம்சங்கள் குறித்து நமக்கு சொல்லப்பட்டிருக்கிறது. மனித உரிமைகளில் யார் ? எல்லை மீறுகிறார்களோ, அந்த மனிதர் மன்னிக்காத வரை அல்லாஹ் மன்னிக்கவே மாட்டான். என்று நபிகளார் நமக்கு கூறினார்கள்.

மனிதனின் மானம் வானம் போல் பெரியது மானத்திற்கு முன்னால் மனிதனின் உயிர் மற்றும் உடமைகள் அத்திப்பழத்தின் விதையை விடவும் சிறியவை. மானம் காப்பதும் மரியாதை கேட்பதும் மனிதனின் குருதியில் ஊரிய குணாதிசியங்கள்.

மானம் இழந்தவன் தன் உயிரை இழந்தான்’ என்பார்கள் நம் முன்னோர்கள்.மானம் மலையேரும் போது மனிதன் தற்கொலை செய்து கொள்கிறான் அல்லது சமூகத்தை விட்டும் ஓடி ஒழிந்து கொள்கிறான். தன்மானம்; காப்பதற்காக தன் சொத்து சுகங்களைக்கூட தியாகம் செய்யும் அளவுக்கு மனிதன் தன்மானத்தை பெரும் செல்வமாக மதிக்கின்றான்.

ஆதி மனிதர்களான ஆதம் அலைஹிஸ்ஸலாம், ஹவ்வா அலைஹிஸ்ஸலாம் ஆகிய இருவரும் சுவர்க்கத்தில் தங்க வைக்கப்பட்ட போது இறை கட்டலையை மீறினார்கள் அதன் விலைவால் அவர்களின் வெட்கத்தலங்கள் தெரிந்தன. உடனே இருவறும் பொங்கி எழுந்து நாணத்துடன் தங்கள் மானத்தை சுவனத்தின் இலை தழைகளைக் கொண்டு மறைக்க விலைந்ததாக குர்அன் கூறுகின்றது.

فَدَلّٰٮهُمَا بِغُرُوْرٍ‌  فَلَمَّا ذَاقَا الشَّجَرَةَ بَدَتْ لَهُمَا سَوْاٰتُهُمَا وَطَفِقَا يَخْصِفٰنِ عَلَيْهِمَا مِنْ وَّرَقِ الْجَـنَّةِ‌  وَنَادٰٮهُمَا رَبُّهُمَاۤ اَلَمْ اَنْهَكُمَا عَنْ تِلْكُمَا الشَّجَرَةِ وَاَقُلْ لَّـكُمَاۤ اِنَّ الشَّيْطٰنَ لَـكُمَا عَدُوٌّ مُّبِيْنٌ‏

இவ்வாறு, அவன் அவ்விருவரையும் ஏமாற்றி, அவர்கள் (தங்கள் நிலையிலிருந்து) கீழே இறங்கும்படிச் செய்தான் - அவர்களிருவரும் அம்மரத்தினை (அம்மரத்தின் கனியை)ச் சுவைத்தபோது - அவர்களுடைய வெட்கத்தலங்கள் அவர்களுக்கு வெளியாயிற்று; அவர்கள் சுவனபதியின் இலைகளால் தங்களை மூடிக்கொள்ள முயன்றனர்.(அல்குர்ஆன் : 7:22)

மானம் காத்த மாநபி.

இன்னும் சொல்லப் போனால் மாஇஸ் ரளியல்லாஹு அன்ஹு அவர்கள் தன் விபச்சாரக் குற்றத்தை நபி ஸல்லல்லாஹு அலைஹி வஸல்லம் அவர்களிடம் ஒப்புக் கொண்டு அதற்குரிய தண்டனையை வழங்கக் கோரிய மூன்று சந்தர்ப்பங்கிலும் அவரின் மானத்தின் புனிதம் கருதி அவரின் இருண்ட விவகாரத்தை வெளிச்சப்படுத்தாமல் அவரை தண்டிக்காது திருப்பி அனுப்பிவைத்தார்கள் நபிகள் நாயகம்.நான்காவது தடைவ அவரே முன் வந்து அதற்குரிய தண்டனையைப் பெற்று இவ்வுலகிலேயே தன்னை பரிசுத்தப்படுத்திக் கொண்டார்.  (புகாரி 6814)

இஸ்லாம் ஒரு மனிதனின் மானத்தை எந்தளவு புனிதமாக மதிக்கின்றதென்றால்.

விபச்சாரம் செய்ததாக ஒருவர் சாட்சி சொன்னாலும் இருவர் சாட்சி சொன்னாலும் மூவர் சாட்சி சொன்னாலும் சொன்னவர்களுக்குத்தான் தண்டனை வழங்க வேண்டும் நான்குபேரின் சாட்சியையே இஸ்லாமிய குற்றவியல் சட்டம் ஏற்றுக் கொள்ளும். அந்நான்கு பேரில் ஒருவரின் கண்னில் பார்வை குறைபாடு இருந்தாலும் அவர்களின் சாட்ச்சி ஏற்றுக் கொள்ளப்பட மாட்டாது என்கின்ற அளவிற்கு ஒருவரின் மானத்தை இஸ்லாம் புனிதமானதாக மதிக்கின்றது.

மனிதனின் மானம் அனைத்தையும் விட உயர்வானது.

அறியாமைக்காலத்து அறப்புக்கள் கூட தங்கள் மானத்தை பெரும் செல்வமாக மதித்துள்ளனர். அறியாமைக்கால புலவர் ஒருவர் தன் மானத்தின் மகிமையை கவிதையில் வடித்துள்ள விதத்தைப் பாருங்கள்.!

"மானம் அனைத்திலும் உயர்வானது! செல்வம் வைடூரியம் ஆகியவற்றை விடவும் விலை மதிப்பற்றது. மானம் இல்லாத செல்லவம் சுபிட்ச்சம் அற்றது.என் செல்வத்தால் என் மானத்தைக் காப்பேன். ஒரு போதும் அதை நான் கலங்கப்படுத்த மாட்டேன். என் செல்வம் பறிபோனால் தந்திரத்தை கையாண்டு அதை திரட்டுவேன். என் மானம் மலையேறினால் தந்திரங்களால் அதை காக்க முடியாது. மானம் கெட்ட பிறகு என் செல்வத்தால் என்ன பலன் இல்லை உயிர் வாழ்ந்தே என்ன பலன்".

இருண்ட வாழ்க்கை வாழ்ந்த அந்த அறபியர்கள் கூட தங்கள் மானத்தை பெரும் செல்வமாக மதித்துள்ளார்கள்.

தாழ்த்தப்பட்டவர்கள் புறக்கனிக்கப்படும் போது அல்லாஹ்வின் கோபம்.

நபிகள் நாயகம் (ஸல்) அவர்கள் மக்காவில் பிரச்சாரம் செய்து கொண்டிருந்த ஆரம்ப நேரம். அன்றைய மக்களால் உயர்ந்த குலமாகக் கருதப்பட்ட குரைஷிக் குலத்தில் நபிகள் நாயகம் (ஸல்) அவர்கள் பிறந்தவர்கள் என்பதால் மரியாதைக்குரியவர்களாக இருந்தனர்.

இந்த நிலையில் முக்கியப் பிரமுகர்களைச் சந்தித்து அவர்களுக்கு நபிகள் நாயகம் (ஸல்) அவர்கள் கொள்கை விளக்கம் அளித்து வந்தனர். ஒரு நாள் அவர்கள் இவ்வாறு கொள்கைப் பிரச்சாரம் செய்த போது நடந்த நிகழ்ச்சி பின் வருமாறு வரலாற்றில் பதிவு செய்யப்பட்டுள்ளது.

நபிகள் நாயகம் (ஸல்) அவர்கள் எதிரிகளில் முக்கியப் பிரமுகர் ஒருவரிடம் பேசிக் கொண்டிருந்தனர். அப்போது தாழ்ந்த குலத்தவராகக் கருதப்பட்ட பார்வையற்ற இப்னு உம்மி மக்தூம் என்பார் வந்தார். அல்லாஹ்வின் தூதரே! எனக்கு அறிவுரை கூறுங்கள் என்றார். நபிகள் நாயகம் (ஸல்) அவர்கள் அவரைப் புறக்கணித்து விட்டு அந்தப் பிரமுகரிடம் பேசிக் கொண்டிருந்தார்கள். அந்தச் சமயத்தில் திருக்குர்ஆன் வசனம் இறங்கியது 

عَبَسَ وَتَوَلّٰٓىۙ‏

اَنْ جَآءَهُ الْاَعْمٰى‏

وَمَا يُدْرِيْكَ لَعَلَّهٗ يَزَّكّٰٓىۙ‏

தன்னிடம் அந்தக் குருடர் வந்ததற்காக இவர் கடுகடுத்தார். அலட்சியம் செய்தார். அவர் தூயவராக இருக்கலாம் என்பது (முஹம்மதே!) உமக்கு எப்படித் தெரியும்? அல்லது அவர் அறிவுரை பெறலாம். அந்த அறிவுரை அவருக்குப் பயன் அளிக்கலாம். யார் அலட்சியம் செய்கிறானோ அவனிடம் வலியச் செல்கிறீர். அவன் பரிசுத்தமாக ஆகாவிட்டால் உம் மீது ஏதும் இல்லை. (இறைவனை) அஞ்சி உம்மிடம் யார் ஓடி வருகிறாரோ அவரை அலட்சியம் செய்கிறீர். (திருக்குர்ஆன்: 80:1-10 )

கண் பார்வையற்ற இவர் விஷயத்தில் இதன் பிறகு நபிகள் நாயகம் (ஸல்) அவர்கள் நடந்து கொண்ட முறை தான் இதை விடச் சிறப்பானது.இதன் பின்னர் இவரைக் காணும் போதெல்லாம் நபிகள் நாயகம் (ஸல்) அவர்கள் மரியாதை செலுத்துவார்கள்.இவர் மூலம் அல்லாஹ் எனக்கு நல்ல அறிவுரை வழங்கினான் என்று அவரை மிகவும் மரியாதையோடு நடத்தினார்கள்

நபிகள் நாயகம் (ஸல்) அவர்கள் மதீனா சென்று மாமன்னராக உயர்ந்த பின் அமைத்துக் கொண்ட ஆட்சியில் இவருக்கு முக்கியப் பங்கையும் அளித்தார்கள்.

 عَنْ قَتَادَةَ عَنْ أَنَسٍ قَالَ اسْتَخْلَفَ رَسُولُ اللَّهِ صَلَّى اللَّهُ عَلَيْهِ وَسَلَّمَ ابْنَ أُمِّ مَكْتُومٍ مَرَّتَيْنِ عَلَى الْمَدِينَةِ وَلَقَدْ رَأَيْتُهُ يَوْمَ الْقَادِسِيَّةِ مَعَهُ رَايَةٌ سَوْدَاءُ

நபிகள் நாயகம் (ஸல்) அவர்கள் போர்க்களம் சென்ற போது இரண்டு தடவை இவரிடம் ஆட்சியை ஒப்படைத்துச் சென்றார்கள். (நூல் : அஹ்மத் 11894)

حَدَّثَنَا عَبْدُ اللَّهِ بْنُ مَسْلَمَةَ، عَنْ مَالِكٍ، عَنِ ابْنِ شِهَابٍ، عَنْ سَالِمِ بْنِ عَبْدِ اللَّهِ، عَنْ أَبِيهِ، أَنَّ رَسُولَ اللَّهِ صلى الله عليه وسلم قَالَ "" إِنَّ بِلاَلاً يُؤَذِّنُ بِلَيْلٍ، فَكُلُوا وَاشْرَبُوا حَتَّى يُنَادِيَ ابْنُ أُمِّ مَكْتُومٍ "". ثُمَّ قَالَ وَكَانَ رَجُلاً أَعْمَى لاَ يُنَادِي حَتَّى يُقَالَ لَهُ أَصْبَحْتَ أَصْبَحْتَ.

 நபிகள் நாயகத்தின் பள்ளிவாசலில் மக்களைத் தொழுகைக்கு அழைக்கும் பணியை பிலால் (ரலி), இப்னு உம்மி மக்தூம் (ரலி) ஆகிய இருவரிடம் தான் நபிகள் நாயகம் (ஸல்) ஒப்படைத்திருந்தார்கள்.

மனித நேயம் காப்போம்.

இஸ்லாம், மனிதநேயத்தை போற்றும்  சன்மார்க்கமாகும்.இஸ்லாம் உலக அமைதியையும்,பாதுகாப்பையும் உறுதி செய்கிறது.படைப்பினங்கள் அனைத்தும் "அல்லாஹ்வின் குடும்பம்"என்கிற கூற்றின் வாயிலாக  ஜாதி மத இன நிற பேதங்களை கடந்து அனைவரும் ஆதி பிதா ஆதம் (அலை)அவர்களின் பிள்ளைகள் என்கிற உணர்வோடு தங்களுக்கிடையில்  அழகிய முறையிலும்,கண்ணியத்துடனும்,நேயத்துடனும் நடந்துக்கொள்ளவேண்டும் என்று இஸ்லாம் வலியுறுத்துகின்றது.

மனித கண்ணியத்தை காப்பதும்,மனிதநேயத்தை போற்றுவதுமே இஸ்லாத்தின் அடிப்படை அம்சமாகும்.

இஸ்லாத்தில் மனிதனை اشرف المخلوقات படைப்பினங்களில் சிறந்த படைப்பு என்று கூறப்பட்டுள்ளது.மனித இனம் உலகில் அனைத்து படைப்பைக் காட்டிலும் சிறந்ததாக உள்ளது என குர்ஆன் வர்ணிக்கிறது...

وَلَـقَدْ كَرَّمْنَا بَنِىْۤ اٰدَمَ وَحَمَلْنٰهُمْ فِى الْبَرِّ وَالْبَحْرِ وَرَزَقْنٰهُمْ مِّنَ الطَّيِّبٰتِ وَفَضَّلْنٰهُمْ عَلٰى كَثِيْرٍ مِّمَّنْ خَلَقْنَا تَفْضِيْلًا‏

நிச்சயமாக, நாம் ஆதமுடைய சந்ததியைக் கண்ணியப்படுத்தினோம்; இன்னும், கடலிலும், கரையிலும் அவர்களைச் சுமந்து, அவர்களுக்காக நல்ல உணவு(ம் மற்றும்) பொருட்களையும் அளித்து, நாம் படைத்துள்ள (படைப்புகள்) பலவற்றையும் விட அவர்களை (தகுதியால்) மேன்மைப் படுத்தினோம்.  (அல்குர்ஆன் : 17:70)

மனித இனத்தை தோற்றத்திலும்,அழகிலும் ஏனைய இனத்தைக் காட்டிலும் சிறப்பாக்கி வைத்ததாக அல்லாஹ் கூறுகிறான்.

لَقَدْ خَلَقْنَا الْاِنْسَانَ فِىْۤ اَحْسَنِ تَقْوِيْمٍ‏

திடமாக, நாம் மனிதனை மிகவும் அழகிய அமைப்பில் படைத்தோம்.          (அல்குர்ஆன் : 95:4)

“பிறப்பொக்கும் எல்லாவுயிர்கும் சிறப்பொவ்வா செய்தொழில் வேற்றுமை யான்” என்று பாடுகிறார் பாவலர் வள்ளுவன்.

அதாவது மனிதர்கள் எனப்படுபவர்கள் பிறப்பினால் யாவரும் சமன் என்பதாகும். உயர்வு தாழ்வுகள் இல்லாமல் பிற மனிதர்கள் மீது அன்பு பாராட்டும் அந்த உயரிய பண்புடையவனே உண்மையான மனிதனாவான் அத்தகைய பண்பில்லாதவர்களை மனிதனாக கருத முடியாது.

இக்கருத்தை இதைவிடவும் சிறப்பாக 1400 ஆண்டுகளுக்கு முன்பே இறைவன் தன் திருமறையில் அனைவரும் ஒரே தாய்,தந்தையின் மக்கள் என கூறிவிட்டான்.

يٰۤاَيُّهَا النَّاسُ اِنَّا خَلَقْنٰكُمْ مِّنْ ذَكَرٍ وَّاُنْثٰى وَجَعَلْنٰكُمْ شُعُوْبًا وَّقَبَآٮِٕلَ لِتَعَارَفُوْا‌  اِنَّ اَكْرَمَكُمْ عِنْدَ اللّٰهِ اَ تْقٰٮكُمْ‌  اِنَّ اللّٰهَ عَلِيْمٌ خَبِيْرٌ‏

மனிதர்களே! நிச்சயமாக நாம் உங்களை ஓர் ஆண், ஒரு பெண்ணிலிருந்தே படைத்தோம்; நீங்கள் ஒருவரை ஒருவர் அறிந்து கொள்ளும் பொருட்டு. பின்னர், உங்களைக் கிளைகளாகவும், கோத்திரங்களாகவும் ஆக்கினோம்; (ஆகவே) உங்களில் எவர் மிகவும் பயபக்தியுடையவராக இருக்கின்றாரோ, அவர்தாம் அல்லாஹ்விடத்தில், நிச்சயமாக மிக்க கண்ணியமானவர். நிச்சயமாக அல்லாஹ் நன்கறிபவன், (யாவற்றையும் சூழந்து) தெரிந்தவன்.(அல்குர்ஆன் : 49:13)

மனிதனின் இன்னொரு சிறப்பு உலகில் அனைத்தும் படைக்கப்பட்டது மனிதனுக்காக என்றும் மனிதன் தன்னை வணங்குவதற்காக படைக்கப்பட்டான் என்று அல்லாஹ் கூறுகிறான்.

இஸ்லாத்தில் மனித  இனத்தின் கண்ணியத்தையும்,சிறப்பையும் எந்த அளவுக்கு வலியுறுத்தப்பட்டிருக்கின்றது என்பதற்கு இந்த ஒரு விஷயமே போதுமானதாகும்.

மனிதன் மரணித்ததற்கு பின்னாலும் அவன் கண்ணியம் காக்கப்பட வேண்டும் என்று இஸ்லாம் வலியுறுத்துகின்றது.

மரணித்த மனிதனை நல்ல முறையில் குளிபாட்டுவதும்.தூய்மையான துணியில் கஃபனிடுவதும்,நறுமணம் பூசுவதும்,ஜனாஸா தொழுவைப்பதும்,நான்கு நபர்கள் தங்களின் தோள்களில் சுமந்து சென்று கபுருஸ்தானில் அடக்கம் செய்வதும் மனித கண்ணியத்தை காட்டுகிறது.

ஒருமுறை ஒரு யூதனின் ஜனாஸா கடந்து செல்லும்போது கண்மணி நாயகம் ﷺஅவர்கள் எழுந்து நின்று மரியாதை செலுத்தினார்கள்.

இது ஒரு யூதனின் ஜனாஸா தானே? (இதற்கு தாங்கள் நிற்க வேண்டுமா?)என்று சஹாபாக்கள் கேட்டதற்கு  

:’’اَلیسُت نفساً‘‘  (مشکوٰۃ شریف، ص: ۱۴۴۔۱۴۷)

அதுவும் ஒரு மனித உயிர் இல்லையா?என்று நாயகம் ﷺஅவர்கள் பதில் கூறினார்கள் (நூல்;மிஷ்காத்) 

அறியாமை கால அரபுகள் போர்களில் எதிரிகளோடு மனிதநேயமற்ற முறையில் கொடூரமாக நடந்து கொண்டனர்.உடல் உறுப்புகளை துண்டு துண்டாக வெட்டுவதும்.எதிரியின் மண்டை ஓட்டில் மது ஊற்றி அருந்துவதும் அவர்களின் கொடூர பழக்கமாக இருந்தது.

இஸ்லாம் இதுப்போன்ற மனிதநேய மீறல்களை கடுமையாக தடை செய்கின்றது.மரணித்தவரின் உடலோடு எந்த விதத்திலும் மரியாதை குறைவாக நடப்பதை இஸ்லாம் தடை செய்கிறது.

அன்னை ஆயிஷா (ரலி)அவர்கள் அறிவிக்கின்றார்கள் 

"மரணித்தவனின் எலும்பை உடைப்பது உயிரோடு இருக்கும் மனிதனின் எலும்பை உடைப்பது போன்றதாகும்."என்று கண்மணி நாயகம் ﷺஅவர்கள் கூறினார்கள்(مشکوٰۃ شریف)

போர்களில் கூட நேயத்தையும் நீதத்தையும் கடைபிடிக்க இஸ்லாம் வழிவகை செய்கிறது.

போர் புரியும் நாட்டிலுள்ள பெண்கள்,வயோதிகர்,சிறுவர் இவர்களை கொள்வது கூடாது.எதிரி நாட்டின் வளங்களை சுரண்டுவதும்,செடி கொடி மரங்களை வெட்டுவதையும் இஸ்லாம் தடை செய்கிறது. 

இஸ்லாத்தின் மனித மகத்துவத்தின் முக்கிய அம்சங்களில் ஒன்று :இஸ்லாத்தை எடுத்துரைக்க வந்த அனைத்து ரசூல்மார்கள்,நபிமார்கள் அனைவரும் மனிதர்களே ஆவார்கள்.

இதனை ஏற்க மனித மனம் மறுத்ததன் விளைவாக ச நபிமார்கள் சிலரை இறைவன் என்றும் இறைவனின் குமாரர் என்று வாதிட்டனர்.

யூதர்கள் நபி தாவூத்,நபி யஃகூப்,நபி உஸைர் (அலைஹிம்)ஆகியவர்களை அல்லாஹ்வின் குமாரர் என்றார்கள்.  கிறிஸ்தவர்கள் நபி ஈஸா(அலை)அவர்களை அல்லாஹ்வின் குமாரர் என்றார்கள்.

கண்மணி நாயகம் ﷺஅவர்கள் கூறினார்கள்;படைப்பினங்கள் அல்லாஹ்வின் குடும்பம் ஆகும்.அல்லாஹ்விடம் படைப்பினங்களில் பிரித்திற்குறிய மனிதர்,எவர் அல்லாஹ்வின் குடும்பத்தினரோடு அழகிய முறையில் நடந்துக்கொள்கிறாரோ அவரே ஆவார்.(مشکوٰۃ شریف)

திருமறை குர்ஆன் சமூக ஒற்றுமை,மனிதநேயத்தை மனித மனங்களில் பதிய வைப்பதற்காக குர்ஆனில் பல இடங்களில் ’’یایّھا النّاس‘‘ மனித இனமே! என்றும் ’’یا بنی آدم‘‘ ஆதமின் மக்களே! என்றும் திரும்ப திரும்ப கூறுவதன் வாயிலாக மனிதர்கள் அனைவரும் சமமானவர்கள் என்ற கருத்தை பதியவைக்கிறது.

இஸ்லாத்தை ஏற்ற மக்களை நோக்கி ’’ یایّھاالذین آمنوا‘‘ முஃமின்களே! என்கிறது காரணம் ஈமான் என்பது ஜாதி மத இன நிற பேதங்களை கடந்து மனிதனை மனிதநேயமிக்க நல்லவனாக மாற்றிவிடும்.

وَقَالَ « إِنَّ دِمَاءَكُمْ وَأَمْوَالَكُمْ حَرَامٌ عَلَيْكُمْ كَحُرْمَةِ يَوْمِكُمْ هَذَا فِى شَهْرِكُمْ هَذَا فِى بَلَدِكُمْ هَذَا أَلاَ كُلُّ شَىْءٍ مِنْ أَمْرِ الْجَاهِلِيَّةِ تَحْتَ قَدَمَىَّ مَوْضُوعٌ وَدِمَاءُ الْجَاهِلِيَّةِ 

يَا أَيُّهَا النَّاسُ ، أَلاَ إِنَّ رَبَّكُمْ وَاحِدٌ ، وَإِنَّ أَبَاكُمْ وَاحِدٌ ، أَلاَ لاَ فَضْلَ لِعَرَبِيٍّ عَلَى عَجَمِيٍّ ، وَلاَ لِعَجَمِيٍّ عَلَى عَرَبِيٍّ ، وَلاَ أَحْمَرَ عَلَى أَسْوَدَ ، وَلاَ أَسْوَدَ عَلَى أَحْمَرَ ، إِلاَّ بِالتَّقْوَى أَبَلَّغْتُ ، قَالُوا : بَلَّغَ رَسُولُ اللهِ ، 

கண்மணி நாயகம்  (ஸல்) அவர்கள் சொன்னார்கள்;அறியாமைக்கால அனைத்து பழக்கவழக்கங்களும் என் பாதத்திற்கு கீழே புதைந்து விட்டன.

மக்களே!நிச்சயமாக உங்களின் அல்லாஹ் ஒருவனாக இருக்கிறான்.உங்களின் தந்தையும் ஒருவராக இருக்கிறார். ஒரு அரபிக்கு அரபி அல்லாதவரை விடவோ,ஒரு அரபி அல்லாதவருக்கு  அரபியை விடவோ எந்த சிறப்பும் கிடையாது.

ஒரு வெள்ளையனர் கருப்பரை விட சிறப்பானவர் அல்லர். சிறப்பின் அளவுகோல் இறையச்சத்தில் உள்ளது.அனைத்து முஸ்லிம்களும் சகோதரர்கள் ஆவார்கள்.

அடிமைகளுடன் நல்ல முறையில் நடந்து கொள்ளுங்கள்.நீங்கள் உண்ணுவதையே அவர்களுக்கும் கொடுங்கள்.நீங்கள் உடுத்துவதையே அவர்களுக்கும் கொடுங்கள்.

இஸ்லாமிய போதனைகளில் ஒன்று முஸ்ஸிம்கள் அனைவரும் சகோதரர்கள் ஆவார்கள்.குடும்ப,குலம்,கோத்திரம்,நிறபேதம்,மொழி அனைத்தும் வெறுமனே அடையாளங்களும்,ஒருவருக்கொருவரை எளிதில் அறிந்துக்கொள்வதற்காகவே ஆகும்.

عَنْ أَبِي هُرَيْرَةَ رَضِيَ اللهُ عَنْهُ قَالَ: قَالَ رَسُولُ اللَّهِ صلى الله عليه و سلم

وَكُونُوا عِبَادَ اللَّهِ إخْوَانًا، الْمُسْلِمُ أَخُو الْمُسْلِمِ،. [رَوَاهُ مُسْلِمٌ].

(நீங்கள் அனைவரும் அல்லாஹ்வின் அடியார்கள்)அல்லாஹ்வின் அடியார்கள் அனைவரும் உங்களுக்கிடையில் சகோதரர்களாக ஆகுங்கள்.ஒரு முஸ்லிம் இன்னொரு முஸ்லிமுக்கு சகோதரர் ஆவார்.

நம் அகம் சார்ந்த தேடல் நிகழும்போது புறம் சார்ந்த மனிதர்களை நினைக்க மறந்துவிடுகின்றோம். ஆனால் அகமும் புறமும் சார்ந்ததுதான் வாழ்க்கை என்பதை ஒவ்வொருவரும் உணர வேண்டும்.

ஒருவரின் துயர் கண்டு துடித்தெழுவது மட்டும் உண்மையான மனித நேயமாகாது. அதனை செயல் வழி காட்ட வேண்டும் என்பதனை உணர வேண்டும்.மனிதநேயத்தை வெறுமனே போதனைகளாக மட்டும் இல்லாமல் நடைமுறைப்படுத்தி காட்டியது இஸ்லாம்.

சக மனிதனை முகமலர்ச்சியோடு சந்திப்பது ஒரு தர்மமே என்ற உயர்ந்த தத்துவத்தை கூறி இஸ்லாம் மனிதநேயம் பேசுகின்றது.

عن جابر بن عبد الله، قال: قال رسول الله صلى الله عليه وسلم: ((كلُّ معروف صدقة، وإنَّ من المعروف أن تلقى أخاك بوجهٍ طَلْق  ))

நற்காரியங்கள் அனைத்துமே தர்மமாகும்.உன் சகோதரனை மலர்ந்தமுகத்துடன் நீ சந்திப்பதும் நற்கருமங்களில் உள்ளதாகும்.

உலகில் வாழக்கூடிய முகம் தெரியாத நபர்கள் நம்மை பார்த்து சிரிப்பது கூட ஒரு மனிதநேயம் தான். மனிதநேயம் என்பது சக மனிதர்களின் மீது பாசம் வைப்பது, கருணை, இரக்கம் காட்டுவது போன்றதாகும். மனிதர்கள் என்றாலே அவர்களுக்கு பிரச்சனை இருப்பது இயல்புதான். அந்த பிரச்சனைகளை பார்த்துவிட்டு அவர்களுக்கு நம்மால் முடிந்த உதவியினை செய்யலாம், பசியால் வாடுபவர்களுக்கு உணவு வாங்கி கொடுக்கலாம், தாகத்தில் தவிப்பவர்களுக்கு நீர் கொடுத்தல், இது போன்ற மனிதநேயமிக்க செயல்களை செய்தால் மனிதருக்குள் ஒற்றுமை நிலை அதிகரிக்கும்.

மனிதநேயம் என்பது மனிதனின் உயர்ந்த குணம், உயர்ந்த கண்ணியம். அது இல்லாமல், மனிதன் ஒரு விலங்கு மட்டுமே என்பதனை உணர்ந்து மனிதநேயத்துடன் வாழ வேண்டும்.

இஸ்லாத்தின் சட்டங்களும்,வணக்க வழிபாடுகள் சமத்துவத்தையும்,சகோதரத்துவத்தையும்,மனித நேயத்தையும் பறைசாற்றுகின்றன.

தொழுகையில் ஸஃப்பில் அணிவகுப்பாக முஸ்லிம்கள் தோளோடு தோள் சேர்ந்து நிற்கின்றனர்.அதில் அரசன் ஆண்டி அறிஞர் பாமரர் என்கிற எந்த பாகுபாடும் இன்றி அனைவரும் ஓரணியில் சமத்துவத்தோடு நிற்கும் காட்சியை காணலாம்.

நோன்பு காலங்களில் மஸ்ஜிதுகளில் நோன்பு திறக்கும் இஃப்தார் வேலையில் ஏழை,பணக்காரன் என்கிற பாகுபாடின்றி அனைவரும் ஒன்றாக கூடி நோன்பு திறக்கும் நிகழ்விலும் இதை காணலாம்.

ஹஜ்ஜில் ஹாஜிகள் அனைவரும் இஹ்ராம் எனும் ஒரே ஆடை அணிந்து பல நாட்டவர் பல இனத்தவர் பல நிறத்தவர் அனைவரும் ஒன்று கூடி ஹஜ் செய்யும் அந்த வேலையில் சகோதரத்துவம் சமத்துவம் ஒற்றுமை போன்ற உயர் பண்புகளை காணலாம்.

இஸ்லாமிய மார்க்கமே இறைவன் அருளிய மிகப் பெரும் அருட்கொடையாகும்.இங்கே ஜாதி மத இன நிற மொழி போன்ற எந்தப் பாகுபாடும் இல்லாமல் அனைவரும் சமத்துவத்தோடும் சகோதரத்துவத்தோடும் வாழ வழி செய்கிறது.இந்த மனிதநேயத்தையும்,சமத்துவத்தையும் ஒருமைப்பாட்டையும் வேறந்த மதத்திலும் காண்பது அரிது.

عن عبد الله بن عمرو قال: قال رسول الله صلى الله عليه وسلم: «الراحمون يرحمهم الرحمن، ارحموا من في الأرض يرحمكم من في السماء، الرحم شجنة من الرحمن، فمن وصلها وصله الله ومن قطعها قطعه الله»

கண்மணி நாயகம்  (ஸல்) அவர்கள் சொன்னார்கள்;இறக்கம் காட்டுபவரின் மீது அல்லாஹ் இறக்கம் காட்டுகிறான்.எனவே நீங்கள் பூமியில் உள்ளவர்களின் மீது இறக்கம் காட்டுங்கள்.உங்களின் மீது வானத்தில் உள்ளவன் இறக்கம் காட்டுவன்.(صحیح بخاری)ا

மனிதர்களின் மீது அன்பு,கருனை காட்டுவதற்கு இஸ்லத்தில் மிகுந்த முக்கியத்துவம் கொடுக்கப்பட்டுள்ளது.

قال رسول الله صلى الله عليه وسلم:

وَالَّذِي نَفْسِي بِيَدِهِ، لَا يَدْخُلُ الْجَنَّةَ إِلَّا رَحِيمٌ، قَالُوا: كُلُّنَا رُحَمَاءُ، قَالَ: لَيْسَ بِرَحْمَةِ أَحَدِكُمْ خُوَيِّصَتَهُ حَتَّى يَرْحَمَ النَّاسَ(کنزالعمّال، ابواب الاخلاق)

கண்மணி நாயகம்  (ஸல்) அவர்கள் சொன்னார்கள்;கருணை காட்டுபவரை தவிர வேறு எவரும் சுவனத்தில் நுழைய முடியாது.

சஹாபாக்கள் சொன்னார்கள்;நாங்கள் அனைவரும் கருணை காட்டுகின்றோம்.அதற்கு நபி அவர்கள்;நெருக்கமானவருக்கு மட்டும் கருணை காட்டுவது அல்ல மக்கள் அனைவரின் மீதும் கருணை காட்டுவதாகும். 

சாதி மத இன வர்க்க பேதங்களை கடந்து அனைவரும் ஓர் தாய் தந்தையின் மக்கள் என்பதனை உணர்த்தி சகோதரத்துவம்,சமத்துவத்தை மனித இனம் கடைப்பிடிக்கும் போது தான் மனித நேயம் வளரும் என்பதே இஸ்லாத்தின் வழிகாட்டுதலாகும்.

இஸ்லாம் அன்றி மனிதநேயம் மலர வாய்பேயில்லை என்பதே யதார்த்தம். இதை புரியும் ஆற்றலை மனித குலத்திற்கு இறைவன் தந்தருள்வானாக! ஆமின்.

வெளியீடு: செங்கை & காஞ்சிபுரம் மாவட்ட ஜமாஅத்துல் உலமா சபை.