ஜும்ஆ பயான் 01/04/2022

 தலைப்பு:

திருக்குர்ஆனை ஒதுவோம்.

__________________________________________

மக்களிடம் ஒரு காலம் வரும்.  அப்போது சிலந்தி கூடு கட்டுமளவிற்கு (நீண்ட காலம்) குர்ஆனைப் (பெட்டிக்குள்) பூட்டியே வைத்திருப்பார்கள். அதைக் கொண்டு அவர்கள் பயன் பெற மாட்டார்கள். (ளஹ்ஹாக் (ரஹ்)

📚 ஜாமிஉ பயானில் இல்மி  2/3201

_________________________________________

_________________________________________

அல்லாஹுதஆலா புனித ரமலான் மாதத்தில் இஸ்லாமியர்களின் மீது நோன்பை கடமையாக்கியிருப்பது, இம்மாதத்தில் இறைமறை திருக்குர்ஆன் இறக்கியருளப்பட்டதற்கு நன்றியை வெளிப்படுத்துவதற்கே ஆகும்.

இறைமறையாம் குர்ஆன், மாந்தர்களுக்கு நேர்வழிக்காட்டிட இறைவன் அருளியப் பெரும் பாக்கியமாகும். அதனால் தான் குர்ஆன் இறங்கிய ரமலான் மாதம், மற்ற மாதங்களை காட்டிலும் சிறப்புவாய்ந்ததாக உள்ளது.

شَهْرُ رَمَضَانَ الَّذِىْٓ اُنْزِلَ فِيْهِ الْقُرْاٰنُ هُدًى لِّلنَّاسِ وَ بَيِّنٰتٍ مِّنَ الْهُدٰى وَالْفُرْقَانِ 

ரமளான் மாதம் எத்தகையதென்றால் அதில் தான் மனிதர்களுக்கு (முழுமையான வழிகாட்டியாகவும், தெளிவான சான்றுகளைக் கொண்டதாகவும்; (நன்மை - தீமைகளைப்) பிரித்தறிவிப்பதுமான அல் குர்ஆன் இறக்கியருளப் பெற்றது; (அல்குர்ஆன் : 2:185)

திருமறையும்,ரமலான் மாதமும் ஒவ்வொன்றுமே தனிச்சிறப்புகள் வாய்ந்தவைகள் தாம், அவ்விரண்டும் ஒன்று சேரும் போது எல்லையற்ற சிறப்புகளை அடைகின்றன.அதனால் தான் ரமலானில் குர்ஆன் அதிகமாக ஓதப்படுகின்றது.

நாயகம் ﷺஅவர்கள் ரமலான் மாதத்தில் வானவர்கோன் ஜிப்ரயீல் (அலை)அவர்களிடம் முழு குர்ஆனையும் ஓதிக்காட்டுவார்கள்.ரமலானில் அதிகமாக குர்ஆன் ஓதுதலில் ஈடுப்பாடுவார்கள்.

குர்ஆனின் சிபாரிசு.

ரமலான்,குர்ஆன் இரண்டிற்குமுள்ள ஒற்றுமை,இவை இரண்டுமே கியாமத் நாளில் சிபாரிசு செய்யும்.

ورد عن عبد الله بن عمرو أن رسول الله صلى الله عليه وسلم قال: « الصِّيَامُ وَالْقُرْآنُ يَشْفَعَانِ لِلْعَبْدِ يَوْمَ الْقِيَامَةِ، يَقُولُ الصِّيَامُ: أَيْ رَبِّ، مَنَعْتُهُ الطَّعَامَ وَالشَّهَوَاتِ بِالنَّهَارِ، فَشَفِّعْنِي فِيهِ، وَيَقُولُ الْقُرْآنُ: مَنَعْتُهُ النَّوْمَ بِاللَّيْلِ، فَشَفِّعْنِي فِيهِ ، قَالَ: «فَيُشَفَّعَانِ».رواه أحمد

கண்மணி நாயகம்ﷺஅவர்கள் கூறினார்கள்; 

மறுமை நாளில் நோன்பும்,குர்ஆனும் அடியானுக்காக சிபாரிசுச் செய்யும்.

நோன்பு கூறும்"எத்தனையோ தினங்கள் இவனை பகலில் உணவையும்,மனோ இச்சையையும் விட்டும் நான் தடுத்திருக்கிறேன்.எனவே இவன் விஷயத்தில் எனது சிபாரிசை ஏற்றுக்கொள்"

குர்ஆன் கூறும் "நான் இவனை இரவு உறங்குவதை விட்டும் தடுத்திருக்கிறேன்.எனவே இவன் விஷயத்தில் எனது சிபாரிசை ஏற்றுக்கொள்"

அப்போது அவ்விரண்டின் சிபாரிசுகள் ஏற்றுக்கொள்ளப்படும்.(நூல்;அஹ்மத்)

ஆம் குர்ஆனோடு தொடர்புள்ள எல்லாவற்றையும் அல்லாஹ் சிறப்பாக்கிவைத்துவிடுகின்றான்.

குர்ஆன் இறங்கிய ரமலான் மற்ற மாதங்களை விடவும் சிறப்பையும்,

குர்ஆன் இறங்கிய ஓர் இரவு ஆயிரம் மாதங்களை விட சிறந்த லைலதுல் கத்ர் இரவாகவும்.

குர்ஆனை சுமந்து வந்த வானவர்கோன் ஜிப்ரயீல் (அலை)அவர்கள் மற்ற மலக்குமார்களை விடவும் சிறந்த மலக்கு ஆகிறார்.

குர்ஆனை பெற்றுக்கொண்ட நம் கண்மணி நாயகம் ﷺ அவர்கள் நபிமார்களில் சிறந்த நபியாகிறார்கள்.

குர்ஆன் இறங்கிய காலம் காலங்களில் சிறந்த காலமாகின்றது.

குர்ஆனை பெற்ற முதல் தலைமுறையினர் "ஸஹாபா"எனும் சிறப்பை பெறுகின்றனர்.

குர்ஆன் வழங்கப்பெற்ற இந்த உம்மத்,சமுதாயங்களில் சிறந்த சமுதாயமாகின்றது.

குர்ஆனை கற்போர்,கற்பிப்போர் என எவரெல்லாம் குர்ஆனோடு தொடர்பில் இருக்கின்றனரோ அனைவரும் சிறப்பை பெறுகின்றனர்.

திருமறை குர்ஆனின் மகத்துவத்தை விளங்க, இது இறைவனின் வார்த்தைகள்.இறைத்தன்மை என்பதே போதுமானதாகும்.

எதார்த்தத்தில் உலகில் சிறப்பு வாய்ந்தவைகளாக கருதப்படும் கஃபதுல்லாஹ்,நபிமார்கள்,மறுமையில் அல்லாஹ்வின் அர்ஷ்,குர்ஸீ,சுவனம்,லவ்ஹு எனும் ஏடு,கலம் எனும் எழுதுகோல்,அல்லாஹ்விற்கு நெருக்கமான மலக்குமார்கள்,இப்படி சிறப்புவாய்ந்தவைகள் அனைத்துமே அல்லாஹ்வின் படைப்பினங்களாகும்.

ஆனால் குர்ஆன் ஒரு படைப்போ,தனி ஒரு பொருளோ அல்ல.அது இறைவனின் தனித்துமான தன்மை,அது அவனோடு என்றுமே நிலைத்திருக்கும்.

இந்த உன்னதமான வேதத்தை தான் அல்லாஹ் தன் நேசத்திற்குறிய நபி முஹம்மதுﷺஅவர்களிடம் மாந்தர்களுக்கு நேர்வழி காட்டிட அருளாக வழங்கினான்.  

ரமலான் மாதத்தில் நபியும் குர்ஆனும்.

நபி(ஸல்) அவர்கள் மனிதர்களில் மிகப் பெரும் கொடையாளியாகத் திகழ்ந்தார்கள். (சாதாரண நாள்களை விட) ஜிப்ரீல்(அலை) அவர்கள் நபி(ஸல்) அவர்களை ரமழான் மாதத்தில் சந்திக்கும்போது நபி(ஸல்) மிக அதிகமாக வாரி வழங்கும் கொடையாளியாகத் திகழ்ந்தார்கள். ஜிப்ரீல்(அலை) அவர்கள் ரமழான் மாதத்தின் ஒவ்வொரு இரவிலும் நபி(ஸல்) அவர்களைச் சந்தித்து (அது வரை) அருளப்பட்டிருந்த) குர்ஆனை நினைவுபடுத்துவார்கள். இருவருமாகத் திருக்குர்ஆனை ஓதும் வழக்கமுடையவர்களாக இருந்தார்கள். தொடர்ந்து வீசும் காற்றை விட (வேகமாக) நபி(ஸல்) அவர்கள் நல்ல காரியங்களில் மிக அதிகமாக வாரி வழங்கும் கொடையாளியாகவே திகழ்ந்தார்கள்' என இப்னு அப்பாஸ்(ரலி) அறிவித்தார். (ஸஹீஹ் புகாரி 6)

மனைவியின் மடியில் குர்ஆன்.

எனக்கு மாதவிடாய் ஏற்பட்டிருக்கும்போது நபி(ஸல்) அவர்கள் என்னுடைய மடியில் சாய்ந்து கொண்டு குர்ஆனை ஓதும் வழக்கமுடையவர்களாக இருந்தார்கள்' என ஆயிஷா(ரலி) அறிவித்தார்.  (ஸஹீஹ் புகாரி 297)

எதிரிகளுக்கு கலக்கத்தை ஏற்படுத்தும் வேதம்.

ஆயிஷா(ரலி) அறிவித்தார்.                      என் தாய் தந்தையர் எனக்கு விபரம் தெரிந்தது முதல் இஸ்லாத்தைக் கடைபிடிப்பவர்களாகவே இருந்தனர். நபி(ஸல்) அவர்கள் காலையிலும் மாலையிலும் எங்களிடம் வராமல் இருந்ததில்லை. பின்னர் ஒரு பள்ளி கட்ட வேண்டும் என்று அபூ பக்ரு அவர்களுக்குத் தோன்றியபோது தம் வீட்டின் வெளிப்புறத்தில் பள்ளி ஒன்றைக் கட்டினார்கள். அதில் தொழுது கொண்டும் குர்ஆனை ஓதிக் கொண்டுமிருப்பார்கள். இணை வைப்பவர்களின் பெண்களும் குழந்தைகளும் அவரை வியப்புடன் பார்த்துக் கொண்டிருப்பார்கள். அபூ பக்ரு மிகுதியாக அழுபவராக இருந்தார். குர்ஆனை ஓதும்போது அவரால் தம் கண்களைக் கட்டுப் படுத்திக் கொள்ள இயலாது. இணை வைக்கும் குறைஷிப் பிரமுகர்களுக்கு இது கலக்கத்தை ஏற்படுத்துவதாக இருந்தது.            (ஸஹீஹ் புகாரி 476)

குர்ஆன் ஓதாதவனின் நிலை.

இறைத்தூதர்(ஸல்) அவர்கள் கூறினார்கள்: 

ஓர் அடியானது உடலைக் கப்ரில் அடக்கம் செய்துவிட்டு, அவனுடைய தோழர்கள் திரும்பும்போது அவர்களின் செருப்பின் ஓசையை மய்யித் செவியேற்கும். அதற்குள் இரண்டு வானவர்கள் அவனிடம் வந்து அவனை எழுப்பி உட்கார வைத்து முஹம்மத் எனும் இந்த மனிதரைப் - பற்றி நீ என்ன கருதிக் கொண்டிருந்தாய்?' எனக் கேட்பர். அதற்கவன் 'இவர் அல்லாஹ்வின் அடியாரும் அவனுடைய தூதருமாவார் என நான் சாட்சி கூறுகிறேன்' என்பான். பிறகு '(நீ கெட்டவனாக இருந்திருந்தால் நரகத்தில் உனக்கு கிடைக்கவிருந்த) தங்குமிடத்தைப் பார்! (நீ நல்லவனாக இருப்பதால்) அல்லாஹ் இதற்குப் பதிலாக உனக்குச் சொர்க்கத்தில் தங்குமிடத்தை ஏற்படுத்தியுள்ளான்' என்று அவனிடம் கூறப்பட்டதும் அவன் அவ்விரண்டையும் ஒரே நேரத்தில் காண்பான். நிராகரிப்பவனாகவோ நயவஞ்சகனாகவோ இருந்தால் கேள்வி கேட்கப்பட்டதும், 'எனக்குத் தெரியாது; மக்கள் சொல்வதையே நானும் சொல்லிக் கொண்டிருந்தேன்' என்பான். அப்போது அவனிடம் 'நீயாக எதையும் அறிந்ததுமில்லை; (குர்ஆனை) ஓதி (விளங்கி)யதுமிலலை என்று கூறப்படும். பிறகு இரும்பாலான சுத்தியால் அவனுடைய இரண்டு காதுகளுக்குமிடையே (பிடரியில்) ஓர் அடி கொடுக்கப்படும். அப்போது மனிதர்கள், ஜின்களைத் தவிர மற்ற அனைத்தும் செவியேற்குமளவுக்கு அவன் கத்துவான்.'  அனஸ்(ரலி) அறிவித்தார்.                   ஸஹீஹ் புகாரி (1338)

எச்சரிக்கை செய்யப்பட்ட கூட்டம்.

அபூ ஸயீத் அல்குத்ரீ(ரலி) அறிவித்தார். 

அலீ(ரலி) (யமனிலிருந்து) நபி(ஸல்) அவர்களிடம் சிறிய தங்கக் கட்டி ஒன்றை அனுப்பி வைத்தார்கள். அதை நபி(ஸல்) அவர்கள் அக்ரவு இப்னு ஹாபிஸ் அல்ஹன்ழலீ அல்முஜாஷியீ(ரலி), உயைனா இப்னு பத்ர் அல் ஃபஸாரீ(ரலி), பனூ நப்ஹான் குலத்தவரில் ஒருவரான ஸைத் அத் தாயீ(ரலி) மற்றும் பனூ கிலாப் குலத்தாரில் ஒருவரான அல்கமா இப்னு உலாஸா அல் ஆமிரி(ரலி) ஆகிய நால்வரிடையே பங்கிட்டுவிட்டார்கள். அதனால் குறைஷிகளும் அன்சாரிகளும கோபமடைந்து, 'நஜ்து வாசிகளின் தலைவர்களுக்குக் கொடுக்கிறார்; நம்மைவிட்டுவிடுகிறாரே' என்று கூறினார்கள். அதற்கு நபி(ஸல்) அவர்கள், 'இவர்கள் (இப்போது தான் இஸ்லாத்தை தழுவியிருப்பதால்) அவர்களின் உள்ளங்களை (முழுமையாக) இணக்கமாக்குவதற்காக (அவர்களுடன் நேசம் பாராட்டும் விதத்தில்) தான் கொடுத்தேன்' என்று கூறினார்கள். அப்போது கண்கள் பஞ்சடைந்த, கன்னங்கள் தடித்திருந்த, நெற்றியோரங்கள் உயர்ந்திருந்த, அடர்த்தியான தாடி கொண்ட, தலைமுடி மழிக்கப்பட்டிருந்த மனிதர் ஒருவர் முன் வந்து, 'முஹம்மதே! அல்லாஹ்வுக்கு அஞ்சுங்கள்' என்று கூறினார். உடனே நபி(ஸல்) அவர்கள் 'நானே (அல்லாஹ்விற்கு) மாறு செய்தால் வேறெவர்தான் அவனுக்குக் கீழ்ப்படிவார்? பூமியில் வசிப்பவர்களின் விஷயத்தில் அல்லாஹ் என் மீது நம்பிக்கை வைத்திருக்க, நீங்கள் என் மீது நம்பிக்கை வைக்க மாட்டீர்களா?' என்று கேட்டார்கள். அப்போது வேறொருமனிதர் இப்படி (குறை சொன்னவரைக் கொல்வதற்கு அனுமதி கேட்டார். அனுமதி கேட்ட அவர் காலித் இப்னு வலீத்(ரலி) தாம் என்று நினைக்கிறேன் அவரை நபி(ஸல்) அவர்கள் (இதைச் சொன்னவரைக் கொல்ல வேண்டாமென்று) தடுத்துவிட்டார்கள். (குறை சொன்ன) அந்த ஆள் திரும்பிச் சென்றபோது நபி(ஸல்) அவர்கள், 'இந்த மனிதரின் பரம்பரையிலிருந்து .. அல்லது இவரின் பின்னே - ஒரு சமுதாயத்தினர் தோன்றுவர். அவர்கள் எத்தகையவர்களாயிருப்பார்கள் என்றால், அவர்கள் குர்ஆனை ஓதுவார்கள். ஆனால், அது அவர்களின் தொண்டைக் குழிகளை தாண்டிச் செல்லாது. அவர்கள் வேட்டையாடப்பட்ட பிராணியின் உடலிலிருந்து (அதன் மீது எய்தப்பட்ட) அம்பு வெளியேறி விடுவதைப் போல் மார்க்கத்திலிருந்து வெளியேறிவிடுவார்கள்; இஸ்லாமியர்களைக் கொல்வார்கள்; சிலைவணக்கம் புரிபவர்களைவிட்டுவிடுவார்கள். நான் அவர்க(ள் வாழும் நாட்க)ளை அடைந்தால் 'ஆத்' கூட்டத்தார் அழிக்கப்பட்டதைப் போன்று அவர்களை நான் நிச்சயம் அழித்து விடுவேன்' என்று கூறினார்கள். (ஸஹீஹ் புகாரி (3344)

குர்ஆனால் சிறியவர்களுக்கு கிடைத்த அந்தஸ்து.

 அம்ர் இப்னு சலிமா(ரலி) அறிவித்தார். 

நாங்கள் மக்கள் கடந்து செல்லும் பாதையிலிருந்த ஒரு நீர் நிலையின் அருகே இருந்தோம். வாகனத்தில் பயணிப்பவர்கள் எங்களைக் கடந்து சென்று கொண்டிருந்தார்கள். நாங்கள் அவர்களிடம், 'மக்களுக்கென்ன? மக்களுக்கென்ன? இந்த மனிதருக்கு (முஹம்மதுக்கு) என்ன?' என்று கேட்டுக் கொண்டிருந்தோம். அதற்கு அவர்கள், 'அந்த மனிதர் தன்னை அல்லாஹ் (இறைத்தூதராக) அனுப்பியிருப்பதாக... அல்லது அல்லாஹ் அவரை இன்ன (குர்ஆன்) போதனைகளைக் கொடுத்து அனுப்பியிருப்பதாகக்... கூறுகிறார்' என்று (குர்ஆனின் சில வசனங்களை ஓதிக்காட்டி) கூறுவார்கள். உடனே நான் அந்த (இறை) வாக்கை மனப்பகுதி செய்து கொள்வேன். அது என் நெஞ்சில் பதிக்கப்பட்டது போன்று ஆகிவிட்டது. அரபுகள், தாங்கள் இஸ்லாத்தை ஏற்றுக் கொள்ள மக்கா வெற்றியை (தக்க தருணமாகக் கருதி) எதிர்பார்த்திருந்தார்கள். எனவே, அவர்கள், 'அவரை அவரின் குலத்தா(ரான குறைஷிய)ருடன்விட்டு விடுங்கள். ஏனெனில், அவர்களை அவர் வென்றுவிட்டால் அவர் உண்மையான இறைத்தூதர் தாம் (என்று நிரூபணமாகிவிடும்)' என்று கூறினார்கள். மக்கா வெற்றியாளர்கள் சம்பவம் நிகழ்ந்தவுடன் ஒவ்வொரு குலத்தாரும் விரைந்து வந்து இஸ்லாத்தை ஏற்றனர். என் தந்தை என் குலத்தாருடன் விரைந்து இஸ்லாத்தை ஏற்றார். நபி(ஸல்) அவர்களிடமிருந்து என் தந்தை திரும்பி வந்தபோது, 'அல்லாஹ்வீன் மீதாணையாக! நான் உண்மையிலேயே நபி(ஸல்) அவர்களிடமிருந்து உங்களிடம் வந்துள்ளேன். நபி(ஸல்) அவர்கள், 'இன்ன தொழுகையை இன்ன வேளையில் தொழுங்கள். இன்ன வேளையில் இப்படித் தொழுங்கள். தொழுகை (வேளை) வந்துவிட்டால் உங்களில் குர்ஆனை அதிகம் அறிந்து வைத்துள்ளவர் உங்களுக்குத் தலைமை தாங்கித் தொழுகை நடத்தட்டும்' என்று கூறினார்கள்' எனக் கூறினார்கள். எனவே, மக்கள் (குர்ஆனை அதிகம் அறிந்தவர் யார் எனத்) துருவிப் பார்த்தபோது நான் பயணிகளிடம் கேட்டு அறிந்துகொண்ட காரணத்தால் என்னை விட அதிகமாகக் குர்ஆனை அறிந்தவர்கள் எவரும், (எங்களிடையே) இருக்கவில்லை. எனவே, (தொழுகை நடத்துவதற்காக) என்னை அவர்கள் முன்னால் நிறுத்தினார்கள். நான் அப்போது ஆறு அல்லது ஏழு வயதுடைய (சிறு)வனாக இருந்தேன். நான் ஒரு சால்வையைப் போர்த்தியிருந்தேன். நான் சஜ்தா செய்யும்போது அது என் முதுகை (விட்டு நழுவிப் பின் புறத்தைக்) காட்டிவந்தது. எனவே, அந்தப் பகுதிப் பெண்மணியொருவர், 'உங்கள் ஓதுவாரின் பின்புறத்தை எங்களிடமிருந்து மறைக்க மாட்டீர்களா?' என்று கேட்டார். எனவே, அவர்கள் (துணியொன்றை) வாங்கி வந்து எனக்குச் சட்டையொன்றை வெட்டித் தந்தார்கள். நான் அந்தச் சட்டையின் காரணத்தால் அடைந்த மகிழ்ச்சியைப் போன்று வேறெதனாலும் மகிழ்ச்சியடைந்ததில்லை.                (ஸஹீஹ் புகாரி (4302)

நாயகத்தின் கண்ணீர்

அப்துல்லாஹ் இப்னு மஸ்வூத்(ரலி) அறிவித்தார். 

(ஒருமுறை) நபி(ஸல்) அவர்கள் என்னிடம், 'எனக்கு (குர்ஆனை) ஓதிக்காட்டுங்கள்' என்று கூறினார்கள். நான், 'தங்கள் மீதே குர்ஆன் அருளப்பட்டுக் கொண்டிருக்க, தங்களுக்கே நான் ஓதிக்காட்டுவதா?' என்று கேட்டேன். அதற்கு அவர்கள், 'ஏனெனில், நான் பிறரிடமிருந்து அதைக் கேட்க விரும்புகிறேன்' என்று கூறினார்கள். எனவே, நான் அவர்களுக்கு 'அந்நிஸா' அத்தியாயத்தை ஓதிக்காட்டினேன். 'ஒவ்வொரு சமுதாயத்திலிருந்தும் (அவர்களின் நபியாகிய) சாட்சியை நாம் (மறுமையில்) கொண்டுவரும் போதும், (நபியே!) உங்களை இவர்களுக்கெதிரான சாட்சியாகக் கொண்டுவரும் போதும் (இவர்களின் நிலை) எப்படியிருக்கும்?' எனும் (திருக்குர்ஆன் 04:41 வது) வசனத்தை நான் அடைந்தபோது நபி(ஸல்) அவர்கள், 'நிறுத்துங்கள்' என்று கூறினார்கள். எனவே, நான் அவர்களுக்கு 'அந்நிஸா' அத்தியாயத்தை ஓதிக்காட்டினேன். 'ஒவ்வொரு சமுதாயத்திலிருந்தும் (அவர்களின் நபியாகிய) சாட்சியை நாம் (மறுமையில்) கொண்டுவரும் போதும், (நபியே!) உங்களை இவர்களுக்கெதிரான சாட்சியாகக் கொண்டுவரும் போதும் (இவர்களின் நிலை) எப்படியிருக்கும்?' எனும் (திருக்குர்ஆன் 04:41 வது) வசனத்தை நான் அடைந்போது நபி(ஸல்) அவர்கள், 'நிறுத்துங்கள்' என்று கூறினார்கள். அப்போது அவர்களின் கண்கள் இரண்டும் கண்ணீரைச் சொரிந்து கொண்டிருந்தன.           (ஸஹீஹ் புகாரி (4582)

திலாவத்تلاوت & கிராஅத் قرأت

கிராஅத்,திலாவத் இரண்டிற்கும் உள்ள வித்தியாசம்.

கிராஅத் قرأت என்றால் 

”جمع الحروف“ یا ”ضم الکلمات بعضھا الی بعض“

எழுத்துக்களின் தொகுப்பு,அல்லது வாக்கியங்கள் சிலதை சிலவற்றோடு சேர்ப்பதாகும்.கருத்தை சிந்திப்பதோ அல்லது அதன் படி அமல் செய்வதோ நோக்கமாக இருக்காது.

திலாவத் تلاوت என்றால் கருத்தை சிந்திப்பதும்,அதன் படி அமல் செய்வதும், நோக்கமாக இருக்கும்.

இமாம் ராகிப் (ரஹ்)அவர்கள் திலாவத்திற்கு கூறும் விளக்கம்:

والتلاوة تختصُّ باِتِّبَاعِ کُتُبِ اللہِ المنزلةِ تارةً بالقرأةِ وتارةً بالارتسام

திலாவத் என்கிற பதம் குர்ஆன் ஓதுதலுக்கு மாத்திரம் பயன்ப்படுத்தப்படும்,

திலாவத் என்றால் اتباعபின்பற்றுதல் என்று பொருளாகும்,சில சமயம் கிராஅத்தையும்,சில சமயம் அதன் படி அமல் செய்வதையும் பின்பற்றுவதை நோக்கமாகக் கொள்ளப்படும். 

இறைவேதமான குர்ஆனை    ஒதியதன் படி அமல் செய்வது வாஜிப் என்பதால் திலாவத் என்கிற பதத்தை குர்ஆனுக்கு மட்டும் பயன் படுத்தப்படும். 

கிராஅத் அப்படியல்ல அதை எல்லாவற்றிற்கும் சொல்லலாம்.

திலாவதே குர்ஆனின் முக்கியத்துவம்.

1)அல்லாஹுதஆலா இறுதி தூதர் நம் கண்மணி நாயகம்ﷺஅவர்களை அனுப்பியதன் நோக்கத்தை திருமறையில் குறிப்பிடுகையில்,முதல் முக்கிய கடமையாக تلاوتِ قرآن குர்ஆன் திலாவதை கூறுகிறான்.

2)செய்யதுனா இப்ராஹீம் (அலை)அவர்கள் இந்த இஸ்லாமிய சமூகத்திற்கும்,அந்த சமூகத்திற்கு சிறந்த நபிக்காக துஆ செய்யும் போதும்,நபியின் முதல் முக்கிய கடமையாக திலாவதை கேட்கிறார்கள்.

3)திலாவதே குர்ஆன் அல்லாஹுதஆலாவிற்கு விருப்பமான அமலாகும்.

4)கண்மணி நாயகம்ﷺஅவர்களின் விருப்பமான அமலாகவும்,அனைத்து ஸஹாபாப்பெருமக்களும் விரும்பி ஈடுப்படக்கூடிய அமலாகவும் திலாவதே குர்ஆன் உள்ளது.

5)அல்லாஹ் அடியார்களை குர்ஆன் ஓத பணிக்கின்றான்.குர்ஆனை ஓதுபவருக்கு சிறப்பைபையும்,அபரிமிதமான நன்மைகளையும் வழங்கிவிடுகின்றான்.

துஆ,திக்ரை விடவும் சிறந்த அமல்.

அமல்கள் அனைத்தையும் விட சிறந்த அமல் குர்ஆன் ஓதுவதே என பல் வேறு ஹதீஸ்களில் வந்துள்ளது.

سُئل صلى الله عليه وسلَّم عن أفضل عبادة يتقرب بها المؤمن إلى الله؟ فقال صلى الله عليه وسلَّم:

"أَفْضَلُ عُبَادَةِ أُمَّتِي قِرَاءَةُ الْقُرْآنِ" (البيهقي عن النعمان بن           البشير)

ஒரு முஃமினை அல்லாஹ்வின் பால் நெருக்கமாக்கிவைக்கும் வணக்கங்களில் ஆக சிறந்தது எது? என நாயகம்ﷺஅவர்களிடம்  வினவப்பட்டது.

அதற்கு கண்மணி நாயகம்ﷺஅவர்கள் சொன்னார்கள்;எனது உம்மத்தில் வணக்கங்களில் ஆகச் சிறந்தது,குர்ஆன் ஓதுவதாகும்.            . அறிவிப்பவர்:நுஃமான் இப்னு பஷீர் (ரலி)அவர்கள் (நூல்:பைஹகீ)

திக்ரின் சிறப்புகளை கூறும் ஹதீஸ்களில் திக்ரு எல்லா அமல்களை விட சிறந்தது எனவும்,ஸலவாத்தின் சிறப்புகளை கூறும் போது ஸலவாத்து சிறந்தது எனவும்,துஆவை கூறும் போது துஆ சிறந்தது எனவும் ஹதிஸ்களில் வருகின்றன.      

اَلدُّعَاءُ هُوَ الْعِبَادَةُ,

துஆ அதுவே வணக்கமாகும்.

قَالَ رَسُوْلُ اللهِ ﷺ : لَيْسَ شَيئٌ أَکْرَمَ عَلَی اللهِ تَعَالَی مِنَ الدُّعَاءِ۔ (رَوَاهُ التِّرْمِذِيُّ

நபிﷺஅவர்கள் கூறினார்கள்;அல்லாஹுதஆலாவிடம் துஆவை விட மிகச் சங்கையான விஷயம் வேறெதுவுமில்லை.

ஆக குர்ஆன் ஓதுதல்,திக்ரு,ஸலவாத்து,துஆ இந்நான்கில் முன்னுரிமை எதற்கு தரவேண்டும் என்பதில் உலமாக்களின் தேர்வு குர்ஆன் ஓதுவதற்கே ஆகும்.

இதற்கு ஆதாரமாக இமாம் நவவீ (ரஹ்)அவர்கள் ஒரு ஹதிஸே குதுஸியைக் கூறுகிறார்கள்:

 وعن ابي سعيد قال : قال رسول اللہ صلی اللہ علیہ وسلم: یقول الرب تبارک وتعالیٰ:مَنْ شَغَلَهُ الْقُرْآنُ عَنْ ذِكْرِي وَمَسْأَلَتِي أَعْطَيْتُهُ أَفْضَلَ مَا أُعْطِي السَّائِلِينَ  وفضل کلام اللہ علی سائر الکلام کفضل اللہ علی خلقہ ): رواه الترمذي (2926) ، والدارمي (3356)

நபிﷺஅவர்கள் கூறினார்கள்;அல்லாஹுதஆலா கூறுகின்றான் "எவர் என்னை திக்ரு செய்வது இன்னும் துஆ செய்வதை விட்டும் குர்ஆன் ஓதுதலில் ஈடுப்படுகின்றாரோ அவருக்கு கேட்போருக்கு வழங்குவதைக் காட்டிலும் மிகச் சிறப்பானதை நான் வழங்கிடுவேன்".

படைப்பினங்களை விட அல்லாஹ் சிறந்தவனாக இருப்பதை போல எல்லா வார்த்தைகளை விட அல்லாஹ்வின் வார்த்தைகள் சிறப்பானதாகும்.

(அறிவிப்பவர்:அபு ஸஈது அல் குத்ரீ (ரலி)அவர்கள் நூல்:திர்மிதீ)

இந்த ஹதீஸில் திக்ரு,ஸலவாத்து,துஆ இவற்றை விட குர்ஆன் ஓதுவதே சிறப்பானது என்பது தெளிவாகின்றது.

“ قال صاحب ”فتح العلام“: الاشتغالُ بھا افضلُ من الاشتغالِ بذکرِ لم یَخُصَّ بمحلٍ أو وقتٍ معینٍ فانْ خُصَّ بِہ بأن وَرَدَ الشرع بہ فیہ فالاشتغالُ بہ افضلُ، مثلاً الصلاة علی النبی صلی اللہ علیہ وسلم طَلَبَتْ لیلةَ الجمعة فالاشتغال بھا افضلُ من الاشتغال بقرأة لم تطلب لیلة الجمعة․․ ولو تعارضا خاصًّا ․․․ روعی الأقلُّ وقوعاً(۱۰) 

ஆனால் அந்தந்த அமல்களுளுக்கான பிரத்யேகமான வேளைகளில் அந்தந்த அமல்களில் ஈடுப்படுவதே சிறப்பானதாகும்.

குர்ஆனை பார்த்து ஓதுவதின் சிறப்பு.

குர்ஆனை மனனமாக (பார்க்காமல்)ஓதுவதை விட பார்த்து ஓதுவது சிறப்பனது.காரணம் குர்ஆனை பார்ப்பதே இபாதத் ஆகும்.

பார்த்து ஒதும் போது பார்ப்பது,ஓதுவது இந்த இரண்டு நன்மைகளும் கிடைக்கின்றன.

 النَّظْرَ فی المصحفِ عبادةٌ مطلوبةٌ فتجتمعُ القرأةُ والنظرُ

மேலும் குர்ஆன் பிரதியை கரங்களில் எடுப்பது,அதனை சுமப்பதன் நன்மைகளும் கிடைக்கின்றன.

இமாமுனா கஸ்ஸாலி (ரஹ்)அவர்கள் எழுதுகிறார்கள்

قرأةُ القرآن مِنَ المصاحِفِ افضلُ اِذْ یَزِیْدُ فی العملِ النظرُ وتأملُ المصحف وحَمْلُہ فیزیدُ الأجرُ

 குர்ஆனை  பிரதியில் (பார்த்து) ஓதுவது மிகச்சிறந்தது காரணம் பார்ப்பது,குர்ஆனை சிந்திப்பது,அதனை சுமப்பது என அமல்களில் அதிகம் இருக்கின்றது.எனவே கூலி அதிகம் கிடைக்கும்.

ஒரு அறிவிப்பில்:குர்ஆனை ப்பார்த்து ஓதுவதன் சிறப்பு வெறுமனே நாவால் ஓதுவதை காட்டிலும் சிறப்பானதாகும், அது நஃபிலை விட ஃபர்ளின் சிறப்பை போன்றதாகும் என வந்துள்ளது.

இமாமுனா கஸ்ஸாலி (ரஹ்)அவர்கள் சொல்கிறார்கள்:ஸஹாபாக்கள் எந்த ஒரு நாளும் குர்ஆன் பிரதியை பார்க்காமல் கழிவதை வெறுக்கக்கூடியவார்களாக இருந்தார்கள்.

 ویکرہونَ اَنْ یخرج یومٌ ولم ینظروا فی المصحف

அதிகமாக குர்ஆன் ஓதவதின் சிறப்பு.

குர்ஆனுக்கு செலுத்தக்கூடிய கடமைகளில் மிக முக்கியமானது ஓதுவதாகும்.

குர்ஆன் ஓதுவது திக்ருகளில் சிறப்பானது.

فقال صلى الله عليه وسلَّم:

"أَفْضَلُ عُبَادَةِ أُمَّتِي قِرَاءَةُ الْقُرْآنِ"

(البيهقي عن النعمان بن البشير)

அதற்கு கண்மணி நாயகம்ﷺஅவர்கள் சொன்னிர்கள்;எனது உம்மத்தில் வணக்கங்களில் ஆகச் சிறந்தது,குர்ஆன் ஓதுவதாகும்.

(அறிவிப்பவர்:நுஃமான் இப்னு பஷீர் (ரலி)அவர்கள் )

அல்லாஹ்தஆலா இரவு,பகல் பாராமல் குர்ஆன் ஓதுபவர்களை புகழ்ந்துக்கூறுகின்றான்.நாயகம் (ஸல்)அவர்கள் அத்தகையோருக்கு துஆ செய்கிறார்கள்.

وارزقنی تلاوتَہ اناءَ اللیلِ واناءَ النھار

அறிஞப் பெருமக்களின் கூற்று:

یُستحبُّ الاکثارُ مِنْ قرأةِ القرآنِ وتلاوتِہ

குர்ஆன் ஒதுவதை அதிகரிப்பது விரும்பதக்கதாகும். 

குர்ஆனை அதிகப்படியாக ஓதுவதுடனே தஜ்வீதோடும்,தர்த்திலோடும் ஓதுவதற்கு முயற்சிக்க வேண்டும்.குர்ஆன் எப்படி இறக்கியருளப்பெற்றதோ அதே அமைப்பில் ஓதுவதே சிறந்ததாகும்.

لَاَن أقرأ البقرةَ وآل عمران أرتِّلُھما وأتدبَّرُھما أحبُّ اِلیَّ مِن اَن اقرأ القرآنَ کلَّہ ھذرمة

இப்னு அப்பாஸ் (ரலி)அவர்கள் கூறுகிறார்கள்:பகரா,ஆலஇம்ரான் இவ்விரண்டு சூராக்களை தர்த்தீலாகவும்,சிந்தித்தும் நான் ஓதுவது,குர்ஆன் முழுவதையும் வேகவேகமாக ஓதிமுடிப்பதை காட்டிலும் எனக்கு விருப்பமானதாகும்.

وعن عبيدة المليكي وكانت له صحبة قال : قال رسول الله - صلى الله عليه وسلم - ( يا أهل القرآن لا تتوسدوا القرآن واتلوه حق تلاوته من آناء الليل والنهار ، وأفشوه وتغنوه وتدبروا ما فيه لعلكم تفلحون ، ولا تعجلوا ثوابه فإن له ثوابا ) رواه البيهقي في شعب الإيمان .

கண்மணி நாயகம்ﷺஅவர்கள் கூறினார்கள்: "குர்ஆன் உடையவர்களே!, நீங்கள் (குர்ஆனை) தலையணையாக ஆக்கிக்கொள்ள வேண்டாம்.  இரவு இன்னும் பகலின் இரு ஓரங்களில் அதனை ஓத வேண்டிய முறைப்படி ஓதவும், அதை (மக்களிடம்)பரப்பவும், ராகமாக ஓதவும், அதில் உள்ள வற்றை(கருத்தை) சிந்திக்கவும், நீங்கள் வெற்றி பெறுவீர்கள், அதற்கு வெகுமதி அளிக்க அவசரப்பட வேண்டாம், ஏனென்றால் அதற்கு நிச்சயம் ஒரு வெகுமதி உண்டு ."(நூல்:பைஹகீ)

கருத்தை விளங்காமல்  குர்ஆன் ஓதுவதும் நன்மையானதே...

குர்ஆனுக்குறிய தனிச்சிறப்பு,அதனை விளங்காமல் ஓதினாலும் நன்மையாகும்,இச்சிறப்பு உலகில் வேறெந்த வேதத்திற்கோ,நூலுக்கோ கிடையாது.

இப்னு உமர் (ரலி)அவர்கள் கூறுகிறார்கள்:குர்ஆனை விளங்கி ஓதுபவருக்கு,இருபது நன்மைகள் கிடைக்கும்.

குர்ஆனை விளங்காமல் ஓதுபருக்கு பத்து நன்மைகள் கிடைக்கும்.

فعن عَبْدِ اللهِ بْنِ مَسْعُودٍ رضي الله عنه قال: قَالَ رَسُولُ اللهِ صَلَّى اللهُ عَلَيْهِ وَآلِهِ وَسَلَّمَ: «مَنْ قَرَأَ حَرْفًا مِنْ كِتَابِ اللهِ فَلَهُ بِهِ حَسَنَةٌ، وَالحَسَنَةُ بِعَشْرِ أَمْثَالِهَا، لَا أَقُولُ ﴿الم﴾ حَرْفٌ، وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ» أخرجه الترمذي

 கண்மணி நாயகம்ﷺஅவர்கள் சொன்னிர்கள்; எவர் அல்லாஹ்வின் வேதத்திலிருந்து ஒரு எழுத்தை ஓதுவாரோ,அதனால்  அவருக்கு ஒரு நன்மை உண்டு.ஒரு நன்மை என்றால் அது போன்று பத்து மடங்காகும்.

அலிஃப்,லாம்,மீம் الم இதனை நான் ஒரு எழுத்து என்று சொல்மாட்டேன்.அலிஃப்أَلِفٌ  ஒரு எழுத்தாகும்,லாம் لَامٌ ஒரு எழுத்தாகும்,மீம் مِيمٌ ஒரு எழுத்தாகும்.

(அறிவிப்பவர்:அப்துல்லாஹ் இப்னு மஸ்வூத் (ரலி)அவர்கள் நூல்:திர்மிதீ)

திருமறை குர்ஆனில் சில சூராக்கள் الم இது போன்ற எழுத்துக்களில் துவங்கும்,அதற்கு (”حروف مقطعات“)"ஹுரூஃபே முகத்தஆத்" எனறு சொல்லப்படும்,அதன் விளக்கம் அல்லாஹ்வை தவிர வேறுயாருக்கும் தெரியாது.

அந்த எழுத்துக்களுக்கும் நன்மை கிடைக்கும் என நபி (ஸல்)அவர்கள் கூறியிப்பது,அர்த்தம் விளங்காமல் குர்ஆன் ஓதினால் நன்மை கிடைக்கும் என்பதனை  உறுதிசெய்கின்றது.

ஆக குர்ஆனை எப்படி ஓதினாலும் நன்மை கிடைக்கும்,ஒளு இல்லாமல் ஓதலாம்,பார்க்காமல் ஓதலாம், எல்லாவற்றிற்கும் தனித்தனி நன்மை உண்டு.

இமாமுனா கஸ்ஸாலி (ரஹ்)அவர்கள் சொல்கிறார்கள்:தொழுகையில் குர்ஆனை நின்றநிலையில்  ஓதினால் நூறு நன்மைகள் கிடைக்கும்,அமர்ந்து தொழுபர் ஓதினால் ஐம்பது நன்மைகள் கிடைக்கும்.தொழுகையில் இல்லாமல் உளுவுடன் ஓதினால் இருபத்தைந்து நன்மைகள் கிடைக்கும்.ஒளு இல்லாமல் ஓதுபவருக்கு பத்து நன்மைகள் கிடைக்கும்.

அல்லாமா இப்னு ஜவ்ஸீ (ரஹ்)அவர்கள் தனது ”مناقب احمد بن حنبل“என்ற இமாம் அஹ்மத் இப்னு ஹம்பல் (ரஹ்)அவர்களின் சிறப்புக்களை கூறும் கிதாபில், இமாம் அவர்களின் ஒரு கனவை கூறுகிறார்கள்;இமாம் அஹ்மத் இப்னு ஹம்பல் (ரஹ்)அவர்கள் கனவில் இறைவனை காணுகிறார்கள்,இமாம் அவர்கள் இறைவனிடம் கேட்கிறார்கள் "ரப்பே!உன் நெருக்கத்தை விரும்புபவர்களுக்கு உன் நெருக்கத்தை பெற்றுத்தரும் அமல்களில் உனக்கு உவப்பான அமல் எது?

அல்லாஹுதஆலா பதில் கூறினான். "அஹ்மதே! எனது கலாம்(குர்ஆனின் வார்த்தைகளை ஓதுவதே என் நெருக்கத்தை பெற எனக்கு விருப்பமான அமல்)

மீண்டும் இமாம் அவர்கள் கேட்டடார்கள்:( இச்சிறப்பு யாருக்கு கிடைக்கும்?)குர்ஆனை விளங்கி ஓதுபவருக்கா?அல்லது விளங்காமல் ஓதுபவருக்கா?

அதற்கு அல்லாஹ் "விளங்கி ஓதினாலும் அல்லது விளங்காமல் ஓதினாலும் சரியே! "என்று கூறினான்.(இஹ்யா உலூமுத்தீன்)

கல்வி ஞானம் அதிகரிக்க...

عن عبدالله بن مسعود رضي الله عنه أنه قال:

"من أراد العلم فعليه بالقرآن فإن فيه خبر الأولين والآخرين"

இப்னு மஸ்வூத் (ரலி)அவர்கள் சொன்னார்கள்;எவர் கல்வி ஞானத்தை நாடுகிறாரோ,அவர் குர்ஆனை பற்றிப்பிடிக்கட்டும்.அதிலே முன்னோர்,பின்னோரின் செய்தி இருகின்றது.

வீட்டில் நூரானிய்யத் மற்றும் (பரகத்)அபிவிருத்தி  ஏற்பட...

  عنأَنَسٍ ، قَالَ: قَالَ رَسُولُ اللهِ (صَلَّى اللهُ عَلَيْهِ وَسَلَّمَ):(نَوِّرُوا مَنَازِلَكُمْ بِالصَّلَاةِ وَقِرَاءَةِ الْقُرْآنِ

علم اور

கண்மணி நாயகம்ﷺஅவர்கள் சொன்னிர்கள்;தொழுகை மற்றும் குர்ஆன் ஓதுவதைக் கொண்டு உங்கள் இல்லங்களை ஒளிப்பொருந்தியதாக ஆக்குங்கள்.                (அறிவிப்பவர்:ஹழ்ரத் அனஸ் (ரலி)அவர்கள் )

மரண வேதனை இலகுவாக...

قَالَ رَسُولُ اللهِ (صَلَّى اللهُ عَلَيْهِ وَسَلَّمَ):

ما منْ ميتٍ يموتُ، فيُقرأُ عندهُ سورةُ ( يس )، إلا هوَّنَ اللهُ عز وجل عليهِ .

الراوي : أبو ذر الغفاري | المحدث : الألباني 

ஷைதானின் தீங்கை விட்டும் பாதுகாப்புப் பெற...

قَالَ رَسُولُ اللهِ (صَلَّى اللهُ عَلَيْهِ وَسَلَّمَ):مَن یقرأ القرآنَ لا یزالُ فی حِرَزٍ وحِصْن(۴۰)۔   الراوي :حضرت علی مرتضیٰ

அனைத்து நோய்களுக்கும் மருந்து.

وَنُنَزِّلُ مِنَ الْـقُرْاٰنِ مَا هُوَ شِفَآءٌ وَّرَحْمَةٌ لِّـلْمُؤْمِنِيْنَ‌ۙ وَلَا يَزِيْدُ الظّٰلِمِيْنَ اِلَّا خَسَارًا‏

இன்னும், நாம் முஃமின்களுக்கு ரஹ்மத்தாகவும், அருமருந்தாகவும் உள்ளவற்றையே குர்ஆனில் 

(படிப்படியாக) இறக்கிவைத்தோம்; ஆனால் அக்கிரமக்காரர்களுக்கோ இழப்பைத் தவிர வேறெதையும் (இது) அதிகமாக்குவதில்லை.             (அல்குர்ஆன் : 17:82)

குர்ஆன் ஓதுவதினால் கிடைக்கும் பலாபலன்களில் சில...

1)நன்மை,நற்கூலி

2)பாவமீட்சி

3)இறையருள்,ஸகீனா எனும் அமைதி

4)மறுமையில் நபிமார்கள்,சித்தீகீன்களோடு எழுப்பப்படுதல்

5)நரகம் செல்ல தகுதியானவருக்கு சிபாரிசு

6)சுவனத்தில் சேர்க்கும்

7)நரகை விட்டும் காக்கும்

8)உள்ளத்தை உயிர்ப்பிக்கும்

9)உள்ளத்தை ஒளிப்பொருந்தியதாக்கும்

10)கல்வி ஞானம்

11)நினைவாற்றல்

12)போதுமென்ற மனம்

13)ஷைதானை விட்டும் பாதுகாப்பு

14)வீட்டில் கைரு,பரகத் ஏற்படும்

15)சோர்வு நீங்கி,உற்சாகம் பிறக்கும்

16)உள்ளத்தில் நிம்மதி உண்டாகும்

17)ஈமானில் உத்வேகம்

18)மரணவேளையில் இறையுதவி

19)உடல் சார்ந்த நோய்களை விட்டும் நிவாரணம்

20)ஆத்மார்த்தமான நோய்களுக்கான மருந்து

21)சிபாரிசுشفاعت செய்வதன் உரிமை

22)நல்வாழ்வு

23)கலிமாவோடு மரணம்

24)வேதனையை விட்டும் பாதுகாப்பு

25)நன்மையின் எட்டை (அஃமால் நாமாவை)கணக்கச் செய்யும்

26)அச்சநாளில் நிம்மதி

27)கண்களின் குளிர்ச்சி

28)அச்சம்,கவலையை நீக்கும்

29)மஹ்ஷர் வெளியில் நிழல்

30)இம்மை,மறுமையின் தேவைகளை நிவர்த்திச்செய்யும்

31)வேதனையை இலகுவாக்கும்

32)அல்லாஹ்வின் பிரத்யேக உதவியை பெற்றுத்தரும்

33)தடுமாறும் நாளில் நேர்வழிக்காட்டும்

34)பயணத்தில் இறையுதவியை பெற்றுத்தரும்

35)ஜின்னின் தீங்கு மற்றும் கண்ணேறை விட்டும் பாதுகாக்கும்

36)வீட்டில் அபிவிருத்தி கிடைக்கும்

37)இறை சிந்தனையை உண்டாக்கும்

38)இறைவனின் திருப்பொருத்தை பெற்றுத்தரும்.

அல்லாஹுதஆலா அருள்மறையாம் திருமறை குர்ஆனை அனுதினமும் ஓதும் பாக்கியத்தை தந்தருள் புரிவானாக!

எதிர்வரும் ரமலானில் அதிகமாக குர்ஆன் ஓதும் வாய்ப்பை நல்கிடுவானாக!ஆமீன்..

வெளியீடு :

செங்கல்பட்டு & காஞ்சிபுரம் மாவட்ட ஜமாஅத்துல் உலமா சபை.